Okhurumuwela wa Yehova—Ntakhara Heeni Ninnathamalela?

1-2. Mmukhalelo taani mukhalelo ahu oryaaya woolikana ni wa mmiravo yoowo onalociwa mu eparakrafu yoopacerya?

MMWAANYIHERYE mmiravo yoowo ophwiiwale mu emusi yooreela. Nyenya mu nihiku nimoha enneereya epahu; asitiithi awe aakhwa nthowa na asitenti. Owo onnakhala oothananaxa. Nave tho epahu ekina ennammorela mmiravo yoola. Owo onnasuwela wi asitiithi awe yaahiyeeha muhakhu woothene nave tho wi awo yaahipaka ivaale sincipale. Vano moone, ohiya ohalano muhakhu ntoko yoohiyeryiwa awe, owo onahalano ivaale, nave alipa oopoleiha annachuna okookiheryiwa. Ivaale itokweenexa nave owo haanono owerya wa oliva seiho.

² Mmukhalelo woolikana, mukhalelo ahu ti woolikana ni wa mmiravo yoole. Asitiithi ahu oopacerya Atamu ni Eva, yaari oophaameya nave yaakhala mu parataiso ooreera. (Map. 1:27; 2:​7-9) Awo yaahikhalano owerya wa opuha ekumi yooreela ni yoohikuchuwa. Nyenya voocharela soothene saatorokeya. Awo yaahiyeleela vaate vaya mparataiso, hiiha ntoko ewehereryo aya ya okhalano ekumi yoohimala. Yoohiyeryiwa taani yaahaalaaya waavaha anamwane aya a muhoolo? Piipiliya onnanleela: “Nthowa na muchu mmoha pahi [Atamu] yoovolowa mweelaponi yoocheka, nave moorweela wa yoocheka woovolowa mweelaponi okhwa, hiihaa tho okhwa wohaaphwanya achu oothene ntakhara oothene yaacheka.” (Aro. 5:12) Yoohiyeryiwa yeeyo Atamu onihiyenryeiye eri yoocheka, enakumiherya okhwa. Yoocheka yeeyo nramvaahu eri ntoko evaale etokweene, yeeyo oothene ahu nihinaweryaahu oliva.—Sal. 49:8.

3. Ntakhara heeni soocheka sahu inanwerya olikanyihiwa ni “ivaale”?

³ Yesu oolikanyiha soocheka ntoko “ivaale.” (Mat. 6:12; Luka 11:4) Vaavaa nnachekaahu, eri ntoko nnapaka evaale ni Yehova. Nnaphwanela oliva mulacu wa yoocheka. Waakhanle wi Yehova haapanke marehereryo a okhurumuwela soocheka sahu, naahaala olivaka soocheka sahu ni okhwa nave hinaahaala okhalano ewehereryo ya okhalano okumi wanaawiili.—Aro. 6:​7, 23.

4. (1) Nahirivo nikhaviheryo, tiheeni yaahaala weereya wa anamacheka oothene? (Salmu 49:​7-9) (2) Mpiipiliyani, masu awi “yoocheka” enaahiwa eheeni? (Moone ekaaxa “Yoocheka.”)

⁴ Apwanne ti wooweryeya okookiha soothene Atamu ni Eva ayelenlaaya? Mukhatiihu tahi wooweryeya okookiha. (Mwaalakhanye Salmu 49:​7-9.) Ohirivo nikhaviheryo, hinaahaala okhalano ewehereryo ya okumi wa muhoolo naari ovinya mookhwani. Mweeparipari, okhwa wahu waahaala okhala ntoko wa axinama.—Ekl. 3:19; 2 Pet. 2:12.

