“Mukhaleke Aweerano Masu”

1-2. Tiheeni enaweeriha alapeli a Muluku okhala oohakalala? (Tiyaku 1:​22-25)

YEHOVA ni Mwanawe oosiveliwa enachuna wi nikhaleke oohakalala. Mulipa oomurepa Salmu 119:2 ooloca: “Oohakalala ti yaawo anachariha sawuupuxerya sawe, yaawo anamwaavya yoowo ni murima aya woothene.” Yesu aahiroromeliha tho, alocaka wi: “Oohakalala ti yaale aniiwa masu a Muluku nave enachariha!”—Luka 11:28.

² Ntoko alapeli a Yehova, naachu oohakalala. Ntakhara heeni? Nookhalano mathowa mancipale, nyenya echu yoochuneya ti yaawi ninnaalakhanya Masu a Muluku moohihiyererya ni wiilipixerya opharihela yeeyo nihusenryaahu.—Mwaalakhanye Tiyaku 1:​22-25.

3. Nnaphuravo hai vaavaa nnapharihelaahu yeeyo nnaalakhanyaahu Mmasu a Muluku?

³ Sookhalavo mikhalelo mincipale nnaphuraahu vaavaa nnakhalaahu “aweerano masu.” Woopacerya, ninnasuwela wi ala mapacereryo oochuneya vancipale a omuhakalaliha Yehova. Osuwela yeela onnaneeriha okhala oohakalala. (Ekl. 12:13) Vaava nnapharihelaahu muteko yeeyo nnaalakhanyaahu Mmasu ooveereliwa a Muluku, ninnarehererya okumi ahu weemusi nave ninnateka onthamwene woolipa ni anna ni arokora ahu. Woonaru akhweya eyo yoheereya chiryene mu ekumi anyu. Ohiya yeeyoru, ninnasepa makacamiho mancipale yaawo achu anahoolelaaya nthowa na ohiiwelela malamulo a Yehova. Mweeparipari, ninneemererya yeeyo Mwene Tavite olonceiye. Amanle oloca mu ncipo na nlamulo, malamulo ni mathorihelo a Yehova, owo aakuchula ariki: “Nookhalavo nchuwelo ntokweene mu okhapelela yaawo.”—Sal. 19:​7-11.

4. Ntakhara heeni ilukuluku soothene tahi wookhweya opharihela soothene seiyo nnaalakhanyaahu Mmasu a Muluku?

⁴ Mweeparipari, tahi wi ilukuluku soothene onnakhala wookhweya weerano yeeyo Masu a Muluku analocaaya. Nnaphwanela waavyavyaka elukuluku wi nicharihe yoochariha ahu yeeyo nipankaahu wi nimwaalakhanye ni omuhuserya Piipiliya, wi niwerye wiiwexexa yeeyo Yehova onachuneiye wi neere. Vano, hankooni naalikhale mikhalelo mikina seiho sinahaala onikhaviherya waalakhanyaka mohihiyererya. Nave tho nnahaala othokororya yeeyo enahaala onikhaviherya wuupuwelela vooloca sa yeeyo naalakhannyaahu ni woona mikhalelo seiho nnaphwanelaahu opharihela muteko seiho nnahuseryaahu mu okumi ahu.

MWAAVYEKE ELUKULUKU YA WAALAKHANYA MASU A MULUKU

5. Ichu taani ikina inaneeriha okhala ooweiwa?

⁵ Ancipale a achu a Yehova arino okumi wooweiwaxa. Ninnamaliha elukuluku yincipale nikhapelelaka ichu seiho Piipiliya onaloceiye wi ti soochuneyaxa. Ntoko yootakiherya, ancipale a hiyo ninnalapa miteko soomwiilini wi niivakulele hiyo aneene ni ichoko sahu. (1 Tim. 5:8) Akristu ancipale ennaakhapelela asitiithi aya awiiceliwa naari awuuluvala. Nave oothene ahu ninnaphwanela okhapelela okumi ahu ene, echu yeeyo enamaliha elukuluku yincipale. Ohiya yeeyoru tho, nookhalano ichu ikina soochuneya wi neere mmulokoni. Murici mutokweene nryaahuno ori opaka makupa mmuteko woolaleerya mwa mvai. Wa mirici soothene muryaanyuno, muni mphwanye hai elukuluku ya omwaalakhanya Piipiliya moohihiyererya, wuupuwelela yeeyo mwaalakhannyaanyu ni opharihela muteko yeeyo muhusenryaanyu?

