Mutakiherye Mvai wa Yesu Mmuteko Woolaleerya

1. Tiheeni enaahiyaniha alapeli a Yehova ni wa yaale aniiseera wi Akristu?

ECHU emoha enaahiyaniha alapeli a Yehova wa yaale aniiseera wi Akristu, ori mvai ayaa mmuteko woolaleerya. (Titu 2:14) Nyenya vakina vaya, onanwerya okhala woovila okhala oohakalala mmuteko woolaleerya. Akhweya munanwerya wiisoona hiihaa ntoko mutokweene mmoha yoowo onalapa mwakuru alonceiye: “Ennakhala elukuluku kihinakhalaakano nchuno na olaleerya.”

2. Ntakhara heeni vakina vaya onanwerya okhala woovila ohakalala ni muteko woolaleerya?

² Akhweya nnawerya ohakhalalaka vancipale ni miteko mikina mmuteko wa Yehova ohiya ni muteko woolaleerya. Ntakhara heeni eyo enneereya? Noone yootakiherya ela: Vaavaa nnakhaviheryaahu mmuteko wooteka naari orehererya Ipa sa Omwene, waakhaviherya anna yaawo ephacuweliwe naari waalipiha yaawo. Mmikhalelo seiha, ninnawerya woona sookhumelela mu elukuluku ene yeeyo nave onnakhala wookhweya woona wi wiilipixerya wahu wookumiherya mphurelo waphaama. Ohiya yeeyoru, mukhalelo wa nipuro nenle ti waphaamaxa; ninnawerya woona osivela ni murecele variyari va anna nave ninnalekecheya wi awo annavaha esisapo yeeyo nnapakaahu. Akhweya, vakina vaya nnawerya olaleerya mu iyaakha sincipale mu ekulucu emohamoha ni sookhumelela savakhaani naari achu okhooca muchaka ahu. Noosuwela wi vaavaa makuchuwelo anaacamelaaya, nnahaala ohoolelaka waakaahiwa otokweene. (Mat. 10:22) Tiheeni enahaala onikhaviherya olipiha naari waaceererya mvai ahu mmuteko woolaleerya?

3. Tiheeni nnahuseryaahu vooloca sa mvai wa Yesu mu Luka 13:​6-9?

³ Nnawerya oohuserya sincipale vooloca sa mukhalelo wa okhalano mvai mmuteko woolaleerya vaavaa nnathokororyaahu yootakiherya ya Yesu. Variyari va muteko awe woolaleerya mvai awe hiwaavukunwe. Mweeparipari, owo ahiilipixerya vancipale moovira wa elukuluku. (Mwaalakhanye Luka 13:6-9.) Mu niphwanaphwaniho nimoha, Yesu aahilikanyiha muteko awe woolaleerya ni wiilipixerya wa mulopwana mmoha yoowo aakhapelela emaca ya uuva. Hiiha ntoko mulopwana yoole aahiyeleenle ikuru atitelela okhapelela mwiri wa mukuukhu yoowo waahivaha sawiima, Yesu tho haahin’ye waalaleerya achu naari mano ovukula mvai awe mmuteko woolaleerya. Moohiyana, owo aahaaceererya wiilipixerya wawe wi aakhaviherye achu weemererya michaka saphaama.

4. Ichu taani xexe nnahaalaahu ohuserya mu yootakiherya ya Yesu?

⁴ Mmwaha yoola, nnahaala woona mukhalelo Yesu oonihenryeiye mvai mmuteko woolaleerya xaxaxa variyari va miyeeri sawe sookuchula mithanu nammoha veelaponi yeela yavathi. (“Voocharela” moone enoota ya yoohuserya mu Luka 10:1.) Ohuserya vooloca sa yeeyo Yesu ohusinheiye ni ochariha yootakiherya awe, enahaala onikhaviherya okhala a mvai. Nnahaala othokororya ichu xexe nnahaalaahu ohuserya mu yootakiherya ya Yesu: (1) Owo aahitikitheryeya mu yookhwela ya Yehova, (2) owo aahikhalano mmuupuweloni sooloherya sa Mpiipiliyani, (3) owo aanaroromela nikhaviheryo na Yehova ni (4) owo aahititelela okhalano moonelo woophwanelela vooloca sa achu.

