Nnaphwanela Otitelela Ohuseryaka ni Mahusiheryo Yaawo Ari Mathipelo a Mpiipiliyani!

1. Ti mwawiihai mahusiheryo oopacerya a Mpiipiliyani atoronkaaya okumi anyu?

ICHU seiho naahusenryaahu vaavaa naapacenryaahu omuhuserya Piipiliya saatoroka okumi ahu. Ntoko yootakiherya, vaavaa naahusenryaahu wi nsina na Muluku ti Yehova, naahipacerya okhala asinthamwene awe. (Yes. 42:8) Vaavaa naahusenryaahu yeeyo eneereya nakhwa, hiniipakela tho makoho waakhanle wi amusi ahu yaawo akhwile anamuhooxeya. (Ekl. 9:10) Nave vaavaa naahusenryaahu wi elapo enahaala okhala Parataiso, naahihiya okhala awuukhuwa ni omwaahiyu ahu. Hiyo naapacerya ororomela wi nnahaala okhala ohiya mu elukuluku yavakhaani ya iyaakha 70 naari 80, nto okhala wookhala. — Sal. 37:29; 90:10.

2. Ntakhara heeni nnanwerya oloca wi ophiyerya tho Akristu awiichwelavo ananwerya ophuravo ni mahusiheryo oopacerya a Mpiipiliyani? (2 Petru 1:12, 13)

² Hiyaano hanirwa nicuwala ichu seiha soopacerya naahusenryaahu Mpiipiliyani mukhalelo siryaaya soochuneya. Mu ekarta awe yanaawiili, murummwa Petru aahaarepela Akristu wi awo ‘yaari ootikitheryeya phaama mu eparipari.’ (Mwaalakhanye 2 Petru 1:12, 13.) Nto mu elukuluku yeele, ahusiha oowoka ni achu ootakhala, yaaneererya waahuweliha yaawo mmalapelo eeparipari. (2 Pet. 2:1-3) Petru aachuna waalipiha anna wi aakhaviherye ovilela woopopiha yoola. Mwawiihiiha, owo aahiwuupuxerya ichu seiho yaahusenryaaya. Mahusiheryo yaala, yaahaala waakhaviherya Akristu yaale otitelela okhala oororomeleya wa Yehova ophiyerya omakuchuwelo.

3. Niphwanaphwaniho taani nnanikhaviherya woona wi mahusiheryo oopacerya a Mpiipiliyani toophara muteko ophiyerya tho wa Akistu awiichwelavo?

³ Naamwi nimurumeelaka Yehova mu iyaakha sincipale, nlelo nnaphwanela ohuserya mahusiheryo mavyaani anathipeleya Mpiipiliyani. Muupuwele yootakiherya ela: Mulipa awaapeya a mavyakelo ni mukina onaamuhuserya waapeya annapharihela ikaruma imohamoha wi yaapeye yoolya. Nyenya elukuluku omalinheiye ni mavyakelo awe ennamukhaviherya mulipa awaapeya a mavyakelo opharihela ikaruma soophwanelela mmikhalelo mivyaani ni mmikhalelo soohiyana aaceereryaka mukhalelo awe wa waapeya. Mmukhalelo mmohamoha, achu yaale emalinhe elukuluku yincipale emurumeelaka Yehova ni oohuserya a Piipiliya avyaani, aasuwela mahusiheryo oopacerya mamohamoha a Masu a Muluku. Nyenya akhweya oothene ananwerya ohuseryavo ni mahusiheryo yaala mmukhalelo woohiyana. Ovinyerya vaavaa nipatisiwaahu, akhweya okumi ahu ni mirici sahu sa orumeela sootorokeya. Nyenya wuupuwelela iparipari nihusenryaahu khalai sinamunikhaviherya ophwanya mikhalelo mivyaani sa opharihela mmikhalelo sahu sahiihaano. Nnahaala woona mahusiheryo mararu oopacerya a Mpiipiliyani ni yeeyo Akristu awiichwelavo anahaalaaya ohuseryavo ni yaawo.

