OKUMI WEEKIRISTU

Wunnuwiha Mavyakelo Ahu Mmuteko wa Olaleerya​—Mwaakhaviherye Oohuserya a Piipiliya Oya Vahoolo wi Yiiveleele ni Opatisiwa

NTAKHARA HEENI TI YOOCHUNEYA: Wi etitelele weemereryiwa ni Yehova, oohuserya a Piipiliya onaphwanela oveleela okumi aya wa Yehova ni opatisiwa. (1Ped 3:21) Voocharela anamwaakhela naakiho noomunepani wakhala wi annakhala mwawiiwanana ni wiiveleela waya. (Sal 91:1, 2) Akiristu aniiveleela wa Yehova​—ohiya wa achu, muteko, naari marehereryo makina. Mwawiihiiha, oohuserya onaphwanela wunnuwiha osivela ni omuthamalela wawe Muluku.​—Aro 14:7, 8.

MUKHALELO WA WEERANO YEELA:

• Variyari va yoohuserya, muthokororye masu anooniherya makhalelo a Yehova. Mmuceenyerye omwaalakhanya Piipiliya mahiku oothene ni ovekela wa Yehova “mohihiyeryerya.”​—1Tes 5:17; Tiy 4:8.

• Mmukhaviherye oohuserya anyu a Piipiliya okhalano soolakelela soomunepani, ntoko wiiveleela ni opatisiwa. Navetho, mmukhaviherye owo ophwanya soolakelela soopacerya, opaka makupa mmithukumano naari ovaha onamoona wa amwaacamani ni asinthamwene awe a omuteko. Muupuwele wi Yehova hanamukhinyeererya muchu omurumeela yoowo. Wiiveleela yoolakelela ya muchu mukhateiye.​—Malam 30:19, 20.

• Mmuceenyerye oohuserya anyu opaka matorokelo anachuneya wi amuhakalalihe Yehova ni weemereryiwa wi apatisiwe. (Masi 27:11) Woona wi soochuna ni sookhovelela ikina soothipeleya mmurimani, oohuserya a Piipiliya onnaphwanela okhaviheryiwa wi ahiye omuchu wakhalai ni owara omuchu muvyaani. (Éfe 4:22-24) Muthokororye vamoha miyaha inaphwanyeya mu Mulipeleli, irino muru: “A Bíblia Muda a Vida das Pessoas.”

• Mmuleele ohakalala munaphwanyaanyu mu omurumeela Yehova.​—Isa 48:17, 18.