Mweemererye Osivela wa Yehova

1. Ntakhara heeni nyuwaano mwiiveleenlaanyu wa Yehova? (Moone tho eruku.)

MUNNUUPUWELA vaavaa mwaavekenlaanyu wa Yehova nave mmuleela owo wi munachuna wiiveleela wa yoowo? Nyuwaano mwaahipaka yoolakelela yeela woona wi mwaahimusuwela nave mwaanamusivela yoowo. Nyuwaano moomuroromeliha owo wi munahaala okuha mu nipuro noopacerya yookhwela awe mu okumi anyu nave wi mwaahaala otitelela omusivelaka yoowo ni murima anyu woothene, okumi anyu ni ikuru sanyu soothene. (Mar. 12:30) Vano, osivela wanyu ntakhara yoowo onamvira okhalaka woolipa. Mwahaala waakhula hai wakhala wi muchu ohookohaani: “Munnaroromela wi munnamusivela Yehova?” Muhoovelenleru nyuwaano mwaahaala wi “Miyaano kinnamusivelaxa opwaha muchu ori oothene naari echu eri yoothene!”

2-3. Tiheeni Yehova onachuneiye wi neemererye, nave tiheeni nnahaalaahu woona mmwaha yoola? (Yeremiya 31:3)

² Naamwi nsuwelaka wi ninnamusivela vancipale Yehova, akhweya hannalekecheya wi Yehova onnanisivela. Akhweya nnanwerya wuupuwela wi hanri oophaameya mwawaakhwanela wi anisiveleke. Murokora mmoha ooloca mmukhalelo woohiphwanelela ariki: “Mi koosuwela wi kinnamusivela Yehova. Nkinakhwa minikwa ntakhara yeeyo. Pahiru kinakhwa minikhwa waakhanle wi Yehova onnakisivela.” Nyenya Yehova onoona hai vooloca sa nyuwaano?

³ Yehova onachuna wi muroromeleke wi owo onnoosivelaani. (Mwaalakhanye Yeremiya 31:3.) Eparipari ti yawi, Yehova towiichanneeni. Vaavaa mwiiveleenlaanyu wa yoowo ni opatisiwa, nyuwaano mohaakhela echu yoochuneyaxa, osivela wawe woororomeleya. Eyo enataphulela wi owo onnoosivelaani vatokweene nave harwa oohiyaani. Woona wi Yehova ookhalano osivela woororomeleya wa alapeli awe oororomeleya, owo onnawoona oothene ntoko ‘oosiveliwa awe,’ ophiyerya tho wi nyuwaano mwa oochuneyaxa wa yoowo (Mal. 3:​17, enoota.) Yehova onachuna wi mwiisooneke hiiha ntoko murummwa Paulo iisooneiye. Owo aahilekecheya wi Yehova aanamusivela nave arepa: “Mweeparipari, kinnaroromela wi naari okhwa, naari okumi, naari ankeelo, naari mamwene, naari ichu samutano, naari ichu sinoorwa, naari owerya, naari orekama, naari wiixa, naari yoopatuxiwa ekina heweryaru onimwalanya hiyo ni osivela wa Muluku.” (Aro. 8:​38, 39) Mu yoohuserya yeela, nnahaala woona ntakhara heeni nnaphwanelaahu olipiha ororomela wahu wi Yehova onnanisivela ni yeeyo enahaala onikhaviherya weerano yeeyo.

NTAKHARA HEENI TI WOOCHUNEYA WEEMERERYA OSIVELA WA YEHOVA

4. Yawootha taani Satana onachuneiye wi neemererye, nave ti mwawiihai nnahaalaahu okhooca yawootha yeela?

⁴ Moorweela wa weemererya osivela wa Yehova nnanwerya owaniha ni “mavyakelo” a Satana (Aef. 6:11) Satana onanwerya opaka soothene onaweryeiye wi anihiihe omurumeela Yehova. Mavyakelo mamoha a Satana ori omwaramwaxa sawootha sawi Yehova hananisivela. Muhicuwale wi Satana muteko awe waavya ikari. Owo ikwaha ikina onnanihiphela vaavaa nnakhalaahu oohikhapeleleya, akhweya vaavaa nnahooxeyaahu mmuupuweloni nthowa na makacamiho akhalai, naari makacamiho ahiihaano, akhweya tho ohisuwelaxa phaama sa muhoolo. (Mas. 24:10) Satana ori ntoko mwaco yoowo onachuna omphara mwaaxinama oohikhapeleleya. Mwawiihiiha owo onnapharihela mukhalelo ahu wooceecheya wa mmuupuweloni wi aniceecheihe. Nyenya natitelela olipiha ororomela wahu wi Yehova onnanisivela, nnahaala okhala ooreheryeyaxa ‘okhoma’ ni mavyakelo a Satana.—1 Pet. 5:​8, 9; Tiy. 4:7.