YEHOVA TI MPATUXA

4. Osuwela wi Yehova ti Mpatuxa waavolowenle hai okumi anyu?

⁴ Hiyaano noosuwela wi Elapo, ni soothene iri mwemmo, ipatuxiwe ni Mpatuxa a miruku ni oowerya. Piipiliya oni: “Otenke ichu soothene ti Muluku.” (Ahe. 3:4) Nyenya hiyaano nnanwerya ohuserya ichu ikina sincipale nnihusiheryo nenla noopacerya. Nthowa na onipatuxa, Yehova oosuwela soothene vooloca sa hiyaano. Owo tho onnuukhuwa ni hiyo nave oosuwela yeeyo eri yaphaama wa hiyaano. Mwawiihiiha, osuwela wi Yehova Mpatuxa wootoroka moomalela okumi ahu nave woovaha yootaphulela yeeparipari.

5. Eparipari taani ya Mpiipiliyani enanikhaviherya okhala awiiyeviha? (Yesaya 45:9-12)

⁵ Osuwela wi Yehova ti Mpatuxa onnanikhaviherya tho okhala awiiyeviha. Ntoko yootakiherya, mu ekwaha emoha, Yupu aahitikitheryeyaxa wa yene mukhateiye ni wa achu akina. Wi amukhaviherye, Yehova aamukhaviherya Yupu wuupuwela wi owo Mpatuxa aikuru. (Yupu 38:1-4) Nnikhaviheryo nenla, Yupu aahiwerya wiiwexexa wi ichu soothene Yehova onapakeiye ilukuluku soothene ti sawookololowa. Atharihaka wi achu henaphwanela wiisoonaka okhala atokweenexa ompwaha Muluku, Yesaya oorepa: “Apwanne oloko onanwerya oloca wa Mulipa Awuupa oriki: ‘Tiheeni weyaano oneeraawe?’”— Mwaalakhanye Yesaya 45:9-12.

6. Mu ilukuliku taani onakhalaaya waphaama wuupuwelela vooloca sa miruku ni owerya wa Mpatuxa ahu? (Moone tho iruku.)

⁶ Vaavaa Mukristu onapaceryeiye okhalano mavyakelo, owo onanwerya opacerya ororomelakaxa miyoonelo sawe ohiya waavyaka ohoolela wa Yehova ni wa Piipiliya. (Yupu 37:23, 24) Wakhala wi eyo enneereya, ti waphaama Mukristu omaala ni wuupuwelela mukhalelo miruku ni owerya wa Mpatuxa iryaaya soohilikanyiheya. (Yes. 40:22; 55:8, 9) Hiihaa, nihusiheryo nenla noopacerya nnanwerya omukhaviherya otitelela okhala awiiyeviha ni wiiwexexa wi yeeyo Yehova onuupuweleiye ti yoochuneyaxa opwaha miyoonelo sawe.

7. Tiheeni Raela eenreiye wi eemererye ohoolela ovyaani?

⁷ Wuupuwela wi Yehova Mpatuxa, waahimukhaviherya Raela yoowo onakhala o Eslovenia, weemererya ohoolela ovyaani wa mmarehereryo. Owo onnathariha: “Vakina vaya, kinnoona okhala woovila weemererya soolakelela ikina sa yaale anahoolela. Ntoko yootakiherya, miyaano kaahoona Yoolokoha n.º 8 ya 2023. Naamwiihiiha, mu ekwaha yoopacerya kamoonnaaka munna aphunwe ipweto aperekhaka mwaha, kaahitepa onyeenyeya. Mwawiihiiha, kaahivekela wa Yehova kivekaka wi akikhaviherye weemererya matorokelo yaala.” Raela aahiiwexexa wi, nthowa na okhala Mpatuxa a wirimu ni Elapo ya vathi, Yehova ookhalano ophwanelela wa ohoolela moophaameya marehereryo awe. Apwanne ikwaha ikina nyuwaano tho munnoona okhala woovila weemererya wiiwexexa ovyaani naari ohoolela ovyaani? Yaari hiiha, echu yoophwanela weera ori okhala awiiyeviha ni waavya elukuluku wi muupuwelele vooloca sa miruku ni owerya wa Mpatuxa anyu.— Aro. 11:33-36.

