Mmukhaviherye Muhooleli Ahu Yesu

1. Teevi eri yookhwela ya Yehova olelo?

OLELO, yookhwela ya Muluku wi michaka saphaama sa Omwene ilaleeryiwe mu elapo yoothene. (Mar. 13:10; 1 Tim. 2:3, 4) Ola muteko wa Yehova nave mwawiihiiha owo oomuthanla Mwanawe oosiveliwa wi ahooleleke muteko yoola. Nnanwerya ororomela wi woona wi Yesu onnanihoolela, muteko woolaleerya onahaala okhwaaniheryiwa hiiha ntoko Yehova onachuneiye ehaakumve ophiya makuchuwelo.—Mat. 24:14.

2. Tiheeni nnahaalaahu othokororya mmwaha yoola?

² Mmwaha yoola, nnahaala woona ti mwawiihai Yesu onamphariheleiye “namuteko oororomeleya ni a miruku” wi avahererye yoolya yoomunepani ni waarehererya oomuchara awe ntakhara muteko mutokweene wa olaleerya wa elapo yoothene. (Mat. 24:45) Nnahaala tho woona tiheeni mmoha ti mmoha a hiyo onaphwaneleiye weera wi amukhaviherye Yesu ni namuteko oororomeleya.

YESU ONNAHOOLELA MUTEKO WOOLALEERYA

3. Owerya taani Yesu aavahiweiye?

³ Yesu tonahoolela muteko woolaleerya. Nnasuwela hai yeela? Elukuluku vakhaani ahaakumve oya wirimu, Yesu aathukumana ni oomuchara awe oororomeleya va mwaako o Kalileya. Owo aahiloca wa yaawo: “Koovahiwa owerya woothene woolamula, wirimu ni veelaponi ya vathi.” Moone yeeyo aalonceiye voocharela: “Haweni wa achu a maloko oothene, mwaapakeke oohuserya aka.” (Mat. 28:18, 19) Mwawiihiiha, opwaha ichu soothene Yesu oovahiwa owerya wa ohoolela muteko woolaleerya.

4. Ntakhara heeni nnanwerya ororomela wi Yesu onnahoolela muteko woolaleerya ophiyerya olelo?

⁴ Yesu olonce wi muteko woolaleerya ni waapaka oohuserya waahaala okhwaaniheryiwa wa “maloko oothene” nave wi aahaala okhala ni oomuchara awe “mahiku oothene ophiyerya makuchuwelo a ilukuluku.” (Mat. 28:20) Masu yaala annooniherya mookwakwaleya wi muteko woolaleerya waahaala otitelela ohooleliwa ni Yesu ophiyerya mmahiku ahu.

5. Ti mwawiihai nnakhaviheryaahu waakhwaniheryeya wa Salumu 110:3?

⁵ Yesu huukhuwa waakhanle wi yaahaala okhalawo anamalapa awaakhwanela variyari va omakuchuwelo wa mukhalelo wa ichu. Owo aanasuwela wi yooloherya ya mulipa a masalmu yaahaala waakhwanela: “Atchu anyu enarwa-yiveléla anene nihiku nanyu na’khocho.” (Sal. 110:3, NN) Waakhanle wi nyuwaano munnalaleerya michaka saphaama, munnamukhaviherya Yesu ni namuteko oororomeleya nave munnakhaviherya waakhwaniheryeya wa yooloherya yeela. Muteko onnaya vahoolo, nyenya nookhalano makacamiho.

6. Nikacamiho taani alaleeryi a Omwene anahoolelaaya olelo?

⁶ Nikacamiho nimoha alaleeryi a Omwene anakumanaayano ori wiiciwa. Alipa oomwaryeya, ahooleli a malapelo ni achu a ipoliitika annaaleela achu ancipale sawootha vooloca sa muteko ahu. Wakhala wi amusi ahu, achu naasuwenlaahu ni asinthamwene ahu oomutekoni aawokiwa ni sawootha seiha, awo ananwerya onikhinyererya ohiya omurumeela Yehova ni ohiya olaleerya. Mu ilapo ikina, amwiicani ahu ananwerya onoopopiha, onihiphela naari waaphara anna ni arokora ahu nave ophiyerya waawalela mukariposo. Hannatikhiniheya vaavaa achu ananikhalihaaya mmukhalelo yoola. Yesu aaloherya: “Achu a maloko oothene anamuwiicaani nthowa na nsina naka.” (Mat. 24:9) Wiica yoola nnahoolelaahu yawooniherya yawi nookhalano weemereryiwa wa Yehova. (Mat. 5:11, 12) Musaserya toneeriha wi niiciweke. Nyenya Yesu tooweryaxa ompwaha Satana! Nnikhaviheryo na Yesu, michaka saphaama sinnaaphwanya achu a maloko oothene. Muthokororye yawooniherya.

