Yehova Onamoovahaani Ikuru

1-2. Makacamiho taani Anamoona a Yehova ancipale anahoolelaaya?

MURUMMWA Paulo aamuceenyerya Timoteo ni Akristu oothene wi yaakhwaniherye muteko aya. (2 Tim. 4:5) Mwawiihiiha, ninnachariha ekano ya Paulo ni opaka owetha wahu mmuteko wa Muluku. Nyenya mu ilukuluku ikina onnakhala woovila. Wa anna ni arokora ahu akina annoovelela oya mmuteko woolaleerya. (2 Tim. 4:2) Muupuwele, ntoko yootakiherya, wa anna yaawo anakhala mu ilapo seiho muteko ahu onakhwatiihiwaayawo. Awo annalaleerya naamwi esuwelaka wi awo anahaala owaleliwa mukariposo!

² Achu a Yehova annahoolela makacamiho oohiyanahiyana yaawo anaweeriha okhala ooceecheya. Ntoko yootakiherya, ancipale annalapa mu iwora sincipale wi evakulele imusi saya. Awo annachuna opaka sincipale mmuteko woolaleerya, nyenya awo hanakhalano ikuru omakuchuwelo wa esumana. Akina hanawerya opaka sincipale mmuteko wa Yehova nthowa nawi aakhalano ereca etokweene naari tawuuluvala, nave akina hanwerya okhuma mmavaate mwaya. Akina anniisoona ohikhala echweenevo vamiithoni va Yehova. Murokora awiichaniwa Mariya,b ooloca: “Kinniilipixerya vancipale wi kivareryele miyoonelo saka vaavaa kinakhalaaka ooceecheya. Voocharela kinniisoona okhala oohihakalala nthowa nawi onnachuneya elukuluku ni ikuru wi kiye mmuteko woolaleerya.”

3. Tiheeni nnahaalaahu othokororya mmwaha yoola?

³ Moohipwacha makacamiho yaawo nryaahuno, Yehova onanwerya onivaha ikuru seiho nnachunaahu wi ntitelele omurumeela yoowo ophiyerya vaavaa nnaweryelaahuvo. Nihaakumve othokororya mukhalelo Yehova onanikhaviheryeiye, hankooni nthokororye mukhalelo Yehova aamukhavihenryeiye murummwa Paulo ni Timoteo wi yaakhwaniherye muteko aya moohipwacha makacamiho.

YEHOVA ONNANIVAHA IKURU WI NTITELELE OLALEERYA

4. Makacamiho taani Paulo aahoolenleiye?

⁴ Paulo aahoolela makacamiho mancipale. Owo aanachuna nikhaviheryo na Yehova vaavaa amwiicani awe yaammanaaya, yaanwalenlaaya mukariposo, ni vaavaa yeereryaaya omwiipha. (2 Kor. 11:23-25) Paulo aaheemererya wi mu ilukuluku ikina aanawaniha ni moonelo wooheseya. (Aro. 7:18, 19, 24) Owo tho aakhalano nikacamiho mookumini nenlo naari ntoko “mwiiwa mmwiilini,” nenlo aachuneiye wi Muluku aviihevo.—2 Kor. 12:7, 8.

5. Moohipwacha makacamiho aahoolenleiye, tiheeni Paulo aakhwanihenryeiye?

⁵ Yehova aamvaha Paulo ikuru wi atitelele mmuteko awe woolaleerya moohipwacha makacamiho oothene owo aakumaneiyeno. Muthokororye yeeyo Paulo aakhwanihenryeiye. Ntoko yootakiherya, elukuluku yeeyo owo aawaleliweiye mu empa yo Roma, moolucuwa owo aahaalaleerya ancipale, ophitaanyerya alamuleli a othoriha. (Saw. 28:17; Fil. 4:21, 22) Owo tho aanalaleerya wa ancipale a Nikhuuru na Alipa Oolipelela, ni oothene yaale yaamuxekurya. (Saw. 28:30, 31; Fil. 1:13) Mu elukuluku emohamoha tho yeele, Muluku aampharihela Paulo wi arepe ikaarata seiho saakhavihenrye Akristu eeparipari khalai ni a mmahiku ahu. Nave tho, yootakiherya ya Paulo yaalipiha muloko wo Roma, yeeyo yeerinhe wi anna ‘yuumihe murima, yaaceererya olaleerya masu a Muluku ehoovakaru.’ (Fil. 1:14) Naamwi Paulo ahiweryaka weera sincipale ntoko aachuneleiye, owo aanapaka owetha wawe, nave eyo ‘yaanakhaviherya winnuwiha michaka yaphaama.’—Fil. 1:12.

