Ti Mwawiihai Yehova Onanikhaviheryeiye wi Nivilele

1. Ntakhara heeni tahi wookhweya ovilela ophiyerya omakuchuwelo, nyenya taani onanikhaviherya? (1 Petru 5:10)

MMAHIKU yaala ookuchula ni oovila, achu a Yehova annaphwanela otitelela okhala oovilela. Akina annahooxeya ni ireca itokweene. Akina annahooxeya nthowa na omuyeleela oosiveliwa aya mookhwani. Nlelo akina annahoolela wiikariwa ni amusi aya naari ni achu a kuvernu. (Mat. 10:​18, 36, 37) Muroromele wi, moohipwacha nikacamiho taani nenlo munahoolelaanyu, Yehova onanwerya wookhaviheryaani ovilela.—Mwaalakhanye 1 Petru 5:10.

2. Ikuru sahu sa ovilela ntoko mukristu sinarweela woowi?

² Ovilela onataphulela otitelela okhalano ewehereryo variyari va makacamiho, wiikariwa naari sawuukhula. Ovilela ntoko Mukristu honarweela mu ikuru sahu, ohiya yeeyo, onarweela wa Yehova yoowo onawerya onivaha “owerya woopwahaxa.” (2 Ako. 4:7) Mu yoohuserya yeela, nnahaala woona mikhalelo mixexe seiho Yehova onanivaheiye wi anikhaviherye ovilela. Nnahaala woona tho echu nnaphwanelaahu weera wi nikumihevo mphurelo wa yeeyo owo onivanheiye.

NIVEKELO

3. Ntakhara heeni nnanwerya oloca wi nivekelo echu yootikhiniha?

³ Yehova oovaha yamahala yootikhiniha yeeyo enahaala onikhaviherya ovilela. Owo oheeriha okhala wooweryeya wi hiyaano nloceke ni yoowo, naamwi nri oocheka. (Ahe. 4:16) Muupuwele ela: Nnawerya ovekela wa Yehova wa elukuluku vyakala ni wa mwaha vyakala. Owo onanwerya oniwiriyana mu elocelo eri yoothene nnipuro nri noothene, naamwi nri mukhatiihu naari nri mukariposo. (Yona 2:​1, 2; Saw. 16:​25, 26) Wakhala wi nri awuukhuwaxa nihinawerya ophwanya masu a oloca moonelo ahu, Yehova onanwerya wiiwexexa echu nnachunaahu oloca. (Aro. 8:​26, 27) Mweeparipari, ti yootikhiniha owerya oloca ni Yehova!

4. Ntakhara heeni nnanwerya oloca wi mavekelo ahu ooveka ovilela eri mwawiiwanana ni yookhwela ya Yehova?

⁴ Mmasu awe Yehova onnanroromeliha wi “moohipwacha yeeyo nnavekaahu mwawiiwanana ni yookhwela awe, owo onnaniiwa.” (1 Yoh. 5:14) Nnanwerya omveka Yehova nikhaviheryo wi nivilele? Aa! Weerano yeeyo enniiwanana ni yookhwela awe. Ntakhara heeni nnalocaahu yeela? Yehova olonce wi natitelela okhala oororomeleya, owo onanwerya omwaakhula Satana Musaserya. (Mas. 27:11) Ohiya yeeyoru, Piipiliya olonce wi Yehova onnachuna ‘wooniherya ikuru sawe wa yaale arino murima wawookololowa wa yoowo.’ (2 Math. 16:9) Mwawiihiiha, nnaphwanela ororomela wi Yehova onnavaha owerya wawe achunaka onikhaviherya ovilela.—Yes. 30:18; 41:10; Luka 11:13.

