‘Omwaacamela Muluku Ti Waphaama’ wa Hiyo!

1-2. (1) Tiheeni eri yoochuneya weera wi mukhaleno onthamwene ni muchu? (2) Tiheeni nnahalaahu othokororya mmwaha yoola?

APWANNE nyuwaano mookhalaano nthamwene awaacameleya? Ti mwawiihai mwinnuwinhaanyu onthamwene anyu ni yoowo? Ti yawooneya wi mwaanaviriha elukuluku vamoha, mwaahihuserya saweereya sa okumi awe nave tho vooloca sa yeeyo enamusivela ni ehinamusivela. Nyuwaano mwaahiwerya woona mikhalelo sawe saphaama seiyo mwaahaalaanyu osiveliwa otakiherya. Nave mwaapacerya omusivela nthamwene anyu.

² Winnuwiha onthamwene woolipa ni muchu onnachuneya elukuluku ni ikuru. Emohamoha tho, wi ninnuwihe onthamwene ahu woolipa ni Yehova onnachuneya elukuluku ni ikuru. Mmwaha yoola nnahaala woona mukhalelo nneeraahu nimwaacamelexa Muluku ni miphurelo seiyo inakhalavo nthowa na weerano yeeyo. Voopacerya, nnahaala othokororya ntakhara heeni oryaaya waphaama omwaacamela Nthamwene ahu aphaamaxa, Yehova.

3. Ntakhara heeni ti waphaama wuupuwelela miphurelo inakhalavo moorweela wa omwaacamela Yehova? Mphwanaphwanihe.

³ Moohikhwa minikwa, nyuwaano munneemererya wi ti waphaama omwaacamela Yehova. Nyenya wuupuwelela mwawiiseela mukhalelo oryaaya waphaamaxa omwaacamela Yehova, onamuniceenyerya otitelela omwaacamela yoowo. (Sal. 63:6-8) Ntoko yootakiherya, noosuwela wi olya soolya soophwanelela, ovyakiha mwiili, wiichuuwa mwawaakhwanela ni owurya maahi mancipale ti saphaama wa hiyaano. Nto naamwiihiiha, ancipale hanachariha sooleeliherya seiya nave hanapwacha okumi aya. Mwawiihiiha, vaavaa nnuupuwelaahu vooloca sa miphurelo nnakhalaahuno mu ochariha sooleeliherya seiyo inakhaliha phaama okumi ahu, ninnatitelela ochariha. Mmukhalelo mmohamoha, noosuwela wi omwaacamela Yehova ti waphaama wa hiyaano, nyenya wuupuwelela miphurelo inakhalavo mu weerano yeeyo, onnanceenyerya otitelela omwaacamela Nthamwene ahu.—Sal. 119:27-30.

4. Ntoko yooniheryiwaaya mu Salmu 73:28, masu taani namarepa ola aalonceiye?

⁴ Mwaalakhanye Salmu 73:28. Mulipa oomurepa Salmu 73, aari mulevi yoowo aavahiwe murici wa wiipa macipo mu empa ya Yehova. Mwawooneya owo aahimurumeela Yehova mooromeleya mu elukuluku vakhaani. Nyenya, aanasuwela wi waari woochuneya wuupuwela wi ‘omwaacamela Muluku’ waari waphaama wa yene, nave tho aanachuna wi akina esuwele wi okhalano onthamwene ni Muluku waari waphaama tho wa yaawo. Miphurelo taani inakhalavo mu weerano yeeyo?

‘OMWAACAMELA MULUKU’ ONNANIRUUHELA OHAKALALA

5. (1) Ntakhara heeni nnanwerya oloca wi omwaacamela Yehova onnaruuha ohakalala? (2) Mwawiiwanana ni Masiposipo 2:6-16 mvahe yootakiherya mukhalelo miruku sa Yehova inookhapelelaayani ni wookhaviheryaani!

⁵ Wakhala wi onthamwene ahu ni Yehova ti woolipaxa, nnamukhala oohakalalaxa. (Sal. 65:4) Aakhalavo mathowa mancipale ananeeriha ooloca yeeyo. Ntoko yootakiherya, vaavaa nnaalakhanyaahu Mpiipiliyani yeeyo Yehova onachuneiye ni opharihela yeeyo, ninnakhalano miruku. Miruku seiyo sinnanikhapelela mu ovoloweliwa woonanara ni ohipaka soohesa itokweene. (Mwaalakhanye Masiposipo 2:6-16.) Ti nthowa nene, Piipiliya onaloceiye wi: “Oohakalala muchu yoowo onaphwanya miruku ni muchu yoowo onakhalano wiiwexexa.”—Mas. 3:13.

