Mutitelele Weeca mu Nroromelo

1. Ntakhara heeni murummwa Paulo aanawerya wuupuwelela sa muculi ni wiisoona okhala oohakalala?

MURUMMWA Paulo, aanasuwela wi moohilekela aahaala okhwa. Nyenya vaavaa uupuwenleiye mukhalelo aapharihenleiye okumi awe, aahiisoona okhala oohakalala. Owo aahi: “Kookwaaxa ochimaka, kookhala mwawiiwanana ni nroromelo.” (2 Tim. 4:6-8) Paulo aahipaka soolakelela sa miruku mu okumi awe ntoko Mukristu nave aanasuwela wi aahihakalaliha murima wa Yehova. Hiyaano tho, nnachuna opaka soolakelela saphaama ni okhalano weemereryiwa ni Yehova. Vano, tiheeni nnaphwanelaahu weera?

2. Enataphulela eheeni weeca mu nroromelo?

² Alocaka sa yene mwaneene ni wa Akristu akina oororomeleya, Paulo aahi: “Nneeca moorweela wa nroromelo, ohiya moorweela wa ichu sawooneya.” (2 Ako. 5:7) Eyo enataphulela eheeni? Mpiipiliyani, masu awi “weeca” ikwaha ikina enaahiwa mukhalelo muchu onalakeleleiye opharihela okumi awe. Wakhala wi muchu oneeca pahiru mu ichu sawooneya, owo onapaka soolakelela seiyo inathipeleya pahiru mwa seiyo onaweryeiye woona, wiiwa ni wuupuwela. Mmukhalelo mukina, wakhala wi muchu oneeca mu nroromelo, owo onapaka soolakelela sinathipeleya seiyo iniiwanana ni mukhalelo Yehova oonuupuweleiye. Meerelo awe ennooniherya wi owo onnalekecheya yawi Muluku onahaala omuchuwela nave wi ikano sa Yehova, nnaphwanyaahu Mpiipiliyani, ilukuluku soothene ti samphurelo wa hiyaano.—Sal. 119:66; Ahe. 11:6.

3. Miphurelo taani nnakhalaahuno vaavaa nneecaahu mu nroromelo? (2 Akorintu 4:18)

³ Eparipari wi oothene ahu ninnapaka soolakelela ikina sinathipeleya wa yeeyo nnoonaahu, nniiwaahu ni nnuupuwelaahu. Nyenya, wakhala wi nnatikitheryeya pahiru mu ichu seiho vaavaa nnapakaahu soolakelela soochuneya, mweeparipari, nnahaala okhalano makacamiho. Ntakhara heeni? Nthowa nawi ilukuluku soothene hannaphwanela ororomela wa yeeyo nnoonaahu, nniiwaahu ni nnuupuwelaahu. Wakhala wi nneeca pahiru mu ichu sawooneya, mu elukuluku vyakala nnawerya opaka yoolakelela yeeyo Yehova oohineemereryeiye. (Ekl. 11:9; Mat. 24:37-39) Nyenya wakhala wi ninneeca mu nroromelo, nnahaala opaka soolakelela seiyo ‘sinaahakalaliha Apwiya’. (Aef. 5:10) Ohiya yeeyoru, ochariha ikano sa Muluku onahaala onivaha murecele wa mpuwa ni ohakalala weeparipari. (Sal. 16:8, 9; Yes. 48:17, 18) Nave natitelela weeca mu nroromelo, nnahaala okhala okhala wookhala.—Mwaalakhanye 2 Akorintu 4:18.

4. Ti mwawiihai muchu onahaaleiye osuwela wi oneeca mu nroromelo naari mu ichu sawooneya?

⁴ Nni nsuwele hai waakhanle wi nneeca mu nroromelo naari mu ichu sawooneya? Xaxaxa, nnaphwanela wiikoha: Echu taani kinathokororyaaka vaavaa kinapakaaka yoolakelela? Apwanne kinuupuwela pahiru wa ichu seiho kinaweryaaka woona? Naari, apwanne kinapaka soolakelela kithokororyaka ikano sa Yehova? Mmwaha yoola, nnahaala woona mukhalelo nnahaalaahu otitelela weeca mu nroromelo mmikhalelo miraru soochuneya: Vaavaa nnathanlaahu muteko, vaavaa nnalakelelaahu taani nnayaahu othelanano ni vaava nnaakhelaahu ohoolela wa mmarehereryo a Yehova. Nave mmoha ti mmoha wa mikhalelo seiha, nnahaala woona yeeyo nnaphwanelaahu othokororya wi nipake yoolakelela yaphaama.

