Mmwaavye Yehova wi Mphwanye Nihakararyo

1. Mutharihe mukhalelo wa Ayuta yaari wookapuroni.

MWAANYIHERYE mukhalelo yiisoonnaaya Ayuta yaari wookapuroni o Papulo. Awo yaahoona elapo aya epahuliwaka. Wa nthowa na soocheka saya ni sa makholo aya, awo yaahikuxiwa mu ipa saya nave ekerihiwa mu elapo ekina. (2 Math. 36:​15, 16, 20, 21) Chiryene, yaawo yaari wookapuroni o Papulo yaahikhalano otaphuwa wa owerya opaka miteko saya sa nihiku ti nihiku. (Yer. 29:​4-7) Naamwiihiiha, okumi aya hiwaari wookhweya nave mweeparipari ola hiwaari mukhalelo wa okumi yaahaalaaya okhalano. Mmukhalelo ene yoola, ti mwawiihai awo yiisoonnaaya? Moone masu yaawo a mulapeli oororomeleya mmoha aari wookapuroni: “O mihice so Papulu, naahikiraathi weiwo. Naahinla vaavaa naamuupuwenlaahu Siyoni.” (Sal. 137:1) Yaawo yaari wookapuroni yaahikhala ooceecheya nave yaanachuna nihakararyo, nyenya ti woowi yaahaalaaya ophwanyawo nihakararyo?

2-3. (1) Tiheeni Yehova eenryeiye wa Ayuta yaawo yaari wookapuroni? (2) Tiheeni nnahaalaahu othokororya mmwaha yoola?

² Yehova “Muluku a ohakararya woothene.” (2 Ako. 1:3) Ntoko Muluku oosivela, owo onnasiveliwa waahakararya oothene yaale anamwaacamela yoowo. Yehova aanasuwela wi akina a yaawo yaari wookapuroni yaahaala weemererya olaka wawe nave yaahaala omukookela yoowo. (Yes. 59:20) Mwawiihiiha, opwaha iyaakha 100 ohaakumve okapuro, Muluku aahimveerela mulipa a miririmu Yesaya omurepa liivuru yoowo onakuxa nsina nawe. Ni yoolakelela taani? Yesaya ooloca: “Muluku anyu oriye: ‘Mwaahakararye, mwaahakararye achu aka.’” (Yes. 40:​1, TNM) Aai, moorweela wa soorepa sa mulipa a miririmu, Yehova aahaavaha ohakararya yoowo Ayuta yaawo yaari wookapuroni yaachunaaya.

³ Hiiha ntoko Ayuta yaale yaari wookapuroni, hiyaano tho ikwaha ikina ninnachuna nihakararyo. Nnahaala othokororya mikhalelo miraru seiho inooniherya wi Yehova aahaahakararya yaawo yaari wookapuroni: (1) Owo aahiroromeliha waakhurumuwela yaawo yaacharunwe, (2) aahaavaha ewehereryo achu awe, ni (3) aahimaaliha woova waya. Vaavaa nnathokororyaahu miyaha seiha, moone mukhalelo nnahaalaahu ophura ni masu oohakararya a Yehova.

YEHOVA MWA IKHARARI ONNANIKHURUMUWELA

4. Ti mwawiihai Yehova oonihenryeiye wi Muluku a ikharari? (Yesaya 55:7)

⁴ Yehova “Tiithi a ikharari.” (2 Ako. 1:3) Owo ohooniherya mukhalelo yoola vaavaa aaroromelinheiye waakhurumuwela yaawo yaari wookapuroni yaacharunwe. (Mwaalakhanye Yesaya 55:7.) Owo ooloca: “Ni osivela woororomeleya woohimala kinamoomorela ikharari.” (Yes. 54:​8, TNM) Yehova aahaala wooniherya hai ikharari sawe? Naamwi nloko na Ayuta nlelo naaphwanela ohooxeya ni sookhumelela sa saweera saya, Yehova aahaaroromeliha wi hiyaahaala otitelela okhala o Papulo okhala wookhala. Awo yaahaala okhala o Papulo pahiru mu elukuluku ya vakhaani. (Yes. 40:2) Masu yaala yaahaalipiha ni waahakararya akina yaawo yaacharunwe nave yaachuna omuhakalaliha Yehova!

