MWAHA WOOHUSERYA 7
NCIPO 15 Nimvuwihe Mwaana a Yehova!
Okhurumuwela wa Yehova—Onataphulela Eheeni wa Nyuwaano?
“Tiwi wa nyuwo toriwo okhurumuwela weeparipari.”—SAL. 130:4.
IPONTU SA VASULU
Naawaalikhelaka saweereya sakhalai sinaphwanyeya Mpiipiliyani, sinnaaceererya othamalela wahu okhurumuwela weeparipari yoowo Yehova onavahereryeiye wa mmoha ti mmoha a hiyo.
1. Ntakhara heeni okhurumuwela wa achu ikwaha sincipale ti woovila?
‘MIYAANO KINNOOKHURUMUWELA.’ Ti mwawiihai masu yaala yaahaalaaya okurumuxa murima anyu xaxaxa vaavaa nyuwaano munasuwelaanyu wi mooloca naari moopaka echu yeeyo emuhicinhe mukina? Nyenya enataphulela eheeni masu awi ‘miyaano kinnookhurumuwela’? Apwanne muchu yoowo mwaamuhicinhaanyu onachuna oloca wi onthamwene anyu wooreheryeya moomalela? Naari wi onachuna oloca wi hanachuna otitelela oloca mwaha yoowo? Okhurumuwela yoowo achu anavahereryaaya vakina vaya onanwerya okhala woovilaxa.
2. Ti mwawiihai okhurumuwela wa Yehova otharihiwaaya mu soorempwa? (Moone tho enoota.)
2 Mukhalelo Yehova onanikhurumuweleiye hiyaano achu oohiphaameya, ti woohiyanaxa ni mukhalelo hiyaano nnaakhurumuwelaahu akina. Haavo onakhurumuwela hiiha ntoko Yehova onakhurumuweleiye. Namarepa a Salmu ooloca vooloca sa Yehova ariki: “Tiwi wa nyuwo toriwo okhurumuwela weeparipari, wi mucicimihiweke.”a (Sal. 130:4) Chiryene, okhurumuwela wa Yehova tori “okhurumuwela weeparipari.” Owo onnanooniherya echu onataphulelaaya okhurumuwela weeparipari. Mu iversikulu ikina sa soorempwa sa Ehepri, anamarepa a Piipiliya yaahithariha mukhalelo Yehova onakhurumuweleiye epharihelaka masu yaawo ehintonkaaya opharihela, wi etharihe mukhalelo achu anakhurumuwelaaya.
3. Ti mwawiihai okhurumuwela wa Yehova oryaaya woohiyana ni wawihu? (Yesaya 55:6, 7)
3 Vaavaa Yehova onamukhurumuweleiye muchu, yoocheka ya muchu yoowo ennaxipiheya. Onthamwene yoowo waanananre onnarehereryeya moomalela. Okhurumuwela wa Yehova ti wawaakhwanela nave yamahala yootikhiniha.—Mwaalakhanye Yesaya 55:6, 7.
4. Ti mwawiihai Yehova onanikhaviheryeiye wiiwexexa yootaphulela ya okhurumuwela weeparipari?
4 Waakhanle wi okhurumuwela wa Yehova ti woohiyana ni wawihu, hiyaano ntoko achu oohiphaameya nni niwerye hai wiiwexexa yootaphulela yeeparipari? Yehova onnapharihela maphwanaphwaniho ooreera wi anikhaviherye wiiwexexa mukhalelo onanikhurumuweleiye. Mmwaha yoola, nnahaala ohuserya makina a yaawo. Awo anahaala onooniherya mukhalelo Yehova onaxipiheiye yoocheka, mu elukuluku emohamoha orehererya onthamwene yoowo waananarihiwe ni yoocheka. Vaavaa nnahuseryaahu mwawiixeela vooloca sa maphwanaphwaniho yaala, nnahaala wunnuwiha othamalela wahu wa Tiithi ahu a ikharari, yoowo onooniherya okhurumuwela wawe mmikhalelo mincipale.