5. Ntakhara heeni nnaphwanelaahu wiisoonaka oosiveliwa ni oochuneya wa Yehova?

⁵ Moorweela wa weemererya osivela wa Yehova, nnanwerya okhala awaacameleyaxa wa yoowo. Ntakhara heeni nnalocaahu yeela? Yehova aapatunxe achu ni nchuno na wooniherya osivela wa akina ni woona wi awo tho annasiveliwa ni akina. Vaavaa muchu onanooniheryeiye osivela, eyo ennanceenyerya tho omooniherya osivela. Vaavaa nniisoonaahu wi Yehova onnanisivela, hiyaanotho ninnamusivela yoowo. (1 Yoh. 4:19) Nyenya vaavaa nninnuwihaahu osivela wahu ntakhara yoowo, owotho onnannuwiha osivela wawe ntakhara hiyo. Piipiliya onnanleela mookwakwaleya wi: “Mmwaacamele Muluku, nave owo onarwa awaacamelaani.” (Tiy. 4:8) Nyenya, nni nlipihe hai ororomela wahu wi Yehova onnansivela?

TIHEENI ENAHAALA ONIKHAVIHERYA WEEMERERYA OSIVELA WA YEHOVA?

6. Waakhanle wi hamunaroromela wi Yehova onnoosivelaani, tiheeni munaphwanelaanyu weera?

⁶ Mukhale ootitelela ni ooluluwanya mmavekelo anyu. (Luka 18:1; Aro. 12:12) Mumveke Yehova ikwaha sincipale wakhala wooweryeya wi ookhaviheryeeni wiisoonaka hiiha ntoko owo onawooneiyeeni. Ikwaha ikina, nyuwaano mukhatiinyu munawerya wiisoonaka ohikhala echweenevo, yeerihaka okhala woovila weemererya wi Yehova onnoosivelaani. Nyenya muupuwele wi Yehova mutokweene opwaha murima anyu. (1 Yoh. 3:​19, 20) Owo ohoosuwelaani phaama opwaha nyuwo aneene, owo tho onnoona mukhalelo anyu yoowo muhinaweryaanyu woona. (1 Sam. 16:7; 2 Math. 6:30) Mwawiihiiha, muhoovelele ‘ohula murima anyu’ ntakhara miyoonelo sanyu wa yoowo, mvekaka nikhaviheryo nawe wi mweemererye osivela wawe. (Sal. 62:8) Mmanle ovekela wa yoowo, voocharela ti woochuneya mpake ichu ntoko iha.

7-8. Ti mwawiihai Salmu onanikhaviheryeiye ororomela wi Yehova onnanisivela?

⁷ Mweemererye masu a Yehova. Owo aahaaveerela anamarepa a Piipiliya wi etharihe mukhalelo owo oryeiye. Moone mukhalelo mulipa oomurepa Salmu Tavite omutharinheiye Yehova. “Yehova ori vakhiviru va yaale arino murima woophweeya, owo onnaavuluxa yaale ari oonyaanyeya mmunepani.” (Sal. 34:​18, enoota.) Vaavaa munakhalaanyu awuukhuwa, munanwerya wiisoonaka okhala mukhatiinyu. Yehova onnaroromeliha wi mu elukuluku yeeyo, owo onnakhala vakhiviru vanyu woona wi onnoona wi nyuwaano munnachuna nikhaviheryo nawe opwaha khalai. Mu Salmu mukina Tavite oorepa: “mukhapelele miithori aka mu nipotoro nanyu nannyapara.” (Sal. 56:8) Yehova onnoona vaavaa munakhalaanyu oothanana. Owo onnuukhuwa vancipale ni nyuwaano nyenya onnoona wiicela wanyu mmurimani mwawe. Hiihaa ntoko ncoicoi nri noothene na maahi a munipotoroni nannyapara nryaaya noochuneya wa muchu ori vamukwahani wa mutakhwani, miithori anyu toochuneya wa Yehova, nave owo onnuupuwela ikwaha soothene munoonaanyu wiicela muninla. Mu Salmu 139:​3, ninnaalakhanya wi: “moosuwela phaama iphiro saka soothene.” Yehova onnoona iphiro sanyu soothene, nyenya onatikitheryeya mu saphaama munapakaanyu. (Ahe. 6:10) Ntakhara heeni? Nthowa nawi owo onnavaha esisapo wiilipixerya wanyu woothene munapakaanyu wi mmuhakalalihe.a