VAAVAA NNATHANLAAHU MUTEKO

5. Echu taani enakhala yookhweya wuupuwela vaavaa nnathanlaahu muteko?

⁵ Oothene hiyo, ninnachuna wiivakulela ni okhapelela soothowa soomwiilini sa emusi ahu. (Ekl. 7:12; 1 Tim. 5:8) Miteko mikina sinnaliva phaama nyenya mikina hooye. Mmikhalelo seiya, ti wooweryeya waakhwaniherya soothowa sa nihiku ti nihiku nave ophiyerya tho okhapelela ekhorowa ntakhara muhoolo. Mmiteko mikina, ikhorowa sinaakhwanela pahiru wi ikuliweno pahiru ichu soochuneya sa emusi. Vaavaa nnathanlaahu muteko, ti yawooneya wi nnahaala wuupuwela ikhorowa kavi nnayaahu waakhelaka. Nyenya wakhala wi ti yeelaru nnathokororyaahu, nni neeceke mu ichu sawooneya.

6. Nnii neece hai mu nroromelo vaavaa nnathanlaahu muteko? (Ahepri 13:5)

⁶ Wakhala wi nneeca mu nroromelo, nnahaala wuupuwela tho mukhalelo muteko nthanlilaahu waahaalaaya ovolowela onthamwene ahu ni Yehova. Nnanwerya wiikoha: ‘Mmuteko yoola, apwanne kinahaala opakaka echu yeeyo Yehova oniiceiye?’ (Mas. 6:16-19) ‘Apwanne kinahaala oyeleelaka mithukumano naari ohikhalano elukuluku yawaakhwanela wi kilaleeryeke naari omwaalakhanya Piipiliya?’ (Afi. 1:10) Wakhala wi naakhulo wa makoho yaala ti nawi aai, yaamukhala yamiruku oheemererya muteko yoowo, naamwi okhalaka woovila ophwanya muteko. Hiyaano nneeca mu nroromelo, wa nthowa na yeeyo, ninnapaka soolakelela seiho sinooniherya ororomela wahu wi Yehova onahaala okhapelela soothowa sahu.—Mat. 6:33; mwaalakhanye Ahepri 13:5.

7-8. Ti mwawiihai munna onakhala o Amerika Oohico eenceiye mu nroromelo? (Moone tho eruku.)

⁷ Moone mukhalelo Xaviere,a munna yoowo onakhala wa Amerika oohico, iiwexenxeiye ochuneya waya weecaka mu nroromelo. Owo ooloca: “Kaahaaxa muteko yoowo waahaala okilivaka ikhorowa sawaaca nave yoowo waahaala okeeriha wiisoonaka okhala awaakhwaneliwa.” Nyenya Xaviere, aanachuna tho vancipale okhala piyoneero. Owo ooloca: “Kaahiwerya opakeliwa makoho ntakhara muteko ni muhooleli a elapo. Kihaakumve opakeliwa makoho, kaahivekela kivekaka nikhaviheryo, woona wi kaahisuwela wi Yehova oosuwela yeeyo eri yoophwanelela wa miyo. Kaanachuna muteko woophwanelela ni ikhorowa sawaaca, nyenya eyo ehikaakanyenrye opaka sincipale ntakhara Yehova.”

⁸ Xaviere ooloca: “Variyari va opakeliwa makoho, muhooleli a muteko aahikileela wi kaaphwanela olapaka iwora sawaaceererya mwawuuluulela. Mmukhalelo wa ncicimiho, kaahimutharihela wi nkaaphwanela weerano yeeyo wa nthowa na omulapela waka Yehova.” Xaviere aahilakelela oheemererya muteko, nave mu isumana piili ohoolo waya aahikhala piyoneero. Ohoolo waya, mu eyaakha ene yeele, owo aahiphwanya muteko wa iwora vakhaani. Owo ooloca: “Yehova ohiiwa mavekelo aka nave akikhaviherya ophwanya muteko yoowo onakeemererya okhala piyoneero. Kinnahakalala vancipale woona wi muteko yoola onnakivaha elukuluku yawaaca wi kimurumeele Yehova ni wa annaka.”