YEHOVA ONNAXIPIHA YOOCHEKA
5. Tiheeni eneereya vaavaa Yehova onakhurumuweleiye soocheka sahu?
5 Mpiipiliyani, wiiliwiili soocheka sinnalikanyihiwa ni mirici soohokola. Mwene Tavite oothariha soocheka sawe mmukhalelo ola: “Tiwi soohesa saka sookimirya; ntoko murici woohokola, sootepa, nkinawerya oteexa.” (Sal. 38:4) Nyenya Yehova onnakhurumuwela soocheka sa achu oonanara murima yaawo acharunwe. (Sal. 25:18; 32:5) Masu Ehepri ataphuleliwe awi “okhurumuwela” mwawooneya anataphulela “ovinya” naari “oteexa.” Vaavaa Yehova onakhurumuweleiye soocheka sahu owo onnaxipiha murici woohokola, nave enakhala ntoko wi naateenxe murici woohokola mmachurini mwahu nave owo anoorola.
‘oolevelela’ (Sal. 32:5)
6. Ophiyera mweero taani Yehova anoorolaka soocheka sahu?
6 Piipiliya onnapharihela niphwanaphwaniho nikina wi ooniherye wi Yehova onnakuxa soocheka sahu arihela ocai wa hiyaano. Salmu 103:12 onnanleela ariki: “Hiiha ntoko onakhumawo nsuwa orakamelannaaya ni nnaneelaayawo, hiiha tho owo onnakuha ocai wa hiyo soohesa sahu.” Onakhuma nsuwa wootepa orakameelana ni nsuwa nnaneelaayawo. Mapuro yaala meeli hayintoko ophwanyana. Ela enataphulela wi Yehova onakuha ocai soocheka sahu mmukhalelo nihinaweryaahu waanyiherya. Ela ennanlipiha wi Yehova onnanikhurumuwela moomalela!
“Hiiha ntoko onakhumawo nsuwa orakamelannaaya ni nnaneelaayawo” (Sal. 103:12)
7. Mmukhalelo taani Piipiliya otharinheiye yeeyo Yehova oneereiyeno ni soocheka sahu? (Mikeya 7:18, 19)
7 Naamwi Yehova aniviiheryakavo soocheka sahu ni orihela ocai wa hiyo, apwanne owo onnatitelela wuupuwelela seiho? Hooye. Mwene Esekiya aahirepa vooloca sa Yehova: “Moorihela oculi wanyu soocheka saka soothene.” Hiiha ntoko enoota etharinhaaya, “moovihavo soocheka saka soothene vamiithoni vanyu.” (Yes. 38:9, 17, TNM; moone enoota.) Ela enataphulela wi Yehova onnarihela ocai wene soocheka sa oocharuwa nave owo hanuupuwelela wiili soocheka seiyo. Masu yaala ananwerya tho olociwa mmukhalelo ola: “Nyuwaano moheeriha [soocheka saka] okhala ntoko hiseeren’ye.” Nlelo Piipiliya oocicimiherya mwaha yoola mu niphwanaphwaniho nikina, nenlo nnaphwanyeya mu Mikeya 7:18, 19. (Mwaalakhanye.) Iversikulu seiha sinnaloca wi Yehova onnavonyerya soocheka sahu mphareya. Mu ilukuluku sakhalai, echu yeeyo yaamorela veeri va ephareya hiyooniwa naari mano ophwanyiwa.
“Moorihela soocheka saka soothene oculi wanyu” (Yes. 38:17, TNM)
“Munarwa murihela soocheka sahu veeri wa ephareya” (Mik. 7:19, PMM)
8. Tiheeni nihusenryaahu ophiyerya vaava?
8 Moorweela wa masu yaala a maphwanaphwaniho, ninnahuserya wi vaavaa Yehova onanikhurumuweleiye, owo onnantaphula mmurici woohokola wa soocheka sahu. Mweeparipari, hiiha ntoko Tavite olonceiye: “Oohakalala taale aleveleliwe soonanara saya, nave ixipihiwa soocheka saya; oohakalala muchu yoowo Yehova oneereiye ahimweere oocheka.” (Aro. 4:7, 8) Ola okhurumuwela weeparipari!