MULUKU HANATANNYA MAKACAMIHO

8. Ntakhara heeni waari waphaama ohuserya wi Muluku hanatannya makacamiho?

⁸ Ntakhara heeni Muluku onneemererya makacamiho? Nthowa na ohisuwela naakhulo na nikoho nenla, achu ancipale annanyeenyeya ni Muluku naari tho hanaroromela wi owo ookhala! (Mas. 19:3) Mmakupa makina, nyuwaano moohuserya wi yoocheka ni ohiphaameya seiho iraviwe inatannya makacamiho, nave ohiya Yehova. Nyuwaano tho moohuserya wi opixa murima wa Yehova ntakhara achu, onneeriha wi amilyawu a achu emusuwele ni woona mukhalelo owo onahaaleiye omaliha makacamiho moomalela. (2 Pet. 3:9, 15) Iparipari seiha saahoohakararyaani ni olipiha onthamwene anyu ni Yehova.

9. Mmikhalelo taani akhweya onahaalaaya okhala waphaama wuupuwela ntakhara heeni Yehova oneemereryeiye makacamiho?

⁹ Hiyaano noosuwela wi nnaphwanela okhala oopixa murima vaavaa nnanweheryaahu Yehova wi amalihe makacamiho ahu. Vaavaa hiyaano naari muchu yoowo nnamusivelaahu onahooleleiye makacamiho, okhalihiwa moonanara naari omuyeleela oosiveliwa, nnanwerya wuupuwela wi Yehova onnalekela weeravo echu. (Hap. 1:2, 3) Mmikhalelo ntoko seiha, yaamukhala yaphaama wuupuwelela mathowa enamweeriha Yehova weemererya wi achu aphaama enahoolela makacamiho.a (Sal. 34:19) Nave tho nnanwerya wuupuwelela sa yookhwela ya Yehova ya omaliha makacamiho okhala wookhala.

10. Tiheeni yaamukhavihenrye Anne ovilela ni okhwa wa amama awe?

¹⁰ Osuwela eparipari vooloca sa makacamiho onanwerya onikhaviherya ovilela. Anne, yoowo onakhala mu evilivili yo Mayotte, Oseyano Intiku, ooloca: “Mu iyaakha sa muculi kohaayeleela amama aka, nave ela yookeeriha okhala oothananaxa. Nyenya kinnaavyaavya wiiliwiili wuupuwelela wi tahi Yehova onatannya makacamiho. Moohiyana, owo onnawehererya mohakalala omaliha ichu soothene inanihooxa ni waaviiha oosiveliwa ahu akhwile. Wuupuwelela iparipari seiha, onnakikhaviherya okhalano murecele yoowo kihinaweryaaka othariha.”

11. Osuwela mathowa enamweeriha Yehova weemererya makacamiho enanikhaviherya hai?

¹¹ Osuwela mathowa enamweeriha Yehova okhala oopixa murima ni enamweeriha weemererya makacamiho, onanwerya onikhaviherya otitelela olaleerya. Murummwa Petru oothariha wi opixa murima wa Yehova onnavaha ekari wi achu ancipale echaruwe nave evuluxiwe. Voocharela, owo oorepa: “Muupuwele achu a mukhalelo taani munaphwanelaanyu okhala. Munaphwanela okhala achu a meecelo aweela oomucicimiha Muluku.” (2 Pet. 3:11) Mukhalelo ahu mmoha wa ‘meecelo aweela oomucicimihano Muluku,’ ori olaleerya. Hiiha ntoko Tiithi ahu, hiyaano ninnaasivela achu nave ninnachuna wi awo ekhaleno okumi okhala wookhala mu elapo evyaani. Yehova onnatitelela waavaha achu mu elapo awe ekari ya omulapela. Nave nyuwaano mookhalano ekari ya olapa vamoha ni Muluku ni waakhaviherya achu ancipale ohuserya vooloca sa yoowo ehaakumve ophiya makuchuwelo! — 1 Ako. 3:9.