YESU AAHITIKITHERYEYA MU YOOKHWELA YA YEHOVA

5. Ti mwawiihai Yesu oonihenryeiye wi aatikitheryeya mu yookhwela ya Muluku?

⁵ Yesu aahilaleerya mwa mvai “michaka saphaama sa Omwene” nthowa nawi owo aanasuwela wi ti yeeyo Muluku aachuneiye wi eere. (Luka 4:43) Wa Yesu, olaleerya waari muteko woochuneyaxa mu okumi awe. Ophiyerya tho wi omakuchuwelo wa miyeeri sawe sookuchula, owo aahititelela ‘ovira epooma ni epooma, muceche ni muceche,’ aahusihaka achu. (Luka 13:22) Yesu tho, aahaavyakiha akina wi elaleeryeke michaka saphaama hiiha ntoko yene.—Luka 10:1.

6. Ti mwawiihai muteko woolaleerya oniiwananaaya ni miteko mikina? (Moone tho eruku.)

⁶ Olelo tho, olaleerya michaka saphaama nlelo muteko woochuneyaxa yoowo Yehova ni Yesu anachunaaya wi nipakeke. (Mat. 24:14; 28:19, 20) Mweeparipari, muteko ori woothene nnapakaahu ntakhara Yehova ori mwawiiwanana ni muteko woolaleerya. Ntoko yootakiherya, ninnapaka Ipa sa Omwene wi achu yaawo arino nchuno ekhaleno mpuro wa omulapelamo Yehova. Ohiya yeeyoru, ichu soothene inapakiwa Opeteli sookhalano yoolakelela ya okhaviherya soothowa sa muteko woolaleerya. Vaavaa enakhumelelaaya epahu ya maphacuwelo ninnavahererya nikhaviheryo wa annihu, ohiya pahiru wi naakhaviherye okhapelela soothowa saya soomwiilini, nyenya tho wi naakhaviherye okookela yookhovelela aya yoomunepani enaphitaanyerya olaleerya. Vaavaa nnuupuwelaahu wi olaleerya muteko woochuneyaxa yoowo Yehova onachuneiye wi nipakeke, ninnaceenyeryeya olaleeryaka moohihiyererya. Yánosh, mutokweene mmoha onakhala o Hungary ooloca: “Miyaano ilukuluku soothene kinneererya wuupuwela wi hiwaavo muteko mukina nnapakaahu ntakhara Yehova onaraceela muteko woolaleerya. Ola murici ahu woochuneyaxa.”

7. Ntakhara heeni Yehova onachuna wi ntitelele olaleerya? (1 Timotiyu 2:3, 4)

⁷ Nnanwerya waaceererya mvai ahu mmuteko woolaleerya moorweela wa owoonaka achu mmukhalelo Yehova onawooneiye. Owo onachuna wi achu ancipale wakhala wooweryeya yiiwe ni yeemererye michaka saphaama wi evuluxiwe. (Mwaalakhanye 1 Timotiyu 2:3, 4.) Ti nthowa nene owo onanikhaviheryeiye winnuwiha mavyakelo ahu mmukhalelo wa olaleerya. Ntoko yootakiherya, eproxura Waasivela Achu—Waapaka Oohuserya ennanivahererya sooleeliherya soophara muteko inanikhaviherya mukhalelo wa opaceryiha ovaanela ni yoolakelela ya opaceryiha soohuserya sa Piipiliya. Naamwi achu ehipanke yoolakelela ya omurumeela Yehova hiihava, awo akhweya anamukhalano ekari ya weerano yeeyo ehaakumve ophiya yoohooxa etokotoko. Mwawiihiiha, yeeyo nnaaleelaahu olelo enanwerya waaceenyerya omwaahiyu opaka yoolakelela yeela. Nyenya eyo pahiru enanwerya weereya wakhala wi nootitelela olaleerya.

YESU AAHIKHALANO MMUUPUWELONI SOOLOHERYA SA MPIIPILIYANI

8. Osuwela sooloherya sa Mpiipiliyani waavolowenle hai mukhalelo Yesu aaphariheleiye elukuluku awe?

⁸ Yesu aanasuwela sooloherya sa Mpiipiliyani seiyo saahaala waakhwanela. Ntoko yootakiherya, owo aanasuwela wi muteko awe woolaleerya waahaala omaliha iyaakha raru ni emeya. (Tan. 9:26, 27) Owo tho aanasuwela yeeyo yaaloheryiwe vooloca sa tiliini ni mukhalelo aahaaleiye okhwa. (Luka 18:31-34) Yesu aaheeriha wi yeeyo owo aasuwenleiye evolowele mukhalelo aaphariheleiye elukuluku awe. Ntoko yookhumelela, owo aanalaleerya mwa mvai wi aakhwaniherye muteko yoowo aarummwaleiye.