6. Muni mweerihe hai omwaalakhanya wanyu Piipiliya okhala woochuneya? (Moone tho eruku.)

⁶ Omwaalakhanya Piipiliya echu emoha wa “ichu soochuneyaxa” wa hiyaano ntoko Akristu, mwawiihiiha nnaphwanela omwaalakhanyaka moohihiyererya. (Afi. 1:10) Vooloca sa muchu oohakalala, Salmu ekapitulu yoopacerya ooloca: “owo onnahakalala ni nlamulo na Yehova, nave onnaalakhanya nlamulo Nawe ni masu avathivathi othana ni ohiyu.” (Sal. 1:​1, 2) Mweeparipari, eyo enataphulela wi nnaphwanela omalihaka elukuluku nimwaalakhanyaka Piipiliya. Elukuluku taani eri yoophwanelela omwaalakhanya Piipiliya? Naakhulo nnanwerya okhala noohiyana wa mmoha ti mmoha a hiyo. Nyenya echu yoochuneya ori othanla elukuluku yeeyo enahaala onikhaviherya omwaalakhanyaka Piipiliya moohihiyererya. Munna mmoha awiichaniwa Victor ooloca: “kinnasiveliwa omwaalakhanya Piipiliya woosiiselo. Naamwi kihisiveliwaka ovinya woosiiselo ene, ela elukuluku sihinakhalaayavo ichu sincipale saahaala okaakanyerya. Muupuwelo aka onnakhala woomaaleleya nave kinnawerya okhala ootikitheryeya.” Akhweya ela ti yeeparipari wa nyuwo. Mwiikohe: ‘Teevi eri elukuluku yoophwanelela wa miyo wi kiimwaalakhanyeke Piipiliya?’

MUUPUWELELEKE SA YEEYO MWAALAKHANNYAANYU

7-8. Tiheeni enahaala onaakanyerya ophuravo mwawaakhwanela yeeyo nnaalakhanyaahu? Mphwanaphwanihe.

⁷ Eparipari ti yawi nnanwerya waalakhanya soolaleeryiwa sahu sincipale nyenya nihiweryeke wuupuwelela. Apwanne mohintonko waalakhanya echu, voocharela muhiwerya wuupuwela yeeyo mwaalakhannyaanyu? Oothene ahu ennaneera. Moothananiha, ela enanwerya okhala nikacamiho mu omwaalakhanya wahu Piipiliya. Ntoko yootakiherya, nnanwerya waalakhanya ikapitulu sa Mpiipiliyani savakhaani mahiku oothene. Eyo ti yaphaama. Nnaphwanela olakelela ikapitulu seiho nnaphwanelaahu waalakhanyaka ni wiilipixerya waakhwaniherya seiho. (1 Ako. 9:26) Mwawiihiiha, omwaalakhanya Piipiliya mapacereryo—nyenya mapacereryo aphaama. Wakhala wi ninnachuna okumihavo mphurelo wawaaca mu omwaalakhanya Piipiliya nnaphwanela opaka sincipale ohiya pahiru omwaalakhanya.

⁸ Muupuwele olikanyiha ola: Maahi, ikwaha sincipale mmukhalelo wa epula, toochuneya wa ekumi. Nyenya wakhala wi epula yoorupa yawaaca mu elukuluku yoophwanelela, echaya enanwerya wuucelana phaama. Wakhala wi yoorupa epula yawaacaxa hekhala yamphurelo. Echaya ennachuna elukuluku wi epula erumpe evolowelane nave yeerihaka wi mmiso waaliwe omela. Mmukhalelo mmohamoha nnaphwanela osepa waakuviha omwaalakhanya Piipiliya ophiyerya nihinakhalano elukuluku ya wuupuwelela yeeyo nihusenryaahu ni opharihela muteko.—Tiy. 1:24.

9. Tiheeni nnaphwanelaahu weera wakhala wi nohoona wi ninnamwaalakhanya mwawaakuvihaxa?

⁹ Apwanne nyuwaano mohoona wi, ikwaha ikina munnamwaalakhanya Piipiliya mwawaakuveya? Tiheeni nyuwaano munaphwanelaanyu weera? Mwaalakhanyeke vakhaani vakhaani. Mwiilipixerye wi muupuwelele yeeyo munaalakhanyaanyu naari mmanlaanyu waalakhanya. Eyo tahi yoovila. Waakhanle wi nceenyeryo na waalikhela ninnooneya hiiha wa nyuwo, akhweya munanwerya woona wi ekano eri ntoko pahiru wuupuwela vooloca sa yeeyo mwaalakhannyaanyu. Nyuwaano munanwerya olakelela otikitherya elukuluku anyu ya yoohuserya wi mphitaanyeryevo elukuluku ya wuupuwelela, naari waalikhela. Vakina vaya, nyuwaano munanwerya othanla waalakhanya iversikulu savakhaani nave mpharihele elukuluku enahalela wi muupuwelele vooloca sa yeeyo mwaalakhannyaanyu. Victor yoowo oromoliwe woopaceryani, ooloca: “Kinnatikitherya waalakhanya waka wa Piipiliya wookhuveya, pahiru mu ekapitulu emoha.” Woona wi kinaalakhanya wooxixelo ene, kinnawerya wuupuwelela variyari va nihiku vooloca sa yeeyo kaalakhannyaaka.” Moohipwacha mukhalelo taani munapharihelaanyu ti woochuneya waalakhanya mmukhalelo yoowo onaweemereryaani okumihavo mphurelo wawaaca wa yeeyo munaalakhanyaanyu.—Sal. 119:97; moone ekaaxa “Makoho Anathokororyiwa.”

