Apwanne ‘Moohuserya Yoovitheya’ ya Okhala Awaakhwaneliwa?

1. Waakhwaneliwa enataphulela eheeni, nave tiheeni ehinataphulelaaya?

APWANNE mwa muchu awaakhwaneliwa? Muchu awaakhwaneliwa onnaphwanya ohakalala ni murecele atikitheryeyaka mu mareeliho awe ahiihaano. Owo hanakhala oonyeenyeya wa nthowa na yeeyo ohiryeiyeno. Mwawiihiiha, okhala awaakhwaneliwa henataphulela wi hannaphwanela okhala awuukhuwa ni mukhalelo nnakhalaahu mu okumi. Ntoko yootakiherya, Mukristu tho onnaavya ikari wi aaceererye muteko awe mmuteko wa Yehova. (Aro. 12:1; 1 Tim. 3:1) Naamwiihiiha, owo hanayeleela ohakalala wakhala wi ikari sa muteko hasiphin’ye mwawaakuveya ophiyerya vaavaa aawehereryeiyevo.

2. Ntakhara heeni ohaakhwaneliwa oryaaya wawoopiha?

² Wakhala wi hannaakhwaneliwa ni yeeyo nryaahuno, nnanwerya opacerya opaka soolakelela sooheseya. Yaale ahinaakhwaneliwa ni yeeyo aryaayano, ananwerya olapaka iwora sincipale wi ekhaleno ichu seiho sihiri soochuneyaxa. Moothananiha, Akristu akina ophiyerya wi ahiiya ikhorowa ni ichu ikina seiho yaachunaaya. Akhweya awo yaanuupuwela eriki: ‘Eyo enaphwanela okhala yaaka, miyaano kinnachuna eyo hiihaano’ naari ‘kinanwerya okuxa ekhorowa hiihaano nave voocharela kikookihe.’ Mwawiihiiha, mukhalelo vyakala wa wiiya honamuhakalaliha ni honamucicimiha Yehova. (Mas. 30:9) Akina yaahikhala oonyeenyeya nthowa na ohaakhela mirici mmuteko wa Yehova ophiyerya wi aahiya omurumeela Yehova. (Aka. 6:9) Ntakhara heeni mulapeli awiiveleela a Yehova aahaaleiye wuupuwela weerano yeeyo? Nikacamiho naahaala okhala nawi muchu owo oohiya wunnuwiha mukhalelo wawaakhwaneliwa.

3. Nihusiheryo taani noolipiha nnahuseryaahu mu Afilipi 4:11, 12?

³ Oothene ahu nnanwerya wunnuwiha waakhwaneliwa. Murummwa Paulo oorepa wi owo ‘aahihuserya okhala awaakhwaneliwa ni seiho aakhaleiyeno.’ (Mwaalakhanye Afilipi 4:11, 12.) Owo aarempe masu yaala ari mukaripooso. Naamwiihiiha, owo haayelenle ohakalala. Owo ‘aahihuserya yoovitheya’ ya okhala awaakhwaneliwa. Wakhala wi ninnawaniha wi nikhale awaakhwaneliwa, masu ni yaweereya ya Paulo ennooniherya wi nnanwerya wunnuwiha mukhalelo yoola wawaakhwaneliwa. Hannaphwanela oweherya wi onamukhala wookhweya waakhwaneliwa ni mikhalelo sahu. Ohiya yeeyo, nnaphwanela ohuserya okhala awaakhwaneliwa. Mwawiihai? Nnahaala othokororya mikhalelo seiho inahaala onikhaviherya ohuserya yoovitheya ya waakhwaaneliwa.

MUNNUWIHE OTHAMALELA

4. Ntakhara heeni okhala muchu oothamalela onnanikhaviherya okhala awaakhwaneliwa? (1 Atesalonika 5:18)

⁴ Muchu oothamalela onnannuwiha waakhwaneliwa. (Mwaalakhanye 1 Atesalonika 5:18.) Ntoko yootakiherya, vaavaa nnathamalelaahu mweeparipari wa soothowa sa mookumini, hanikhala awuukhuwaxa ni ichu seiho nnachunaahu, nyenya nihirino. Vaavaa nnamuthamalelaahu Yehova wa nthowa na mukhalelo nnamurumeelaahu hiihaano, eyo ennanikhaviherya wuupuwelela mukhalelo nnahaalaahu opaka owetha wahu mmurici ahu, ohiya pahi wuupuwelelaka mukhalelo nnahaalaahu owerya ophwanya murici mukina yoowo nnachunaahu. Yehova oosuwela wi tiwoochuneya okhala oothamalela, nave chiryene nlo nthowa nimoha nimweerinhe owo onileela Mpiipiliyani wi nimuthamaleleke vaavaa nnavekelaahu! Okhalano munepa woothamalela onnanikhaviherya woona “murecele wa Muluku yoowo opwanhe wiiwexexa woothene.”—Afi. 4:6, 7.

