Mukawane ni Akina Yeeyo Muhusenryaanyu

Yoohuserya ya muchu mukhateiye enanwerya onikhaviherya. Nyenya nnanwerya okhala olipiheya vaavaa nnakawanaahu ni akina muhakhu woomunepani yoowo niphwannyaahu. Masiposipo 11:25 oni: “Nave yoole onaariiryiha murima akina onarwa ariiryihiwa tho murima.”

Wiiliwiili, Vaavaa nnakawanaahu ni akina seiho nihusenryaahu ninnawerya wiiwexexa seiho nihusenryaahu nave onnakhala wookhweya wuupuwela. Ohiya yeeyoru, okawana muhakhu woomunepani ni akina onnanivaha ohakalala nthowa nawi noosuwela wi michaka seiha sinanwerya waakhaviherya yaawo.—Saw. 20:35.

Mweererye ela: Mu esumana enacharela, Mvarerye ikari seiho munakhalaanyuno wi mvaanele ni muchu ichu seiho muhusenryaanyu. Onanwerya okhala Mmusi anyu, nthamwene anyu oomutekoni naari ooxikola, munna a mmulokoni, akhweya mwaacamani anyu naari muchu yoowo mumphwannyaanyu mmuteko woolaleerya. Mweererye oloca yeeyo muhusenryaanyu mmukhalelo wookhweya ni mookwakwaleya.

Muupuwele: Yoolakelela anyu waaleela akina yeeyo muhusenryaanyu ori waalipiha ohiya waakhinyererya akina.—1 Ako. 8:1.