Apwanne Munnapharihela Phaama Sooruma sa Piipiliya?

Sooruma sa Piipiliya tiheeni? Sooruma sa Piipiliya ori waalakhanyiwa wookaravaariwa wa Tradução do Novo Mundo Oorehereryiwa. Owo onnavonyiwa vakhaani-vakhaani mu ilocelo sincipale vaavaa onakhalaaya wooweryeya. Echu emoha enakhaviherya vancipale wa sooruma sa Piipiliya ori ophariheliwa masu oohiyanahiyana wi eweemelele achu yaawo analociwa Mpiipiliyani. Masu anaalakhanyiwa mmukhalelo woophwanelela, mukhalelo yoowo onooniherya okwakwaleya wa muchaka wa Mpiipiliyani.

Ti mwawiihai akina anaphuraaya orweela wa waalakhanyiwa wa Piipiliya wookaravaariwa? Ancipale yaawo anawiriyana wiiliwiili waalakhanyiwa wa Piipiliya wookaravaariwa annasiveliwa woona mukhalelo eyo eneerihaaya Masu a Muluku okhala eeparipari wa yaawo. Awo annoona yeeyo moorweela wa waawiriyana alipa a waalakhanya oohiyanahiyana yaawo anaweemelela achu analociwa Mpiipiliyani, annawerya woona saweereya sa Mpiipiliyani moophwanelela nave anniiwexexa phaameene yeeyo erempwe. (Mas 4:5) Moorweela wa owiriyana waalakhanyiwa wa Piipiliya wookaravaariwa, ancipale annakhala oomaaleleya vaavaa aniisoonaaya okhala awuukhuwa.—Sal 94:19.

Owiriyana Masu a Muluku yaalakhanyiwaka moovuwa onnakhalano ovolowela wakuru mu okumi ahu. (2Math 34:19-21) Waakhanle wi waalakhanyiwa wa Piipiliya wookaravaariwa onnaphwanyeya mu elocelo yeeyo muniiwexexaanyu, apwanne waanwerya owiriyanaka moohihiyererya ntoko makupa a yookhovelela anyu yoomunepani?

MOONE EXILEMA OKARAVAARIWA WA PIIPILIYA—MAKUPA AKWATIWE, NAVE VOOCHARELA MWAAKHULE NIKOHO NNACHARELA:

Tiheeni enootikhinihaani vooloca sa opakiwa wa waalakhanyiwa wa Piipiliya wookaravaariwa?