YEHOVA ONNARAPIHA SOOCHEKA SAHU
9. Ti mwawiihai Piipiliya onanikhaviheryeiye woona wi Yehova onnanikhurumuwela moomalela?
9 Moorweela wa woopola, Yehova onnamaliha soocheka sa yaale ari oocharuwa, moone mukhalelo Piipiliya onathariheiye vooloca sa yeeyo Yehova oneereiye. Mpiipiliyani, ninnaalakhanya wi Yehova onnarapiha ni otuluxa soocheka sahu. Eyo ennakumiherya weelihiwa wa mulipa oocheka. (Sal. 51:7; Yes. 4:4; Yer. 33:8) Yehova mwaneene onnathariha sookhumelela sa mwaha ene yoola: “Soocheka sanyu, nari iphilivinle ntoko nikhami, inamweelihiwa ntoko maralala; nari isheenre ntoko ekocokhwa, inamweela ntoko nchoce.” (Yes. 1:18, PMM) Ti woovila oxipiha mathepa oopilivila va ekuwo yaweela. Mwawiihiiha, moorweela wa niphwanaphwaniho nenla Yehova onnanroromeliha wi soocheka sahu sinanwerya orapihiwa moomalela nave hasirwa suupuweleliwa.
“Soocheka sanyu, nari iphilivinle ntoko nikhami, inamweelihiwa ntoko maralala; nari isheenre ntoko ekocokhwa, inamweela ntoko nchoce” (Yes. 1:18, PMM)
10. Ti mwawiihai Piipiliya onathariheiye mukhalelo Yehova onanikhurumuweleiye mwa mahala?
10 Ntoko etharihiwaaya mmwaha ovirale, soocheka sinnalikanyihiwa tho ni ivaale. (Mat. 6:12; Luka 11:4) Mwawiihiiha, ikwaha soothene nnamuchekelaahu Yehova, onakhala ntoko wi nnaaceererya evaale. Nookhalano evaale etokweene wa yoowo! Nyenya vaavaa Yehova onanikhurumuweleiye, ori ntoko olevelela evaale, yeeyo naahaalaahu okohiwa hiyo aneene. Owo hanakookela wuupuwelela soocheka seiyo okhurumuwenleiye. Hiiha ntoko muchu onakhaleiye oohakalala vaavaa onaleveleliweiye ivaale sawe, hiyaano tho ninnakhala oohakalala vaavaa Yehova onanikhurumuweleiye!
“Mukhurumuwele ivaale sahu” (Mat. 6:12)
11. Enataphulela eheeni vaavaa Piipiliya onaloceiye wi soocheka sahu ‘sooxipihiwa’? (Saweeriwa ti Arummwa 3:19)
11 Yehova tahi wi pahiru onoona olevelela ivaale naari soocheka sahu, nyenya owo onnaxipiha moomalela. (Mwaalakhanye Saweeriwa ti Arummwa 3:19.) Vaavaa nnaleveleliwaahu evaale nnanwerya waanyiherya eneneeryo ya X yeeyo enooniherya oleveleliwa wa evaale. Mwawiihiiha, achu oothene ananwerya woona manuumeru eri veeri va eneneeryo ya X. Nyenya oxipiha echu ti woohiyana. Etinta yeeyo achu a mu elukuluku yakhalai yaapharihelaaya, yaanwerya okhala wookhweya oxipha mwawaakuveya. Muchu aanwerya okuxa exiponxa yoonaana ni opuphucano masu yaale yaarempwale. Mwawiihiiha, vaavaa evaale ‘yaaxipihiwaaya,’ eyo yaanacakanela moomalela. Achu hiyaawerya woona yeeyo yaarempwale woopaceryani. Waakhala ntoko wi hayintonko okhalavo evaale. Ninnathamalela vancipale moorweela wa osuwela wi vaavaa Yehova onakhurumuweleiye soocheka sahu, eri ntoko wi iho hasintoke weereya!—Sal. 51:9.
“Wi ixipihiwe soocheka sanyu” (Saw. 3:19)
12. Tiheeni nnahuseryaahu nniphwanaphwaniho na neeku nooripa?
12 Wookhalavo tho mukhalelo mukina yoowo Yehova onanikhurumuweleiye soocheka sahu moomalela. Owo onnathariha: “Kinamuxipiha soocheka saa ntoko wi kikhunenle nneeku Nave soocheka saa ntoko wi kikhunenle nneeku ntokweene.” (Yes. 44:22, TNM) Vaavaa Yehova onakhurumuweleiye soocheka onakhala ntoko wi onapharihela neeku nooripa wi avithe soocheka sahu ni yoolakelela yawi sihooneyeke.