9. Ntakhara heeni wiiwexexa sooloherya sa Mpiipiliyani sinnanceenyerya olaleerya mwa mvai?

⁹ Wiiwexexa sooloherya sa Mpiipiliyani, sinnanceenyerya olaleerya mwa mvai woona wi noosuwela wi moohilekela enamphiya makuchuwelo a mukhalelo yoola wa ichu. Ninnawerya woona saweereya sa mweelaponi ni mukhalelo wa achu inaakhwaniheryaaya sooloherya sa Mpiipiliyani vooloca sa mahiku ookuchula. Ninnawerya tho woona wiicana orivovo variyari va Olamulelo wa Elapo Yoothene Ankolo Amerikana ni Rusiya vamoha ni akhaviheryi awe. Eyo ennakhwaniherya yooloherya yawi mwene oohico ni mwene oomokoni yaahaala wuupuruxanaka mukina ni mukhwaawe “mu elukuluku yookuchula.” (Tan. 11:40) Nave tho ninniiwexexa wi inaani sa eruku ya yooloherya ya Taniyeli 2:43-45 eneemelela Olamulelo wa Elapo Yoothene Ankolo Amerikana. Nri oolekecheya wi hiiha ntoko yooloherya enooniheryaaya, moohilekela—aa moohilekelaxa—Omwene wa Muluku onahaala waatoloxa alamuleli a elapo yeela. Sooloherya soothene seiya sinnoniherya wi nri mu elukuluku yookuchula nave wi nnaphwanela olaleerya michaka saphaama mwa mvai.

10. Mmikhalelo taani mikina sooloherya sa Mpiipiliyani inanceenyeryaaya olaleerya?

¹⁰ Sooloherya sa Mpiipiliyani tho sinnanivahererya muchaka wa ewehereryo yeeyo nnasiveliwaahuno okawana ni akina. Carrie, murokora yoowo onarumeela o Repuplika Tominikana ooloca: “Vaavaa kinuupuwelaaka vooloca sa ichu soohakalalihaxa seiyo Yehova ororomelinheiye opaka omwaahiyu, kinnakhalano nchuno ntokweene na waaleela akina.” Owo onnaaceererya: “Achu ancipale annahoolela makacamiho oohiyanahiyana nave ti yawooneya wi awo annachuna vancipale osuwela soororomeliha sa Yehova.” Ohiya yeeyoru, sooloherya sa Mpiipiliyani sinnanooniherya wi ilukuluku soothene Yehova onnanikhaviherya mmuteko yoola. Leila, yoowo onakhala o Hunkriya ooloca: “Yesaya 11:6-9 onnakuupuxerya wi muchu vyakala onanwerya otorokeya nnikhaviheryo na Yehova. Ti nthowa nene kinachunaaka okawana michaka saphaama ni achu oothene.” Nave munna o Sampiya oniichaniwa Christopher, ooloca: “Marku 13:10 onaloca wi, michaka saphaama inaphwanela olaleeryiwa veelaponi yoothene, nave ti yoohakalalihaxa okhaviherya mu waakhwanela wa yooloherya yeela.” Hanka nyuwaano, yooloherya taani ya Mpiipiliyani enoocenyeryaani otitelela olaleerya?

YESU AANAROROMELA NIKHAVIHERYO NA YEHOVA

11. Ntakhara heeni Yesu aanaphwanela ororomela nikhaviheryo na Yehova wi atitelele olaleeryaka mwa mvai? (Luka 12:49, 53)

¹¹ Yesu aanaroromela wi Yehova aahaala omukhaviherya otitelela olaleerya mwa mvai. Naamwi Yesu alocaka mwa ncicimiho ni othanlela masu oophwanelela, owo aanasuwela wi michaka saphaama saahaala otannya okawanyeya ni wiica otokotoko. (Mwaalakhanye Luka 12:49, 53.) Wa nthowa na olaleerya wawe, ahooleli a malapelo mu ikwaha ikina yaaneererya omwiipha. (Yoh. 8:59; 10:31, 39) Naamwiihiiha, Yesu aahititelela olaleerya nthowa nawi aanasuwela wi Yehova aari ni yoowo. Owo aaloca: “Nkiri meekhaaka, nto Atiithi yaawo akirumme ari ni miyo. . . . Owo hakihin’yeru meekhaaka, woona wi mahiku oothene kinneerano soothene inamuhakalaliha.”—Yoh. 8:16, 29.

