“Nyenya Ovilela Okhaleno Muteko Aya Wophameya”

“Nyenya ovilela okhaleno muteko aya wophameya, wi mukhale óphameya ni óhikhalano murala, óhithoiwaru etchu.”—TIYAKO 1:4, NN.

MACIPO: 135, 139

TIHEENI MUNUUPUWELAANYU?

Tiheeni enahaala wookhaviheryaani ovilela?

Sootakiherya taani sa ovilela iri sawooneya?

Masu awi “ovilela okhaleno muteko aya wophameya” anataphulela eheeni?

1, 2. (a) Tiheeni nnahuseryaahu orweela wa ovilela wa Kiteyoni ni alopwana awe 300? (Moone eruku yoopacerya.) (b) Mwawiiwanana ni Luka 21:19, ntakhara heeni ovilela ti wookhweleya?

NKAANYIHERYANI ekhoco yookacamiha ni yoovelaveliha variyari va akhoco a Aisarayeli, ehooleliwaka ni Kiteyoni, ni amwiicani aya. Kiteyoni ni alopwana awe yaawiikara Amitiya ni akina yaakhaviherya ohiyu woothene mastatiya 32. Piipiliya onnaloca yeeyo yeeren’ye voocharela: “Gedeyoni àphiya o Yordano nave àmulapuwa yowo ni atxhu awe masana mararu aryeiyeno yàri . . . òvelavela.” Nyenya awo hiyaavonthe ekhoco, nave yaaphwanela owana ni akhoco 15.000. Amwiicani awo yaanaahooxa mu iyaakha sincipale, mwawiihiiha Aisarayeli hiyaaphwanela okookela muculi. Nyenya Kiteyoni ni alopwana awe yaatitelela owiikara amwiicani aya ophiyerya waavootha!—Amuthoriha 7:22; 8:4, 10, 28.

² Hiyaano tho ninnawaniha ekhoco yookacamiha ni yoovelaveliha. Amwiicani ahu anaphitaanyerya Satana, elapo awe ni ohiphaameya wahu. Akina a hiyo annawana ekhoco yeeyo mu iyaakha sincipale. Nnikhaviheryo na Yehova, ninnavootha ikhoco sincipale. Nyenya, nlelo hinivonthe ekhoco yookuchula. Ikwaha ikina akhweya nnamvelavela owaniha. Naari nnamvelavela oweherya okuchuwa wa mukhalelo yoola woonanara. Yesu aalopola wi naahaala okhalano saweeha sincipale ni wiikariwa variyari va mahiku ookuchula. Nyenya tho aaloca wi navilela nnahaala ovootha. (Mwaalakhanye Luka 21:19.) Ovilela tiheeni? Tiheeni enahaala onikhaviherya ovilela? Nnii nihuserye eheeni wa yaale anavilela? Nave nnii niwerye hai wi “ovilela okhaleno muteko aya wophameya”?—Tiyako 1:4.

OVILELA TIHEENI?

3. Ovilela tiheeni?

³ Mpiipiliyani, ovilela onataphulela sincipale opwaha weemererya nikacamiho. Onavolowela mukhalelo nnuupuwelaahu ni nnoonaahu vooloca sa saweeha sahu. Ovilela onnanikhaviherya okhala oolipa murima, oororomeleya, ni oomaaleleya. Liivuru mmoha onaloca wi ovilela mukhalelo onanikhaviherya okhalano ewehereryo yoolipa ni oheemererya yaweeha. Onnanikhaviherya okhala aweemeleleya ni oohicikinyeya vaavaa nnakumanaahu ni saweeha itokotoko. Nave onnanikhaviherya ovootha saweeha ni wiikhalelaru mu yoolakelela, ohiya mu makacamiho ahu.