5. Ti mwawiihai nivekelo nnahaalaaya onivaha murecele wa mmuupuweloni? (Yesaya 26:3)

⁵ Piipiliya olonce wi vaavaa nnavekelaahu moohihiyererya vooloca sa sawuukhula sahu, ‘murecele wa Muluku yoowo opwanhe wiiwexexa woothene, onarwa okhapelela mirima sahu vamoha ni miyuupuwelo sahu.’ (Afi. 4:7) Muthokororye eyo enataphulelaaya. Achu yaawo ahinamurumeela Yehova annahoolela makacamiho oohiyanahiyana nave anneererya mikhalelo soohiyana hiyana wi ekhaleno murecele wa mmuupuweloni. Ntoko yootakiherya, akina annapharihela mukhalelo mukina wa waalikhela wi emalihe muupuwelo a miyuupuwelo soothene, ophitaanyerya wuukhuwa. Vaavaa muchu oneereiyeno ichu seiha ahivareryelaka muupuwelo awe onanwerya ovoloweliwa ni masololo. (Mulikanyihe ni Mateyu 12:​43-45.) Ohiya yeeyo, murecele yoowo Yehova onanivaheiye vaavaa nnavekelaahu onnapwahaxa murecele ori woothene yoowo nnapwanyaahu orweela mu wuupuwelela. Ohiya yeeyo, murecele yoowo Yehova onanivaheiye vaavaa nnavekelaahu, onnapwahaxa murecele ori woothene yoowo nnaphwanyaahu orweela mu wuupuwelela. Vaavaa nnavekelaahu wa Yehova, ninnooniherya wi ninnamuroromela yoowo nave tho owo onnanivaha “murecele woohimala.” (Mwaalakhanye Yesaya 26:​3, TNM.) Mukhalelo mmoha Yehova oneereiyeno yeeyo, ori moorweela wa onuupuxerya iparipari seiho nihusenryaahu mmasu awe. Iparipari seiha sinnamaaliha muupuwelo ahu ni murima ahu nthowa nawi ninnasuwela wi Yehova onnanipwacha nave tho onachuna wi nikhumelele phaama.—Sal. 62:​1, 2.

6. Ti mwawiihai munahaalaanyu opharihela phaama yamahala ya nivekelo? (Moone tho eruku.)

⁶ Tiheeni munaphwanelaanyu weera? Vaavaa munahoolelaanyu yaweeha ya nroromelo, ‘mumvonyerye Yehova wuukhuwa wanyu.’ (Sal. 55:22) Mvekele mvekaka tho miruku sawaakhwanela wi nwerye ovootha nikacamiho nanyu. (Mas. 2:​10, 11) Ohiya yeeyoru, muhirwe mucuwale omuthamalela Yehova mmavekelo anyu. (Afi. 4:6) Mwaavye sawooniherya sawi Yehova onnookhaviheryani variyari va saweeha sanyu nave muthamalele nikhaviheryo nawe. Naamwi nyuwaano muhooxeyaka wa nthowa na yaweeha, muhirwe mucuwale mukhalelo Yehova ookhavihenryeiyeni.—Sal. 16:​5, 6.

MASU A MULUKU

7. Ti mwawiihai yoohuserya ya Piipiliya enahaalaaya onikhaviherya ovilela?

⁷ Yehova oonivaha masu awe wi enikhaviherye ovilela. Piipiliya ookhalano soorepa sincipale seiho sinanroromeliha wi Yehova onahaala onikhaviherya. Pahiru muthokororye yootakiherya emoha. Mateyu 6:8 oni: “Muhaakumve oveka, Atiithi anyu aasuwela ichu sinoothowaani.” Yesu tolonce masu yaala, nave owo oomusuwela phaama Yehova ompwaha muchu ori oothene. Mwawiihiiha nnaphwanela ororomela wi vaavaa nnahooxeyaahu, Yehova onnasuwela yeeyo nnachunaahu nave onahaala onikhaviherya. Piipiliya ookhalano soororomeliha sa phaama sa Yehova seiho sinahaala owerya onivaha ikuru seiho nnachunaahu wi niwerye ovilela.—Sal. 94:19.

8. (1)  Mvahe yootakiherya ya nlakiheryo nimoha nenlo nnahaala onikhaviherya ovilela. (2) Tiheeni enahaala onikhaviherya wuupuwelela malakiheryo a Mpiipiliyani vaavaa nnachunnahu?