7. Yawooniherya taani munoonaanyu yawi Wupulula 14:6, 7 onnaakhwaniheryeya?

⁷ Nikacamiho nikina nnahoolelaahu vaavaa nnalaleeryaahu ori waaphwanya achu a ilocelo soohiyana-hiyana. Mu wuupulula murummwa Yohani aavahiweiye, Yesu aaloherya wi mmahiku ahu michaka saphaama saahaala ovootha nikacamiho nenla. (Mwaalakhanye Wupulula 14:6, 7.) Mwawiihai? Ninnaavaha achu ancipale ekari ya weemererya michaka sa Omwene. Olelo, achu orukurerya elapo enanwerya waalakhanya ikaruma inathipeleya Mpiipiliyani mu esaiti ahu jw.org woona wi sookhalamo sooleeliherya mu ilocelo opwaha 1.000! Nikhuuru Noolamulela noheemererya otaphuleliwa wa liivuru Mpuhe Okumi Okhala Wookhala! Yeeyo eri ekaruma ahu yoochuneya ya waapakano oohuserya mu ilocelo opwaha 700! Yoolya yoomunepani ennaphwanyeya tho moorweela wa ixilema sawiimukaravaariwa ntakhara achu ahiniiwa ni soolaleeryiwa sawiimwaapareiwa ntakhara achu oohoona. Ninnoona waakhwaniheryeya wa sooloherya sa Mpiipiliyani. Achu “a ilocelo soothene a maloko” annahuserya oloca “elocelo yaweela” ya eparipari ya Mpiipiliyani. (Zak. 8:23; Sof. 3:9, TNM) Soothene seiha sinnaakhwaniheryeya nthowa na ohoolela woowerya wa Yesu Kristu.

8. Sookhumelela taani irivo wa muteko ahu woolaleerya ophiyerya hiihaano?

⁸ Olelo, achu opwaha 8.000.000 mu ilapo 240 ari mmarehereryo a Yehova nave eyaakha ti eyaakha mamilyawu a achu annapatisiwa! Nyenya echu yoochuneyaxa opwaha waaca wa achu ori mikhalelo soomunepani, “muchu ahihano,” yoowo oomuchara avyaani yaala anamuwaraaya. (Kol. 3:8-10) Ancipale annahiya meecelo oonanara, ocapaheya, nlala ni nthalu. Yooloherya enaphwanyeya mu Isaiya 2:4 BNM ennaakhwaniheryeya; awo ‘hanahuserya tho meerelo a ekhotxo.’ Vaavaa nniilipixeryaahu onwara muchu ahiihaano, ninnaakhaviherya achu oya mmarehereryo a Muluku nave ninnooniherya wi nnamuchara muhooleli ahu Kristu Yesu. (Yoh. 13:35; 1 Ped. 2:12) Ichu iha hinneereya mwaayiini. Yesu onnanivaha nikhaviheryo nnachunaahu.

YESU OOMUTHANLA NAMUTEKO

9. Mwawiiwanana ni Mateu 24:45-47, tiheeni Yesu olonceiye wi yaahaala weereyaka variyari va elukuluku yookuchula?

⁹ Mwaalakhanye Mateu 24:45-47. Yesu aaloherya wi variyari va elukuluku yookuchula, owo aahaala omuthanla “namuteko oororomeleya ni a miruku” wi avahereryeke yoolya yoomunepani. Mwawiihiiha, ninnaweherya wi namuteko yoola alapeke mwakuru mmahiku ahu. Nave ti yeeyo eneereya. Muhooleli ahu onnapharihela nikhuuru nikhaani na alopwana oothanliwa wi evahererye wa achu a Muluku ni yaale anooniherya nchuno ‘yoolya yoomunepani mu elukuluku yoophwanelela.’ Alopwana yaala haniisoona ntoko aneene a nroromelo na akina. (2 Kor. 1:24) Ohiya yeeyo, awo aasuwela wi Yesu Kristu tori ‘muhooleli ni mulamuleli’ a achu awe.—Isa. 55:4.