4. Ntakhara heeni nnanwerya oloca wi ovilela onaceenyeryiwa ni osivela?

⁴ Osivela onnanceenyerya ovilela. (Mwaalakhanye 1 Korinto 13:4, 7.) Mmikhalelo taani? Omusivela Yehova onnanceenyerya ovilela ni echu yoothene owo oneemereryeiye wi neereke. (Luka 22:41, 42) Waasivela annihu ennanikhaviherya ovilela ohiphaameya waya. (1 Pedro 4:8) Omusivela oothelana ahu ennanikhaviherya ovilela “sokatxamiha” seiyo tho atheli oohakalala anakumanaayano, nave ennalipiha othela wahu.—1 Korinto 7:28.

TIHEENI ENAHAALA WOOKHAVIHERYAANI OVILELA?

5. Ntakhara heeni Yehova toophwanelela onikhaviherya wi nivilele?

⁵ Mumveke Yehova wi oolipiheni. Yehova ti “Muluku òvilela ni òhakalaliha.” (Aroma 15:5) Owo pahiru toniiwexexa phaama mukhalelo ahu, moonelo ni muyareriwo ahu. Mwawiihiiha owo oosuwela phaameene yeeyo nnachunaahu wi nivilele. Piipiliya onii: “Annera otxhuna wa yale anatxitximiha, annawiriyana wupuwela waya, nave annàvulusa yawo.” (Salumu 145:19) Nyenya, Muluku onahaala waakhula hai mavekelo ahu ntakhara ovilela ni onilipiha ?

6. Ntoko eroromelihiwaaya Mpiipiliyani, Yehova ‘onanivaha ikuru’ mwawiihai ntakhara saweeha sahu?

⁶ Vaavaa nnamvekaahu Yehova wi anikhaviherye ovilela, owo onnaroromeliha ‘onivaha ikuru.’ (Mwaalakhanye 1 Korinto 10:13.) Oneerano hai eyo? Mweelukuluku aya, owo onnaviihavo yaweeha. Nyenya mu ikwaha sincipale, owo onahaala onivaha ikuru wi nikhaleno “ovilela wothene ni ohakalala.” (Kolosi 1:11) Nave woona wi oosuwela phaama okotakota wahu woomwiilini, ni mmuupuweloni, Yehova harwa eemererya onikhumelela echu yoovila enahaala onihiiha okhala oororomeleya.

7. Mphwanaphwanihe ntakhara heeni ninnachuna yoolya yoomunepani wi nivilele.

⁷ Mweemererye wi yoolya yoomunepani elipihe nroromelo nanyu. Ntakhara heeni yoolya yoomunepani ti yookhweleya? Wi niphwanaphwanihe: Wi muchu awelele mwaako woorakama, onachuneya olya nihiku ti nihiku, opwaha onalyeleiyevo. Wi avilele nave aphwanye yoolakelela, mulipa oowela onaphwanela ovonaxa wakhala wooweryeya. Moolikana, ninnachuna yoolya yawaaca yoomunepani wi niwerye ovilela nave niphwanye yoolakelelaahu. Nnaphwanela olakelela omaliha elukuluku yincipale mu yoohuserya ya muchu mukhateiye ni ophiya mmithukumano sahu. Miteko seiyo inahaala onivaha yeeyo nnachunaahu wi nlipihe nroromelo nahu.—Yohani 6:27.

8, 9. (a) Mwawiiwanana ni Yobi 2:4, 5, tiheeni enavolowela vaavaa nnahoolelaahu saweeha? (b) Vaavaa munakumanaanyu ni yaweeha, yaweereya taani yoohooneya munaphwanelaanyu waanyiherya?