⁸ Yehova onnapharihela soorepa seiha soolipiha sa Mpiipiliyani alocaka wi: “onnoopwachaani ni woosivelaani.” Ntoko nthokoronryaahu woopaceryani, Satana onnaruuha sawootha sa wi Yehova hanoosivelaani. Mwawiihiiha, wakhala wi ikwaha ikina munnakhwa minikwa osivela wa Yehova ntakhara nyuwaano, mwiikohe: ‘Taani kinaphwanelaaka omweemererya, “tiithi a sawootha” naari “Muluku a eparipari”?’—Yoh. 8:44; Sal. 31:5.

9. Yoororomeliha taani Yehova onaavaheiye yaale enamusivela? (Mukwaha 20:​5, 6)

⁹ Muupuwele mukhalelo Yehova onawooneiye yaale anamusivela. Moone yeeyo Yehova aalonceiye wa Mose ni wa Aisarayeli. (Mwaalakhanye Mukwaha 20:​5, 6.) Yehova onnaroromeliha wi onahaala otitelela waavaha osivela woororomeleya yaale anamurumeela. Woona wi Yehova toororomeleya, nnaphwanela olekecheya wi owo harwa ahiya omusivela muchu yoowo onamusivela. (Neh. 1:5) Mwawiihiiha, wakhala wi munnachuna osuwela waakhanle wi Yehova onnoosivelaani, mwiikohe: ‘miyaano kinnamusivela Yehova?’ Mwawiihiiha muupuwele ela: Wakhala wi nyuwaano munnamusivela nave munnapaka owetha wanyu wi mmuhakalalihe, nyuwaano munanwerya ororomela wi owo onnoosivelaani vancipale. (Tan. 9:4; 1 Ako. 8:3) Mmasu makina, waakhanle wi nyuwaano hamunakhwa minikwa osivela wanyu ntakhara Yehova, ntakhara heeni okhwa minikwa osivela wawe wa nyuwaano? Nyuwaano munanwerya ororomela moomalela wi owo okhala wookhala onamoosivelakaani nave harwa oohiyaani.

10-11. Yehova onachuna wi mooneke hai woopola? (Akalatiya 2:20)

¹⁰ Muupuwele mukhalelo woopola oryaaya yamahala yasisapo. Mukucho wa woopola wa Yesu Kristu yamahala etokweene ya Yehova ntakhara achu. (Yoh. 3:16) Apwanne Yehova omuruminhe mwanawe wi akhwe ntakhara nyuwaano? Aa! Moone yeeyo yeeren’ye ni murummwa Paulo. Owo tho aahipaka ichu sincipale soonanara ahaakumve okhala Mukristu, nyenya vaavaa aareiye Mukristu aanaphwanela otitelela owaniha ni ohiphaameya wawe. (Aro. 7:​24, 25; 1 Tim. 1:​12-14) Mwawiihiiha, owo ahipacerya woona woopola ntoko yoovaha ya Yehova wa yene mwaneene. (Mwaalakhanye Akalatiya 2:20.) Muupuwele wi Yehova aahimveerela murummwa Paulo orepa masu yaala. Nyenya soothene siri Mpiipiliyani sirempwe wi inihusihe. (Aro. 15:4) Yehova onachuna wi mweemereryeke wi mukucho wa Yesu yamahala wa nyuwaano. Vaavaa munuupuwelaanyu mukhalelo yamahala yeela eryaaya yootikhiniha wa nyuwaano ni wi Yehova oovanheeni nyuwaano, munahaala ororomelaxa wi Yehova onnoosivelaani.