6. Ntakhara heeni mulipa oomurepa Salmu aayeleela ohakalala?

⁶ Eparipari wi asinthamwene a Yehova vakina vaya annakhala awuukhuwa. Mulipa oomurepa Salmu 73 aahiyeleela ohakalala wawe vaavaa aapacenryeiye ovoloweliwa ni miyoonelo soohiphwanelela. Owo aanakhala oonyeenyeya nave aanaakhalela nrima achu aweera soonanara, uupuwelaka wi yaawo ahinamurumeela Muluku ni ochariha malamulo awe yaakhalano okumi woohakalaliha. Mulipa oomurepa Salmu aaphiyerya makuchuwelo oonanara awi achu a nlala ni awiikhoma yaari ooreelaxa, yaahikhalano ekumi yaphaamaxa nave yaahooxeya vakhaani. (Sal. 73:3-7, 12) Owo aahikhala awaakanyeryeyaxa, ophiyerya wi aapacerya wiikoha waakhanle wi owetha wawe mu omurumeela Yehova chiryene waari wamphurelo. Mu othanana wawe owo ooloca: “Mweeparipari, kaatitelenle weeliha murima aka mahaleene ni onyawa matata aka mu ohikhalano nthowa.”—Sal. 73:13.

7. Vaavaa nnakhalaahu oothanana, tiheeni nnaphwanelaahu weera? (Moone tho ya ekaapa.)

⁷ Naamwi aari oothananaxa, mulipa oomurepa Salmu aaheeravo echu wi atoroke mukhalelo awe wa wuupuwela. Owo ‘aavolowa mu nipuro ntokweene naweela na Muluku,’ ti weiwo Yehova aawookolonleiyewo mukhalelo awe wa wuupuwela. (Sal. 73:17-19) Olelo tho, Yehova Nthamwene ahu aphaamaxa onnasuwela vaavaa nnakhalaahu othanana. Wakhala wi nooveka ohoolela wawe ni weemererya nikhaviheryo nenlo onanivaheiye orweela Mmasu awe ni mmulokoni, nnanwerya okhalano ikuru wi nivoothe othanana wahu. Naamwi nri awuukhuwaxa ophiyerya nihinasuwela echu yaweera, Yehova onahaala onihakararya ni onimaaliha.—Sal. 94:19.a

‘OMWAACAMELA MULUKU’ ONNANIVAHA YOOLAKELELA YAPHAAMA NI EWEHERERYO

8. Mmikhalelo taani mikina miili soochuneya sa omwaacamela Muluku oryaaya wa phaama wa hiyaano?

⁸ Omwaacamela Muluku ti waphaama mmikhalelo mikina miili soochuneyaxa. Yoopacerya, eyo ennanivaha yoolakelela yeeparipari mookumini. Yanaawiili, ennanivaha ewehereryo yoolipa ya omwaahiyu. (Yer. 29:11) Nnahaala othokororya vakhaani vooloca sa miphurelo seiya miili.

9. Ntakhara heeni okhala asinthamwene a Yehova onnanivaha yoolakelela yaphaama ya okumi?

⁹ Achu ancipale olelo annaloca wi Muluku haawo. Mwawiihiiha, awo anuupuwela wi okumi hiwaano yoolakelela, nave wi achu pahiru enamuhiya okhala. Nyenya okhala asinthamwene a Muluku onnanivaha yoolakelela yaphaama ya okumi. Omuhuserya Piipiliya onnanlekecha wi Muluku “ookhala nave wi onnaachuwela yaale anamwaavya mweeparipari.” (Ahe. 11:6) Ohiya yeeyoru, Yehova onipatunxe ni nchuno na omurumeela yoowo. Nave vaavaa nneeraahuno yeeyo, okumi ahu onnakhala woohakalalaxa.—Malam. 10:12, 13.

10. Mwawiiwanana ni Salmu 37:29, tiheeni Yehova ororomelinheiye wa yaale anamuroromela?

¹⁰ Olelo, ancipale hiyanono ewehereryo yeeparipari ntakhara omwaahiyu. Awo anatikitheryeya pahiru mu olapa, othela, waayara anamwane ni weererya okhapelela ikhorowa vakhaani ntakhara vaavaa ehinahaalaaya oweryaka olapa. Muluku hanapaka makupa mu okumi aya. Nyenya alapeli a Yehova ewehereryo aya enathipeleya wa yoowo. (Sal. 25:3-5; 1 Tim. 6:17) Hiyaano ninnamuroromela Muluku ni Nthamwene ahu, nave ninnaroromela wi onahaala waakhwaniherya soothene ororomelinheiye. Hiyaano ninnawehererya ichu sincipale saphaama inahaala weereya omwaahiyu, xaxaxa owerya omurumeela Yehova okhala wookhala Mparataiso.—Mwaalakhanye Salmu 37:29.