⁸ Muupuwele ororomeleya wanyu wa Muluku. Vaavaa nnakumanaahu ni saweeha sinnavolowela sincipale opwaha makacamiho ahu. Ororomeleya wahu wa Muluku onneehiwa. Mukhalelo nnaakhulelaahu yaweeha ninnooniherya wi nnamoona Yehova ntoko Mulamuleli a elapo. Mwawiihai? Satana, mwiicani a Muluku onaakaaha olamulelo awe, onamunyemula Yehova moorweela wa oloca wi achu anamurumeela pahiru Muluku ni mathowa a ichu soomwiilini. Satana aaloca: “Atxhu hanapwatxha oyelèla itxhu sothene, nto anapwatxha okhapelela ekumi aya.” Satana aaloca sa Yobi: “Nto mwererye ophoreiha mwili awe ni makhuva awe, hiha munammona oruwanakani.” (Yobi 2:4, 5) Apwanne Satana ootorokeya ovinyerya vaava aalonceiye yeela? Hooye! Iyaakha sincipale ohoolo waya, Satana avonyiwe wirimu, owo aanaanyemula moohihiyererya akapuro oororomeleya a Muluku. (Wupulula 12:10) Olelo, Satana nlelo onaloca wi achu anamulapela Muluku ni mathowa a ichu soomwiilini. Satana onachuna onoona nikhoocaka olamulelo wa Muluku nave nihiyaka omurumeela Owo.

⁹ Vaavaa munahooxeyaanyu, mweererye waanyiherya yaweereya ela yoohooneya. Satana ni masololo ari makupa makina. Awo annoovareryaani wi yoone yeeyo munahaalaanyu opaka nave annaloca wi munahaala oceecheya. Makupa makina Yehova ni Mwene ahu Yesu Kiristu, ni awoocihiwa yaawo aviihiwe mookhwani, ni macikhwi a ankeelo. Awo tho annoona wiilipixerya wanyu, nyenya annawaniha wi ewaakiheeni! Awo ari oohakalala owoonaani wi munanwerya ovilela ni wiikhalelaru oororomeleya wa Yehova. Voocharela munnamwiiwa Yehova alocaka ni nyuwaano: “Mwan’aka, okhale ni miruku, kinamwèliwa murima, ni kinammwakhula yole onakinyemula.”—Masiposipo 27:11.

10. Munii mmutakiherye hai Yesu moorweela wa omuupuwelela phatamari a ovilela?

¹⁰ Mmuupuwele Phatamari. Muupuwele wi munapaka mukwaha woorakama nave munahaala ophiya nipuro munayaanyuwo nihiku noocharela. Wi mphiye nipuro nenlo onachuneya weeca ohiyu woothene. Nyenya moosuwela wi moohilekela onahaala osavo, nave moosuwela wi mwatitelela weeca munahaala ophiya nipuro munayaanyuwo. Okumi onanwerya olikanyihiwa ni opaka mukwaha. Nyuwaano munamukumana ni ilukuluku sookacamiha, nave munamukhulumuwa ni makacamiho anyu. Yesu tho ahikumanano mukhalelo yoowo. Vaavaa aakhomeliweiye vamwirini woohooxa, owo aahooxeya vancipale. Eyo yaari elukuluku yookacamiha ya okumi awe! Tiheeni yaamukhavihenrye ovilela? Piipiliya onaloca wi owo aawenhe “otheya ávahiwiye va mithoni vawe.” (Ahebri 12:2, 3, NN ) Yesu aamoona phatamari a ovilela wawe, nave echu yookhweleyaxa, owo aahaala okhalano makupa mu weeliha nsina na Muluku ni okhaviherya ophwanelela wawe olamulela. Aasuwela wi yaweeha yaari ya elukuluku vakhaani nave phatamari awe wirimu aahaala okhala oohimala. Makacamiho nnakumanaahuno olelo, anamukhala oovelaveliha ni oohooxa, nyenya muupuwele wi awo teelukuluku yavakhaani.

“ALIPA-OVILELÁWO”

11. Ntakhara heeni ninnaphwanela othokororya yootakiherya ya “alipa-ovileláwo”?

¹¹ Haniwerya ovilela mukhatiihu. Wi aaceenyerye Akiristu ovilela saweeha sincipale sa Satana, murummwa Pedro aarepa: “Mmukhotxe, nulipa munroromeloni, musuwelaka wi masoso mamohamoha annàphwanya asinninyu amwalamwanle mwelaponi.” (1 Pedro 5:9) Masu awi “alipa-ovileláwo” ananihusiha mukhalelo wa okhala oororomeleya, nave annanikhaviherya tho woona wi nnanwerya ovilela, nave tho annanuupuxerya wi nakhala oororomeleya nnammwaakhela phatamari. (Tiyako 5:11) Hankooni nthokororye sootakiherya vakhaani.^[1]—Moone masu a vathi omakuchuwelo.