⁸ Malakiheryo a Mpiipiliyani ananwerya onikhaviherya ovilela. Mweeparipari owo ookhalano miruku soophara muteko seiho sinahaala onikhaviherya opaka soolakelela mwa miruku. (Mas. 2:​6, 7) Ntoko yootakiherya, Piipiliya onnanleela wi nihiye wuukhuwaka ni yeeyo enahaala weereya omeelo, nyenya ohiya yeeyo, nimuroromeleke Yehova mahiku oothene. (Mat. 6:34) Wakhala wi ninnamwaalakhanya Piipiliya mahiku oothene, ni wuupuwelela mwawiixeela yeeyo naalakhannyaahu, onamukhala wookhweya wuupuwela malakiheryo a Mpiipiliyani vaavaa nnachunaahu opaka yoolakelela naari vaava nnachunaahu osuwela mukhalelo wa ovilela nikacamiho.

9. Ti mwawiihai saweereya sa Mpiipiliyani inalipihaaya ororomela wahu nikhaviheryo na Yehova?

⁹ Mpiipiliyani tho ninnaalakhanyamo saweereya sa achu ntoko hiyaano, yaawo yaamuroromenle Yehova nave ekhaviheriwa ni Yoowo. (Ahe. 11:​32-34; Tiy. 5:17) Vaavaa nnuupuwelelaahu saweereya seiha, ninnaaceererya ororomela wahu wi Yehova ti “nchawelo nahu ni ikuru sahu, nikhaviheryo nnaphwanyeya mwawaakuveya mu ilukuluku sa sawuukhula.” (Sal. 46:1) Vaavaa nnuupuwelelaahu mukhalelo alapeli a Yehova yoonihenryaaya nroromelo naya mwa yoowo, ni yaatitelenlaaya omurumeela mu ilukuluku soovila, ninnaceenyereya opaka emohamoha.—Tiy. 5:​10, 11.

10. Ti mwawiihai nyuwaano munahaalaanyu opharihela phaama yoovaha ya Masu a Muluku?

¹⁰ Tiheeni munapwanelaanyu weera? Mmwaalakhanyeke Piipiliya mahiku oothene nyenya murepele soorepa seiho munoonaanyu wi ti soophariheleya wa nyuwaano. Ancipale ahoona wi yoorepa ya nihiku mukhalelo mmoha waphaama wa opacerya nihiku ni muupuwelo oolipiha a Mpiipiliyani. Murokora awiichaniwa Mariya a aahoona wi eyo yaari eparipari vaavaa asitiithi awe yaaphwanyiwaaya ni ereca ya kanser. Tiheeni yaamukhavihenrye ovilela variyari va miyeeri saya sookuchula? “Owo ooloca: wooxixelo ori woothene miyaano kaanaalakhanya Yoorepa ya Nihiku mahiku oothene ni wuupuwelela.” “Eyo yookikhaviherya mahiku oothene omuupuwelaka Yehova vamoha ni ichu seiho okihusinheiye Mmasu awe, ohiya otikitheryeya pahiru mmakacamiho.”—Sal. 61:2.

ANNIHU A MUNROROMELONI

11. Ntakhara heeni ti yoohakararya osuwela wi hanri mukhatiihu vaavaa nnavilelaahu saweeha?

¹¹ Yehova oonivaha onnaahu Weekristu wi onikhaviherye ovilela. Pahiru osuwela wi “[annihu] a elapo yoothene annahoolela masooso mamohamoha yaawo” ennanihakararya wi hanri mukhatiihu. (1 Pet. 5:9) Mweeparipari, nnanwerya ororomela wi moohipwacha nikacamiho nnahoolelaahu, akina tho aahoolela nikacamiho nimohamoha nave yaahivilela. Eyo enataphulela wi hiyaano tho nnanwerya ovilela!—Saw. 14:22.