6. Mwawiiwanana ni 2 Korinto 12:9, 10, tiheeni yaamukhavihenrye Paulo waakhwaniherya orummwa awe?

⁶ Paulo aahiiwexexa wi echu eri yoothene owo aapakeiye mmuteko wa Yehova, aakhwaniha moorweela wa ikuru sa Muluku, ohiya sawawe. Owo aaloca wi ikuru sa Muluku “sinnakhwaaniheryeya mwa oceecheya.” (Mwaalakhanye 2 Korinto 12:9, 10.) Moorweela wa munepa waweela, Yehova aahimvaha Paulo ikuru wi aakhwaniherye muteko awe—moohipwacha wiikariwa, owaleliwa naari makacamiho makina aahooleleiye.

7. Makacamiho taani yaahaala weeriha okhala woovila wa Timoteo waakhwaniherya muteko awe?

⁷ Timoteo, nthamwene a Paulo yoowo aari mmiravo, aanaroromela tho ikuru sa Muluku wi aakhwaniherye muteko awe. Timoteo aamuhoola Paulo variyari va mikwaha sawe sa omisiyonaariyo. Nave Paulo aahimurumiha owo mmikwaha sawaaceereryeya wi axekurye ni olipiha miloko. (1 Kor. 4:17) Timoteo aaniisoona okhala oohiphwanelela. Akhweya ti nthowa nene Paulo aalonceiye wa yoowo: “Ahikhale ani anyemule omiravo aa.” (1 Tim. 4:12) Nave tho, mu elukuluku yeele, Timoteo aakhalano mwiiwa mmwiilini mwawe—“wiiceliwa . . . wiiliwiili.” (1 Tim. 5:23) Nyenya Timoteo aanasuwela wi munepa waweela wa Yehova waahaala omvaha owo nlipiho nenlo aachuneiye wi alaleerye michaka saphaama ni waarumeela asinnawe.—2 Tim. 1:7.

YEHOVA ONNANIVAHA IKURU WI NTITELELE OKHALA OOROROMELEYA MOOHIPWACHA MAKACAMIHO

8. Ti mwawiihai Yehova onaalipiheiye achu awe olelo?

⁸ Olelo, Yehova onnaavaha achu awe “owerya wene woopwaha” wi ewerye otitelela omurumeela owo moororomeleya. (2 Kor. 4:7) Hankooni nthokororye soovaha xexe seiho Yehova onanivaheiye wi inilipihe ni onikhaviherya otitelela okhala oororomeleya wa yoowo: nivekelo, Piipiliya, annihu Eekristu, ni muteko ahu woolaleerya.

9. Ti mwawiihai nivekelo nnanikhaviheryaaya?

⁹ Nlipiho orweela wa nivekelo. Mwawiiwanana ni Éfeso 6:18, Paulo onnanceenyerya oovekela wa Muluku “ilukuluku soothene.” Ntoko yookhumelela, Muluku onahaala onilipiha. Jonnie, yoowo onakhala o Poliviya, aahoona nikhaviheryo na Yehova vaavaa aahoolenleiye makacamiho matokweene. Amwaariye ni asitiithi awe yaahiiceliwa vancipale mu elukuluku emohamoha. Waari woovila wa Jonnie weera echu eri yoothene wi aakhaviherye oothene aya. Amamaawe yaakhwa, nave yaaviravo elukuluku wi amwaariye ni atiithi awe epenuwe. Uupuwelaka sa muculi, Jonnie ooloca: “Vaavaa kaakhanlaaka awuukhuwaxa echu yaakikhaviherya ilukuluku soothene waari ovekela wa Yehova ni omuleela mukhalelo koonaaka.” Yehova aamvaha Jonnie ikuru seiho aachuneiye wi avilele. Ronald, mutokweene mmoha o Poliviya, aahiiwa wi amama awe aakhalano kanser. Awo yaakhwa mweeri mmoha ohoolo waya. Tiheeni yaamukhavihenrye owo ovilela mu elukuluku yeela yoovila? Owo ooloca: “Vaavaa kaavekelaaka wa Yehova, kaanamuleela ichu soothene koonaaka. Koosuwela wi owo onnakiiwexexa phaama opwaha muchu mukina, opwaha mukhalelo kiniisuwelaaka mukhataaka.” Mu ilukuluku ikina, nnanwerya wiisoona wi hinni niwerye ovilela ni makacamiho ahu ni ohisuwela echu yooloca mu nivekelo. Nyenya Yehova onnaniwopa wi nivekeleke wa yoowo. Naamwi noonaka okhala woovila othariha mukhalelo nnoonaahu.—Aro. 8:26, 27.

10. Hiihaa ntoko elociwaaya mu Ahebri 4:12, ntakhara heeni omwaalakhanya Piipiliya ni wuupuwelela yeeyo naalakhannyaahu ti woochuneya?