5. Ntakhara heeni nryaahuno mathowa mancipale waapwaha Ayuta yaari wookapuroni wi nooniherye othamalela wa ikharari sa Yehova?

⁵ Tiheeni nnahuseryaahu? Yehova ari ooreheryeya waakhurumuwela moomalela alapeli awe. Olelo nookhalano mathowa mancipale a ophura mukhalelo yoowo waapwaha Ayuta yaawo yaari wookapuroni. Ntakhara heeni? Nthowa nawi noosuwela yeeyo Yehova opankeiye wi akhurumuwele soocheka sahu. Iyaakha masaneene Yesaya amanle oloherya, Yehova aahimurumiha Mwanawe oosiveliwa veelaponi yavathi wi avahererye woopola wa anamacheka oothene oocharuwa. Mukucho yoola onnavaha ekari wi soocheka “ixipihiwe” moomalela. (Saw. 3:19; Yes. 1:18; Aef. 1:7) Mweeparipari, Yehova Muluku ookhurumuwelaxa!

6. Ti mwawiihai nnahaalaahu ophura moorweela wa otikitheryeya mu ikharari sa Yehova? (Moone tho eruku.)

⁶ Masu ooveereliwa a Yehova enaphwanyeya mu Yesaya 55:7 ananwerya onilipiha wakhala wi ninniiphwanyera mathowa. Akina a hiyaano nnanwerya otitelela wiiphwanyerya mathowa wa nthowa na yoohesa yeeyo naapankaahu naamwi nimanle ocharuwa. Eyo enanwerya weereya wakhala wi ninnahooxeya xaxaxa ni sookhumelela sa yoohesa yeeyo. Mwawiihiiha, wakhala wi noolokoha soocheka sahu nave nicharuwa nnanwerya olekecheya wi Yehova oonikhurumuwela. Vaavaa Yehova onanikhurumuweleiye, owo onnathanla ohuupuwelela tho yoocheka ahu. (Mulikanyihe ni Yeremiya 31:34.) Woona wi Yehova hanuupuwelela soohesa sahu sakhalai hiyaano tho hannaphwanela otitelela wuupuwelela seiho. Wa Yehova, echu yoochuneya ti yeeyo nnapakaahu hiihaano, ohiya soohesa seiho nipankaahu khalai. (Ese. 33:​14-16) Nave moohilekela, Tiithi ahu a ikharari onahaala onitaphula moomalela mu sookhumelela sa soohesa sahu.

7. Tiheeni enahaala oneeriha waavya nikhaviheryo wakhala wi ninnavitha yoocheka?

⁷ Tiheeni nnaphwanelaahu weera wakhala wi nookhalano yawuupuxerya ya murima yoolimela nthowa na ovitha yoocheka etokweene? Piipiliya onnaniceenyerya oveka nikhaviheryo na atokweene. (Tiy. 5:​14, 15) Ikwaha ikina, nnanwerya woona okhala woovila weemererya soohesa sahu. Nyenya nnaphwanela waapharihela alopwana yaala wi enikhaviherye nave wi awo enahaala okhala oosivela ni a ikharari ni hiyaano hiiha ntoko Yehova oryeiye, wakhala wi nohuupuwelela yeeyo nave ncharuwa nnahaala okhalano nchuno na oloca ni yaawo. Muthokororye mukhalelo ikharari sa Yehova saamulipinhaaya munna mmoha awiichaniwa Arthura yoowo aarino yawuupuxerya murima yawaakanyeryeyaxa. Owo ooloca: “Variyari va eyaakha emoha, kaanoona epwitikiri. Nyenya kimanle wiiwa vooloca sa yawuupuxerya ya murima, kaahilokoha yoocheka aka wa amwaaraka ni atokweene. Voocharela, kaahiisoona okhala phaamaxa vaavaa kawaalenlaaka yeeyo yaakuukhula nthowa nawi vano nkaawaarino yawuupuxerya ya murima yoohokola, nto naamwiihiiha kaaniisoona okhala awuukhuwaxa. Atokweene yaahikuupuxerya wi Yehova haakinyanyanle. Owo onnanlaka nthowa nawi onnansivela. Masu aya aphaama yaahitannya murima aka nave yaahikikhaviherya orehererya muupuwelo aka.” Olelo, Arthur onarumeela ntoko pioneeru ookhilaatheya ni murummwa oorumeela. Ti yoolipiha vancipale osuwela wi vaavaa nnacharuwaahu mweeparipari soocheka sahu, Yehova ilukuluku soothene ori ooreheryeya onikhurumuwela!