9. Echu taani muhusenryaanyu ni yaweereya ya Trésor?

⁹ Hanka wakhala wi nohoona wi muteko yoowo nryaahuno hiihaano onnanihiiha weecaka mu nroromelo? Moone yeeyo yeeren’ye ni munna o Konku, awiichaniwa Trésor. Owo oriye: “Kaakhalano muteko yoowo kaachunaaka. Kaanaakhela ikhorowa sincipale opwaha muteko aka wa khalai nave kaanacicimihiwa ni achu ancipale.” Nyenya Trésor ikwaha ikina aanayeleela mithukumano woona wi aanaphwanela olapaka mu iwora sawaceererya. Owo tho aanakhinyereryiwa woothaka wi avithe ichu soohiroromeleya seiho emperesa yaapaakaaya. Trésor aanachuna okhuma mu emperesa, nyenya owo aanoova ohiphwanya muteko mukina. Tiheeni yaamukhavihenrye? Owo ooloca: “Hapakuki 3:17-19 ookikhaviherya wiiwexexa wi Yehova ilukuluku soothene aahaala okikhapelela, naamwi kahin’ye muteko yoole ni okhalakano ikhorowa vakhaani. Mwa yeeyo, kaahiveka wi kihiye muteko.” Owo onnathariha: “Ancipale anuupuwela wi anamuteko aya eri ooreheryeya opaka wiilipixerya vyakala wi eweryeke waakhela ikhorowa sawaaca, ophitaanyerya elukuluku yeeyo anamalihaaya ni amusi aya ni elukuluku yeeyo anapharihelaaya wi emulapele Muluku. Kinnatepa ohakalala woona wi kookhapelela onthamwene aka ni Yehova vamoha ni emusi aka. Eyaakha emoha ohoolo waya, Yehova aakikhaviherya ophwanya muteko waphaama. Kinnaakhela ikhorowa sawaakhwanela wi kivakuleleno emusi aka nave kookhalano elukuluku wi kimurumeele Yehova. Wakhala wi ninnamukuha Yehova mu nipuro noopacerya, nnanwerya ohoolela makacamiho vyakala a othoiwa ikhorowa. Nyenya Yehova ilukuluku soothene onahaala onikhapelela!” Wakhala wi ninnaroromela ikano sa Yehova, nnahaala otitelela weecaka mu nroromelo, nave owo, mweeparipari onahaala onireeliha.

VAAVAA NNAMUTHANLAAHU OOTHELANANO

10. Ti mwawiihai muchu aahaaleiye weeca mu ichu sawooneya vaavaa onamuthanleiye muchu oothelanano?

¹⁰ Othela yamahala ya Yehova, mwa yeeyo ti wooweryeya ochuna othela naari otheliwa. Vaavaa anamuthanleiye oothelanano, akhweya murokora owo onanwerya waalikhela omuchu wa munna, mukhalelo awe, meecelo, mukhalelo owo onaphariheleiye ikhorowa, mirici aryeiyeno veemusini ni waakhanle wi owo onnamuhakalaliha.b Ichu soothene seiha ti soochuneya. Nyenya wakhala wi owo onuupuwela pahiru wa ichu seiha, owo onahaala weecaka mu ichu sawooneya.

11. Tiheeni nnaphwanelaahu weera wi neece mu nroromelo vaavaa nnamuthanlaahu muchu oothelanano? (1 Akorintu 7:39)

¹¹ Yehova onniirumiha ni anna ni arokora yaawo enawerya ochariha ikano sawe vaavaa anamuthanlaaya oothelanano! Ntoko yootakiherya, awo annacicimiherya ohoolela wa owehererya ophiyerya ‘winnuwa’ ahaakumve opacerya opaka ompwana. (1 Ako. 7:36) Awo, annapwachapwacha wi muchu yoowo anayaaya othelanano, anaphwanela okhalano mikhalelo seiho Yehova olonceiye wi mulopwana ni muthiyana ekhaleno. (Mas. 31:10-13, 26-28; Aef. 5:33; 1 Tim. 5:8) Wakhala wi muchu yoowo ohiri Namoona a Yehova onnooniherya nchuno wa yaawo, awo annachariha ekano ya othelana “pahiru mwa Apwiya”, yeeyo enaphwanyeya mu 1 Akorintu 7:39. (Mwaalakhanye.) Awo annatitelela weeca mu nroromelo nave annaroromela wi Yehova ilukuluku soothene onahaala waakhapelela phaama yaawo mmuupuweloni ompwaha muchu mukina.—Sal. 55:22.