10. Mphwanaphwanihe mukhalelo munahaalaanyu opharihela yeeyo munahuseryaanyu. (1 Atesalonika 5:​17, 18)

¹⁰ Moohipwacha elukuluku munamwaalakhanyaanyu Piipiliya naari iwora munamalihaanyu mmwaalakhanyaka, mwaavyavyeke opharihela muteko yeeyo munaalakhanyaanyu. Vaavaa munaalakhanyaanyu makupa a Masu a Muluku, mwiikohe: ‘Kini kipharihele hai sooleeliherya seiha hiihaano naari omwaahiyu onoorwa?’ Ntoko yootakiherya, mwaanyiherye wi munamwaalakhanya 1 Atesalonika 5:​17, 18. (Mwaalakhanye.) Mmanle waalakhanya iversikulu seiha piili nyuwaano munanwerya omaala wi muupuwelele ikwaha kavi nave mukhalelo taani munavekelaanyu mwawiixeela. Ohiya yeeyoru, munanwerya wuupuwelela vooloca sa ichu seiho munathamalelaanyu. Akhweya nyuwaano munanwerya olakelela omuthamalela Yehova wa ichu raru sooluluwanya. Wakhala wi munnamaliha elukuluku muupuwelelaka miyaha sa Mpiipiliyani, eyo enahaala wookhaviheryaani wiiwexexa Masu a Muluku ni weerano yeeyo awo analocaaya. Muupuwele mukhalelo mwaahaalanyu ophura waakhanle wi munnuuluulela mukhalelo yoowo wawuupuwela mahiku oothene mmakupa makina a Piipiliya yaawo mwaalakhannyaanyu! Wakhala wi mahiku oothene munnapharihela yeeyo mwaalakhannyaanyu Mpiipiliyani, moovira wa elukuluku munahaala okhala mulapeli a Yehova aphaama. Nyenya tiheeni munaphwanelaanyu weera wakhala wi sookhalavo ichu seiho nyuwaano munaphwanelaanyu opaka?

MUTIKITHERYE SOOLAKELELA SOOPHWANELELA

11. Ntakhara heeni ikwaha ikina munanwerya wiisoona okhala ooceecheya? Mvahe yootakiherya.

¹¹ Vaavaa munamwaalakhanyaanyu Piipiliya, ikwaha ikina nyuwaano munanwerya okhala ooceecheya vaavaa muniiwexexaanyu wi sookhalavo ichu ikina munaphwanelaanyu orehererya. Ntoko yootakiherya, mwaanyiherye nihiku nimoha mu omwaalakhanya wanyu Piipiliya onnaphitaanyeryavo malakiheryo vooloca sa ohooniherya nthalu. (Tiy. 2:​1-8) Nyuwaano munnoona wi munnaphwanela orehererya mukhalelo munaakhalihaanyu akina, mwa yeeyo munnalakelela opaka matorokelo makina. Ela ti yaphaama! Mwawiihiiha, mu nihiku noocharela, munnaalakhanya iversikulu ikina seiho inooniherya wi ti woochuneya okhalano ekaasoope wa yeeyo munalocaanyu. (Tiy. 3:​1-12) Nyuwaano munniiwexexa wi, ikwaha ikina munnaloca ichu soohipwanelela naari sooceecheiha. Mwawiihiiha, munnalakelela wi munahaala okhala awaalipihaxa akina vaavaa munalocaanyu ni yaawo. Mu omwaalakhanya wanyu Piipiliya mu nihiku noocharela, onanwerya ophitaanyerya olopola wa ohikhala nthamwene a elapo. (Tiy. 4:​4-12) Nyuwaano munnoona wi munnaphwanela okhalano ekaasoope mu mathatelo yaawo munathanlaanyu. Mu nihiku naneexexe, nyuwaano munanwerya woona okhala woovila opaka matorokelo oothene yaala.

