Mweemererye Okhurumuwela wa Yehova

1-2. Otaphuwa taani enakhalaayano anamacheka echarunwe? (Moone tho ekaapa.)

MWENE Tavite aanasuwela yeeyo eneereya wakhala wi muchu onniiphwanyerya mathowa ntakhara soocheka sa khalai. (Sal. 40:12; 51:​3, masu oohulela) Owo aahipaka soocheka itokweene mu okumi awe. Mwawiihiiha, owo aahooniherya ocharuwa weeparipari nyenya Yehova aahimukhurumuwela. (2 Sam. 12:13) Tavite aahihakalala vaavaa aasuwenleiye wi Yehova aahimukhurumuwela.—Sal. 32:1.

² Hiiha ntoko Tavite, nnanwerya wiisoona okhala ootaphuwa vaavaa nnaakhelaahu ikharari sa Yehova. Naamwi nipanke yoocheka etokweene, ti yoohakalaliha osuwela wi Yehova onahaala onikhurumuwela wakhala wi noocharuwa moomalela, omveka wi anilevelele, waaleela atokweene ni opaka owetha wahu wi nihikookele opaka yoocheka emohamoha! (Mas. 28:13; Saw. 26:20; 1 Yoh. 1:9) Nyenya ti yoolipiha osuwela wi onnalevelela moomalela ntoko wi yoocheka eyo hiyintonko weereya!—Ese. 33:16.

3-4. Murokora mmoha iisoonne hai amanle opatisiwa, nave tiheeni nnahaalaahu othokororya mmwaha yoola?

³ Vakina vaya, akina annoona okhala woovila weemererya okhurumuwela wa Yehova. Moone yeeyo yeeren’ye ni Jennifer, Yoowo aphuiwe mu eparipari. Vaavaa owo innunweiye, aahiivoliiherya meecelo oonanara nave aaneerano eyo moovitheya. Iyaakha vakhaani ohoolo waya, aahimukookela Yehova nave apatisiwa. Owo ooloca: “Khalai, ikwaha sincipale kaanacapaheya, ohapaliwa, nave tho kaakhala oonyeenyeya, nyenya tho ophwanya ikhorowa yaari echu yoochuneyaxa wa miyaano. Mmuupuweloni mwaka, miyaano kaanasuwela wi wakhala wi kooveka nikhurumuwelo nave kicharuwa, mukucho wa Yesu onamukeeliha. Nyenya miyaano nkaawerya olekecheya mmurimani mwaka wi kaahikhurumuweliwa.”

⁴ Apwanne vakina vaya munnoona okhala woovila olekecheya mmurimani mwanyu wi Yehova ohookhurumuwelani soocheka sanyu sakhalai? Yehova onachuna wi niisooneke okhala ookhapeleleya mu ikharari sawe hiiha ntoko Tavite. Mu yoohuserya yeela, nnahaala woona ntakhara heeni ninnaphwanela weemererya okhurumuwela wa Yehova ni echu enahaala onikhaviherya weerano yeeyo.

NTAKHARA HEENI NINNAPHWANELA WEEMERERYA OKHURUMUWELA WA YEHOVA?

5. Satana onachuna wi neemereryeke eheeni? Mvahe yootakiherya.

⁵ Orweela mu weemererya okhurumuwela wa Yehova, nnanwerya osepa omorela mmiraakho sa Satana. Muupuwele wi Satana onahaala opaka soothene onawereiye wi anihiihe omurumeela Yehova. Wi aakhwaniherye yoolakelela awe, Satana onanwerya oneeriha weemererya wi soocheka sahu ti sootepaxa nave Yehova hawerya onilevelela. Moone yeeyo yeeren’ye ni mulopwana o Korintu yoowo aaviihiwe mmulokoni nthowa na opaka mararuwo. (1 Ako. 5:​1, 5, 13) Ohoolo waya, owo aahicharuwa nyenya Satana aachuna wi anna a mmulokoni ekhooce omulevelela mulopwana ole, nave ehimwaakhele wanaawiili mmulokoni. Mu elukuluku emohamoha, Satana aakhwela wi mulopwana yoole aacharunwe ooneke wi harwa akhurumuweliwa, ‘wi avoothiwe ni othanana woopwaha mphimo’ ophiyerya ohiya omurumeela Yehova. Mweeparipari tiyeeyo ene Satana aachuneiye. Olelo tho, Satana onachuna wi niisooneke wi Yehova harwa anikhurumuwela soocheka sahu, wi nihiye omurumeela Yehova. Nyenya hanneemererya yeeyo “woona wi noosuwela ovyaka wawe.”—2 Ako. 2:​5-11.