“Kinamuxipiha soocheka saa ntoko wi kikhunenle nneeku” (Yes. 44:22, TNM)
13. Vaavaa Yehova onakhurumuweleiye soocheka sahu nniisoona hai?
13 Eyo enataphulela eheeni wa hiyo? Vaavaa Yehova onanikhurumuweleiye soocheka shu, hannaphwanela wiisoonaka wi nlelo nooteexa murici mutokweene wa soocheka mu okumi ahu. Orweela wa nikhami na Yesu Kristu, ivaale sahu sooleveleliwa moomalela. Vaavaa Yehova onanleveleleiye soocheka sahu, enakhala ntoko wi hanintonkeru ocheka. Ola onataphulela okhurumuwela weeparipari yoowo onarwa wa Yehova vaavaa nnacharuwaahu soocheka sahu, nave ti hiiha owo onanikhurumuweleiye.
YEHOVA ONNANEEMERERYA NTOKO ASINTHAMWENE AWE A VAMURIMANI WANAAWIILI
Okhurumuwela yoowo Tiithi ahu a wirimu onanivahereryeiye onnaneeriha okhalano onthamwene waphaama ni yoowo (Moone eparakrafu 14)
14. Ntakhara heeni nnaphwanelaahu ororomela okhurumuwela wa Yehova? (Moone tho iruku.)
14 Okhurumuwela weeparipari onarweela wa Yehova, onnaneemererya okhalano onthamwene waphaama ni yoowo. Eyo ennanikhaviherya osepa wiikuherya mathowa. Hannaphwanela okhala awoova nuupuwelaka wi Yehova onnanikuherya mathowa moovitheya nave aavyaka mukhalelo wa onlaka. Owo harwa eerano yeeyo. Ntakhara heeni nnaphwanelaahu omuroromela Yehova vaavaa onaloceiye wi oonikhurumuwela? Mulipa a miririmu Yeremiya onnamuloca Yehova ariki: “Kinamukhurumuwela soonanara saya nave nkirwa kuupuwela tho soocheka saya.” (Yer. 31:34, PMM) Alocaka masu yaala, murummwa Paulo oopharihela masu mamohamoha ariki: “Nkirwa tho kuupuwela soocheka saya.” (Ahe. 8:12) Nyenya eyo chiryene enataphulela eheeni?
“Nkirwa kuupuwela tho soocheka saya” (Yer. 31:34, PMM)
15. Mmukhalelo taani Yehova ohinuupuweleleiye soocheka sahu?
15 Mpiipiliyani, masu awi “wuupuwelela” tahi wi ilukuluku soothene enalociwa sa muchu onuupuwelela echu naari wuupuwela vooloca sa yeeyo. Moohiyana ni yeeyo, enanwerya ovolowela wa muchu yoowo oneera echu. Aweera soonanara yoowo aathomeiwe va mwirini mmakupa a Yesu, aaveka ariki: “Yesu, mukuupuwele vaavaa muneeraanyu mvolowe mu Omwene anyu.” (Luka 23:42, 43) Owo tahi wi aamveka Yesu wi amuupuwele mu elukuluku ene yeele. Nyenya Yesu aahimuleela mulopwana owo wi aahaala omviiha. Mwawiihiiha, vaavaa Yehova onaloceiye wi harwa uupuwelela soocheka sahu, owo onachuna oloca wi harwa apaka echu wi anilake. Owo harwa anilaka omwaahiyu wa nthowa na soocheka seiyo onikhurumuwenleiye.
16. Ti mwawiihai Piipiliya onathariheiye otaphuwa yoowo onarweela mu okhurumuwela weeparipari?
16 Vaavaa Yehova onanikhurumuweleiye ninniisoona okhala ootaphuwa, nave Piipiliya onnapharihela niphwanaphwaniho nikina wi anikhaviherye wiiwexexa yeeyo. Wa nthowa na ohiphaameya wahu, ninnalikanyihiwa ni “akapuro a yoocheka.” Nyenya orweela wa ikharari sa okhurumuwela wa Yehova, nri ntoko akapuro yaawo ‘ataphuliwe wa yoocheka.’ (Aro. 6:17, 18; Wup. 1:5) Vaavaa nnasuwelaahu wi Yehova oonikhurumuwela, nnanwerya okhala oohakalala ntoko kapuro otaphuliwe.