12. Tiheeni nihusenryaahu orweela wa yootakiherya ya akerupini yaakuhiwe o Eeteni?

¹² Akerupini ankeelo akuruxa. Aatamu ni Haava emanle ocheka, Yehova aahaavaha akerupini murici muvyaani veelaponi yavathi. Waari woohiyana ni yoowo yaaryaayano wirimu. Yootakiherya aya enanwerya onihusiha mukhalelo wa ovilela vaavaa nnakhalaahuno murici woovila. Piipiliya onnooniherya wi Yehova ‘àhakuhawo ankelo [akerupini] yalipelela ematxa ya w’Edeni, onakhumawo, nsuwa ni nsipàtxa na moro, wi elipeleleke ephiro wàriwo mwiri w’ekumi.’^[2] (Moone masu a vathi omakuchuwelo.) (Maphatxuwelo 3:24) Piipiliya hanaloca wi akerupini yaahiikhupanyerya naari yaahoona wi yaari ookhweleyaxa ni murici aya muvyaani. Awo hiyaaceechen’ye. Opwaha yeeyo, yaahiikhalelaru mmurici aya, ophiyerya okhwaaniherya muteko aya, akhweya mu elukuluku ya Maahi Mancipale, ivinre iyaakha 1.600 ohoolo waya!

13. Yuupu aawenrye hai ovilela ni saweeha?

¹³ Yuupu muchu oororomeleya. Ikwaha ikina munamuhooxeya nthowa na nthamwene naari mmusi olonce echu yoonanara. Akhweya munamwiiceliwa naari munnamuhooxeya nthowa na okhwa wa oosiveliwaanyu. Moohipwacha yookhumelela, munamphwanya nihakararyo mu yootakiherya ya Yuupu. (Yobi 1:18, 19; 2:7, 9; 19:1-3) Yuupu haasuwela ntakhara heeni aahooxeyeiye ni makacamiho mancipale, nyenya haakookenle muculi. Tiheeni yaamukhavihenrye ovilela? Opwaha soothene, aanamusivela Yehova nave haachuna omuthananiha. (Yobi 1:1) Yuupu aachuna omuhakalaliha Muluku mu ilukuluku saphaama ni soonanara. Mwawaaceererya, Yehova aamukhaviherya Yuupu woona ikuru Sawe moorweela wa omuleela owo vooloca sa ichu ikina sootikhiniha aapatunxeiye. Eyo yaamulekecha Yuupu osuwela wi Yehova aahaala omaliha makacamiho awe mu elukuluku yoophwanela. (Yobi 42:1, 2) Nave ti yeeyo yeeren’ye. “Apwiya yamòpola wa masòso awe nave yanvaha muhakhu opwaha yole wopatxerya.” Yuupu aakhala “miyakha mintxipale, uluvanl’ene ni alyilevo.”—Yobi 42:10, 17.

14. Mwawiiwanana ni 2 Korinto 1:6, ovilela wa Paulo waakhavihenrye hai akina?

¹⁴ Murummwa Paulo. Munnahooxeya ni wiikariwa? Nyuwaano mwa mutokweene a muloko naari ooweherya a weeceeca munoona wi mohaaceliwa ni mirici sanyu sincipale? Wakhala wi ti hiiha yootakiherya ya Paulo enamookhaviheryaani. Paulo aahooxeya ni wiikariwa, wiiliwiili aanawoova asinneeni mmilokoni. (2 Korinto 11:23-29) Nyenya Paulo haaceechen’ye, nave yootakiherya awe yaahaalipiha akina. (Mwaalakhanye 2 Korinto 1:6.) Mmukhalelo mmohamoha ovilela wanyu onamwaakhaviherya akina ovilela.

