Nnii Nipharihele Hai Sooruma Sookravariwa?
1. Ohiya pahiru soolaleeryiwa soorempwa, echu taani ekina nryaahuno?
1 Ancipale annasiveliwa ompharihela site jw.org wi ewiriyane waalakhanya waphaama ni woororomeleya wa masu eeparipari. (Ekle. 12:10) Mwawiihiiha, montoko opharihela sooruma sookravariwa? Ti wooweryeya owiriyana miyaha mu site ahu. Sooruma sookravariwa inanikhaviherya hai?
2. Nnii nipharihele hai sooruma sookravariwa ntakhara hiyaano ni echoko ahu?
2 Ntakhara Yoohuserya Ahu Naari ni Echoko: Owiriyana sooruma sookravariwa sa Piipiliya, irevista, naari soolaleeryiwa ikina vaavaa nneecaahu naari nipakaka muteko ahu wa nihiku ti nihiku, ennanikhaviherya opharihela phaama elukuluku ahu. (Éfe. 5:15, 16) Nnahaala oreeriha malapelo ahu a echoko orweela wa owiriyana yooruma vaavaa nnacharihaahu mu soolaleeryiwa sahu. Opharihela sooruma sookravariwa variyari va yoohuserya ahu, enahaala onikhaviherya xaxaxa wakhala wi nnachuna ohuserya waalakhanya phaama naari osuwela elocelo ekina.
3. Taani mu ekulucu ahu onaphura moorweela wa sooruma sookravariwa?
3 Mu Orummwa: Achu mu ekulucu ahu anakhala ooweiwa wi yaalakhanye, nyenya anahaala osiveliwa owiriyana sooruma sookravariwa. Akhweya nnanwerya waaphwanya achu analoca elocelo ekina yaawo yaahaala weemererya wiiwa masu Oomwene mu ‘elotxelo aya.’ (Saw. 2:6-8) Mmakupa makina, achu aakhovelela owiriyana. Ntoko yootakiherya, elapo ya Hmong, achu annaaleela anamwane miyaha nave annakuha yeele awiriyannaaya. Achu ancipale a Afrika annasiveliwa ohuserya moorweela wa owiriyana.
4. Vooloca sa waakhaviherya achu mu ekulucu ahu, makoho taani nnaphwanelaahu wiipakela?
4 Mu ekulucu anyu, apwanne waahaala okhala wa mphurelo orumiha yookravariwa mu elocelo ya namakhala? Apwanne ookhala aahaala okhalano mphurelo mu omvaha yooruma yookravariwa moorweela wa e-mail naari mukhalelo mukina? Apwanne waahaala okhala waphaama okumiha sooruma sookravariwa sa soolaleeryiwa sahu ni ohela mu CD wi mumvahe namakhala oonihenrye nchuno, vamoha ni yoolaleeryiwa aya? Soolaleeryiwa soothene sa mu ikhankoonya, eproxura, irevista, naari etrataato nivanhaahu muchu nnaphwanela orepela. Sooruma sookravariwa ipakiwe wi nipharihele muteko mu yoohuserya ahu ni waala mmiso weeparipari wa Omwene.—1 Kor. 3:6.