Yehova Onachuna wi Oothene Echaruwe

1. Ocharuwa onavolowela eheeni?

VAAVAA nnapakaahu echu yoonanara, ti woochuneya ocharuwa. Piipiliya onnaloca wi muchu onnooniherya ocharuwa vaava onakhaleiyeno ekeerelani wa nthowa na echu yoonanara yeeyo aapankeiye, omaala opaka ichu mmukhalelo yoowo ni okhala oolakelela ohuuluula yeeyo.—Mat. 3:8; Saw. 3:19; 2 Pet. 3:9.

2. Ntakhara heeni oothene nnaphwanelaahu ohuserya vooloca sa ocharuwa? (Nehemiya 8:9-11)

² Muchu oothene ori mukumi onnaphwanela ohuserya vooloca sa ocharuwa. Ntakhara heeni? Woona wi oothene ahu ninnacheka nihiku ti nihiku. Nthowa na okhala anamwane a Atamu ni Eva, mmoha ti mmoha a hiyo oorava yoocheka ni okhwa. (Aro. 3:23; 5:12) Oothene ahu na achu oocheka nave ninnaphwanela ocharuwa. Naamwi achu yaawo yaarino nroromelo noolipa, ntoko murummwa Paulo, hiwaari wookhweya wa yaawo wiivareryela wa soochunachuna soonanara. (Aro. 7:21-24) Apwanne ela enataphulela wi ilukuluku soothene nnaphwanela okhalaka oothanana wa nthowa na soocheka sahu? Hooye! Yehova ta ikharari nave onachuna wi hiyo nikhaleke oohakalala. Muthokororye yaweereya ya Ayuta a mmahiku a Nehemiya. (Mwaalakhanye Nehemiya 8:9-11.) Yehova haachuna wi awo ekhalexa oothanana wa nthowa na soocheka seiho awo yaapankaaya khalai. Owo aachuna wi awo emurumeeleke yoowo moohakalala. Yehova oosuwela wi vaavaa nnacharuwaahu, eyo ennanikhaviherya okhala oohakalala. Mwawiihiiha, owo onnanihusiha vooloca sa ocharuwa. Wakhala wi noocharuwa soocheka sahu, nnaphwanela ororomela wi Tiithi ahu aikharari onahaala onikhurumuwela.

3. Tiheeni nnahaalaahu othokororya mmwaha yoola?

³ Mmwaha yoola, nnahaala ohuserya vooloca sa ocharuwa. Nnahaala othokororya ichu raru. Yoopacerya, nnahaala ohuserya yeeyo Yehova aaleenleiye Aisarayeli vooloca sa ocharuwa. Voocharela, nnahaala ohuserya mukhalelo Yehova aakhaviheryeiye yaawo wi echaruwe. Vookuchulani, nnahaala woona yeeyo Yesu aaleenleiye oohuserya awe vooloca sa ocharuwa.

YEEYO YEHOVA AALEENLEIYE AISARAYELI VOOLOCA SA OCHARUWA

4. Tiheeni Yehova aahusinheiye nloko na Aisarayeli vooloca sa ocharuwa?

⁴ Vaava Yehova aavanheiye malamulo Aisarayeli, awo yaahiroromeliha wi yaahaala wiiwelelaka yaawo. Nave Yehova aahiroromeliha wi wakahala wi anniiwelela malamulo yaala, owo aahaala waakhapelelaka ni waareeliha yaawo. Owo aahi vooloca sa malamulo awe: “Chiryeene nlamulo kinooleelaaka olelo, hinri ociiwene wa weyo wi ohaleeleno.” (Malam. 30:11, 16, PMM) Nto waakhanle wi awo hiyiiwelenle malamulo awe naari waakhanle wi aathanla waalapela amuluku akina, owo haahaala waakhapelelaka tho nave yaahaala ohooxeyaka. Nto ela henooniherya wi Yehova aahaala waanyanyala moomalela. Awo yaanwerya ‘okookela wa Yehova Muluku aya ni owiriyana masu awe.’ (Malam. 30:1-3, 17-20) Mmasu makina, awo yaanwerya ocharuwa. Waakhanle wi awo aheerano yeela, Yehova aahaala owaacamela ni waareeliha yaawo wanaawiili.