¹⁰ Olipihiwa moorweela wa Piipiliya. Paulo aanaalakhanya Soorepa seiho saamulipiha ni omuhakararya, nave hiyo tho nnaphwanela weerano emohamoha. (Aro. 15:4) Wakhala wi ninnaalakhanya Masu a Muluku ni wuupuwelela yaawo, Yehova onanwerya opharihela munepa awe waweela wi onikhaviherye wiiwexexa phaama mukhalelo Soorepa iho inaphariheleyaaya wa nikacamiho nahu. (Mwaalakhanye Ahebri 4:12.) Ronald, yoowo oromoliwe woopaceryani, ooloca: “Kinnathamalela wunnuwiha nchuno na waalakhanya makupa a Mpiipiliyani ohiyu ori woothene. Kinnuupuwelela mikhalelo mincipale sa Yehova ni mukhalelo wa waakhapelela akapuro awe. Eyo ennakilipiha.”

11. Ti mwawiihai Piipiliya aamukhavihenryeiye murokora mmoha?

¹¹ Vaavaa nnuupuwelelaahu Masu a Muluku, enamunikhaviherya okhalano moonelo woophwanelela vooloca sa makacamiho ahu. Muthokororye mukhalelo Piipiliya aamukhavihenryeiye naamukhweli mmoha. Mutokweene mmoha olonce wi naamukhweli owo aakhaviheryeya moorweela wa omwaalakhaanya liivuru a Yupu. Vaavaa owo eenreiyeno yeela, moonelo awe woopacerya waari waakaaha moonelo wooheseya wa Yupu. Aanyiheryaka vooloca sa Yupu owo aahi: “Yupu! Ohuupuweleke pahiru makacamiho aa.” Nyenya voocharela naamukhweli owo aahoona wi moonelo awe waalikana ni yoowo Yupu aareiyeno. Ela yaamukhaviherya owo otoroka moonelo awe ni olipiheya wi awerye ovilela ni ohooxeya wa omuyeleela iyawe.

12. Ti mwawiihai Yehova onaaphariheleiye anna ni arokora wi enilipihe?

¹² Olipiheya orweela wa Akristu akhwiihu. Mukhalelo mukina Yehova onaalipiheiye Akristu ori moorweela wa asinthamwene a munroromeloni. Paulo aarepa wi aanachuna ‘olipihana munroromeloni’ ni anna ni arokora awe oomunepani. (Aro. 1:11, 12) Mariya, yoowo oromoliwe woopaceryani, onnavaha esisapo onthamwene yoowo. Owo ooloca: “Yehova aahaapharihela anna ni arokora yaawo yaahaasuwela sa makacamiho aka. Awo yaanaloca echu yoolipiha naari okirumihela ikaarata, chiryene yaari echu yeeyo kaachunaaka. Ennakhaviherya tho waaleela arokora akina yaawo yaarino nikacamiho nimohamoha ni ohuserya orweela wa yaawo. Nave atokweene annakeeriha wiisoona wi ka muchu oochuneya mmulokoni.”

13. Ti mwawiihai nneeraahu niwerye olipihana mukina ni mukhwaawe mmithukumano sa muloko?

¹³ Mpuro mmoha woophwanelela nnalipihanaahuwo mukina ni mukhwaawe, ori mmithukumano sahu sa muloko. Vaavaa munayaanyu mmithukumanoni munanwerya waalipiha akina moorweela wa waaleela wi munnaasivela yaawo ni waathamalela wa yeeyo anapakaaya. Ntoko yootakiherya, mithukumano ihaakumve opacerya, mutokweene mmoha awiichaniwa Petru aaloca wa murokora mmoha yoowo iyawe ahiri Namoona: “Nyuwaano hamunawerya waanyiherya mukhalelo munanlipihaanyu owoonaani vaava. Nyuwaano munnarwa ni anamwane anyu athanu nammoha muri ooreheryeya ovaha maakhulo.” Mai owo aahinla nave aahaakhula ariki: “Nyuwaano hamunaanyiherya mukhalelo kaachunaaka wiiwa yeela olelo.”