5. Mathowa taani yaahaala oweeriha Aisarayeli okhala oothamalela? (Moone tho eruku.)

⁵ Moone yeeyo yeeren’ye ni Aisarayeli. Mu ikwaha sincipale yaanamukhupanya Yehova wi hiyaakhalano yoolya yeeyo yaakhovelenlaaya olya o Yikuputu. (Nam. 11:4-6) Eparipari wi okumi mutakhwani hiwaari wookhweya. Tiheeni yaahaala waakhaviherya okhala awaakhwaneliwa? Yaaphwanela wuupuwelelaka ni othamalela vooloca sa yeeyo Yehova aapankeiye ntakhara yaawo. Yaaphwanela wuupuwela wi vaavaa yaaryaaya akapuro, yaahikhalihiwa moonanaraxa o Yikuputu nave Yehova aahaavuluxa ni aaruuhelaka a Yikuputu ipahu Khumi. Emanle Aisarayeli otaphuliwa awo “yaakusha muhakhu muncipale waYiikuputu” ntoko ooru, eparata ni soowara. (Muk. 12:35, 36, PMM) Vaavaa Aisarayeli yiikariwaaya ophiyerya muxerexerye mwa Eniya Yooxeerya, Yehova mootikhiniha aahikawanya maahi. Nave vaavaa yeecaaya mutakhwani, owo aanaalyiha ni mana. Vano, tinivi naari nikacamiho? Aisarayeli hiyaakhwaneliwa, ohiya nthowa nawi hiyaakhalano yoolya yeeyo yaachunaaya, nyenya nthowa nawi hiyaathamalela yeeyo yaakhalaayano.

6. Tiheeni enahaala onikhaviherya okhala achu oothamalela?

⁶ Vano, ti mwawiihai nyuwaano muneeraanyu munnuwihe othamalela? Yoopacerya, mwiivahe elukuluku mahiku oothene wi muupuwelele ichu saphaama seiho inoosivelaani. Munanwerya tho orepa ichu piili naari raru seiho munathamalelaanyu. (Wiik. 3:22, 23) Yanaawiili, mooniherye othamalela wanyu. Mpaceryihe waathamalela akina wa yeeyo enapakaaya ntakhara nyuwaano. Opwaha soothene mmuthamalele Yehova moohihiyererya. (Sal. 75:1) Yaneeraru, mwaathanle asinthamwene a vamurimani yaawo tho anathamalela. Wakhala wi asinthamwene ahu henathamalela naari wi tookhupanya eyo tho enanwerya onivolowela, nyenya wakhala wi asinthamwene ahu toothamalela, mukhalelo aya waphaama onanwerya onivolowela okhala achu oothamalela. (Malam. 1:26-28; 2 Tim. 3:1, 2, 5) Vaavaa nnaavyaahu ikari wi nthamalele, hanikhalaka oonyeenyeya wa makacamiho ahu ni ichu seiho nnachunaahu, nyenya nihirino.

7. Ti mwawiihai Aci unnuwiheiye othamalela nave ni yookhumelela taani?

⁷ Muthokororye yeeyo yeeren’ye ni Aci, yoowo onakhala o Intonesiya. Owo ooloca: “Variyari va epahu ya Koronaviru, kaahipacerya olikanyiha mikhalelo saka ni sa anna aka a munroromeloni. Ntoko yookhumelela, kaahikhala oohaakhwaneliwa.” (Aka. 6:4) Tiheeni emukhavihenrye otoroka mukhalelo awe wa wuupuwela? Aci ooloca: “Kaahipacerya wuupuwela mareeliho yaawo kaakhelaaka mahiku oothene ni wuupuwelela ichu saphaama seiho kaaryaakano nthowa na opaka makupa mmarehereryo a Yehova. Mwawiihiiha, kaahooniherya othamalela waka wa Yehova. Ntoko yookhumelela, eyo yaahikikhaviherya okhala awaakhwaneliwa.” Wakhala wi munniisoona okhala oohihakalala wa nthowa na mikhalelo sanyu, apwanne mwaanwerya opaka yeeyo Aci eenreiye wi akhale muchu oothamalela?

