Mutakiherye Ovilela wa Yehova

1-2. Yoolaiherya taani enaphwanyeya mu Isaiya 65:16, 17 enanikhaviherya otitelela okhala oovilela?

“MUHIVELAVELE!” waari muru woohakalaliha wa muthukumano wa muceche wa 2017. Muthukumano ola waahooniherya mukhalelo nneeraahu niwerye ovilela variyari va makacamiho yaawo nnakumanaahuno. Sooviravo iyaakha xexe ovinyerya vaavaa naaryaahuno muthukumano yoola, nave ophiyerya olelo ninnatitelela ovilelano okumi mmukhalelo yoola wa ichu.

² Makacamiho taani muryaanyuno hiihaano? Apwanne moomuyeleela mmusi anyu naari nthamwene anyu mookhwani? Apwanne mookhalano ereca yoohilooleya? Nave apwanne okumi anyu ti woovila nthowa nawi mohuuluvala? Apwanne munnahoolela ipahu sa maphacuwelo, nlala, naari wiikariwa? Naari apwanne munnahooxeya nthowa na epahu yeela ya Koronaviru, naari echu ekina yoolikana? Ninnaweherya nihiku nenlo makacamiho oothene yaala anahaalaaya ovira, ni vaavaa nnahaalaahu ocuwala nave herwa tho yeereya wanaawiili!—Mwaalakhanye Isaiya 65:16, 17.

3. Tiheeni nnaphwanelaahu weera hiihaano, nave ntakhara heeni?

³ Okumi mmukhalelo yoola wa ichu ti woovila, nave akhweya nnamuhoolela makacamiho makina muhoolo. (Mat. 24:21) Mweeparipari, hiyaano nnaphwanela otitelela olipiha ovilela wahu. Ntakhara heeni? Nthowa nawi Yesu aaloca: “Munarwa-mukhalano okumi anyu mwivilelelo.” (Luka 21:19, NN) Wuupuwelela mukhalelo akina anakhumelelaaya phaama vaavaa anavilelaaya ni makacamiho ntoko awihu, onanwerya olipiha ovilela wahu.

4. Ntakhara heeni nnaweryaahu oloca wi Yehova yootakiherya yaphaama ya ovilela?

⁴ Taani ori yootakiherya yaphaama ya ovilela? Yehova Muluku. Apwanne naakhulo nna ninnootikhinihaani? Akhweya ela ennootikhinihaani. Nyenya wakhala wi mohuupuwelela vooloca sa yeela munahaala wiiwexexa. Elapo ela enalamuleliwa ni Musaserya, mwawiihiiha aakhalavo makacamiho mancipale. Yehova ookhalano ikuru sa omaliha makacamiho yaala, nyenya owo onnaweherya nihiku nenlo onahaaleiye weerano yeela muhoolo. (Aro. 9:22) Mu elukuluku emohamoha, Muluku ahu onnatitelela ovilela aweheryaka elukuluku yeeyo onahaaleiye otoloxa elapo yeela. Hankooni nthokororye ichu thanu naxexe seiyo Yehova onavileleiyeno.

TIHEENI YEHOVA ONAVILELEIYENO?

5. Ti mwawiihai nsina na Muluku nnanyemuliwaaya, nave nyuwaano munoona hai vooloca sa yeela?

⁵ Yehova onnavilelano onyemuliwa wa nsina nawe. Yehova onnasivela nsina nawe, nave owo onachuna wi achu oothene ecicimiheke nenlo. (Isa. 42:8) Nyenya iyaakha opwaha 6.000 sivinre, nsina nawe hinaacicimihiwe. (Sal. 74:10, 18, 23) Ela yaapacenrye mu emaca ya Eteni vaavaa Musaserya (enataphulela “Nawoothe”) aalonceiye wi Muluku haachuna wi Atamu ni Eva ekhaleno echu yeeyo yaahaala oweeriha wi ehakalaleke. (Map. 3:1-5) Ovinyerya elukuluku yeele oya ohoolo, Yehova onnootheryiwa wi onnakhwatiiha echu yeeyo achu anachunaaya. Yesu aanuukhuwa nthowa nawi nsina na Atiithi awe naananyemuliwa. Nthowa na yeeyo, owo aahaahusiha oohuserya awe ovekela: “Atiithihu muri wirimu, nsina nanyu neelihiwe.”—Mat. 6:9.

6. Ntakhara heeni Yehova oheemererya wi evirevo elukuluku yincipale ahaakumve wooniherya wi owo tori mulamuleli oophwanelela wirimu ni veelaponi yavathi?