10. Yoolaleeryiwa taani elociwe mu eparakrafo yookhavihenryeeni opacerya omurumeela Yehova?

¹⁰ Ovinyerya 1919, namuteko oororomela oorehererya soolaleeryiwa soohiyana-hiyana seiho saavanhe achu ekari ya ohuserya eparipari ya masu a Muluku. Mu 1921, namuteko aahimurehererya liivuru A Harpa de Deus wi aakhaviherye yaawo yooniherya nchuno, ohuserya mahusiheryo ari mathipelo a Mpiipiliyani. Vaavaa ilukuluku saatorokeyaaya, saanapakiwa soolaleeryiwa ikina. Yoolaleeryiwa taani yookhavihenryeeni omusuwela ni omusivela Tiithi ahu a wirimu? Apwanne yaari “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, Piipiliya Onahusiha Eheeni Chiryene?, Tiheeni Piipiliya Onanihusiheiye? naari yoolaleeryiwa ahu evyaani Mpuhe Okumi Okhala Wookhala!? Soolaleeryiwa soothene seiha saapakiwe wi inikhaviherye waapaka oohuserya. Nave iho saari seiho naachunaahu mu elukuluku saavonyiwaaya.

11. Ntakhara heeni eryaaya yoochuneya wa oothene ahu waakhela yoolya yoomunepani?

¹¹ Achu avyaani anooniherya nchuno tahi yaaworu pahi anachuna yoolya yoolipa yoomunepani. Oothene ahu ninnachuna. Murummwa Paulo oorepa: “Yoolya yoolipa ti ya achu atokweene.” Paulo ohaaceererya wi opharihela yoolya yeela yoomunepani onahaala onikhaviherya “ohiyaniha yaphaama ni yoonanara.” (Ahe. 5:14) Onanwerya okhala woovilaxa wiiwelela malakiheryo a Yehova hiihava nthowa nawi achu ancipale toonanaraxa murima. Nyenya Yesu onnavareryela waakhanle wi nookhalano ichu seiho nnachunaahu wi ntitelele olipiha nroromelo nahu. Ehime ya yoolya yeela ti Masu ooveereliwa a Muluku, Piipiliya. Namuteko oororomeleya onnarehererya ni okawa yoolya yeela acharihaka ohoolela wa Yesu.

12. Ntoko Yesu, ti mwawiihai nnacicimihaahu nsina na Muluku?

¹² Ntoko Yesu, ninnavaha ncicimiho nsina na Muluku hiiha ntoko nnaphwanelaaya. (Yoh. 17:6, 26) Ntoko yootakiherya, mu 1931 naakuxa nsina na mu Soorempwa Anamoona a Yehova. Moorweela wa weerano yeela, ninnooniherya mukhalelo nsina na Muluku nryaaya noochuneya wa hiyo nave ninnachuna wi nsuweliwe ni nsina na Atiithi ahu a wirimu. (Isa. 43:10-12) Nave ovinyerya mu Otupuru a eyaakha yeele, nsina naweela ninnaphwanyeya va ekaapa ya erevista ti erevista ya Mulipeleli. Mwawaacererya, Tradução do Novo Mundo da Bíblia Sagrada ookookiheryamo nsina na Muluku mu mapuro oophwanelela naaphwanyeyaayamo Mmasu awe. Ela ti yoohiyana vancipale ni ikerexa Seekristu seiho siviihalemo nsina nawi Yehova mu Apiipiliya aya!