6. Tiheeni enahaala onikhaviherya ohiya wiiphwanyerya mathowa?

⁶ Mweeparipari wakhala wi ninneemererya okhurumuwela wa Yehova, nnahaala ohiya wiiphwanyerya mathowa. Wakhala wi noocheka ninniiphwanyerya mathowa. (Sal. 51:17) Eyo ti yaphaama. Yawuupuxerya ahu ya murima enanwerya onceenyerya opaka soolakelela saphaama wi nookolole mukhalelo ahu. (2 Ako. 7:​10, 11) Nyenya wakhala wi nootitelele wiiphwanyerya mathowa, nnanwerya okhala ooceecheya ophiyerya nihiye omurumeela Yehova. Vaavaa nneemereryaahu okhurumuwela wa Yehova nnahaala ohiya wiiphwanyerya mathowa. Mwawiihiiha nnaphwanela omurumeelaka Yehova mmukhalelo yoowo onachuneiye wi nimulapeleke, ni yawuupuxerya ya murima yaweela ni ohakalala otokweene. (Ako. 1:​10, 11; 2 Tim. 1:3) Nyenya nni nlekeche hai murima ahu wi ororomeleke okhurumuwela wa Muluku?

TIHEENI ENAHAALA ONIKHAVIHERYA WEEMERERYA OKHURUMUWELA WA YEHOVA?

7-8. Mmukhalelo taani Yehova iitharinheiye wa Mose nave yoororomeliha taani eyo enanivahaaya? (Mukwaha 34:​6, 7)

⁷ Muupuwelele sa yeeyo Yehova olonceiye wa yene mukhateiye. Ntoko yootakiherya moone yeeyo Yehova aalonceiye ni Mose o mwaako Sinayi.a (Mwaalakhanye Mukwaha 34:​6, 7.) Naamwi Yehova aarino mikhalelo sincipale saphaama, owo aahithanla omuleela Mose wi ‘ka Muluku a ikharari, ni amahala.’ Apwanne Muluku a mukhalelo ntoko yoola aanwerya okhooca omukhurumuwela mulapeli awe ocharunwe? Hooye! Wakhala wi Yehova hamukhurumuwenle muchu ntoko yoola, owo aahaala okhala oonanara murima ni oohikhalano ikharari. Nyenya Yehova harwa eerano yeeyo.

⁸ Nnaphwanela ororomela wi vaavaa Yehova olonceiye wi ta ikharari, owo onaloca eparipari woona wi hanootha. (Sal. 31:5) Ntakhara heeni nnaphwanelaahu weemererya masu awe. Wakhala wi munnoona okhala woovila ohiya wiiphwanyerya mathowa, mwiikohe: ‘Miyaano kinneemererya wi mweeparipari Yehova ta ikharari ni aniphwanya nave harwa akhooca omukhurumuwela namacheka ori oothene ocharunwe? ‘Vano miyaano nkinaphwanela weemererya wi owo ookikhurumuwela?’

