Mmukhalelo Taani Munapharihelaanyu Ochekula wa Ntakiheryo?

Ovinyerya mu Yaneru a 2018, ochekula wa ntakiheryo onnaphwanyeya mu Yoochariha ya Mithukumano—Okumi ni Muteko Ahu Weekristu. Nni nipharihele hai nikupa nenla?

Makupa Aanaxikola: Nyuwaano munaphwanela opharihela nikoho, yoorepa ni mwaha wa yoolaleeryiwa ya nikupa ochekula wa ntakiheryo. Nyenya ela henataphulela wi munaphwanela weerakano mmukhalelo mmohamoha ntoko exilema. Munanwerya opharihela mwaha mukina, otoroka opaceryiha naari othariha yoorepa mmukhalelo woohiyana. Ohiya yeeyo, nyuwaano munanwerya opharihela Ikaruma sahu sa Ohusihano naamwi ehiphwanyeyaka va Yoochariha ahu yeeyo munahaalaanyu opharihelaka.

Mmuteko Woolaleerya: Nikupa na ochekula wa ntakiheryo onanikhaviherya okhalano moonelo wa opharihela mmuteko wa olaleerya. Wakhala wi mwaneene a vaate ohooniherya nchuno ni ochuna osuwela sincipale, munanwerya otitelela ovaanela ni yoowo, mpharihelaka nikupa na oxekurya woopacerya. Nyuwaano munanwerya opaka mapaceryiho anyu yaawo ari oohiyana ni yoochariha anyu, naari tho opharihela mmukhalelo mukina. Mpwanne mwaha naari yoorepa ya mweeri mukina yaahaala okhaviherya mu ekulucu anyu? Mpwanne achu a ekulucu anyu yaahaala okhalano nchuno waakhanle wi mulonce mwaha yoowo oneereya mu ekulucu? Munanwerya othanla mwaha yoowo onahaala okhaviherya mu ekulucu anyu. Nyenya yoolakelela anyu enaphwanela okhala weera “soothene wanthowa na michaka yaphaama” wi nuuke ni akina.”—1Kor 9:22, 23.