⁶ Waakaahiwa wa otokweene awe. Pahiru Yehova torino ophwanelela wa olamula wirimu ni veelaponi yavathi, nave mukhalelo awe wa olamulela ti waphaamaxa. (Wup. 4:11) Nyenya Musaserya onneererya waawoka ankeelo ni achu ni oweeriha wi yuupuweleke wi Muluku haano ophwanelela wa olamula. Waanachuneya oviravo elukuluku wi esuweliwe wi Yehova tarino ophwanelela wa olamula nave wi owo mulamuleli aphaamaxa. Mwa miruku, Muluku oheemererya wi achu elamulele mu elukuluku yincipale wi ewerye woona wi awo hanawerya wiilamulela phaama mukhataaya ehinwiriyanaka Mpatuxa aya. (Yer. 10:23) Nthowa na opisa murima wa Muluku, haavo onahaala okhwa minikwa wi owo torino ophwanelela wa olamulela wirimu ni veelaponi yavathi. Oothene anamusuwela wi Yehova tori mulamuleli aphaama nave wi pahiru Omwene awe tonahaala oruuha murecele ni okhapeleleya weeparipari.

7. Taani anammwareela Yehova, nave tiheeni owo onahaaleiye weera ni yaawo?

⁷ Omwareya wa anamwane awe akina. Yehova aapatunxe ankeelo ni achu oophaameya, ehirino yoocheka. Nyenya voocharela Satana (enataphulela “Mwiicani”) aahimmwareela Yehova nave aahaalekecha achu oophaameya, Atamu ni Eva, wi emmwareele tho Yehova. Ankeelo akina ni achu yaammwareela tho. (Yuda 6) Voocharela, ophiyerya tho nloko na Aisarayeli, achu oothanliwa ni Muluku, yaamukhooca yoowo nave epacerya waalapela amuluku atheru. (Isa. 63:8, 10) Mweeparipari Yehova aakhala awuukhuwa. Nyenya, owo aavilela, nave onnatitelela ovilela ophiyerya elukuluku yeeyo onahaaleiye waatoloxa achu oothene oomwaryeya. Vookuchula Yehova ni oothene yaawo ari oororomeleya wa yene, anahaala ohakalala woona wi awo herwa tho echuna ovilela ni ichu soonanara sineereya mu elapo yeela yootakhala!

8-9. Sawootha taani Yehova onaloceliweiye, nave nni naakhulele hai?

⁸ Sawootha sa Musaserya. Satana aamootherya Yupu vamoha ni alapeli akina a Yehova wi awo anamulapela owo pahiru nthowa na sookhalano saya. (Yobi 1:8-11; 2:3-5) Musaserya onnatitelela owootherya achu ophiyerya olelo. (Wup. 12:10) Nnanwerya wooniherya wi Satana nawoothe moorweela wa ovilela ni makacamiho ahu ni otitelela okhala oororomeleya wa Yehova nthowa nawi ninnamusivela yoowo. Yehova aamureeliha Yupu nave owo tho onamunireeliha wakhala wi noovilela.—Tiy. 5:11.

⁹ Satana onnaapharihela ahooleli a malapelo atheru wi eloceke wi Yehova toonanara murima nave tho toneeriha wi achu ehooxeyeke. Ophiyerya tho wi akina annaloca wi vaavaa anamwane anakhwaaya, Muluku tonaakuxa awo nthowa nawi aanaachuna ankeelo akina wirimu. Ala masu oonyemula chiryene! Nyenya hiyaano ninnasuwela wi Yehova Tiithi oosivela. Vaavaa nnakhalaahuno ereca etokweene naari vaavaa onakhweiye oosiveliwaahu, hinnamuruwana Muluku. Ohiya yeeyo, ninnaroromela wi nihiku nikina owo onahaala omaliha ireca ni waaviiha alipa ookhwa. Hiyaano nnanwerya omuleela muchu ti muchu yoowo onachuna owiriyana wi Yehova Muluku oosivela. Neerano hiihaa Yehova onanwerya omwaakhula yoowo onamunyemula.—Masi. 27:11.

10. Tiheeni Salumu 22:23, 24 onuupululeiye vooloca sa Yehova?

¹⁰ Ohooxeya wa alapeli awe oosiveliwa. Yehova, Muluku a niphwanya. Owo onnuukhuwa vaavaa onaniiweiye ninlaka nthowa na makacamiho yaawo nnavilelaahuno ntoko wiikariwa, ireca, naari ohiphaameya wahu. (Mwaalakhanye Salumu 22:23, 24.) Yehova onniiwexexa wiicela yoowo nnoonaahu; owo onnachuna omalihavo nave onahaala weerano yeeyo. (Mulikanyihe ni Mukwaha 3:7, 8; Isaiya 63:9.) Nnahaala ophiya nihiku vaavaa owo ‘onahaaleiye ovuta miithori oothene wiithoni [wahu] nave horwa tho okhalavo okhwa, naari wunla, naari ikucho, naari wiicela.’—Wup. 21:4.