12. Echu taani muhusenryaanyu ni yeeyo yeeren’ye ni Rosa?

¹² Moone yeeyo yeeren’ye ni murokora a wiichaniwa Rosa o Kolompiya. Wa nthowa na muteko awe, owo aanavaanela vancipale ni mulopwana yoowo aahiri Namoona a Yehova nave mulopwana yoowo aapacerya omukhwela. Nave Rosa aapacerya tho omuchuna yoowo. Owo ooloca: “Waakhala ntoko wi aari mulopwana aphaama. Owo aalapa muteko wawiiveleela nave owo haamulya soona naari owuryaxa. Ohiya yeeyoru, owo aanatepa okikhaliha phaama. Owo aakhalano soothene seiho kaachunaaka mwa mulopwana, pahiru haari Namoona a Yehova. Mweelukuluku yeele, kiisoona okhala mukhataaka; kaanachuna otheliwa, nyenya nkaamphwannye muchu a mmarehereryo. Ti nthowa nene waaryaaya woovila oloca wi hooye wa yoowo, woona wi yaari echu kaachunaaka vancipale.” Naamwiihiiha, Rosa haakuxen’ye ni mukhalelo yoole nave haaweence mu ichu sawooneya. Owo aahimaala wi uupuwele yeeyo yaahaala weereya ni onthamwene awe ni Yehova waakhanle wi oothelana ni mulopwana yoowo. Mwa yeeyo, aahilakelela okwatelela ovaanela nave atikitheryeyaxa mmiteko soomunepani. Vahilekenle ohoolo waya, owo aahiwompwa ntakhara Exikola ya Alaleeryi a Omwene nave olelo, owo onarumeela ntoko piyoneera avameekheiye. Rosa ooloca: “Murima aka onnatekhuma ni ohakalala ni mareeliho yaawo Yehova okivanheiye.” Eparipari wi ilukuluku soothene tahi wookhweya weecaka mu nroromelo mmiyaha seiho sinavolowela miyoonelo sahu. Nyenya vaavaa nnamuhiyaahu Yehova wi anihoolele, ilukuluku soothene sookhumelela sene inakhala saphaama wa hiyo.

VAAVAA NNAAKHELAAHU OHOOLELA WA MMAREHERERYO A YEHOVA

13. Echu taani enahaala oneeriha weeca mu ichu sawooneya vaavaa nnaakhelaahu ohoolela wa mmarehereryo?

¹³ Ti yawunlaana waakhela ohoolela wa mmarehereryo yoowo onanikhaviherya omurumeelaka Yehova mmukhalelo woophwanelela. Ohoolela yoola onanwerya orweela wa atokweene a muloko a vanipuroni, ooweherya a ekulucu, o Peteli naari wa Nikhuuru Noolamulela. Nyenya hanka wakhala wi hanniiwexexa yeeyo eri oculi wa ohoolela vyakala? Akhweya nnanwerya wuupuwelaka pahiru wa makacamiho yaawo anahaala okhumelela wa nthowa na ohoolela yoowo. Ophiyerya wi, nnawerya otikitheryeyaka ohiphaameya wa anna yaawo evanhe ohoolela.

14. Echu taani enahaala onikhaviherya weeca mu nroromelo vaava nnaakhelaahu ohoolela wa mmarehereryo? (Ahepri 13:17)

¹⁴ Vaavaa nneecaahu mu nroromelo, ninnaroromela wi Yehova tonahoolela marehereryo awe nave wi owo oosuwela phaama mikhalelo sa mmoha ti mmoha a hiyo. Wa nthowa na yeeyo, ninniiwelela mwawaakuveya ohoolela nave ninneerano yeeyo ni moonelo woophwanelela. (Mwaalakhanye Ahepri 13:17.) Noosuwela wi wiiwelela wahu onnaruuhela wiiwanana mmulokoni mwahu. (Aef. 4:2, 3) Naamwi anna yaawo anahoolela eri oohiphaameya, ninnaroromela wi Yehova onahaala onireeliha wakhala wi naachu awiiwelela. (1 Sam. 15:22) Wakhala wi matorokelo vyakala toochuneya, Yehova onahaala okhapelela mwaha yoowo mu elukuluku yoophwanelela.—Mik. 7:7.

