Yooleeliherya Ya Ohuserya

Echu Taani Munaphwanelaanyu Ohuserya Woopaceryani?

Oothene ahu nrino elukuluku ya vakhaani wi nipake yoohuserya ya muchu mukhateiye. Ti mwawiihai nneeraahu nipharihele phaama elukuluku yeeyo? Yoopacerya, muhihuseryeke mwaakuveyaka. Mweeparipari, ti waphaama ohuserya ichu savakhaani moomaaleleya, ohiya ohuserya ichu sincipale mwaakuveyaka.

Voocharela, mulakelele echu munahaalaanyu ohuserya woopaceryani. (Aef. 5:15, 16) Muthokororye sooleeliherya inacharela:

• Mmwaalakhanyeke Piipiliya mahiku oothene. (Sal. 1:2) Nyuwaano munanwerya opacerya mpharihelaka yoochariha ya waalakhanyiwa wa Piipiliya wa muthukumano Okumi ni Muteko Ahu Weekristu.

• Murehereryeke yoohuserya ya Mulipeleli ni muthukumano Okumi ni Muteko Ahu Weekristu. Mweererye wiirehererya phaama wi mvahe naakhulo.—Sal. 22:22.

• Khoo, mweererye tho waalakhanya naari woona yoolya ekina yoomunepani, ntoko, irevista sa vanlakani, ixilema ni miyaha inavonyiwa mu jw.org.

• Mpake mareheryo anyu a ohuserya. Munanwerya otholathola sincipale vooloca sa nikacamiho akhweya munahoolelaanyu, akhweya minikwa seiho muryaanyuno naari mwaha vyakala wa Mpiipiliyani yoowo munachunaanyu wiiwexexa phaama. Wi mukhaleno sooleeliherya sincipale, moone makupa “Exercícios Bíblicos” mu jw.org, a Ekunya.