12. Ti mwawiihai Yesu aareherenryeiye oohuserya awe wi etitelele olaleerya vaavaa yaahaalaaya ohoolela wiiciwa?

¹² Yesu aahiwuupuxerya oohuserya awe wi yaaphwanela ororomela nikhaviheryo na Yehova. Owo wiiliwiili aanaaroromeliha wi Yehova aahaala waakhaviheryaka naamwi ehoolelaka wiikariwa. (Mat. 10:18-20; Luka 12:11, 12) Yesu aahaaleela wi yaaphwanela okhala awiikasoopa. (Mat. 10:16; Luka 10:3) Owo aahaaleela tho wi hiyaaphwanela omukhinyeererya muchu weemererya michaka sa Omwene. (Luka 10:10, 11) Nave tho aahaaleela wi yaaphwanela ochawa wakhala woochuneya. (Mat. 10:23) Naamwi Yesu aarino mvai nave tho aamuroromelaka Yehova, owo hiihela va yawoopiha.—Yoh. 11:53, 54.

13. Ntakhara heeni munanwerya ororomela wi Yehova onahaala wookhaviheryaani?

¹³ Olelo, hiyaano tho ninnachuna nikhaviheryo na Yehova wi ntitelele olaleerya mwa mvai vaavaa nnahoolelaahu wiiciwa. (Wup. 12:17) Ntakhara heeni munaphwanelaanyu ororomela wi Yehova onahaala wookhaviheryaani? Wa nthowa na yeeyo Yesu ovenkeiye mu nivekelo nenlo nnaphwanyeya mu Yohani ekapitulu 17. Mu nivekelo nenla, Yesu aahimveka Yehova wi aakhapelele arummwa, nave Yehova aahaakhula yooveka yeele. Mu liivuru a Saweeriwa ti Arummwa onnooniherya mukhalelo Yehova aakhavihenryeiye arummwa olaleeryaka mwa mvai moohipwacha wiiciwa. Mu nivekelo nimohamoha, Yesu aahimveka tho Yehova wi aakhapelele yaale yaahaala weemererya michaka. Ophitaanyerya tho nyuwaano. Yehova onnatitelela waakhula nivekelo nenla ophiyerya olelo. Owo onahaala wookhaviheryaani hiiha tho ntoko aakhavihenryeiye arummwa.—Yoh. 17:11, 15, 20.

14. Ntakhara heeni ilukuluku soothene nnanwerya olaleerya mwa mvai naamwi ori mu ilukuluku soovila? (Moone tho eruku.)

¹⁴ Vaavaa makuchuwelo anaacamelaaya, wiiliwiili onamukhalaka woovilaxa olaleerya michaka saphaama mwa mvai, nyenya Yesu ooniroromeliha wi nnamukhalano nikhaviheryo nri noothene nnachunaahu. (Luka 21:12-15) Hiiha ntoko Yesu ni oohuserya awe, ninnaahiya achu olakelela waakhanle wi enahaala oniwiriyana naari hooye, nave ninnasepa waakhulana ni yaawo. Naamwi mmakupa yaawo muteko ahu onawatiihiwaayawo, anna ni arokora ahu annawerya olaleerya nthowa na omuroromela Yehova, ohiya ororomela ikuru saya. Hiiha ntoko Yehova aakhavihenryeiye alapeli awe khalai, owo tho onnanivaha ikuru olelo wi “waakhwanele phaama muteko woolaleerya” mwawiiwanana ni yookhwela awe. (2 Tim. 4:17) Mwawiihiiha, mmuroromele Yehova nave owo onamookhaviheryaani otitelela olaleerya mwa mvai.

