Mpharihele Phaama Mapakeliwo a Liivuru Piipiliya Onahusiha

Vaavaa muhuserya a Piipiliya onahusereiye yeeyo Piipiliya onahusiheiye ni opharihela mu okumi awe, owo onahaala wunnuwa ni okhalano sawiima soomunepani. (Sal. 1:1-3) Nnahaala owerya waakhaviherya oohuserya a Piipiliya wunnuwa moorweela wa opharihela phaama mikhalelo sa liivuru Piipiliya Onahusiha.

Makoho Oopacerya: Miyaha soothene inapacerya ni makoho yaawo anaakhuliwa mpuwa wa mwaha. Munaphwanela opaka makoho yaala wi mutannye nchuno na namahuserya. Naari mumveke wi aloce moonelo awe vooloca sa makoho oothene. Wakhala wi ohaakhula mmukhalelo wooheseya, hori woochuneya omvaanya mweelukuluku yeeyo. Waakhula wawe onahaala wookhaviheryaani osuwela miyaha munaphwanelaanyu ocicimiherya.​—Masi. 16:23; 18:13.

Masu Awaaceererya: Wakhala wi muhuserya onniiwexexa nave onneemererya nihusiheryo mmwaha, pahiru mmuleele wi aalakhanye mukhateiye masu awaaceererya. Mu yoohuserya enacharela mpharihele elukuluku vakhaani wi musuwele waakhanle wi ohiiwexexa. Nyenya, wakhala wi ti wa mphurelo, munaphwanela opharihela elukuluku ya ohuserya wi muthokororye masu awaaceererya moorweela wa waalakhanya iparakrafo ni opaka makoho mureherenryaanyu.

Ekaaxa ya Wuuluulela: Ekaaxa ya wuuluulela omakuchuwelo wa mwaha yookhalano maakhulo a makoho oopacerya. Mpharihele ekaaxa yeela wi musuwele waakhanle wi muhuserya ohiiwexexa naari wi onnawerya othariha mahusiheryo oochuneya. Mwaalakhanye vamoha masu oothene moovuwa ophitaanyerya yoorepa aya. Mwamala, mumveke muhuserya wi atharihe apharihelaka yoorepa yeeyo.​—Saw. 17:2, 3.