9. Enataphulela eheeni okhurumuweliwa soocheka sanyu? (Salmu 32:5)

⁹ Muupuwele sa yeeyo Yehova aaveerenleiye alipa oomurepa Piipiliya vooloca sa okhurumuwela wawe. Ntoko yootakiherya, muthokororye mukhalelo namarepa a Piipiliya Tavite aatharinheiye okhurumuwela wa Yehova. (Mwaalakhanye Salmu 32:5.) Tavite aahi: “nyuwo mwaalevelela yoohesa ya soocheka saka.” Masu a Eheepri ataphuleliwe “olevelela” ananwerya otaphulela “oviiha, oviihavo,” naari “oteexa.” Mwawiihiha, vaavaa Yehova aamulevelenleiye Tavite, owo isoonne ntoko wi Yehova aviinhevo niphuta noohokola vamuru vawe nenlo owo aateenxeiye. Tavite aanwerya okhala oohakalala nthowa na osuwela wi Yehova aamulevelela moomalela. (Sal. 32:​2-4) Nnanwerya okhalano ohakalala woolikana. Hannaphwanela otitelela wiisoonaka moonanara nthowa na yeeyo neenraahu. Ohiya yeeyo, nnaphwanela okhala oohakalala wa nthowa na Yehova oviihavo niphuta noohokola moorweela wa onilevelela moomalela.

10-11. Masu awi: “oorehereya olevelela” enanihusiha eheeni vooloca sa Yehova? (Salmu 86:5)

¹⁰ Mwaalakhanye Salmu 86:5. Tavite ooloca wi Yehova ori “oorehereya olevelela.” Eyo enataphulela wi Yehova hanaakuvela onyeenyeya vaavaa nnapakaahu soohesa, nave owo ilukuluku soothene ori oorehereya waalevelela yaale echarunwe. Ntakhara heeni owo oneereiyeno yeeyo? Makupa makina a eversikulu enaloca wi: “Osivela wanyu woororomeleya otokweene wa oothene yaale anawiichanaani” Mmwaha ovirale noohuserya wi Yehova onnaroromeliha owooniherya osivela wawe woororomeleya yaale enamusivela nave harwa aahiya. Aceenyeriwaka ni osivela wawe woororomeleya, owo onahaala ‘waakhurumuwela’ anamacheka oothene oocharuwa. (Yes. 55:​7, PMM.) Waakhanle wi nyuwaano munnoona okhala woovila weemererya okhurumuwela wa Yehova mwiikohe: ‘Apwanne kinnaroromela wi Yehova tookhurumuwela—nave wi onnakhala oorehereya waakhurumuwela oothene yaale echarunwe enakhuwela wa yoowo evekaka ikharari? Apwanne nkinaphwanela weemererya wi owo aakikhurumuwela vaavaa kaakhuwenlaaka wa yoowo kivekaka ikharari?’

¹¹ Nnanwerya ophwanya nihakararyo moorweela wa osuwela wi Yehova onniiwexexa moomalela mukhalelo ahu woohiphaameya. (Sal. 139:​1, 2) Eyo ennakhala yawooneya mu aliivuru akina a salmu a Tavite yaawo tho enanikhaviherya weemererya okhurumuwela wa Yehova.

MUHICUWALE YEEYO YEHOVA ONUUPUWELEIYE

12-13. Mwawiiwanana ni Salmu 103:​14, tiheeni Yehova onuupuweleleiye wa hiyaano, nave tiheeni eyo enaniceenyeryaaya weera?

¹² Mwaalakhanye Salmu 103:14. Tavite ooloca wi Yehova “onnuupuwela wi hiyo na nchupi.” Ni masu yaala Tavite onnathariha nthowa nimoha nnamweeriha Yehova okhala ooreheryeya waakhurumuwela alapeli awe echarunwe: Owo ilukuluku soothene onniiwexexa mukhalelo ahu woohiphaameya. Wi niiwexexe phaama eyo hankooni noone vakhiviru khiviru masu a Tavite.