MUKHALE AWIIYEVIHA

8. Tiheeni yeeren’ye ni Paruki?

⁸ Namarepa a mulipa miririmu Yeremiya, Paruki, ekwaha ekina aahikhala oonyeenyeya wa nthowa na mikhalelo sawe sa okumi. Paruki aahikhalano murici woovila, owo aaphwanela omukhaviherya Yeremiya waaleela Aisarayeli oohithamalela yeeyo yaahaala weereya ni yaawo nthowa nawi hiyaamwiiwelenle Yehova. Paruki, aahaakanyeryeya. Ohiya otikitheryeya wa yeeyo Yehova aachuneiye wi owo apake, owo aahipacerya wuupuwelelaxa wa yene mukhateiye ni wa yeeyo aachuneiye. Orweela wa Yeremiya Yehova aaloca wa Paruki ariki: “Weyo onniivyaavyerya ichu itokotoko. Omaale waavya ichu seiho.” (Yer. 45:3-5, TNM) Mmasu makina, Yehova aaloca wa Paruki ariki: “Waakhwaneliweke ni mikhalelo saa sahiihaano.” Paruki aahinwiriyana Yehova nave aahititelela okhala nthamwene awe a vamurimani.

9. Mwawiiwanana ni 1 Akorintu 4:6, 7, tiheeni wiiyeviha onanceenyeryaaya wuupuwela? (Moone tho iruku.)

⁹ Ikwaha ikina, mulapeli a Yehova akhweya onamuupuwela wi onnaphwanela okhalano murici wammoori. Owo onanwerya wuupuwela hiiha nthowa nawi ookhalano mavyakelo mancipale, onnalapa moowetha naari wi onnamurumeela Yehova mu iyaakha sincipale. Mwawiihiiha, akina ananwerya waakhela murici mmohamoha yoowo aachuneiye arinono. Tiheeni yaahaala omukhaviherya wi ahikhale oonyeenyeya? Owo aaphwanela wuupuwelela masu a murummwa Paulo enaphwanyeya mu 1 Akorintu 4:6, 7. (Mwaalakhanye.) Ikari soothene seiho nnaakhelaahu ni mavyakelo oothene yaawo nryaahuno inarwa wa Yehova. Soothene seiha sawooniherya sa mahala matokweene a Yehova.—Aro. 12:3, 6; Aef. 2:8, 9.

10. Nni ninnuwihe hai wiiyeviha?

¹⁰ Nnanwerya winnuwiha wiiyeviha nuupuwelaka mwawiixeela yootakiherya yeeyo Yesu ovanheiye. Moone yeeyo yeeren’ye ohiyu yoowo Yesu aarapinheiye inaani sa arummwa awe. Murummwa Yohani oorepa: “Yesu aasuwenleiye, [1] wi Atiithi yamvaha ichu soothene mmatani mwawe nave [2] wi owo aarwenle wa Muluku, [3] nave wi aaya wa Muluku, . . . apacerya orapiha inaani sa oohuserya awe.” (Yoh. 13:3-5) Yesu aanwerya wiisoona okhala oophwanelela orapihiwa inaani sawe. Nyenya Yesu hantonko wiisoona wi, wanthowa na okhala mwana a Muluku, aaphwanela okhalano empa yaphaama, ikhorowa sincipale naari okhalano ekumi yookhweya. (Luka 9:58) Yesu aari awiiyeviha; aari awaakhwaneliwa. Owo ootikitherya yootakiherya yoophaameya wa hiyaano.—Yoh. 13:15.