11. Yehova onoona hai vooloca sa alapeli awe yaale akhwile?

¹¹ Waayeleela asinthamwene awe yaale akhwile. Ti mwawiihai Yehova onooneiye vooloca sa alopwana ni athiyana oororomeleya yaale akhwile? Owo onnachuna chiryene owoona wanaawiili! (Yobi 14:15) Munnawerya waanyiherya mukhalelo Yehova oreiyeno munkhela ni nthamwene awe Aparahamu? (Tiy. 2:23) Naari Mose, yoowo aaloceiyeno “ethoi ni ethoi”? (Muk. 33:11) Ni mukhalelo owo onaweheryeiye omwiiwa Tavite ni alipa awiipa masalumu akina yiipaka macipo aya ooreera ni oocicimiha! (Sal. 104:33) Naamwi asinthamwene yaala a Muluku ekonaka mookhwani, owo haacuwanle yaawo. (Isa. 49:15) Owo onnuupuwela echu eri yoothene vooloca sa omuchu aya. Piipiliya onaloca wi: “Achu oothene anakhala, akumi mwa yoowo.” (Luka 20:38) Nihiku nikina awo, anahaala okookela okhala akumi, nave owo onahaala owiriyana mavekelo aya ookhumela vathi vamurima ni weemererya malapelo aya. Waakhanle wi moomuyeleela oosiveliwaanyu mookhwani, muupuwelo yoola onanwerya woolipihaani ni woohakararyaani.

12. Tiheeni enamweeriha Yehova okhala oonyeenyeya variyari va mahiku yaala ookuchula?

¹² Ohooxiwa wa achu orweela wa achu oonanara murima. Vaavaa omwareya waapacenryaaya mu Eteni, Yehova aasuwela wi mikhalelo saahaala onanara ichu sihaakumve okhala phaama. Yehova onniica ichu soonanara, ohookololowa, ni nlala seiho isaren’ye veelaponi olelo. Owo ilukuluku soothene onnaakhapelela achu yaale ahinawerya wiisaakiha, ntoko ikwaasuni ni anaamukhwele. (Zak. 7:9, 10) Yehova onnatepa onyeenyeya vaavaa onawooneiye akapuro awe ehooxiwaka ni ewaleliwaka mukariposo. Munanwerya ororomela wi, owo onnaasivela oothene yaale anavilela vamoha ni yoowo.

13. Meecelo taani oohiphwanelela Yehova onooneiye variyari va achu, nave tiheeni owo onahaaleiye weera?

¹³ Ichu soonanara achu anapakaaya. Achu yaapatuxiwe wi emutakiheryeke Muluku, nyenya Satana onnasiveliwa oweeriha awo opaka ichu soonanara. Vaavaa Muluku ‘onneiye wi mweelaponi achu yamvira ekhalaka oonanara murima’ mmahiku a Nowa, ‘aalapha ompatuxa muchu, nave aatepa ohapaleya wanthowa na ompatuxa muchu.’ (Map. 6:5, 6, 11) Apwanne mikhalelo sa elapo yeela sookhala phaama? Mweeparipari hooye! Musaserya onnatepa ohakalala vaavaa achu anapakaaya mikhalelo soothene sa ocapaheya seiho siri sawunlaana, ophitaanyerya okonihana wa achu ehithelanne ni wa achu yaawo ari oophwanaphwana mwiikho! (Éfe. 4:18, 19) Satana onnatepa ohakalala tho vaavaa onawooneiye achu anamulapela Yehova epakaka soocheka itokweene. Vaavaa opisa murima wa Yehova onahaalaaya omala, owo onahaala wooniherya wi onniica meecelo oothene oocapaheya moorweela wa waaviihavo achu oothene ahinachuna opaka matorokelo.

14. Tiheeni achu anapakaaya ni elapo vamoha ni axinama?

¹⁴ Onanarihiwa wa soopatuxiwa sawe. Ohiya wi pahiru muchu ‘onamulamulela mukhweiye amweerelaka yoonanara’ nyenya owo tho hanakhapelela elapo ni axinama hiihaa ntoko Yehova onachuneiye wi achu yeereke. (Ekle. 8:9; Map. 1:28) Masiyentista akina enaloca wi wanthowa na yeeyo achu aneeraaya, soopatuxiwa sa miloko miloko sinanwerya ocakanela mu iyaakha savakhaani inacharela. Ti wookhweya wiiwexexa ntakhara heeni achu anuukhuwaaya wi elapo eri mmakacamihoni! Ninnathamalela vancipale, wi Yehova oolaiherya ‘waatolosha yaawo anatolosha elapo yavathi’ ni weeriha elapo yoothene okhala parataiso.—Wup. 11:18; Isa. 35:1.