12. Anna eni enikhaviherye hai, nave tiheeni nnaphwanelaahu weera ntakhara yaawo? (2 Akorintu 1:​3, 4)

¹² Vaavaa nnavilelaahu, anna ananwerya onilipiha. Murummwa Paulo aahisuwela wi eyo eparipari. Mu ikaarata sawe, owo aahithariha masina a achu yaawo yaamukhavihenrye vaavaa owo ahaaweryeiye okhuma vaate nave aahaathamalela. Awo yaahimvaha Paulo nihakararyo, nlipiho ni nikhaviheryo nawooneya. (Afi. 2:​25, 29, 30; Ako. 4:​10, 11) Olelo tho enanwerya weereya echu yoolikana. Vaavaa nnachunaahu nikhaviheryo wi nivilele anna ni arokora ahu ananwerya onikhaviherya; nave vaavaa awo anachunaaya nikhaviheryo hiyaano nnanwerya waakhaviherya.—Mwaalakhanye 2 Akorintu 1:​3, 4.

13. Tiheeni emukhavihenrye murokora mmoha awiichaniwa Maya ovilela?

¹³ Onnaahu Weekristu waari nlipiho ntokweene wa murokora awiichaniwa Maya. Empa awe yaahitholatholiwa mu 2020, nave voocharela aahikuxiwa wi athorihiwe nthowa na oloca sa nroromelo nawe ni achu akina. Maya ooloca: “Variyari va elukuluku yeele kaaryaaka awuukhuwaxa mmuupuweloni, anna ni arokora yaanakilikaarela ni okirepela michaka ekooniheryaka osivela waya. Miyaano kaanasuwela wi ilukuluku soothene anna ennakisivela nave awo emusi aka. Opacerya mu 2020, kiri oolekecheyaxa ni yeeyo.”

14. Tiheeni nnaphwanelaahu weera wi niphure orweela wa nikhaviheryo na anna ni arokora ahu? (Moone tho eruku.)

¹⁴ Yeeyo munaphwanelaanyu weera. Vaavaa munavilelaanyu mutitelele owaacamela anna ni arokora Eekristu. Muhoovelele oveka nikhaviheryo wa atokweene. Awo ananwerya okhala “ntoko nchawelo mu elukuluku ya echeku, ntoko nipuro nawiipithavo.” (Yes. 32:​2, TNM; enoota.) Muupuwele tho wi anninyu Eekristu tho annahoolela makacamiho. Opaka echu mooreera murima wa muchu oothoiwa, enanwerya omukhaviherya okhalano moonelo woophwanelela vaavaa onavileleiye yaweeha awe.—Saw. 20:35.

EWEHERERYO AHU

15. Ewehereryo ya omwaahiyu yaamukhavihenrye hai Yesu, nave ti mwawiihai ewehereryo ahu ya omwaahiyu enanikhaviheryaaya? (Ahepri 12:2)

¹⁵ Yehova oonivaha ewehereryo yoolipa wi enikhaviherye ovilela. (Aro. 15:13) Muupuwele mukhalelo ewehereryo yaamukhavihenryaaya Yesu mu nihiku noovilaxa mu okumi awe veelaponi yavathi. (Mwaalakhanye Ahepri 12:2.) Yesu aanasuwela wi ororomeleya wawe waahaala okhaviherya weeliha nsina na Yehova. Nave tho aanaweherya okhala vamoha ni Atiithi awe, moovira wa elukuluku arumeele vamoha ni asinna awe mu Omwene wa wirimu. Mmukhalelo mmohamoha ewehereryo ahu ya okhala ni okumi okhala wookhala mu elapo evyaani ya Muluku ennanikhaviherya ovilela makacamiho vyakala yaawo nnahoolelaahu mu elapo yeela ya Satana.