5. Ti mwawiihai Tiithi ahu oosivela onikhavihenryeiye wa evaale ahu nihiyeryiwaahu ya yoocheka? (Moone ekaapa.)

⁵ Nuupuwelaka sa mmiravo yoowo olociwe woopaceryani, mukhalelo taani owo aahaaleiye wiisoona waakhanle wi mulopwana mukina ooreela aahiivaha wi alive ivaale soothene? Moohikhwa minikwa, mmiravo aahaala othamalela vancipale ni weemererya yoovaha yeeyo. Mmukhalelo woolikana, Tiithi ahu oosivela Yehova oonivaha yamahala yeeyo elivenle evaale ya yoocheka nramvaahu wa Atamu. Yesu oothariha mmukhalelo ola: “Vawi Muluku aatepa osivela elapo ophiyerya omvaha Mwanawe ooyariwa meekheiye, wi oothene yoole onamuroromela ahitoloxiwe, nto akhaleno ekumi yoohimala.” (Yoh. 3:16) Ohiya yeeyoru, yamahala emohamoha yeeyo ennaneemererya okhalano onthamwene waphaama ni Yehova.

6. Masu taani a Mpiipiliyani nnahaalaahu othokororya mmwaha yoola, nave ntakhara heeni?

⁶ Ti mwawiihai nneeraahu niphurevo wa yamahaala yeela yootikhiniha ya okhurumuweliwa soocheka sahu, naari “ivaale”? Naakhulo na nikoho nenla ninnaphwanyeya mmasu anaphariheliwa Mpiipiliyani ntoko waataanihiwa, oxipihiwa soocheka, mukucho wa waataaniha, woopola, ovuluxa ni weeriwa awookololowa. Mu yoohuserya yeela, nnahaala othokororya yootaphulela ya mwaha ti mwaha wa masu yaala. Wuupuwela vooloca sa yeeyo Yehova opankeiye wi anikhurumuwele, othamalela wahu wa yoowo onahaala winnuwa.

YOOLAKELELA: WAATAANIHIWA

7. (1) Echu taani ekina Atamu ni Eva eyeleenlaaya? (2) Ntoko muyareryiwo wa Atamu ni Eva, tiheeni nnachunaahuxa? (Aroma 5:​10, 11)

⁷ Ohiya pahiru oyeleela ewehereryo ya okhalano ekumi yoohimala, Atamu ni Eva aayeleela onthamwene aya ni Tiithi aya Yehova. Woopaceryani, Atamu ni Eva yaanapaka makupa a emusi ya Muluku. (Luka 3:38) Nyenya vaavaa yaahimwiiwelenlaaya Yehova, yaahiikariwa mu emusi yeele ehaakumve opacerya okhalano anamwane. (Map. 3:​23, 24; 4:1) Ntoko muyareryiwo awe, ninnachuna waataanihiwa ni Yehova. (Mwaalakhanye Aroma 5:​10, 11.) Mmasu makina, nnaphwanela wunnuwiha onthamwene ahu waphaama ni yoowo. Mwawiiwanana ni ereferensiya, masu Eekriki yaawo aphariheliwe vaava awi “waataaniha”, ananwerya otaphulela “opaka onthamwene ni mwiicani.” Mootikhiniha, Yehova topaceryinhe wi okhale wooweryeya. Mwawiihai?

MAREHERERYO: OXIPIHIWA SOOCHEKA

8. Tiheeni Yehova ovaherenryeiye wi arehererye onthamwene ahu ni Yoowo?

⁸ Oxipihiwa soocheka eri marehereryo yaawo Yehova opharihenleiye wi arehererye onthamwene waphaama variyari va achu oocheka. Ela enavolowela otoroka echu emoha ni wa ekina yoolikana. Mmukhalelo yoola echu yeeyo erimeenle naari ephween’ye enanwerya ocopanyeryiwa naari oraceelihiwa. Soorempwa Seekriki Seekristu sinnapharihela masu oolikana ni erino yootaphulela emohamoha ntoko “oxipihiwa soocheka,” mukucho wa waataaniha. (Aro. 3:25) Mukucho wa waataaniha ari meerelo yaawo aneeriha okhala wooweryeya okhala mmureceleni ni Muluku ni okhalano onthamwene waphaama ni yoowo.