¹¹ Ninnamuthamala Yehova nthowa na omurumiha Yesu veelaponi ya vathi wi akhwe ntakhara hiyaano. Mathowa makina Yesu aarweenleiye veelapo ya vathi waari olokoha michaka sa phaama vooloca sa Muluku. (Yoh. 18:37) Yesu tho oonihusiha iparipari vooloca sa mukhalelo Yehova onaasiveleiye anaawe.

YESU ONANIKHAVIHERYA HAI WEEMERERYA OSIVELA WA YEHOVA?

12. Ntakhara heeni nnaphwanelaahu weemererya yeeyo Yesu olonceiye vooloca sa Yehova?

¹² Vaavaa Yesu aareiye veelaponi ya vathi aanasiveliwa waaleela achu mukhalelo Yehova oreiye. (Luka 10:22) Nookhalano mathowa oothene a ororomela mukhalelo Yesu omutharinheiye Yehova. Nthowa nawi Yesu aari ni Atiithi awe wiirimo, ahaakunve orya veelapo ya vathi. (Ako. 1:15) Yesu oosuwela mukhalelo Atiithi awe anamusivelaaya. Navetho owo ohoona mukhalelo Atiithi awe anooniheryaaya osivela wa Ankeelo oororomeleya ni wa anamwane awe oothene alopwana ni athiyana oororomeleya a veelaponi ya vathi. Ti mwawiihai Yesu onaakhaviheryeiye akina weemererya osivela wa Muluku?

13. Yesu onachuna wi nimooneke hai Yehova?

¹³ Yesu onachuna wi nimooneke Yehova hiiha ntoko owo onamooneiye. Mu aliivuru a michaka Yesu oomuloca Yehova ntoko “Tiithi” opwaha ikwaha 160. Nyenya vaavaa aaloceiye ni oomuchara awe owo aanapharihela masu awi “Atiithi anyu” naari “Atiithi anyu a wirimu.” (Mat. 5:16; 6:26) Yesu ahaakumve orwa veelaponi ya vathi alapeli oororomeleya a Yehova yaanamwiichana ntoko ‘Aikuru Soothene, Muluku Aikuru Soothene, Mpatuxa Mutokotoko’ ni masina makina a ncicimiho. Nyenya ikwaha sincipale Yesu aahimwiichana Yehova wi ‘Atiithi’ ahu. Masu yaala annooniherya wi Yehova onakhwela wi alapeli awe yiisooneke okhala awaacameleya wa yene hiiha ntoko mwaana oniisooneiye okhala awaacameleya wa Atiithi awe oosivela. Yesu aachuna onihusiha wi Yehova onnanisivela, hiiha ntoko Tiithi onaasiveleiye anamwane awe ookhweleya. Nnahaala woona vooloca sa ikwaha piili seiho Yesu aapharihenleiye masu awi “Tiithi” wi aloce sa Yehova.

14. Ti mwawiihai Yesu oonihenryeiye wi mmoha ti mmoha a hiyaano tasisapo va miithoni va Atiithi ahu a wirimu? (Mateyu 10:​29-31) (Moone tho eruku.)

¹⁴ Yoopacerya, nnahaala woona yeeyo Yesu olonceiye mu Mateyu 10:​29-31. (Mwaalakhanye.) Iphera asipalame akhaani yaawo ehinahaala omusivela Yehova naari omulapela. Yesu olonce wi Atiithi ahu aasuwela phaama ene weiwo enakhalaayawo epalame ti epalame. Waakhanle wi Yehova onnavaha esisapo epalame nnanwerya olekecheya wi owo onnampwacha mmoha ti mmoha a hiyaano, woona wi ninnamusivela nave tho ninnamulapela! Yesu tho ooloca wi Atiithi ahu aasuwela miihi muchu ti muchu oreiyeno mmuruni mwawe. Woona wi Yehova oosuwela ophiyerya ichu ikhaani vooloca sa hiyaano nnanwerya olekecheya moomalela wi owo onnanipwacha vancipale. Mweeparipari, Yesu onachuna wi neemererye wi mmoha ti mmoha a hiyaano na asisapo vamiithoni va Atiithi ahu a wirimu.