YEHOVA ONNANIVAHA EWEHERERYO

8. (1) Ewehereryo taani Yehova aavanheiye Ayuta yaari wookapuroni? (2) Mwawiiwanana ni Yesaya 40:​29-31, tiheeni yaahaala waakhaviherya Ayuta yaale yaacharunwe?

⁸ Mmoonelo wa achu, Ayuta yaawo yaari wookapuroni hiyaarino ewehereryo yawi yaahaala okookela elapo aya. Olamulelo wa Elapo Yoothene wo Papulo waahisuweliwa wi hiweemererya waataphula akapuro aya. (Yes. 14:17) Nyenya, Yehova aahaavaha ewehereryo achu awe. Owo aahaaroromeliha owoopola achu awe, nave hiyaavo yaahaala omuhiiha weerano yeeyo. (Yes. 44:26; 55:12) Mmoonelo wa Yehova, Papulo haawarino ikuru, aari ntoko nchupi. (Yes. 40:15) Vaavaa muchu onaveereiye nchupi ninnacakanela mwawaakuveya. Ewehereryo yeela yaahaala waakhaviherya hai Ayuta yaari wookapuroni? Eyo yaahaala waahakararya. Nyenya yaanwerya opaka sincipale. Yesaya oorepa: “Nto yaale ananweherya Yehova anamukookela okhalano ikuru.” (Mwaalakhanye Yesaya 40:​29-31, TNM.) Aai, ewehereryo yaahaala waavaha ikuru; awo yaahaala “ovavela osuluxa ntoko sawawe.”

9. Mathowa taani yaahaala oweeriha yaale yaari wookapuroni ororomela soororomeliha sa Yehova?

⁹ Yehova aahaavaha tho yawooniherya Ayuta yaawo yaari wookapuroni wi eroromele soororomeliha sawe. Mwawiihai? Muupuwele sooloherya seiho saakhwanenle. Awo yaahisuwela wi Asiriya yaahikuxa omwene woomoko o Isarayeli ni waakeriha achu aya wookapuroni. (Yes. 8:4) Awo yaahiwoona Apapulo emutoloxaka Yerusalemu nave yaakuxaka achu yaakhala mwemmo yaakerihaka wookapuroni. (Yes. 39:​5-7) Awo yaahoona vaavaa mwene o Papulo aamphanreiye Mwene Setekiya anwosola miitho awe nave amukeriha o Papulo. (Yer. 39:7; Ese. 12:​12, 13) Soothene Yehova aalohenryeiye saahaakhwanela. (Yes. 42:9; 46:10) Soothene seiha saahilipiha nroromelo naya nawi yoororomeliha ya Yehova ya waataphula yaahaala tho waakhwanela!

10. Tiheeni enahaala onikhaviherya otitelela owehererya variyari va mahiku yaala ookuchula?

¹⁰ Tiheeni nnahuseryaahu? Vaavaa nniisoonaahu ohikhala echweenevo, ewehereryo enanwerya onihakararya ni onikhaviherya okhalano ikuru. Nnakhala mu ilukuluku sa sookacamiha nave nookhalano amwiicani oowerya. Namwi hiiha, hannaphwanela oyeleela ewehereryo. Yehova oonivaha ewehereryo yootikhiniha—ekumi yoohimala nri mmureceleni weeparipari ni okhapeleleya. Nnaphwanela otikitherya ewhereryo yeela vamurimani vahu ni mmuupuweloni mwahu. Naaheerano yeela, ewehereryo ahu enanwerya oceecheya ntoko wooneya wa nipuro naphaama nenlo nihinooneya phaama nthowa nawi nnaweha va eviituru yoosuxaara. Nni niwerye hai “opupucha eviituru,” neerihaka ewehereryo ahu okhala yawaarya? Wiiliwiili nnaphwanela waavyaka elukuluku wi naanyiherye mukhalelo okumi ahu onahaalaaya okhala wootikhiniha mu elapo evyaani. Nnanwerya waalakhanya miyaha, woona ixilema ni owiriyana macipo enaloca sa ewehereryo ahu. Nave nnanwerya oloca ni Yehova mu nivekelo vooloca sa soororomeliha seiho nnawehereryaahu wi noone saakhwanelaka.