APWANNE OVILELA ONAMUKHALANO “MUTEKO AYA WOPHAMEYA” MWA NYUWO?

15, 16. (a) “Muteko” taani ovilela onaakhwanihaaya? (b) Mvahe sootakiherya mukhalelo nneeraahu nihiye “ovilela okhaleno muteko aya wophameya.”

¹⁵ Tiyako aaveereliwa orepa: “Nyenya ovilela okhaleno muteko aya wophameya, wi mukhale óphameya ni óhikhalano murala, óhithoiwaru etchu.” (Tiyako 1:4) Ovilela onaakhwaniha hai “muteko aya” mwa hiyo? Vaavaa nnakumanaahu ni yaweeha, nnanwerya woona wi ninnachuna okhala oopixa murima, oothamalela, naari oosivela. Vaavaa nnavilelaahu yaweeha, nnahaala ohuserya mukhalelo wa wooniherya phaama mikhalelo seiya, ni mukhalelo nnahaalaahu orehererya omuchu ahu Weekiristu.

¹⁶ Woona wi ovilela onnaneeriha okhala Akiristu aphaama, hannaphwanela opwexa nlamulo na Yehova wi nimalihe yaweeha. Ntoko yootakiherya, wakhala wi munnawaniha ni muupuwelo woocapaheya, muheemererye yaweeha! Mumveke Yehova nikhaviheryo wi mukhooce muupuwelo yoowo. Mookhalano mmusi onawiikaraani? Muhiceecheye! Mutitelele omurumeela Yehova. Ntoko yookhumelela munahaala olipiha nroromelo nanyu wa Yehova. Muupuwele: Naariki neemereryiwe ni Muluku, nnaphwanela ovilela.—Aroma 5:3-5; Tiyako 1:12.

17, 18. (a) Mulikanyihe okhweleya waya ovilela ophiyerya omakuchuwelo. (b) Vaavaa nnaacamelaahu omakuchuwelo, nroromelo taani nnaphwanelaahu okhalano?

¹⁷ Nnaphwanela ovilela ohiya pahiru mu elukuluku vakhaani nyenya ophiyerya omakuchuwelo. Nkaanyiheryani pophoro onapwina. Achu ari mwemmo anaphwanela weekha ophiyerya okhomoni oriwo echaya. Muchu onii avelavele arikimpaceryaru weekha onahaala omiryiwa. Nave muchu onahaala ovelavela ahaakumve ophiya okhomoni onahaala tho omiryiwa. Wakhala wi ninnachuna okhala mu elapo yahiihaano, nnaphwanela otitelela ovilela. Hankooni nikhaleno muupuwelo mmohamoha wa murummwa Paulo, yoowo aarempe: “Hiyano hinakukhumuwa.”—2 Korinto 4:1, 16.

¹⁸ Ntoko Paulo, noolekecheya wi Yehova onahaala onikhaviherya ovilela ophiyerya omakuchuwelo. Paulo aarepa: “Mwa sothene iha nri òvothasa ni ikuru sa yole onikhwenle hiyo. Eparipari miyo kosuwela wi nari okhwa, nari ekumi, nari ankelo, nari owerya wa wirimu, nari mutano, nari omwahiyu, nari ikuru sa wirimu, nari sa vathi, hiyavo yopatusiwa ekina enawerya onimwalanyiha ni okhwela Muluku onisuwelin’heiye mwa Yesu Kristu Pwiya ahu.” (Aroma 8:37-39) Eparipari wi ikwaha ikina nnahaala ovelavela. Nyenya hankooni nimutakiherye Kiteyoni ni alopwana awe. Awo yaavelavela, nyenya hiyaakookenle muculi. ‘Yatitelela owikara’!—Amuthoriha 8:4.

[Masu a vathi]

[Yooleeliherya va epaaxina 10]

Yehova onniiwexexa phaama mukhalelo ahu, oosuwela phaameene yeeyo nnachunaahu wi nivilele

[Yooleeliherya va epaaxina 11]

Yesu aamoona phatamari a ovilela wawe