5. Yehova oonihenrye hai wi haavelavenle ni achu awe? (2 Mamwene 17:13, 14)

⁵ Achu oothanliwa a Yehova, yaanammwareela yoowo mwawuuluulela. Awo yaanalapela soophwaniherya nave yaanapaka ichu ikina sootakhala. Ntoko yookhumelela, awo yaanahooxeya. Nto Yehova aanatitelela waakhaviherya achu awe okookela omurumeela yoowo. Wiiliwiili, owo aanaarumihela alipa a miririmu wi yaaceenyerye achu ocharuwa ni omurumeela yoowo ni murima aya woothene.—Mwaalakhanye 2 Mamwene 17:13, 14.

6. Ti mwawiihai Yehova aapharihenleiye alipa a miririmu awe wi yaakhaviherye achu ochuneya waya ocharuwa? (Moone tho eruku.)

⁶ Yehova ilukuluku soothene aanaapharihela alipa a miririmu awe wi aalopole ni owookolola achu awe. Ntoko yootakiherya, Muluku aahi moorweela wa Yeremiya: “Okikòkele miyano, weyano Isarayele òhiroromeleya. Miyo kinamolevelela ntakhara miyano ka mulipa a ikharari. Nkinyènyeya wa mahiku othene . . . osuwele sotxheka sà: weyano wohàrukunuwela Apwiya [Yehova].” (Yer. 3:12, 13, BNM) Moorweela wa Yoweli, Yehova aahi: “Mukookele wa miyo ni murima anyu woothene.” (Yow. 2:12, 13, PMM) Owo aamuleela Yesaya oloca ariki: “Rapani, mwiireerihe! Viihanvo soonanara sanyu vamiithoni vaka. Malihani soonanara.” (Yes. 1:16-19, PMM) Nave moorweela wa Esekiyeli Yehova aakoha: “Munii kinnahakalalano okhwa wa aweera soonanara? . . . Honakisivela omoona acharunwe meecelo awe akhala mukumi? Miyaano honakisivela okhwa wa muchu, . . . charuwani wi mukhale akumi” (Ese. 18:23, 32, PMM) Yehova onnatepa osiveliwa owoona achu echaruwaka nthowa nawi owo onachuna wi awo ekhale akumi, okhala wookhala! Mwawiihiiha, Yehova hanaweherya wi achu oocheka epake matorokelo ahipacenre waakhaviherya. Hankooni noone sootakiherya ikina sa seiho.

7. Apharihelaka yaweereya ya Hoseya ni mwaariye, tiheeni Yehova aahusinheiye achu awe?

⁷ Moone yeeyo Yehova aahusinheiye achu awe moorweela wa mulipa a miririmu Hoseya ni mwariye, Komeri. Amanle opaka mararuwo, Komeri aamuhiya Hoseya akusana ni mulopwana mukina. Tiheeni Yehova eenreiye? Yehova, yoowo onasuwela mirima, aahi wa Hoseya: “Hawe wamukhweleke tho mwaaraa yoole a namararuwe, orino mpwanaawe. Omukhwele yoowo ntoko miyo kinakhwelelaaka muloko wa aIsarayeli nari yaacharaka amuluku akina.” (Ose. 3:1, PMM; Mas. 16:2) Moone wi mwaara a Hoseya iiha apanke yoocheka etokweene. Naamwiihiiha, Yehova aamuleela Hoseya wi amulevelele nave amukuse wi akhale mwaariye.a Moorweela wa yootakiherya yeela, Yehova aachuna waahusiha achu mukhalelo iisooneiye vooloca sa yaawo. Naamwi nlelo awo yaapaka ichu soonanaraxa, owo aanaasivela yaawo. Owo aatitelela waarumiha alipa a miririmu awe wi yaakhaviherye awo ocharuwa ni opaka matorokelo mu okumi aya. Yootakiherya yeela ennanihusiha wi Yehova, “tonaalikhela mirima” nave owo onahaala weererya omukhaviherya muchu yoowo nlelo onapaka yoocheka etokweene wi acharuwe. (Mas. 17:3) Hankooni noone.