11. Tiheeni yaamukhavihenrye murokora mmoha yoowo aarino nikacamiho ntokweene na okumi okookela okhalano ikuru?

¹¹ Moone mukhalelo ewehereryo enamuhakaranryaaya ni omulipiha murokora mmoha awiichaniwa Joy, yoowo orino nikacamiho ntokweene na okumi. Owo ooloca: “Vaavaa kinakhalaaka awuukhuwa, kinnamuleela Yehova miyoonelo saka soothene sawiixeela, kisuwelaka wi owo onnakiiwexexa. Akaakhulaka, Yehova ookivaha ‘owerya woopwahaxa.’” (2 Ako. 4:7) Joy onniisaanyiherya tho mu elapo evyaani mummo oni ‘ahikhale oni aloce ariki: Kinamwiiceliwa.’ (Yes. 33:​24, TNM) Wakhala wi hiyaano tho noomiinela murima ahu wa Yehova ni otikitheryeya mu ewehereryo ahu, nnamukookela okhalano ikuru wanaawiili.

12. Mathowa taani nryaahuno a ororomela soororomeliha sa Yehova? (Moone tho eruku.)

¹² Hiiha ntoko eenreiye ni Ayuta yaari wookapuroni, Yehova tho oonivaha mathowa mancipale wi nroromele soororomeliha sawe. Muupuwele vooloca sa sooloherya nnoonaahu saakhwanelaka. Ntoko yootakiherya, ninnoona olamulelo wa elapo yoothene yoowo ori “okhopolomoha woolipa ni okhopolomoha wooceecheya.” (Tan. 2:​42, 43, TNM) Nave tho ninniiwa elociwaka sa “ocikinyeya wa elapo nipuro nnipuro,” nave ninnalaleerya wa “maloko oothene.” (Mat. 24:​7, 14) Sooloherya seiha ni sikina sincipale sinnalipiha nroromelo nahu wa soororomeliha sa Yehova soohakararya seiyo nlelo sihaakumve waakhwanela.

YEHOVA ONNAMAALIHA WOOVA WAHU

13. (1) Makacamiho taani Ayuta yaahaalaaya ohoolela mu elukuluku ya otaphuliwa waya? (2) Ntoko etharihiwaaya mu Yesaya 41:​10-13, ti mwawiihai Yehova aahakaranryeiye Ayuta yaari wookapuroni?

¹³ Naamwi Yehova aahakaranrye Ayuta yaawo yaari wookapuroni ni ewehereryo yootikhiniha, owo aahisuwela wi awo yaahaala ohoolela makacamiho mu elukuluku yaahaalaaya otaphuliwa. Yehova aahiloherya wi omakuchuwelo wa okapuro wa Ayuta, mwene oowerya aahaala ohiphela maloko oorukurerya nave vookuchula tho aahaala omuhiphela Papulo. (Yes. 41:​2-5) Apwanne Ayuta yaanaphwanela okhala awuukhuwa? Yehova aahaalipiha achu awe woosilo ene, ariki: “Ohoove, woona wi kiri ni weyo. Ohuukhuwe, woona wi miyo ka Muluku aa.” (Mwaalakhanye Yesaya 41:​10-13, TNM.) Tiheeni aachuneiye oloca vaavaa aaloceiye ariki: “Miyo ka Muluku aa”? Owo tahi wi aawuupuxerya Ayuta wi emulapeleke—awo yaanasuwela wi eyo echu yeeyo yaaphwanelaaya opaka. Ohiya yeeyoru, owo aawuupuxerya wi nlelo aari mmakupa aya.—Sal. 118:6.