16. Ti mwawiihai ewehereryo emukhavihenryaaya murokora mmoha ovilela, nave tiheeni muhusenryaanyu ni yaweereya awe?

¹⁶ Moone mukhalelo ewehereryo ya okhala ni okumi okhala wookhala mu elapo evyaani yaamukhavihenryaaya murokora mmoha o Rusiya awiichaniwa Alla, yoowo aiyawe yaawaleliwe mukariposo eniiha eweheryaka othorihiwa. Vaavaa eyo yeeren’yaaya, Alla ooloca: “Ovekela vooloca sa ewehereryo ahu ya omwaahiyu ni wuupuwelela ennakikhaviherya ohikhala ooceecheya. Miyaano kinniiwexexa wi ala tahi makuchuwelo. Yehova onahaala waavootha amwiicani awe nave onahaala onireeliha.”

17. Nni nooniherye hai wi ninnathamalela ewehereryo yeeyo Yehova onanivaheiye? (Moone tho eruku.)

¹⁷ Yeeyo munaphwanelaanyu weera. Mvirihe elukuluku wi muupuwele omwaahiyu wootikhiniha yoowo Yehova okhapelenleiye. Mwiisaanyiherye mu elapo evyaani nave mwaanyiherye mareeliho yaawo nnahaalaahu okhalano. Nave yaweeha vyakala yeeyo nnahaalaahu ohoolela hiihaano enahaala okhala ntoko wi ti ‘yeelukuluku vakhaani ni yooveya.’ (2 Ako. 4:17) Ohiya yeeyoru, mpake owetha wanyu wi mwaaleele akina vooloca sa nroromelo nanyu. Muupuwele mukhalelo okumi oryaaya woovila wa achu yaawo ehinamurumeela Yehova, awo tho aakhalano makacamiho mancipale, nyenya hesuwenle ichu sootikhiniha seiho owo ororomelinheiye. Naamwi nyuwaano mulonce pahiru ichu savakhaani wa yaawo, munanwerya waaceenyerya ochuna osuwela sincipale vooloca sa Omwene wa Yehova ni soororomeliha sawe.

18. Ntakhara heeni nnaphwanelaahu ororomela mu soororomeliha sa Yehova?

¹⁸ Amanle ovilela saweeha sincipale, Yupu aaloca wa Yehova: “Vano koosuwela wi munnawerya opaka ichu soothene nave wi hiyaavo munuupuwelaanyu opaka eri yoohiweryeya wa nyuwo.” (Yupu 42:2) Yupu aahihuserya wi hiyaavo echu enahaala omuhiiha Yehova opaka yeeyo ororomelinheiye. Vaavaa nnuupuwelaahu wi Yehova onahaala waakhwaniherya soororomeliha sawe ni oviihavo makacamiho ahu, eyo enanwerya onivaha ikuru wi nivilele. Ntoko yootakiherya, mwaanyiherye muthiyana mmoha yoowo oniiceliwa mu iyaakha sincipale, owo onnuukhuwa nthowa nawi ooya wa matotore mancipale, nyenya haavo awenrye ompenuxa. Mwawiihiiha, owo vano onnamphwanya totore yoowo onamuleela yeeyo ene enamweeriha okhala awiiceliwa nave onnamuleela mukhalelo onahaaleiye omukhaviherya okhala phaama, mwawaakuveya owo onniisoona okhala oohakalalaxa, naamwi ahaalaka oweherya mu elukuluku vakhaani wi apenuwe. Owo vano onanwerya ovilela, asuwelaka wi ookhalano ewehereryo yawaarya,ewehereryo yawi onahaala openuwa. Mmukhalelo mmohamoha ororomela wahu mu ewehereryo ya parataiso onoorwa ennanikhaviherya ovilela.

19. Tiheeni nnaphwanelaahu weera wi nivilele?

¹⁹ Ntoko noonnaahu, Yehova onnanikhaviherya ovilela saweeha sahu moorweela wa nivekelo, Masu awe, annihu a munroromeloni ni ewehereryo ahu. Wakhala wi noopharihela phaama soovaha seiha, Yehova onahaala onihoolela wa makacamiho oothene yaawo nnahaalaahu ohoolela ophiyerya nihiku nenlo makacamiho a elapo ya Satana enahaalaaya ocakanela.—Afi. 4:13.