11. Wiiyeviha omukhavihenrye hai Dennis okhala awaakhwaneliwa?

¹¹ Munna awiichaniwa Dennis yoowo onakhala o Olanta, olonce wi onniilipixerya okhala awiiyeviha ntoko Yesu, nyenya tahi wookhweya. Owo ooloca: “Vaavaa muchu onaakheleiye murici yoowo kaachunaaka, vakina vaya kinnakhala oonyeenyeya nthowa nawi kinuupuwela wi kaaphwanela kiri miyaano kinaakhela murici owo. Vaavaa eyo eneereyaaya, kinnahuserya mwaha yoowo onaloca sa wiiyeviha. Mu apilikativo JW Library^®, koorepela soorepa soophwanelela vooloca sa wiiyeviha wi kiweryeke ophwanya mwawaakuveya ni waalakhanya seiho. Koopaxaara tho mu telefoni aka miyaha ikina inaloca sa wiiyeviha nave kinnawiriyana mwawuuluulela.a Koohuserya wi muteko woothene nnapakaahu nnapaka ntakhara omucicimihano Yehova, ohiya hiyaano. Yehova mooreera murima onneemererya wi mmoha ti mmoha a hiyaano akhaleno echu ya opaka, nyenya ti yene oneeriha muteko okhumelela phaama.” Wakhala wi moopacerya wiisoona okhala oohihakalala wa nthowa na ohikhalano murici yoowo mwaachunaanyu, munnuwihe wiiyeviha. Eyo enahaala olipiha onthamwene anyu ni Yehova nave enahaala wookhaviheryaani okhala awaakhwaneliwa.—Tiy. 4:6, 8.

MUUPUWELELEKE EWEHERERYO ANYU

12. Ewehereryo taani ya omwaahiyu enanikhaviherya okhala awaakhwaneliwa? (Yesaya 65:21-25)

¹² Ninnakhala awaakhwaneliwaxa naawuupuwelelaka sa ewehereryo yeeyo nryaahuno omwaahiyu ahu. Mu liivru a Yesaya, Yehova onnanleela wi owo onniiwexexa wi nookhalano makacamiho mancipale, nyenya owo tho onnaroromelia wi onahaala omalihavo makacamiho oothene yaala. (Mwaalakhanye Yesaya 65:21-25.) Nnahaala okhalaka mu ipa saphaama ni sookhapeleleya. Nnahaala okhalano muteko wamphurelo nave nnahaala olyaaka yoolya yaphaama ni yoosiva. Hanikhalaka awuukhuwa wa sawoopiha ntakhara hiyaano naari wa anamwane ahu. (Yes. 32:17, 18; Ese. 34:25) Nnaphwanela ororomela moomalela wi mareeliho oothene yaala aphaama ntakhara omwaahiyu ahu teeparipari.

13. Makacamiho taani nryaahuno nave wuupuwelela ewehereryo ahu ya omwaahiyu enanikhaviherya hai?

¹³ Opwaha khalai, hiihaano, nnaphwanela otikitheryeya mu ewehereryo ahu. Ntakhara heeni? Nthowa nawi nnakhala “mmahiku ookuchula” nave oothene ahu nookhalano makacamiho yaawo ari ‘oovila ovilela.’ (2 Tim. 3:1) Yehova onnanikhaviherya nihiku ti nihiku okhala oovilela, anivahaka ohoolela, ikuru nnikhaviheryo nenlo nnachunaahu. (Sal. 145:14) Ohiya yeeyoru, ewehereryo ahu Yekristu enanwerya onivakulela mu ilukuluku soovila. Akhweya nyuwaano mookhalano nikacamiho na ovahererya soothowa soomwiilini sa emusi anyu. Apwanne eyo enataphulela wi ilukuluku soothene munahaala okhala oohaawa? Mweeparipari hooye! Yehova oororomeliha woovahaani yeeyo munachunaanyu—nave xaxaxa—Mparataiso. (Sal. 9:18; 72:12-14) Akhweya nyuwaano munanwerya woona wiicela mahiku oothene, okhala oothanana naari okhalano ereca etokweene. Apwanne munahaala ohooxeyaka hiiha ilukuluku soothene, nave wi hamurwa mukhala phaama? Hooye. Masooso ni okhwa inahaala ocakanela mu elapo evyaani ya Muluku. (Wup. 21:3, 4) Ewehereryo yeela ennanikhaviherya ohikhala oonyeenyeya naari a esara ni yeeyo eneereya wa hiyaano. Nlelo nnanwerya okhalano ohakalala ni murecele, naamwi muchu anikhalinhe moohookololowa, nimuyeleenle oosiveliwaahu mookhwani naari echu vyakala yoonanara yeeren’ye mu okumi ahu. Ntakhara heeni? Nthowa nawi, naamwi makacamiho ahu amutano eri oovilaxa, noosuwela wi ‘ohooxeya wahu ori wa elukuluku ya vakhaani’ nave wi mu elapo evyaani hanirwa nihooxeya.—2 Ako. 4:17, 18.