14. Ti mwawiihai muteko woolaleerya onanikhaviheryaaya?

¹⁴ Olipihiwa orweela mmuteko woolaleerya. Vaavaa nnaalaleeryaahu akina, ninnakhala phaama, moohipwacha waakhanle wi achu annaniwiriyana naari hooye. (Masi. 11:25) Murokora awiichaniwa Stacy ohoona mukhalelo muteko woolaleerya onanlipihaaya. Vaavaa mmusi awe iikariweiye mmuloko, owo aanyeenyeya nave aanatitelela wiikoha, ‘Apwanne kinanwerya omukhaviherya mmusi aka?’ Waari woovila omaala wuupuwela nikacamiho nenla. Tiheeni yaamukhavihenrye ovootha nikacamiho nenla nawuukhula? Muteko woolaleerya! Vaavaa owo aalaleeryeiye, owo aatikitheryeya mwa achu a ekulucu awe yaawo yaachuna nikhaviheryo nawe. Owo oriye: “Variyari va elukuluku yeele, Yehova aakivaha oohuserya a Piipiliya yaawo yaaya vahoolo mwawaakuveya. Eyo yaakilipiha vancipale. Echu yaakikhavihenrye vancipale waari muteko woolaleerya.”

15. Tiheeni nnahuseryaahu orweela wa masu a Mariya?

¹⁵ Nthowa na mikhalelo saya, akina anniisoona wi heni ewerye opaka sincipale mmuteko woolaleerya. Waakhanle munniisoona mmukhalelo yoola, muupuwele wi Yehova onnahakalalela yeeyo munaweryaanyu opaka. Muthokororye wanaawiili yootakiherya ya Mariya. Vaavaa aathamenleiye mu ekulucu ya elocelo ekina, owo aaniisoona wi haapaka sincipale. Owo oriye: “Mu ilukuluku ikina, kaaphwanela pahiru ovaha naakhulo nookhuveya, waalakhanya yoorepa, naari ovaha etrataatu mmuteko woolaleerya.” Owo aaniisoona ohikhala echweenevo aawiilikanyihaka ni achu yaaloca phaama elocelo yeele. Mwawiihiiha, owo aatoroka moonelo awe. Owo aahipacerya woona wi Yehova aanampharihela moohipwacha okotakota wawe. Owo oriye: “Yeeyo Piipiliya onaloceiye ti yookhweya, nave enanwerya otoroka ikumi sa achu.”

16. Tiheeni enahaala waakhaviherya yaale ahinakhuma vaate nyenya anachuna olaleerya?

¹⁶ Yehova onnoona ni onnathamalela nchuno nahu na oya mmuteko woolaleerya, naamwi nihikhumaka vaate. Mwawiihiiha owo onanwerya onikhaviherya wi nlaleerye wa yaawo ananikhapelela, wa matotore naari wa manfirimero. Wakhala wi ninnalikanyiha muteko nnapakaahu hiihaano ni yoowo naapakaahu khalai, nnanwerya okhala ooceecheya. Nyenya wakhala wi ninniiwexexa mukhalelo Yehova onanikhaviheryeiye hiihaano, nnamukhala oolipa wi nivilele nnikacamiho vyakala moohakalala.

17. Mwawiiwanana ni Eklesiyaste 11:6, ntakhara heeni ninnaphwanela otitela mmuteko ahu woolaleerya naamwi nihoonaka sookhumelela sene mwawaakuveya?

¹⁷ Hiyaano hinnasuwela mmiso taani weeparipari naanlaahu onahaala omela ni opacerya wunnuwa. (Mwaalakhanye Eklesiyaste 11:6.) Ntoko yootakiherya, Parpara murokora a iyaakha 80 onnalaleerya wiiliwiili orweela mu telefoni naari ikaarata. Mu ekaarata awe emoha aahimuhelamo Mulipeleli a 1 a Marsu a 2014, aarino muru “O que Deus tem feito por você?” Owo haasuwela wi aaruminhe ekaarata awe wa mutheli yoowo aahin’ye okhala Namoona mu iyaakha sincipale. Awo yaahaalakhanya erevista yeela mwawuuluulela. Mulopwana aahiisoona ntoko wi aaloca ni Yehova ethoi ni ethoi ni yoowo. Mutheli aapacerya ophiya mmithukumano nave voocharela ivinrevo iyaakha 27 aakhala Namoona wanaawiili. Parpara aalipiheya moorweela wa woona sookhumelela saphaama sa ekaarata yeeyo aarempeiye!

18. Tiheeni nnaphwanelaahu weera wi niphurevo orweela wa ikuru sa Muluku?

¹⁸ Yehova onnanivaha ikari sincipale, wi naakhele ikuru sawe. Yehova onnanivaha ichu sincipale wi anilipihe, ntoko nivekelo, Piipiliya, anna ni arokora ahu, ni muteko woolaleerya. Vaava nnapharihelaahu ichu seiha, ninnooniherya wi ninnaroromela nikhaviheryo nawe nave ninnachuna weerano. Hankooni ilukuluku soothene nimuroromele Tiithiihu a wirimu yoowo onasiveliwa ‘waalipiha yaale aniiveleela mwa yoowo ni murima aya woothene.’—2 Math. 16:9.