NNAKHALA “MMAHIKU OOKUCHULA”

12. Wiiwexexa wi nnakhala ‘mmahiku ookuchula’ enanikhaviherya hai?

¹² Piipiliya onnathariha mookwakwalela mukhalelo achu yaahaalaaya okhala “mmahiku ookuchula”. (2 Tim. 3:1-5) Pahiru woona mukhalelo wa achu moorukurerya mwahu orikimvira otepaka, ninnawerya wiiwexexa wi yooloherya yeela ennaakhwanela. Wiiwexexa eparipari yeela, ennanikhaviherya ororomela moomalela Masu a Muluku. — 2 Tim. 3:13-15.

13. Nuupuwelaka niphwanaphwaniho na Yesu nri mu Luka 12:15-21, nikoho taani nnaphwanelaahu wiipakela?

¹³ Osuwela wi nnakhala mmahiku ookuchula ennanikhaviherya otikitheryeya mu opharihela elukuluku ahu mmukhalelo waphaama. Mu Luka 12:15-21, Yesu aahiloca niphwanaphwaniho nimoha nenlo nnanihusiha wi nnaphwanela okhalano mmuupuweloni ichu soochuneyaxa. (Mwaalakhanye.) Ntakhara heeni mulopwana yoole ooreela aahiichaniwa “khamiruku”? Ohiya wi owo aarimukhalano ichu sincipale, nyenya nthowa nawi aakuha mu nipuro noopacerya ichu soohichuneya. Owo ‘aaniithukumanyerya muhakhu, nto haari ooreela vamiithoni va Muluku.’ Ntakhara heeni weerano yeela yaari yoohesa etokweene? Muluku aahi wa mulopwana yoole: “Ohiyu ene yoola okumi aa onamurweeliwa.” Tiheeni niphwanaphwaniho nenla nnanihusihaaya? Elukuluku ehanle ya mukhalelo yoola wa ichu ti yavakhaanixa. Mwawiihiiha nnaphwanela wiikoha: ‘Apwanne soolakelela saka sinnooniherya wi kinnapharihela phaama elukuluku? Soolakelela taani kinaaceenyeryaaka anamwane aka okhalano? Apwanne kinnapharihela elukuluku aka, ikuru saka ni sookhalano saka xaxaxa wi kiithukumanyerye muhaku naari wi kiithukumanyerye muhakhu wiirimu?’

14. Ntakhara heeni ti woochuneya wuupuwelela sawooniherya sawi nri mmahiku ookuchula, nave yaweereya ya Miki enooniherya hai yeela?

¹⁴ Vaavaa nnuupuwelelaahu sawooniherya sawi nri mmahiku ookuchula, eyo enanwerya otoroka mukhalelo ahu wa okhala. Ti yeeyo yeeren’ye ni murokora awiichaniwa Miki. Owo ooloca: “Vaavaa kaamalinhaaka ohuserya, miyaano kaanatepa ochuna okhala mulipa ootholathola ikumi sa axinama ni weeriha eyo okhala muteko aka. Miyaano kaakhalano tho yoolakelela ya okhala piyoneera ookilaatheya ni orumeela weiwo oriwo othowa otokweene. Nyenya asinthamwene amavyakelo yaahikikhaviherya ophimelela waakhanle wi chiryene kaahaala owerya opaka muteko yoowo kaachunaaka vamoha ni soolakelela saka soomunepani. Awo yaahikuupuxerya wi makuchuwelo a mukhalelo yoola wa ichu wohaacamela nave wi mu elapo evyaani kaahaala okhalano elukuluku yoothene ya waahuserya axinama oothene kinachunelaakavo. Mwawiihiiha, miyaano kaahilakelela opaka ikuursu sa elukuluku vakhaani seiyo saahihaala omalihaka elukuluku aka yincipale. Mmukhalelo yoola, kaahiwerya otikitheryeya mmuteko wa opiyoneeru, nave voocharela, kithaamela mu ekulucu yeeyo yaarino othowa otokweene o Ekuatore.” Olelo, Miki ni aiyawe enarumeela mu ekulucu emohamoha yeele.