MUKHALELO YEHOVA ONEERERYEIYE WAAKHAVIHERYA ACHU WI ECHARUWE

8. Tiheeni Yehova eenreiye wi amukhaviherye Kayini ocharuwa? (Mapacereryo 4:3-7) (Moone tho eruku.)

⁸ Moolikana ni anamwane oothene a Atamu ni Eva, Kayini aarava ni asitiithi awe nchuno na weerano yeeyo eri yoonanara. Mwawaaceererya, Piipiliya oni vooloca sa yoowo: “Miteko sawe saari soonanara.” (1 Yoh. 3:12) Akhweya nla ti nthowa nenlo naamweerinhe Yehova ‘ohimphwacha Kayini’ vaavaa owo aavanheiye mukucho. Ohiya otoroka mukhalelo awe, “Kayini ànanariwa ni àtepa winiwa murima.” Tiheeni Yehova eenreiye voocharela? Owo aaloca ni Kayini. (Mwaalakhanye Mapacereryo 4:3-7.) Moone wi Yehova mooreera murima aaloca ni Kayini nave aamuleela wi aahaala omureeliha waakhala wi owo oopaka yeeyo eri yaphaama. Yehova tho aamulopola Kayini wi esara awe yaahaala omweeriha opaka echu yoonanara. Moothananiha, Kayini aakhooca owiriyana. Owo haaweemerenrye wi Yehova amukhaviherye ocharuwa. Woona wi Kayini haanwiriyanne Muluku, apwanne Yehova aalakelela wi haahaala tho weererya omukhaviherya muchu vyakala ocharuwa? Mweeparipari, hooye!

9. Yehova aamukhavihenrye hai Tavite ocharuwa?

⁹ Yehova aanamusivela vancipale mwene Tavite. Ophiyerya wi owo aamwiichana yoowo “muchu a vamurimani vaka.” (Saw. 13:22) Nto Tavite aapaka ichu ikina soonanaraxa, ntoko mararuwo ni wiipha. Mwawiiwanana ni Nlamulo na Mose, Tavite aaphwanela wiiphiwa. (Onam. 20:10; Nam. 35:31) Nto Yehova aanachuna omukhaviherya Tavite wi acharuwe.b Yehova aamurumiha mulipa a miririmu awe Natani wi amuxekurye mwene, naamwi Tavite ahoonihenrye eneneeryo vyakala ya ocharuwa. Natani aahipharihela niphwanaphwaniho wi amukhaviherye Tavite wiiwexexa wi owo aahipaka soocheka itokweene. Tavite aahiiwexexa wi yeeyo owo aapankeiye yaahimuthananiha vancipale Yehova nave oowo aacharuwa. (2 Sam. 12:1-14) Owo aamurepa salmu yoowo onooniherya mukhalelo aathananneiye wa yeeyo owo aapankeiye. (Masu oohulela a Salmu 51) Achu ancipale yaawo apanke yoocheka annaphwanya nihakararyo vaava anamwaalakhanyaaya Salmu yoola nave awo annacharuwa. Ninnathamalela vancipale nthowa nawi Yehova aanamusivela Tavite nave aamukhaviherya owo ocharuwa!