9. Marehereryo taani a elukuluku yavakhaani Yehova aapankeiye wi soocheka sa Aisarayeli siweryeke okhurumuweliwa?

⁹ Wi aweerihe Aisarayeli opuha onthamwene waphaama ni yoowo, Yehova aahipaka marehereryo a elukuluku vakhaani ntakhara oleveleliwa wa soocheka saya. Aisarayeli yaaphwanela opakaka efesta yavameekhaaya mu ekwaha emoha vayaakhani, eyo yiichaniwa Nihiku na Oxipihiwa Soocheka. Mu nihiku nenno, mulipa a mukucho mutokweene aanavaha mikuchu sa axinama mu nsina na achu. Eparipari wi mikucho sa axinama hisaahaala oxipiha moomalela soocheka sa muchu ori oothene, nthowa nawi axinama yaari akhaanixa. Nyenya vaavaa Aisarayeli oocharuwa yaavahaaya mikucho seiyo Yehova aavekeiye, owo aakhala ooreheryeya okhurumuwela soocheka saya. (Ahe. 10:​1-4) Ohiya yeeyoru, mikucho seiyo awo yaavahaaya mu Nihiku na Oxipiha Soocheka ni mu ilukuluku ikina, saanaakhaviherya Aisarayeli wiiwexexa wi awo yaari oocheka nave wi yaanachuna echu yeeyo yaahaala omaliha moomalela soocheka saya.

10. Marehereryo taani a elukuluku yoothene Yehova opankeiye ntakhara okhurumuweliwa wa soocheka?

¹⁰ Yehova aakhalano marehereryo oohimala mmuupuweloni mwawe ntakhara oleveleliwa wa soocheka. Owo oomveleela Mwanawe oosiveliwa wi ‘aveleeliwe ekwaha emoha wa ilukuluku soothene, wi akuxe soocheka sa ancipale.’ (Ahe. 9:28) Yesu oovaha “okumi awe ntoko woopola mu nipuro na ancipale.” (Mat. 20:28) Woopola tiheeni?

EPEREESU: WOOPOLA

11. (1) Mwawiiwanana ni Piipiliya, woopola tiheeni? (2) Tiheeni yaahaala okhala yoochuneya wi woopola owerye oliviwa?

¹¹ Mwawiiwanana ni Piipiliya, woopola eri epereesu eliveliwe wi ixipihiwe soocheka ni waataanihiwa.a Mmoonelo wa Yehova owo onnavahererya mathipelo wa yeeyo yaarimeenle. Mmukhalelo taani? Muupuwele, Atamu ni Eva aayeleela okumi aya woophaameya vamoha ni owerya waya wa okhala ni okumi okhala wookhala. Mwawiihiiha, woopola waaphwanela tho okhala yoolivela yasisapo yoolikana ni yeeyo yaarimeenle. (1 Tim. 2:6) Pahiru yaahaala oliveliwa moorweela wa mulopwana yoowo ori mutokweene (1) aari oophaameya; (2) aarino owerya wa okhala veelaponi yavathi okhala wookhala; ni (3) aari ooreheryeya ovaha okumi awe ntakhara hiyaano. Mwawiihiiha, pahiru okumi wa muchu yoole ti waahaala oraceeliha naari okookiha ekumi yeele yaayeleelen’ye.