12. Ntakhara heeni hamunaphwanela oceecheya wakhala wi omwaalakhanya wanyu Piipiliya onnooniherya wi nyuwaano munnaphwanela opaka matorokelo? (Moone tho eruku.)

¹² Wakhala wi munnachuna opaka matorokelo mancipale, muhiceecheye. Mu woona wanyu wi munnaphwanela opaka matorokelo munnooniherya wi nyuwaano mwa awiiyeviha nave wi mookhalano mathowa aphaama. Muchu awiiyeviha ni oororomeleya wa yene mukhateiye, onnaalakhanya soorempwa ni yoolakelela ya woona makupa onaphwaneleiye otoroka.a Muupuwele tho wi, nnaphwanela otitelela owara “omuchu ovyaani”. (Ako. 3:10) Tiheeni enahaala wookhaviheryaani otitelela okhala aweerano Masu a Muluku?

13. Tuuvi ori mukhalelo waphaama wa opharihela yeeyo muhusenryaanyu? (Moone tho eruku.)

¹³ Ohiya weererya opharihela soothene mwaalakhannyaanyu pahiru mu ekwaha emoha, mutikitherye soolakelela savakhaani. (Mas. 11:2) Munanwerya weererya ela: Mutikitherye elista wa ichu seiho munaphwanelaanyu otoroka, muthanle echu emoha naari piili wa seiyo wi mutoroke, nave voocharela muthokororye echu ekina mu elukuluku ekina. Muni mpacerye vaavi?

14. Ni soolakelela taani nyuwaano munaphwanelaanyu opaceryiha?

¹⁴ Munanwerya olakelela opacerya ni yoolakelela yeeyo eri yookhweya wa nyuwaano waakhwaniherya. Naari akhweya munanwerya othanla wiilipixerya mu echu yeeyo munachunaanyu orehererya. Wakhala wi moolakelela makupa yaawo munachunaanyu wiilipixerya orehererya, mpake otholathola mu Biblioteca Online da Torre de Vigia naari mu Yoohoolela ya Otholathola ya Anamoona a Yehova. Mvekele vooloca sa yoolakelela anyu nave mumveke Yehova wi oovaheeni “nchuno ni owerya wa weerano yeeyo enamuhakalaliha.” (Afi. 2:13) Voocharela mwiilipixerye opharihela yeeyo muhusenryaanyu. Vaavaa munoonaanyu wi moowerya opaka matorokelo naari wunnuwiha mukhalelo Weekristu, munahaala oceenyeryeya otitelela opaka matorokelo, nave mwawooneya onamukhala wookhweya wa nyuwo opaka matorokelo makina.

MWEEMERERYE WI MASU A MULUKU ‘ELAPE MWA NYUWO’

15. Ti mwawiihai achu a Yehova eryaaya oohiyana ni achu ancipale anamwaalakhanya Piipiliya? (1 Atesalonika 2:13)

¹⁵ Achu akina annaloca wi annamwaalakhanya Piipiliya ikwaha sincipale. Nto apwanne awo mweeparipari annaroromela yeeyo Piipiliya onahusiheiye? Apwanne awo anneererya okhala mwawiiwanana ni yeeyo Piipiliya onahusiheiye ni opaka matorokelo mu okumi aya? Moothananiha, ikwaha sincipale naakhulo nene ti nawi hooye. Nyenya achu a Yehova toohiyana vooloca sa Piipiliya! Moolikana ni Akristu a mu nsana noopacerya, ninnamweemererya Piipiliya “ntoko chiryene akhanlaaya, masu a Muluku.” Mwawaaceererya, ninnapaka soothene nnaweryaahu wi niphariheleke ikano sa Mpiipiliyani.—Mwaalakhanye 1 Atesalonika 2:13.

16. Tiheeni enahaala onikhaviherya okhala aweerano Masu?

¹⁶ Tahi wookhweya ilukuluku soothene waalakhanya ni opharihela Masu a Muluku. Onanwerya okhala woovila ophwanya elukuluku ya waalakhanya. Naari nnanwerya omwaalakhanya Piipiliya mwawaakuveya nave nihiwerya wuupuwelela yeeyo naalakhannyaahu. Naari tho akhweya nnanwerya wiisoona wi makupa nnaphwanelaahu orehererya aatepa waaca. Moohipwacha nikacamiho nahu, ti wooweryeya ovootha. Nnikhaviheryo na Yehova, munanwerya ovootha nenlo. Nnanwerya olakelela waakhela nikhaviheryo nawe ni ohikhala achu aniiwa nave ecuwala, nyenya aweerano Masu. Moohikhwa minikwa, vaavaa nniilipixeryaahu waalakhanya Masu a Muluku ni opharihela yaawo mu okumi ahu, nnahaala ohakalalaka.—Tiy. 1:25.