11. Miphurelo taani mikina nnakhalaahuno moorweela wa okhala asinthamwene a Yehova?

¹¹ Okhalano onthamwene ni Muluku onnaniruuhela miphurelo mincipale. Ntoko yootakiherya, vaavaa nnapakaahu yoocheka nave ncharuwa, Yehova onnanroromeliha onikhurumuwela. (Yes. 1:18) Mwawiihiiha, nnanwerya okhalano yawuupuxerya ya murima yaphaama, nihiiphwanyenrye mathowa wa soocheka seiyo sakhalai. (Sal. 32:1-5) Ohiya yeeyoru, nookhalano ekari ya omuhakalaliha Yehova. (Mas. 23:15) Moohikhwa minikwa, nyuwaano munnawerya wuupuwela mareeliho makina mancipale yaawo anakhalavo moorweela wa okhala asinthamwene a Muluku. Vano, nni ntitelele hai omwaacamela Muluku?

MUTITELELE ‘OMWAACAMELA MULUKU’

12. Tiheeni nyuwaano mweenraanyu wi mukhale nthamwene a Muluku?

¹² Waakhanle wi mwa Mukristu oopatisiwa, nyuwaano moopaka sincipale wi mukhale nthamwene a Muluku. Nyuwaano moohuserya iparipari sincipale vooloca sa Yehova ni vooloca sa Yesu, mucharuwa soocheka sanyu, mooniherya nroromelo mwa Muluku, mwiilipixerya wi mpakeke yookhwela awe. Nyenya wi nikhaleno onthamwene woolipaxa ni Muluku, nnaphwanela otitelela weerano ichu seiya.—Ako. 2:6.

13. Ichu taani raru seiyo inahaala onikhaviherya wi ntitelele omwaacamela Yehova?

¹³ Tiheeni enahaala onikhaviherya otitelela omwaacamela Yehova? (1) Nnaphwanela otitelela omwaalakhanya ni omuhuserya Piipiliya. Nyenya yoolakelela ahu henaphwanela okhala pahiru ohuserya mahusiheryo oopacerya vooloca sa Muluku. Nnaphwanela weererya wiiwexexa mukhalelo Yehova onuupuweleiye ni yeeyo owo onachuneiye wi nipake, voocharela, nipharihele mookumini mwahu. (Aef. 5:15-17) (2) Nnaphwanela winnuwiha nroromelo nahu moorweela wa wuupuwelela mikhalelo mincipale seiyo Yehova onooniheryeiye osivela wawe wa hiyaano. (3) Nnaphwanela otitelela wiica ichu seiyo ihinamuhakalaliha Yehova ni ohipaka onthamwene ni achu anapaka ichu soonanara.—Sal. 1:1; 101:3.

14. Mwawiiwanana ni 1 Akorintu 10:31, tiheeni nnaphwanelaahu weera nihiku ti nihiku wi nimuhakalalihe Yehova? (Moone tho iruku.)

¹⁴ Mwaalakhanye 1 Akorintu 10:31. Ti woochuneya wiilipixerya wi nipakeke ichu seiyo inamuhakalaliha Yehova. Henaakhwana pahiru oya mmithukumano ni mmuteko woolaleerya. Eyo ennavolowela yeeyo nnapakaahu nihiku ti nihiku. Ntoko yootakiherya, vaavaa nnakhalaahu oororomeleya mu ichu soothene ni okawana yeeyo nryaahuno ni akina, ninnamuhakalaliha Yehova. (2 Ako. 8:21; 9:7) Owo tho onachuna wi ncicimiheke yamahala ya okumi onivanheiye. Hiyaano ninnamwaacamela Yoole onivanhe ekumi moorweela wa olya ni owurya moophimelela ni moorweela wa okhapelela okumi ahu mmikhalelo mikina. Wiilipixerya ori woothene nnapakaahu wi nimuhakalalihe Yehova, ophiyerya mu ichu inooneya okhala ikhaani, sinnaaceererya osivela wawe ntakhara hiyaano.—Luka 16:10.