14. Mukhalelo taani mukina Yehova aahakaranryeiye alipa awoova yaawo yaari wookapuroni?

¹⁴ Yehova tho aahimaaliha woova wa Ayuta yaawo yaari wookapuroni, awuupuxeryaka ikuru ni masuwelelo awe oohikota. Owo aahaawopa Ayuta yaawo yaari wookapuroni oweha wirimu waariwo itheneeryi. Aahaaleela tho wi tahi orimoona opatuxa itheneeryi, nyenya tho oosuwela soothene masina aya. (Yes. 40:​25-28) Waakhanle wi Yehova oosuwela itheneeryi soothene masina aya, moohikhwa minikwa owo oosuwela nsina na mmoha ti mmoha a alapeli awe! Waakhanle wi Yehova aakhalano owerya wa opatuxa itheneeryi, moohikhwa minikwa owo ookhalano owerya wa waakhaviherya achu awe. Chiryene, Ayuta wookapuroni hiyaawaryino mathowa a okhala awuukhuwa naari awoova.

15. Ti mwawiihai Muluku aareherenryeiye Ayuta yaari wookapuroni wa yeeyo yaahaala orwa?

¹⁵ Yehova tho aahaarehererya achu awe wa yeeyo yaahaala weereya muhoolo. Mmakupa mamoha oopacerya a liivuru a Yesaya, Muluku aahi wa nloko: “Haweni achu aka, mvolowe mmakwaartuni mwanyu nave nwale mikhora. Mwiipithe mu elukuluku yavakhaani, ophiyerya esara evinre.” (Yes. 26:​20, TNM) Makupa yaala yaahaakhwanela woopaceryani vaavaa Mwene Siru aamuhiphenleiye Papulo. Mulipa oothariha miyaha akhalai Mukiriki ooloca wi, vaavaa Siru aavolonweiye o Papulo, owo “aahaavaha owerya [anakhoco awe] owiipaka oothene yaale yaahaalaaya waaphwanya vaate va mikhora.” Mwaanyiherye woova achu yaakhala o Papulo yaarayano! Nyenya Ayuta yaawo yaari wookapuroni hiyaawiphiwe nthowa nawi yaahiiwelela malakiheryo a Yehova.

16. Ntakhara heeni hannaphwanela okhala awuukhuwaxa ni omwaahiyu ahu? (Moone tho eruku.)

¹⁶ Tiheeni nnahuseryaahu? Moohilekela nnahaala ohoolela yoohooxa etokotoko ehintonko weereya. Vaavaa enahaalaaya opacerya, achu oothene veelaponi anahaala okhala awaakanyeryeya ni oohaleeliheya. Nyenya ohiya achu a Yehova. Noosuwela wi Yehova Muluku ahu. Moohikhwa minikwa, nnahaala osuwela wi “woopoliwa [wahu] wohaacamela.” (Luka 21:28) Naamwi vaavaa wiiwanana wa maloko onahaalaaya onihiphela, nnahaala otitelela okhala oohicikinyeya. Yehova onahaala onaakiha orweela wa ankeelo ni ohoolela onavuluxa ekumi. Nni nivahereryiwe hai ohoolela yoola? Nnaphwanela oweherya wi noone. Mwawiihiiha, akhweya nnamwaakhela ohoolela orweela mmilokoni mwahu. Mmukhalelo mukina, iha inanwerya okhala ‘ikwaartu sahu,’ mummo nnahaalaahu ophwanyamo okhapeleleya. Nni niirehererye hai ntakhara yeeyo enahaala orwa omwaahiyu? Nnaphwanela owaacamela anna ni arokora ahu, wiiwelela moohakalala ohoolela wa marehereryo ni okhala oolekecheya wi Yehova onnahoolela marehereryo ahu.—Ahe. 10:​24, 25;13:17.

17. Muni mutitelele hai omwaavya Yehova wi mphwanye nihakararyo?

¹⁷ Naamwi Ayuta yaawo yaari wookapuroni yaari mmukhalelo woovila, Yehova aahaavahererya ohakararya yoowo yaachunaaya. Owo onahaala weerano emohamoha wa hiyaano. Mwawiihiiha, moohipwacha yeeyo enahaala weereya muhoolo, mutitelele omwaavya Yehova wi mphwanye nihakararyo. Chiryene, muroromele ikharari sawe itokweene. Mweerihe ewehereryo anyu okhala yoolipa. Muupuwele wi ni Yehova ntoko Muluku anyu, hiyaavoru munahaalaanyu woova.