YESU ONNAAREHERERYA OOMUCHARA AWE

13. Tiheeni enoolekechaani wi Yesu onnampharihela “namuteko oororomeleya ni a miruku” olelo? (Yoh. 6:68)

¹³ Orweela wa “namuteko oororomeleya ni a miruku,” Yesu oorehererya marehereryo veelaponi yavathi wi evuwihe malapelo aweela. Nyuwaano munoona hai vooloca sa marehereryo yaala? Akhweya munniisoona hiiha ntoko murummwa Pedro iisonneiye, yoowo aalonce wa Yesu ariki: “Nnii n’ye wa wani? Nyuwo murino masu a okumi woohimala.” (Yoh. 6:68) Ti woowi mmoha ti mmoha a hiyo olelo aahaaleiye okhalawo waakhanle wi hanri mmarehereryo a Yehova? Moorweela wa marehereryo yaala, Kristu onnavareryela waakhanle wi nookhalano echu eri yoothene nnachunaahu wi ntitelele okhala oororomeleya wa Muluku. Owo tho onnamvyakiha wi nikhwaaniherye orummwa ahu moophwanelela. Mwawaacererya, owo onnanikhaviherya onwara “muchu ahihano,” wi nimuhakalalihe Yehova.—Éfe. 4:24.

14. Ti mwawiihai mphunryaanyu orweela wa opaka makupa mmarehereryo a Yehova variyari va epahu ya koronaviru?

¹⁴ Yesu onnavahererya ohoolela wa miruku mu ilukuluku sookacamiha. Miphurelo sa ohoolela yoola saahooneya vaavaa epahu ya koronaviru yaapacenryaaya. Vaavaa ancipale mweelaponi yahaasuwelaaya echu ya weera, Yesu aheeriha wi naakhele ohoolela wookwakwaleya wi ntitelele okhala ookhapeleleya. Naahiceenyeryiwa waawara amaaskara vaavaa naakhalaahu mmapuro awaaciwamo ni orakamelana mukina ni mukhwaawe. Atokweene yaahiceenyeryiwa otitelela oloca ni oothene mmulokoni ni osuwela soothowa saya soomwiilini ni soomunepani. (Isa. 32:1, 2) Naanaakhela ohoolela wa waaceererya ni woolipiha orweela wa soolokoha sa Nikhuuru Noolamulela.

15. Ohoolela taani waavahiwe vooloca sa opaka mithukumano ni muteko woolaleerya variyari va epahu, ni yookhumelela taani?

¹⁵ Variyari va epahu, naahaakhela tho ohoolela wookwakwaleya vooloca sa mukhalelo wa opaka mithukumano sa muloko ni muteko woolaleerya. Mwawaakuveya, naapacerya opaka mithukumano sa Muloko, sa ekulucu ni sa muceche orweela mu interneti. Naahipacerya tho ovaha onamoona nipharihelaka ikaarata ni telefoni. Yehova aahireeliha wiilipixerya wahu. Ifiliyale sincipale saahilokoha waaceereryeya otokweene wa alaleeryi. Chiryene, ancipale yaahikhalano saweereya soolipiha variyari va elukuluku yeela.—Moone ekaaxa “Yehova Ooreeliha Muteko Ahu Woolaleerya.”

16. Tiheeni nnaweryaahu ororomela?

¹⁶ Akhweya akina yaanuupuwela wi marehereryo yaanatepiha mikhalelo sa wiikhapelela vooloca sa epahu. Nyenya wiiliwiili, yaanooneya wi ohoolela naakhelaahu waari wa miruku. (Mat. 11:19) Nave vaavaa nnuupuwelelaahu mukhalelo woosivela Yesu onaahooleleiye achu awe, ninnaroromela wi moohipwacha yeeyo enahaala weereya omwaahiyu, Yehova ni Mwanawe oosiveliwa enahaala okhala ni hiyo.—Mwaalakhanye Ahebri 13:5, 6.

17. Ti mwawiihai muniisoonaanyu vooloca sa ohooleliwa ni Yesu?

¹⁷ Ninnahakalala vancipale nthowa nawi Yesu muhooleli ahu! Hiyaano nri mmarehereryo yaawo ehiri ookawanyeya nthowa na sookhovelela, elapo ni ilocelo. Hiyaano ninnaakhela mahusiheryo mancipale orweela mmasu a Muluku nave ninnaakhela ovyakiha woothene nnachunaahu wi niphare muteko woolaleerya. Mmoha ti mmoha a hiyo onnahusihiwa mukhalelo wa onwara muchu ahiihaano nave ninnahusihiwa osivelana mukina ni mukhwaawe. Nookhalano mathowa mancipale a wiirumiha nthowa nawi Yesu muhooleli ahu!