¹³ Tavite ooloca wi Yehova “oosuwela phaameene mukhalelo nipakiwaahu.” Awo yaanpaka Atamu “ni nchupi na echaya” mwawiihiiha owo oosuwela mukhalelo achu epakiwaaya ni yeeyo awo enachunaaya. Ntoko yootakiherya, awo ennachuna olya okona ni omumula. Naamwi achu oophaameya ennachuna ichu seiya. (Map. 2:7) Nthowa na Atamu ni Eva ocheka, achu aakhala nchupi mmukhalelo mukina. Ntoko anamwane awe noorava yoocheka yeeyo enaneeriha opaka yoocheka. Yehova oosuwela sa yeeyo phaameene. Nyenya vaavaa Tavite aalonceiye wi Yehova onnuupuwela wi hiyaano na nchupi, owo tho aachuna oloca wi Yehova oosuwela wi hiyaano na achu oocheka ninnapaka soohesa. Nnanwerya opaka mukwasu yootaphulela ya masu a Tavite mmukhalelo ola: Yehova onniiwexexa wi ikwaha ikina nnahaala ohesaka; vaava nnahesaahu owo onnaceenyereya waakhulela ocharuwa wahu weeparipari anooniheryaka ikharari ni onikhurumuwela.—Sal. 78:​38, 39.

14. (1) Tiheeni Tavite olonceiye vooloca sa mukhalelo Yehova onanikhurumuweleiye? (Salmu 103:12) (2) Nnahuseryavo eheeni ni mukhalelo Yehova aamukhurumuweleiye Tavite? (Moone ekaaxa “Mukhalelo Yehova onakhurumuweleiye ni ocuwala.”)

¹⁴ Tiheeni nnahaalaahu ohuserya mu Salmu 103 vooloca sa mukhalelo Yehova onanikhurumuweleiye? (Mwaalakhanye Salmu 103:12.) Tavite olonce wi vaavaa Yehova onanikhurumuweleiye, Owo onnakuha soocheka sahu “ocai hiiha ntoko [onakhumawo] nsuwa orakamelannaaya ni [nnaneelaayawo].” Mmukhalelo mukina onakhumawo nsuwa wootepa orekameelana ni onaneelawo nsuwa mmukhalelo nihinaanyiheryaahu nave makupa oomeeli ala henawerya okumana. Eyo enanihusiha eheeni vooloca sa soocheka seiho Yehova onakhurumuweleiye? Liivuru mmoha onaloca sa eversikulu yeela onnathariha wi Muluku onnarihela soocheka sahu ocai wa hiyaano, ntoko winkha wa echu yeeyo erimeenle moomalela: “Mwawiihiiha nnanwerya ororomela wi owo harwa uupuwelela soocheka sahu.” Vakina vaya winkhela wa—yoolya naari winkhela wa echu ekina enanwerya oneeriha wuupuwela echu yeeren’ye khalai. Nyenya vaava Yehova onakhurumuweleiye soocheka sahu ori ntoko wi henahalaruvo naari mano echu ekhaani yeeyo enamuupuxerya soocheka naari opharihela ntakhara hiyaano.—Ese. 18:​21, 22; Saw. 3:19.

15. Tiheeni nnaphwanelaahu weera wakhala wi ninniiphwanyerya mathowa mu elukuluku yincipale nthowa na soohesa sahu sakhalai?

¹⁵ Ti mwawiihai masu a Tavite enaphwanyeya mu salmu 103 anahaalaaya onikhaviherya weemererya okhurumuwela wa Yehova? Wakhala wi ninniikuherya mathowa mu elukuluku yincipale wa nthowa na yoocheka evinre nnanwerya wiikoha: ‘Koocuwala yeeyo Yehova oonuupuweleiye—eyo tiwi koocuwala wi oosuwela mukhalelo aka woohiphaameya nave wi onnaakhurumuwela anamacheka echarunwe ntoko miyaano? Kinnupuwela tho yeeyo Yehova onathanleiye ocuwala—eyo tiwi kinnuupuwela soocheka seiho owo okhurumuwenleiye nave ohinahaaleiye opharihela ntakhara miyaano?’ Yehova hanatikithereya ni soocheka sahu sakhalai. (Sal. 130:3) Vaavaa nneemereryaahu okhurumuwela wa Yehova, nnanwerya wiikhurumuwela mukhatiihu wa soocheka seiho naapankaahu khalai ni otitelela oya vahoolo.