15. Ti mwawiihai yootakiherya ya Tiyaku enooniheryaaya wi hannaphwanela ovelavela ni achu? (Moone tho iruku.)

¹⁵ Wuupuwela wi nri mmahiku ookuchula, oonanikhaviherya okhala a mvai mmuteko woolaleerya naamwi achu akina ekhoocaka michaka yaphaama. Eparipari ti yawi, achu ananwerya otorokeya. Moone yootakiherya ya Tiyaku, munnawe Yesu. Owo aahimoona ni miitho awe Yesu innuwaka ophiyerya akhala Mesiya ni muhusiha oohilikanyihiwa. Naamwiihiiha, Tiyaku haari oomuchara a Yesu mu iyaakha sincipale. Tiyaku aahikhala oomuchara a Yesu, owo amanle oviihiwa mookhwaani—nave aari oohuserya a mvaixa!b (Yoh. 7:5; Aka. 2:9) Mwawiihiiha, muhirwe muhiye waaleela iparipari amusi anyu naari achu a ekulucu anyu yaawo nlelo ahinoonihenrya nchuno. Akhweya ti yooweryeya wi yeeyo munaaleelaanyu awo hiihaano, enanwerya waavolowela omwaahiyu, akhweya epacenrye yoohooxa etokotoko.c

MUTITELELE OVAHA ESISAPO SAWUUPUXERYA SA YEHOVA

16. Sawuupuxerya sa Yehova sookhavihenryeni hai? (Moone tho ekaaxa “Mpharihele Iparipari sa Mpiipiliyani wi Mwaakhaviherye Akina”.)

¹⁶ Sooleeliherya ikina soomunepani inathipeleya Mpiipiliyani, marehereryo ahu enavahereryaaya inarehereryiwa ntakhara achu asuwenle vakhaani vooloca sa Piipiliya. Ntoko yootakiherya, mwaha wa vanlakani wa omahuchuwelo wa esumana, mulipeleli a omukawa ni soolaleeryiwa ikina vamoha ni ixilema sa mu esaiti jw.org sinapakiwa xaxaxa ntakhara achu ehiri Anamoona a Yehova. Naamwiihiiha, sawuupuserya seiha sa Yehova sinnawerya onikhaviherya. Iho sinnaaceererya osivela wahu wa Muluku, sinnalipiha nroromelo nahu ntakhara Piipiliya nave tho sinnanikhaviherya okhala ahusiha aphaama. — Sal. 19:7.

17. Mmikhalelo taani waahaalaaya okhala waphaama omaala ni wuupuwelela mahusiheryo oopacerya a Mpiipiliyani?

¹⁷ Hiyaano Anamoona a Yehova, ninnakhala oohakalala vaavaa nnaakhelaahu wiiwexexa ovyaani wa eparipari ya Mpiipiliyani. Nyenya tho ninnatepa ovaha esisapo mahusiheryo oopacerya a Mpiipiliyani yaawo eneerinhe ovolowa mu eparipari. Wakhala wi nookhalano mathitimanelo a othipeleya mmiyoonelo sahu ohiya mu ochariha ohoolela wa mmarehereryo, nnaphwanela okhala awiiyeviha ni wuupuwela wi Mpatuxa ahu amiruku ni a owerya woothene tonahooleela marehereryo. Wakhala wi hiyaano naari muchu yoowo nnamusivelaahu onnahoolela nikacamiho, yaamukhala yaphaama okhala oopixa murima ni wuupuwela ntakhara heeni Yehova oneemereryeiye makacamiho. Nave vaavaa nnathanlaahu mukhalelo nnahaalaahu opharihela sookhalano sahu ni elukuluku ahu, nnaphwanela opharihelaka elukuluku ahu mmukhalelo waphaama ni wuupuwela wi nnakhala mmahiku ookuchula. Weerano hiiha, sawuupuxerya sa Yehova sinamutitelela onilipiha, oniceenyerya ni onikhaviherya okhala amirukuxa.