TIHEENI NNAHUSERYAAHU MOORWEELA WA OVILELA WA YEHOVA?

15-16. Tiheeni enanceenyerya ovilela vamoha ni Yehova? Mphwanaphwanihe.

¹⁵ Nkuupuwelani makacamiho oothene oonyeenyeiha Tiithi ahu a wirimu onavileleiyeno mu iyaakha sincipale. (Moone ekaaxa “Ichu Seiho Yehova Onavileleiyeno.”) Yehova anwerya omaliha onanara wa mukhalelo yoola wa ichu mu elukuluku vyakala. Nyenya opisa wawe murima onnanikhaviherya vancipale! Nuupuwele niphwanaphwaniho nla. Mwaanyiherye wi mulopwana ni mwaariye aaleeliwa wi mwaana yoowo ohiyariwe ookhalano makacamiho matokweene nave ayariwa onahaala okhalano makacamiho a okumi ophiyerya wi onahaala okhwa ari mukhaani. Nyenya asitiithi annahakalala vaavaa mwaana owo onayariweiye naamwi ohaalaka okhala woovila omukhapelela mwaana yoowo. Nthowa na omusivela mwaanaya, awo annavilelano nikacamiho vyakala nave annapaka echu eri yoothene wi emukhapelele.

¹⁶ Moolikana, anamwane a Atamu ni Eva anayariwa oohiphaameya ene. Naamwi hiihaa, Yehova onnaasivela nave onnaakhapelela yaawo. (1 Yoh. 4:19) Moohiyana ni asitiithi a mu niphwanaphwaniho, Yehova onammalihavo makacamiho a anamwane awe. Owo oothanla elukuluku vaavaa onahaaleiye omalihavo makacamiho oothene a achu. (Mat. 24:36) Apwanne osivela wa Yehova honanceenyerya ovilela ni oweherya ophiyerya elukuluku yeeyo?

17. Ti mwawiihai masu a mu Ahebri 12:2, 3 vooloca sa Yesu ananlipihaaya wi ntitelele ovilela?

¹⁷ Yehova ootikitherya yootakiherya yoophaameya ya ovilela. Yesu aahikhumelela phaama mu otakiherya ovilela wa Atiithi awe. Vaavaa aareiye veelaponi yavathi, Yesu aahivilela ni masu oophuca, wuulihiwa muru, ni ohooxeya vamwirini nthowa na hiyo. (Mwaalakhanye Ahebri 12:2, 3.) Yootakiherya ya Yehova ya ovilela, mweeparipari yaahimvaha Yesu ikuru wi avilele. Ela tho enanwerya onilipiha.

18. Ti mwawiihai 2 Pedro 3:9 onanikhaviheryeiye wiiwexexa yeeyo eneereya nthowa na opisa murima wa Yehova?

¹⁸ Mwaalakhanye 2 Pedro 3:9. Yehova oosuwela elukuluku yoophwanelela onahaaleiye otoloxa elapo yeela yoonanara. Nthowa na opisa wawe murima, achu ancipale aakhalano ekari ya omusuwela yoowo, nave hiihaano muloko mutokweene wa amilyawu a achu onnamulapela yoowo. Oothene yaawo annahakalala woona wi Yehova oovilela ophiyerya awo eyariwa, ehuserya omusivela yoowo, nave eveleela ikumi saya wa yoowo. Vaavaa amilyawu a achu anahaalaaya ovilela ophiyerya omakuchuwelo anahaala woona wi Yehova aapaka yoolakelela yaphaama ya okhala oopisa murima!

19. Tiheeni nnaphwanelaahu olakelela weera, nave tinivi nnahaala okhala nchuwelo nahu?

¹⁹ Ninnahuserya orweela wa Yehova mukhalelo wa ovilela moohakalala. Moohipwacha ichu soothananiha ni makacamiho yaawo Satana otannyileiye, Yehova onnatitelela okhala “Muluku oohakalala.” (1 Tim. 1:11, TNM) Moolikana, hiyaano tho nnanwerya otitelela okhala oohakalala vaavaa nnanweheryaahu Yehova moopisa murima wi eelihe nsina nawe, wooniherya ophwanelela wawe wa olamulela, omalihavo onanara woothene, ni omalihavo makacamiho oothene nnahoolelaahu olelo. Hankooni nikhale oolakelela ovilela ni okhala oolipiheya osuwela wi Tiithi ahu a wirimu onnavilela tho. Wakhala wi noheerano hiihaa, masu ala anahaala okhala eeparipari wa mmoha ti mmoha a hiyo: “Ooreeriwa muchu yoowo onavilelano weereriwa, ntakhara, awerya mu weehiwa wawe, onamuchuweliwa ni okumi, yoowo Muluku onaaroromeliheiye yaawo anamukhwela.”—Tiy. 1:12.