16. Mvahe yootakiherya enooniherya wi tiyawoopiha otitelela wuupuwelela soocheka seiho Yehova okhurumuwenleiye. (Moone tho eruku.)

¹⁶ Muthokororye niphwanaphwaniho nimoha. Otitelela wiiphwanyerya mathowa wa soocheka sakhalai onalika ni weeciha ekaaro oyaakano ohoolo ovareryaka va espeelyu enaweha oculi. Ti waphaama ilukuluku ikina ovaryeryaka va espeelyu enaweha oculi woona wi munanwerya osepa sawoopiha siri oculi wanyu. Nyenya wi mweeceke mookhapeleleya nyuwaano munaphwanela otikithereyaka ni ohoolo munayaanyuwo. Mmukhalelo mmohamoha, enamukhala yaphaama ilukuluku ikina wuupuwelela soohesa sahu sakhalai; eyo enanwerya onikhaviherya osepa opaka soohesa imohamoha wanaawiili. Nyenya wakhala wi ninnatitelela otikitheryeya mu soohesa sahu sakhalai, wiiphwanyerya mathowa yoowo nnakhalaahuno onanwerya onooceeliha yeeyo nnahaalaahu weera hiihaano wi nimurumeele Muluku. Ohiya yeeyo nnaphwanela otikithereyaka ni ohoolo nnayaahuwo. Nri mu ephiro yeeyo enakeriha mu ekumi yeeyo elaiheriwe mu elapo evyaani ya Muluku mummo ichu soonanara ‘sihinahaalaaya wuupuweleliwa tho.’—Yes. 65:17; Mas. 4:​25, PMM.

MUTITELELE OLEKECHA MURIMA ANYU

17. Ntakhara heeni nnaphwanelaahu otitelela olekecha murima ahu ntakhara osivela ni okhurumuwela wa Yehova?

¹⁷ Nnaphwanela otitelela olekecha murima ahu wa osivela ni okhurumuwela wa Yehova. (1 Yoh. 3:​19, enoota.) Ntakhara heeni? Nthowa nawi Satana onahaala otitelela oneeriha weemererya wi naachu oochekaxa, nave Yehova harwa anikhurumuwela naari onisivela. Mmukhalelo ori woothene yoolakelela awe, ori oneeriha wi nihiye omurumeela Yehova. Nnaphwanela oweherya wi Satana onahaala opaka owetha wawe woona wi oosuwela wi elukuluku awe ti yookhuveya. (Wup. 12:12) Hannaphwanela omuhiya wi anivoothe!

18. Tiheeni nyuwaano munaphwanelaanyu weera wi mulekeche murima anyu ntakhara osivela ni okhurumuwela wa Yehova?

¹⁸ Mwaha yoola woohooniherya yeeyo munaphwanelaanyu weera wi mulipihe nroromelo nanyu mu osivela wa Yehova. Wi mulekeche murima anyu mu okhurumuwela wa Yehova muupuwele vooloca sa yeeyo owo olonceiye wa yene mukhateiye. Muupuwele vooloca sa yeeyo owo aaverenleiye anamarepa a Piipiliya oloca sa okhurumuwela wawe. Muhicuwale wi owo oosuwela phaama ene mukhalelo anyu woohiphaameya nave onahaala wookhalihaani mwa ikharari. Nyenya muupuwele wi vaavaa owo onakhurumuweleiye onakhurumuwela moomalela. Mwawiihiiha, ni nroromelo nimohamoha ntoko aarino Tavite ntakhara ikharari sa Yehova, munanwerya oloca wi: ‘koothamalela Yehova moolevelela yoohesa ya soocheka saka!’—Sal. 32:5.