10. Osuwela wi Yehova toopixa murima ni hiyaano ni onnanikhurumuwela, enaweerihaani wiisoona hai?

¹⁰ Yehova onniica yoocheka ya mukhalelo ori woothene. (Sal. 5:4, 5) Nyenya, Yehova onnanisivela nave vaavaa nnachekaahu owo onnachuna onikhaviherya. Ilukuluku soothene owo onneererya waakhaviherya ophiyerya tho yaale apanke soocheka itokweene wi echaruwe ni omwaacamela yoowo. Ti yoolipiha osuwela yeela! Vaavaa nnuupuwelelaahu opixa murima ni okhurumuwela wa Yehova, ninnalakelela otitelela okhala oororomeleya wa yoowo ni ocharuwa mwawaakuveya vaavaa nnapakaahu yoocheka. Vano, nnahaala ohuserya yeeyo Yesu aahusinheiye oohuserya awe vooloca sa ocharuwa.

YEEYO OOMUCHARA A YESU YAAHUSENRYAAYA VOOLOCA SA OCHARUWA

11-12. Niphwanaphwaniho taani Yesu opharihenleiye wi anihusihe wi Yehova onnachunaxa onikhurumuwela? (Moone ekaapa.)

¹¹ Mu nsana noopacerya E.K., yaaphiya elukuluku ya orwa wa Mesiya. Ntoko etharihiwaaya mmwaha ovirale, Yehova aahaapharihela Yohani Mpatisi ni Yesu Kristu wi yaahusihe achu ochuneya waya ocharuwa.—Mat. 3:1, 2; 4:17.

¹² Vaavaa aareiye veelaponi yavathi, owo aahaahusiha achu wi Atiithi awe ennachunaxa onikhurumuwela vaavaa nnachekaahu. Yesu aahusiha nihusiheryo nenla noochuneya vaavaa aalonceiye yaweereya ya mwaana oorimeela. Mmiravo yoola aathanla ovinyavo vaate nave aapaka ichu ikina soonanaraxa. Nyenya evinrevo elukuluku, owo ‘aahiisuupuwelela’ nave aakookela owaani. Tiheeni atiithi awe yeenraaya? Yesu aaloca wi mwana owo “arwaaka hiihale ociiwene, apapa awe yaamoona emoriwano ikharari, emuchimakela, emukhupaarela, nave emvaha epeexu.” Mwaana owo haaweherya wi atiithi awe yaahaala omukhurumuwela. Mwawiihiiha, owo aahaaveka waakhanle wi awo yaahaala omweemererya okhala ntoko namuteko a vaate. Nto atiithi awe yaanachuna omulevelela yoowo. Awo yaamwiichana owo “mwanaka” nave yaamwaakhela yoowo veemusini. Atiithi awe yaahi: ‘Owo aarimeela vano ohooneya.’ (Luka 15:11-32) Vaavaa Yesu aareiye wirimu, moohikhwa minikwa, ilukuluku sincipale aanoona mukhalelo Atiithi awe yooniheryaaya niphwanya ni waakuvela waakhurumuwela yaale yaacharuwa. Yaweereya yeela Yesu onleenleiye, mweeparipari ti yoolipiha nave ennooniherya mukhalelo Tiithi ahu aikharari, Yehova, oryeiye!

13-14. Tiheeni murummwa Petru aahusenryeiye vooloca sa ocharuwa nave tiheeni aahusinheiye akina? (Moone tho eruku.)

¹³ Murummwa Petru, aahuserya mahusiheryo oochuneya orweela wa Yesu vooloca sa mukhalelo Yehova onaakhurumuweleiye yaale anacharuwa. Petru aanapaka soohesa sincipale nave Yesu aari ooreheryeya omukhurumuwela yoowo. Ntoko yootakiherya, Petru amanle okhooca wi aamusuwela Pwiya awe, owo aahitepa othanana wa yeeyo eenreiye. (Mat. 26:34, 35, 69-75) Nyenya, Yesu amanle oviihiwa mookwaani, owo aahooneya wa Petru, mwawooneya meekheiyewo. (Luka 24:33, 34; 1 Ako. 15:3-5) Moohikhwa minikwa, Yesu aahisuwela wi Petru aacharuwa nave aahimuroromeliha yoowo wi aahimukhurumuwela.—Mmoone Marku 16:7.