YESU AAHIKHALANO MOONELO WOOPHWANELELA

15. Ti heeni enooniherya wi Yesu aakhalano moonelo woophwanelela vooloca sa muteko woolaleerya?

¹⁵ Yesu aahikhalano moonelo woophwanelela vooloca sa muteko woolaleerya. Eyo yaahimukhaviherya ohiyeleela mvai awe ni otitelela opaka owetha wawe. Ntoko yootakiherya, variyari va eyaakha emoha Yesu amanle opacerya olaleerya, owo aahiiwexexa wi achu ancipale yaakhalano nchuno na owiriyana michaka saphaama, ophiyerya wi owo aahaalikanyiha ni imaca seiyo soolya saya saamalenle sinachuna ohaciwa. (Yoh. 4:35) Nave voocharela aahiloca wa oohuserya awe ariki: “Muteko wa ohaca wootepa waaca.” (Mat. 9:37, 38) Ohoolo waya, owo aahuuluula wanaawiili ariki: “Muteko wa ohaca wootepa waaca . . . Mumveke Mwaneene a ohaca wi aarumihe anamuteko mmuteko awe wa ohaca.” (Luka 10:2) Yesu aanatitelela ororomela wi yaahaala okhalavo achu yaahaala okhalano nchuno na owiriyana michaka saphaama, nave owo aanatepa ohakalala vaava eyo yeereyaaya—Luka 10:21.

16. Ti mwawiihai maphwanaphwaniho a Yesu yaakhavihenryaaya oohuserya awe okhalano moonelo woophwanelela vooloca sa olaleerya? (Luka 13:18-21) (Moone tho eruku.)

¹⁶ Wi aakhaviherye oohuserya awe ohiyeleela mvai, Yesu aahiwooniherya mukhalelo michaka seiho yaalaleeryaya saahaalaaya okumiherya sookhumelela saphaama. Ntoko yootakiherya, moone maphwanaphwaniho meeli owo aapankeiye. (Mwaalakhanye Luka 13:18-21.) Yesu aahipharihela niphwanaphwaniho na mwaammiso wa mustarta wi ahusihe wi michaka sa Omwene saahaala waaceereryeya mmukhalelo wootikhiniha nave wi hiyaavo yaahaala ohiiha waaceereryeya waya. Nave mu niphwanaphwaniho nikina, owo aahipharihela yooruruvaliha wi ooniherye mukhalelo michaka sa Omwene saahaalaaya omwaramwaxeya ni mukhalelo saahaalaaya oruuhela matorokelo wa yaale yaahaala owiriyana, naamwi matorokelo awo ehooneyaka mwawaakuveya wa akina. Mwawiihiiha, Yesu aahiwooniherya oohuserya awe wi michaka seiyo yaalaleeryaaya saahaala waakhaviherya achu ancipale.

17. Ntakhara heeni ninnaphwanela otitelela okhalano moonelo woophwanelela vooloca sa olaleerya?

¹⁷ Ninnaceenyeryeya otitelela olaleerya mwa mvai vaavaa nnuupuwelaahu mukhalelo muteko woolaleerya onaakhaviheryaaya achu ancipale orukurerya elapo. Iyaakha soothene, mamilyawu a achu yaawo arino nchuno annoonela Yawuupuxerya nave ennamuhuserya Piipiliya ni hiyaano. Achu masana masaneene annapatisiwa nave annakhala vamoha ni hiyaano mmuteko woolaleerya. Hannasuwela akavi enahaala weemererya muchaka ahu, echu nsuwenlaahu ti yawi Yehova onnathukumanya muloko mutokweene yoowo onahaala okophola mu yoohooxa etokotoko. (Wup. 7:9, 14) Yehova, Mwaneene a ohaca, oosuwela wi ancipale ananwerya weemererya michaka saphaama. Mwawiihiiha, nookhalano mathowa aphaama wi ntitelele olaleerya!

18. Tiheeni nnachunaahu wi achu yiiwexexe vooloca sa hiyaano?

¹⁸ Echu yaasuwanyeiha oohuserya a Yesu, waari mvai yaaryaayano mmuteko woolaleerya. Ntoko yootakiherya, arummwa yaahilaleerya moolipa murima ni moohakalala, ophiyerya wi achu ‘yaahiiwexexa wi awo yaakhala vamoha ni Yesu’. (Saw. 4:13) Olelo tho, vaavaa nnalaleeryaahu michaka saphaama, nnachuna wi achu enanoona mmuteko woolaleerya, eroromele wi nnatakiherya mvai wa Yesu.