12. Ntakhara heeni Yesu aaryeiye ooreheryeya ovahererya yoolivela ya woopola yeeyo yaachuneya?

¹² Muthokororye mathowa mararu yoonihenrye wi Yesu aari ooreheryeya oliva esisapo yeela ya woopola. (1) Owo aari oophaameya—“owo haapanke yoocheka.” (1 Pet. 2:22) (2) Wa nthowa na yeeyo, owo aakhalano owerya wa okhala veelaponi yavathi okhala wookhala. (3) Owo aari ooreheryeya okhwa ni oleva okumi awe ntakhara hiyaano. (Ahe. 10:​9, 10) Ntoko mulopwana oophaameya, Yesu aari oolikana ni mulopwana oopacerya, Atamu, ahaakumve ocheka. (1 Ako. 15:45) Mwawiihiiha, moorweela wa okhwa, Yesu aahiwerya oxipiha yoocheka ya Atamu, eyo tiwi, oraceeliha yeeyo Atamu aarimeelinheiye. (Aro. 5:19) Hiiha, Yesu ookhala “Atamu ookuchula.” Tahi woochuneya wi muchu mukina oophaameya arwe wi alive yeeyo Atamu orimeelinheiye. Yesu ookhwa “ekwaha emoha wa ilukuluku soothene.”—Ahe. 7:27; 10:12.

13. Ohiyana taani orivovo variyari va marehereryo a oxipihiwa soocheka ni woopola?

¹³ Ohiyana taani orivovo variyari va marehereryo a oxipihawa soocheka ni woopola? Marehereryo a oxipihawa soocheka ari meerelo yaawo Muluku onaphariheleiye wi arehererye onthamwene waphaama variyari va yene ni wa achu. Woopola, eri epereesu yeeyo eliviwe wi yeerihe okhala wooweryeya oxipihiwa soocheka sa achu. Epereesu yeela enneemelela nikhami noochuneyaxa n’yeehiwe moorweela wa Yesu ntakhara hiyaano.—Aefesu 1:7; Ahe. 9:14.

SOOKHUMELELA: OVULUXA NI WEERIWA AWOOKOLOLOWA

14. Tiheeni nnahaalaahu othokororya hiihaano, nave ntakhara heeni?

¹⁴ Tisivi siri sookhumelela mwawiiwanana ni oxipihiwa wa soocheka? Piipiliya onnapharihela masu oohiyanahiyana wi atharihe miphurelo sene. Naamwi yootaphulela ya masu yaala ekhalaka oolikana, masu ti masu ennaceenyerya makupa makina a marehereryo a oxipihiwa soocheka yaawo anahula ephiro ya okhurumuweliwa soocheka ni Yehova. Hankooni nthokororye ichu piili inahaala onikhaviherya wiiwexexa mphurelo wa okhurumuwela wa Yehova.

15-16. (1) Mpiipiliyani, masu awi “ovuluxa” enaahiwa eheeni? (2) Eyo enanivolowela hai?

¹⁵ Mpiipiliyani, ovuluxa onaahiwa otaphuliwa naari okhurumuweliwa, yoowo oneereya wa nthowa na woopola. Murummwa Petru oothariha ariki: “Tiwi, moosuwela wi tahi ni ichu inuuca, ni eparata naari ooru, nyuwo mutaphuliwaanyu [nyuwo mvuluxiwaanyu] wa mukhalelo wa okumi anyu woohiphuriha echu yoowo mwannyereryiwaanyu moorweela wa makholo anyu. Nto waari ni nikhami nasisapo, ntoko na epucepuche ehirakanle nave ehirino nthepa, ela tiwi, nikhami na Kristu.”—1 Pet. 1:​18, 19; moone enoota.

¹⁶ Moorweela wa mukucho ni woopola, nnanwerya otaphuliwa wa yoocheka ni okhwa. (Aro. 5:21) Mweeparipari, nookhalano mathowa oophwanelela a woona mwawiixeela wi nookhalano evaale wa Yehova ni Yesu moorweela wa ovuluxa yoowo onarwa mu nikhami noochuneyaxa, naari mu okumi wa Yesu.—1 Ako. 15:22.

17-18. (1) Enataphulela eheeni weeriwa awookololowa? (2) Eyo enanivolowela hai?