15-16. Tiheeni yaamukhavihenrye munna weeca mu nroromelo naamwi aarino minikwa vooloca sa ohoolela wa mmarehereryo? (Moone tho eruku.)

¹⁵ Moone yootakiherya yeeyo enooniherya wa miphurelo ya weeca mu nroromelo ni wiiwelela ohoolela wa mmarehereryo. O Peru, ancipale analoca Espanyola, nyenya achu akina analoca ilocelo sa vanipuroni. Emoha wa yeeyo eniichaniwa Quéchua. Nyenya wi naakhwaniherye malamulo a alamuleli, yaapakiwa matorokelo a mukhalelo wa waaphwanya achu. (Aro. 13:1) Ntoko yookhumelela, anna akina yaapacerya wiikoha waakhanle wi matorokelo yaale hiyaahaala waakanyerya muteko woolaleerya mu elocelo yeele. Woona wi anna yaahichariha ohoolela yoola, Yehova aahireeliha wiilipixerya waya waaphwanya achu ancipale yaawo yaaloca elocelo ya Quéchua.

¹⁶ Kevin, mutokweene yoowo onarumeela muloko wa elocelo Quéchua, aari mmoha a yaawo yaari awuukhuwa. Owo onnathariha: “Miyaano kaanuupuwela: ‘Vano nni niweryeke hai waaphwanya achu yaawo analoca elocelo ya Quéchua?’” Tiheeni Kevin eenreiye? Owo ooloca: “Kaahimuupuwelela Masiposipo 3:5 ni yootakiherya ya Mose. Yehova aahimvaha ohoolela yoowo wooneya ntoko wi hiwaari woophara muteko. Vaavaa Aisarayeli yaachawaaya o Yikuputu, Yehova aahiloca wa Mose wi aakuxe achu aakerihe mu ephiro yeeyo yaakotela o Eniya Yooxeerya. Yooneya ntoko wi hiyaahaala okophola, nave waahaala okhala wookhweya ophariwa ni a Yikuputu. Naamwi hiiha, Mose aahiiwelela, nave Yehova aahaareeliha Aisarayeli, apakaka yootikhiniha yoohaleeliha wi awoopole achu.” (Muk. 14:1, 2, 9-11, 21, 22) Moohipwacha wuukhuwa, Kevin aari ooreheryeya opaka matorokelo mmuteko awe woolaleerya. Teevi yaari yookhumelela? Owo ooloca: “Yaari yootikhiniha woona mukhalelo Yehova aanikhavihenryeiye. Woopaceryani naaneeca vancipale mu ikulucu nyenya pahiru naamphwanya muchu mmoha naari apiili. Vano nnatikitheryeya mmapuro yaawo anaphwanyeyamo achu ancipale yaawo analoca elocelo ya Quéchua. Mwawiihiiha, hiyaano ninnawerya ovaanela ni achu ancipale nave tho ninnakhalano sooxekurya sincipale ni soohuserya. Ohiya yeeyoru, nuumero na achu anaphiya mmithukumanoni noohaaceerereya.” Moohikhwa minikwa, vaava nneecaahu mu nroromelo, ilukuluku soothene ninnachuweliwa ni Yehova.

17. Tiheeni muhusenryaanyu mmwaha yoola?

¹⁷ Hiyaano noohoona mukhalelo wa otitelela weecaka mu nroromelo vaava nnapakaahu soolakelela vooloca sa miyaha miraru soochuneya. Nyenya nnaphwanela otitelela weecaka mu nroromelo mmakupa oothene a ekumi ahu; ntoko yootakiherya, vaavaa nnathanlaahu mathatelo ahu, yeeyo nnapakaahu vaavaa nnakhalaahuno elukuluku yootaphuwa, vaavaa nnapakaahu soolakelela vooloca sa ohuserya naari waavya muteko ni vooloca sa waaphuwa anamwane. Wa yoolakelela ti yoolakelela, nnaphwanela ohooleliwa, ohiya pahiru wa yeeyo nnaweryaahu woona, nyenya moorweela wa onthamwene ahu ni Yehova, ikano sawe ni yoororomeliha ya ilukuluku soothene onikhapelela. Neerano hiiha, “nnarwa neeca mu nsina na Apwiya [Yehova] Muluku ahu mahiku oothene.”—Mik. 4:5, PMM.