14. Nni nlipihe hai ewehereryo ahu?

¹⁴ Ntakhara heeni ewehereryo ahu ya omwaahiyu ennanikhaviherya okhala awaakhwaneliwa, nave tiheeni enahaala onikhaviherya okhala oolekecheya wi soororomeliha sa Yehova sinahaala waakhwanela? Hiiha ntoko muchu onamphariheleiye pinookulu wi oone ichu soorakameela mwa phaama, hiyaano tho nnamuchuna weeravo echu wi nlipihe ewehereryo ahu wi niwerye omoona phaama parataiso a muhoolo. Ntoko yootakiherya, vaavaa nnakhalaahu awuukhuwaxawa nthowa na okhala woovila ophwanya ekhorowa yawaakhwanela ya wiivakulelano, nnanwerya waanyiherya mukhalelo ekumi enahaalaaya okhala vaavaa nihinahaalaahu ochuna ikhorowa nave ohinahaalaaya okhalawo muchu oohaawa. Wakhala wi nri oonyeenyeya nthowa nawi hinaano murici wammoori, nnanwerya wuupuwela mukhalelo ichu seiya ihiryaaya soochuneya naalikanyihaka ni mukhalelo ekumi enahaalaaya okhala yootikhiniha vaavaa nnahaalaahu okhala oophaameya. (1 Tim. 6:19) Woopaceryani nnanwerya woona okhala woovila wuupuwelaka vooloca sa omwaahiyu, ohiya wuukhuwaka ni sahiihaano. Wakhala wi ninnuupuwelelaxa omwaahiyu wootikhiniha yoowo Yehova oniroromelinheiye, onamukhala wookhweyaxa otikitheryeya wa yeeyo ohiya mu makacamiho ahu.

15. Tiheeni muhusenryaanyu ni yeeyo Christa olonceiye?

¹⁵ Nnanwerya ohuserya ni yaweereya ya Christa mwaara a Dennis, yoowo oromoliwe woopaceryani. Owo ooloca: “Kookhalano ereca ya mmisipheni yootitelela yeeyo enakeeriha opharihelaka ekatera ya maroota nave kimalihaka elukuluku yincipale va nihikuni kiri va ekaama. Mahiku oothene kinamwiiceliwa. Mwa hiihaanoru, totore aka ookileela wi nkipenuwa. Nyenya mwawaakuveya kaahuupuwela: ‘Owo hanoona omwaahiyu mmukhalelo yoowo kinoonaaka. Kitikitheryen’ye mu ewehereryo aka, yeeyo enakivaha murecele wa woomunepani. Olelo, akhweya kinnaphwanela ovilela makacamiho mancipale a elapo yeela, nyenya kinahaala okhalano ekumi yootikhiniha mu elapo evyaani!”

“YAALE ANAMOOVA YOOWO HIYAAVO ECHU ENAATHOWA”

16. Ntakhara heeni mwene Tavite aarempeiye wi yaale enamoova Yehova “hiyaavo echu enaathowa”?

¹⁶ Naamwi nri awaakhwaneliwa, nlelo nnamukhalano makacamiho. Mwene Tavite aahaayeleela anamwane awe araru mookhwani. Akina yaahimootherya ichu soonanara seiho owo aaheenreiyeno, asinthamwene awe yaahimmwareela nave mwene aaheererya omwiipha ni omwaavyaavya mu iyaakha sincipale. Naamwiihiiha, avilelaka yaweeha yeela etokweene, owo aahiloca vooloca sa Yehova ariki: “Yaale anamoova yoowo hiyaavo echu enaathowa.” (Sal. 34:9, 10) Ntakhara heeni aalonceiye yeela? Nthowa nawi aasuwela wi, naamwi Yehova aheerihaka wi makacamiho yeereke mu okumi, owo ilukuluku soothene ahaala omvahereryaka Tavite yeeyo aachuneiye. (Sal. 145:16) Hiiha ntoko Tavite, nnaphwanela ororomela wi Yehova onahaala onikhaviherya ovilelaka mu saweeha sahu soothene. Nnanwerya okhalano murecele ni ohakalala, moohipwacha mikhalelo sahu.

17. Ntakhara heeni muri oolakelela okhala awaakhwaneliwa?

¹⁷ Yehova onachuna wi nyuwaano mukhaleke awaakhwaneliwa. (Sal. 131:1, 2) Mwawiihiiha, mwiilipixerye wi muhuserye yoovitheya ya waakhwaneliwa. Wakhala wi munniilipixerya wunnuwiha othamalela, okhala a wiiyeviha ni olipiha ewehereryo anyu, munanwerya oloca muriki: “Aa, kiri oohakalala.”—Sal. 16:5, 6.