¹⁷ Weeriwa awookololowa enataphulela wi Yehova hanaweherya wi hiyaano nliveke wa soocheka seiho nnapakaahu. Moorweela wa weerano yeeyo, Yehova hananyemula malamulo awe awookololowa. Owo hananeera okhala awookololowa akhweya nthowa nawi nrimukhala oophwanelela; ohiya yeeyo owo hanatumerya soocheka sahu. Nyenya moorweela wa nroromelo nahu mu marehereryo a oxipihiwa soocheka ni epereesu ya woopola yeeyo eliviwe, Yehova ookhalano mathipelo wi alevelele ivaale sahu.—Aro. 3:24; Aka. 2:16.

¹⁸ Eyo enataphulela eheeni wa mmoha ti mmoha a hiyo? Yaale athanliwe wi yalamuleleke vamoha ni Yesu wirimu aheeriwa okhala awookololowa ntoko anamwane a Muluku. (Titu 3:7; 1 Yoh. 3:1) Soocheka saya sooleveleliwa. Nlocaka sa soocheka, awo hiyaanono tho, mwawiihiiha annaphwanelela mu Omwene. (Aro. 8:​1, 2, 30) Yaale arino ewehereryo ya veelaponi yavathi, aheeriwa awookololowa ntoko asinthamwene a Muluku nave soocheka saya sooleveleliwa. (Tiy. 2:​21-23) Mucici muncipale yoowo onahaala okophola mu ekhoco ya Armaketo, onamukhalano ewehereryo ya ohikhwa. (Yoh. 11:26) “Awookololowa” ni “oohookololowa” yaawo anakona mookhwani ari mpiixani wi eviihiwe mookhwani. (Saw. 24:15; Yoh. 5:​28, 29) Moovira wa elukuluku, alapeli oothene awiiwelela a Yehova a veelaponi ya vathi enarwa ‘etaphuliwa mu okapuro wa wuuca ni okhalano otaphuwa woocicimiheya wa anamwane a Muluku.’ (Aro. 8:21) Chiri, mareeliho ootikhiniha enarweela mu marehereryo a oxipihiwa soocheka—waataanihiwa moomalela ni Tiithi ahu, Yehova!

19. Ti mwawiihai mukhalelo ahu otoroken’yaaya okhala waphaama? (Moone tho ekaaxa “Yeeyo Enataphulelaaya wa Hiyo.”)

¹⁹ Mweeparipari, mukhalelo ahu wohintoko okhala ntoko mmiravo yoole olociwe woopaceryani, yoowo aayeleenle soothene nave ahalano ivaale sincipale seiho aahihaaleiye owerya oliva. Nyenya moorweela wa ikharari sa Yehova, nookhalano nikhaviheryo. Mukhalelo ahu wootorokeya nthowa nawi Yehova oopaka marehereryo wi soocheka sahu ikhurumuweliwe nave Yesu ooliva woopola. Nroromelelo nahu mwa Yesu Kristu ninnaneemererya ovuluxiwa naari otaphuliwa wa yoocheka ni okhwa. Soocheka sahu tho inanwerya okhurumuweliwa, nave meerelo ahu ootakhala akhalai, ananwerya oxipihiwa. Echu eri yoochuneyaxa wa soothene, tiyawi hiihaano nnanwerya okhalano onthamwene waphaamaxa ni Tiithi ahu oosivela a wirimu, Yehova.

20. Tiheeni nnahaalaahu othokororya mmwaha onacharela?

²⁰ Vaavaa nnuupuwelelaahu vooloca sa yeeyo Yehova ni Yesu apankaaya ntakhara hiyaano, murima ahu onnasareya othamalela. (2 Ako. 5:15) Nahaari nikhaviheryo naya, hinaahaala okhalano ewehereryo eri yoothene! Nyenya okhurumuwela wa Yehova onataphulela eheeni wa mmoha ti mmoha a hiyo? Ti yeeyo nnahaalaahu othokororya mmwaha onacharela.