Wunnuwiha Mavyakelo Ahu Mmuteko Wa Olaleerya​—Opaka Matorokelo

NTAKHARA HEENI ORYAAYA WOOCHUNEYA: Akristu awoocihiwa ni a ipuchepuche ikina annaawopa achu a maloko oothene wi ewurye “maahi ookumi, . . . mahaleene.” (Wup 22:17) Maahi yaala oosiphela aneemelela soovaha soothene sa Yehova wi awoopole achu awiiwelela mu yoocheka ni okhwa. Wi naakhaviherye achu yaawo arino sookhovelela ni soororomela soohiyanahiyana, nnaphwanela operekha “michaka yaphaama yoohimala” mmukhalelo onahaala otannya murima wa mmoha ti mmoha.—Wup 14:6.

MUKHALELO WA WEERANO:

• Muthanle mwaha ni yoorepa yeeyo enahaala otannya murima wa achu mu ekulucu anyu. Munanwerya othanla ochekula wa ntakiheryo naari mukhalelo wa ovaanela yoowo munapharihelaanyu mwa mphurelo. Miyaha taani ni soorepa inaasivela achu? Michaka taani sahiihaano ni saweereya achu anuupuwelaaya naari analocaaya? Miyaha taani inaasivela alopwana naari athiyana?

• Mu ochekula wanyu, mpharihele mukhalelo wa olocela naari sookhovelela sa ekulucu anyu.—2Kor 6:3, 4.

• Musuwele phaama soolaleeryiwa ni ixilema inapaka makupa a Ikaruma Sahu sa Ohusihano wi mphariheleke wa muchu yoowo onooniherya nchuno.

• Mpaxaare soolaleeryiwa mu elocelo yeeyo munoonaanyu wi munahaala waaphwanya achu analoca mu ekulucu anyu.

• Mutoroke mwaha mwawiiwanana ni yoochuna ya mwaneene a vaate. (1Kor 9:19-23) Mu ikwaha ikina, tiheeni nnaphwanelaahu oloca nasuwela wi mwaneene a vaate oomuyeleela oosiveliwa awe mookhwani?

MOONE EXILEMA, NAVE MWAAKHULE MAKOHO ANACHARELA:

• Mwaha taani mulaleeryi aapaceryinheiye ni mwaneene a vaate?

• Tiheeni yeereya mu ekumi ya mwaneene a vaate?

• Yoorepa taani yaari yoophwanelela mmukhalelo yoole, nave ntakhara heeni?

• Munapaka hai matorokelo wi ekhale a mphurelo wa achu mu ekulucu?