15. Nnaphwanela waakhalihaka hai akina?

¹⁵ Yehova tooreera murima wa awookololowa ni oohookololowa. (Mat. 5:45) Owo onaweherya wi neerekeno emohamoha. Ntoko yootakiherya, ‘hinnaaloca akina moonanara, hinnakhala amaraapwa, nto ninnakhala ooleva, ninnooniherya okhala awiichacala ni achu oothene.’ (Titu 3:2) Mwa yeeyo, naamwi muchu ahimweemereryaaka Yehova, hiyaano hinniisoona okhala oochuneyaxa ompwaha yoowo. (2 Tim. 2:23-25) Vaavaa nnakhalaahu ooreera murima ni waakhaliha akina moopwacha, ninnakhala awaacameleyaxa wa Yehova.

NNANWERYA ‘OMWAACAMELA MULUKU’ NAAMWI NIHESAKA

16. Ti mwawiihai mulipa oomurepa Salmu 73, iisooneiye nthowa na soohesa sawe?

¹⁶ Ikwaha ikina, nthowa na soohesa nipankaahu, nnanwerya opacerya wuupuwelaka wi Yehova hakhala tho nthamwene ahu. Mulipa oomurepa Salmu 73 aahikhalano moonelo woolikana ni yoola, nave owo aaloca: “Inaani saka saahanle vakhaani ohuwela; saahanle vakhaani oserekuwa.” (Sal. 73:2) Owo tho aahiloca wi ‘murima awe waanamusoosa’ nave wi ‘aari khamiruku’ “ntoko mwaaxinama oohuupuwela” vamiithoni va Yehova. (Sal. 73:21, 22) Wa nthowa na soohesa sawe, owo aahiphiyerya makuchuwelo awi aari muchu oohichuneya nave wi haaphwanelela waakhela osivela wa Yehova.

17. (1) Naamwi aari mu elukuluku yoovilaxa tiheeni mulipa oomurepa Salmu eenreiye? (2) Yootakiherya awe enanihusiha eheeni? (Moone tho iruku.)

¹⁷ Naamwi mulipa oomurepa Salmu oonaka wi aahiyeleela onthamwene awe ni Yehova, muupuwelo yoola waahivira mwawaakuveya. Enooneya ntoko wi mu elukuluku awe yoovilaxa, owo aahoona ochuneya waya omwaacamela Muluku. Ophiyerya aaloca wa Yehova ariki: “Nto vano, ilukuluku soothene kiri ni nyuwo; moopharela ntata naka noolopwana. Nyuwo munamukeeciha ni ikano sanyu, nave voocharela munamukihoolela mu ncicimiho.” (Sal. 73:23, 24) Vaavaa nnakhalaahu oocecheya naari awuukhuwa nnaphwanela tho waavya nikhaviheryo na Yehova, woona wi owo Mwala ahu onnanikhapelela. (Sal. 73:26; 94:18) Naamwi nimuhin’ye Yehova, mu elukuluku aya nnanwerya okookela okhala asinthamwene awe woona wi noosuwela wi owo ori “oorehereya olevelela.” (Sal. 86:5) Xaxaxa vaavaa nnakhalaahu awuukhuwaxa mu okumi ahu, nnaphwanelaahu omwaacamelaxa Muluku ahu.—Sal. 103:13, 14.

‘MMWAACAMELE MULUKU’ OKHALA WOOKHALA

18. Ntakhara heeni ninnaphwanela otitelela olipiha onthamwene ahu ni Yehova okhala wookhala?

¹⁸ Hiyaano nnaphwanela otitelela oolipiha onthamwene ahu ni Yehova okhala wookhala. Piipiliya onaloca wi iphiro, miruku ni masuwelelo a Yehova ti “sawiixeela.” (Aro. 11:33) Mwawiihiiha, hinirwa nihiya ohuserya vooloca sa Yehova.

19. Yoororomeliha taani Salmu onanivaheiye?

¹⁹ Salmu 79:13 oni: “Hiyaano achu anyu ni muhuwo anyu yoowo munakukhulaanyu, nnamoothamalelaani okhala wookhala, nave nnamulaleya ncicimiho nanyu wa muyareriwo ti muyareriwo.” Vaavaa munamwaacamelaanyu Muluku, nyuwaano tho munanwerya ororomela mu waakhela mareeliho oohimala ni oloca moolekecheya wi: “Muluku ti mwala wa murima aka ni nikupa naka, okhala wookhala.”—Sal. 73:26.