¹⁴ Petru aahiiwexexa yootaphulela ya ocharuwa ni okhurumuweliwa. Mwawiihiiha, owo aari ooreheryeya waahusiha akina vooloca sa yeeyo. Elukuluku vakhaani emanle efesta ya Pentekosti, Petru aahiloca mwaha wa nikhuuru na Ayuta oohiroromela yaawo yeerinhe wi Mesiya iiphiwe. Owo aahiloca wa yaawo ariki: “Mwawiihiiha, charuwani nave murukunuxe murima wi ixipihiwe soocheka sanyu, hiihaa, munamwaakhela ilukuluku sookurumuxa murima sinarweela wa Yehova.” (Saw. 3:14, 15, 17, 19) Petru aahusiha wi namacheka onnacharuwa moorweela wa ookookela oculi. Ela enataphulela wi owo onnatoroka muupuwelo awe woonanara, onnahiya opaka yeeyo eri yoonanara ni onnapacerya opaka yeeyo enamuhakalaliha Muluku. Owo tho aahooniherya wi Yehova aanwerya okhurumuwela soocheka saya naari weeriha wi soocheka saya sicakanele moomalela. Nave iyaakha sincipale ohoolo waya, Petru aahaaroromeliha Akristu ariki: “Yehova . . . toopixa murima ni nyuwo, woona wi hanachuna wi muchu mmoharu mano atoloxiwe, nto onachuna wi oothene erukunuxe murima.” (2 Pet. 3:9) Ela yoorormeliha yaphaamaxa wa Akristu vaavaa awo anapakaaya soocheka, naamwi iho iri itokweene!

15-16. (1) Murummwa Paulo aahusenrye hai vooloca sa ocharuwa? (1 Timotiyu 1:12-15) (2) Tiheeni nnahaalaahu othokororya mmwaha onacharela?

¹⁵ Paulo o Tarsu aapaka ichu sincipale soonanara. Owo aanawiikara moowali oomuchara oosiveliwa a Kristu. Akristu ancipale mwawooneya yuupuwela wi owo haahaala otorokeya. Nto Yesu aanasuwela wi Paaulo aahaala otorokeya ni ocharuwa. Owo ni Atiithi awe yaahoona makhalelo aphaama a Paulo. Yesu aaloca: “Mulopwana ola yookuxerya yoothanliwa wa miyaano.” (Saw. 9:15) Ophiyerya wi Yesu aapharihela yootikhiniha wi amuhoolele Paulo woocharuwani. (Saw. 7:58–8:3; 9:1-9, 17-20) Paulo aacharuwa nave akhala Mukristu. Yesu aamvaha muteko wi apake ntoko murummwa. Paulo ilukuluku soothene aanaloca mukhalelo aathamaleleiye nthowa nawi Yehova ni Yesu yaamooniherya mahala ni ikharari. (Mwaalakhanye 1 Timotiyu 1:12-15.) Paulo aahi wa anna ni arokora awe: ‘Muluku, mu mahala awe onneererya wookerihaani woorukunuxani murima.’—Aro. 2:4.

¹⁶ Mu ekwaha emoha, Paulo aahiiwa wi muloko wo Korintu waanamweemererya mulopwana yoowo aapaka ocapeheya otitelela okhala mmulokoni. Tiheeni Paulo aaleenleiye awo weera? Orweela wa yeeyo owo aalonceiye, ninnahuserya mukhalelo Yehova onooniheryeiye osivela vaavaa onaalakeiye alapeli awe ni mukhalelo onooniheryeiye ikharari vaavaa awo anacharuwaaya. Nave nnahaala ohuserya mukhalelo nneeraahu nimutakiherye yoowo. Mmwaha onacharela, nnahaala othokororya yeeyo yeeren’ye mmuloko wo Korintu.