15. Tiheeni masu a Yesu mu Yohani 6:44 enanleelaaya vooloca sa Atiithi awe a wirimu?

¹⁵ Moone yootakiherya ekina vaava Yesu aapharihenleiye masu awi “Atiithi.” (Mwaalakhanye Yohani 6:44.) Atiithi anyu a wirimu ahookhaviheryaani nyuwaano waasuwela ni waasivela. Ntakhara heeni awo yenraayano yeeyo? Nthowa nawi awo ahoona mikhalelo saphaama mwa nyuwaano. (Saw. 13:48) Vaavaa Yesu aaloceiye masu a Yehova a mu Yohani 6:​44, akhweya owo aathariha masu a Yehova enaphwanyeya mu Yeremiya 31:3. Mu yoorepa yeeyo, Yehova aaloca wa achu awe ariki: “Ti nthowa nene kooruunhaaka wa miyo ni osivela woororomeleya [naari kititelenlaaka owooniherya osivela woororomeleya].” (Yer. 31:​3, TNM; enoota; mulikanyihe ni Oseya 11:4.) Muupuwele sa yeeyo eyo enataphulelaaya. Atiithi ahu oosivela a wirimu ennatitelela woona echu yaphaama mwa nyuwaano yeeyo muhinaweryaanyu woona.

16. (1) Tiheeni Yesu mweeparipari onanleeleiye, nave ntakhara heeni nnaphwanelaahu omweemererya yoowo? (2) Tiheeni enahaala wookhaviheryaani olekecheya wi Yehova Tiithi aphaama wa nyuwaano? (Moone ekaaxa “Tiithi Yoowo Oothene Ahu Nnamuchunaahu.”)

¹⁶ Amutharihaka Yehova ntoko Tiithi Yesu mmukhalelo mukina onanleela wi: “Yehova tahi wi pahiru ti Atiithi aka awo tho ti Atiithi anyu. Nave kinnoororomelihaani wi ennoosivelaani ni ennuukhuwa ni mmoha ti mmoha a nyuwaano.” Mwawiihiiha, wakhala wi ikwaha ikina hamunalekecheya vooloca sa osivela wa Yehova ntakhara nyuwaano, mmaale nave mwiikohe: ‘Apwanne nkinaphwanela ororomela masu a mwaana yoowo aasuwenle phaama Atiithi nave ilukuluku soothene onaloca eparipari?’—1 Pet. 2:22.

MUTITELELE OLIPIHA OROROMELA WANYU

17. Ntakhara heeni nnaphwanela otitelela olipiha ororomela wahu wi Yehova onnanisivela?

¹⁷ Nnaphwanela otitelela olipiha ororomela wahu wi Yehova onnanisivela. Muupuwele wi Satana onnapaka eri yoothene onaweryeiye wi anoocelihe omurumeela Yehova. Owo anachuna oniceecheiha. Mwawiihiiha, owo onahaala otitelela weererya oneeriha weemererya wi Yehova hananisivela. Hannaphwanela weemererya wi Satana anivoothe!—Yupu 27:5.

18. Muni mulipihe hai ororomela wanyu mu osivela wa Yehova?

¹⁸ Wi mulipihe ororomela wanyu mu osivela wa Yehova, mutitelele ovekela mvekaka nikhaviheryo nawe wi mwiisooneke hiiha ntoko owo onawooneiyeni. Muupuwele mwawiiseela iversikulu sa Mpiipiliyani seiho sinathariha mukhalelo Yehova onaapwacheiye yaale enamusivela. Muupuwele wi ilukuluku soothene Yehova onahaala omusivelaka yoowo onamusivela. Muupuwele vooloca sa ntakhara heeni nyuwaano munaphwanelaanyu woonaka woopola ntoko yamahala wa nyuwo mukhatiinyu. Nave muroromele mu yoororomeliha ya Yesu yawi Yehova Tiithi anyu a wirimu. Mwawiihiiha wakhala wi muchu ookoha: “Apwanne munnaroromela wi Yehova onnoosivelaani?” Nyuwaano munnamwaakhula moororomela, “Aai owo onnakisivela! Nave miyaano kinnapaka owetha waka mahiku oothene wi kooniherye osivela waka wa yoowo!”