“Vano mutaphuliwaanyu wa yoocheka” (Aro. 6:18)
17. Ti mwawiihai okhurumuwela onakumiheryaaya openuxiwa? (Yesaya 53:5)
17 Mwaalakhanye Yesaya 53:5. Piipiliya onaloca wi woona wi naachu oocheka, nri ntoko achu arino ereca yookhwano. Wa nthowa na mukucho yoowo Yehova onivanheiye orweela wa Mwanawe, Yehova oonipenuxa. (1 Pet. 2:24) Vaavaa nnachekaahu ninnananariha onthamwene ahu ni Yehova, nyenya wa nthowa na woopola owo onanwerya onikhurumuwela, nave nnanwerya okhalano onthamwene wawaacameleyaxa ni yoowo wanaawiili. Hiiha ntoko muchu yoowo onapenuxiwa ereca awe etokweene onakhaleiyeno ohakalala otokweene, hiyaano tho ninnakhalano ohakalala otokweene vaavaa onthamwene ahu ni Yehova onarehereryiwaaya ni okhalano weemereryiwa wanaawiili.
‘Wa nthowa na makhwaca awe, noopenuxiwa’ (Yes. 53:5, TNM)
OKHURUMUWELA WA YEHOVA ONANIVOLOWELA HAI?
18. Tiheeni nihusenryaahu ni maphwanaphwaniho ooxiphela anaphwanyeya Mpiipiliyani vooloca sa okhurumuwela wa Yehova? (Moone tho ekaaxa “Mukhalelo Yehova Onanikhurumuweleiye.”)
18 Tiheeni nnahuseryaahu ni maphwanaphwaniho anaphwanyeya Mpiipiliyani vooloca sa okhurumuwela wa Yehova? Vaavaa Yehova onanikhurumuweleiye soocheka sahu, iho inakhala ntoko wi haseeren’ye nave nnanwerya okhalano ororomela wi owo harwa anihooxa ntakhara seiyo muhoolo. Eyo ennaneeriha okhalano onthamwene waphaama ni Tiithi ahu a wirimu. Mu elukuluku emohamoha, ninnuupuwela wi okhurumuwela weeparipari yamahala. Enarweela mu osivela ni mahala matokweene a Yehova, yaawo onawooniheryeiye achu oocheka. Mwawiihiiha, noosuwela wi okhurumuwela wa Yehova yamahala yeeyo owo onanivaheiye nthowa nawi onnanisivela nave tho tamahala, ohiya wi nrimphwanelela.—Aro. 3:24.
19. (1) Nnaphwanela othamalela eheeni? (Aroma 4:8) (2) Tiheeni nnahaalaahu othokororya mmwaha onacharela?
19 Mwaalakhanye Aroma 4:8. Mmoha ti mmoha a hiyo, onanwerya omuthamalela Yehova wanthowa na okhala Muluku a “okhurumuwela weeparipari”! (Sal. 130:4) Mwawiihiiha, wakhala wi ninnachuna wi Yehova anikhurumuwele, nnaphwanela tho weerakano emohamoha. Yesu ooloca: “Wakhala wi himunaakhurumuwela achu soohesa saya, Atiithi anyu a wirimu tho hiyookhurumuwelaani.” (Mat. 6:14, 15) Mwawiihiiha, nnaphwanela omutakiherya Yehova ni waakhurumuwela akina. Nni neereno hai yeeyo? Mwaha onacharela onahaala onooniherya eyo enavolowelaaya.
NCIPO 46 Ninnoothamalelaani Yehova
a Masu oopacerya a Ehepri annapharihela masu awi “okhurumuwela,” yeeyo enooniherya wi orivovo okhurumuwela omoharu weeparipari, naamwi irivovo mikhalelo mikina sa okhurumuwela. Apiipiliya ancipale hanavuwiha makupa yaala oochuneya, nyeenya Tradução do Novo Mundo das Escrituras Sagradas onnavuwiha makupa yaala a Salmu 130:4.