Olapa Vamoha ni Muluku—Onnaruuha Ohakalala
“Hiyo amukhaviheryi a Muluku, ninnovekani wi muhakheleke siyo ene mahala a Muluku.”—2 KORINTO 6:1.
MACIPO: 75, 74
NTAKHARA HEENI ENANWERYA OLOCIWA WI MUTEKO WA OLALEERYA . . .
onnanruuhela ohakalala?
onnanaacameliha wa Muluku ni akina?
onnanikhapelela?
1. Naamwi Yehova arino Oowerya Woothene, onawoopa akina wi epake eheeni?
YEHOVA toowerya woothene. Owo oopatuxa ichu soothene, nave ookhalano miruku ni owerya woohaalakhanyeya. Amanle omukhaviherya Yupu wiiwexexa yeela, Yupu aaloca wa yoowo: “Kòsuwela wi munnawerya sothene. Hiyavoru enovilàni.” (Yobi 42:2) Yehova onnawerya opaka echu eri yoothene nihirivo nikhaviheryo na muchu. Naamwi hiiha onnooniherya osivela moorweela wa waawopa akina olapa vamoha ni yoowo wi ekhwaaniherye yookhwela awe.
2. Muteko taani wookhweleya Yehova aamvanheiye Yesu?
2 Muluku aampatuxa Mwanawe, Yesu, ahaakumve opatuxa echu eri yoothene. Voocharela, Yehova aamweemererya Mwanawe wi apatuxe ichu soothene. (Yohani 1:1-3, 18) Murummwa Paulo oorepa vooloca sa Yesu: “Ti mwa yowo Muluku opatunseiye sothene inakhala wirimu ni vathiva, sawoneya ni sohoneya, omwene ni owerya, otokwene ni olamulela. Sothene sòpatusiwa mwa yowo ni wa yowo.” (Kolosi 1:15-17) Mwawiihiiha, tahi wi pahiru Yehova amvanhe Mwanawe muteko wookhweleya, nyenya waaleela tho akina vooloca sa yoowo. Eyo yaari ekari etokweene!
3. Muteko taani Yehova aamvanheiye Aatamu?
3 Yehova tho onnaawopa achu wi elape vamoha ni yoowo. Ntoko yootakiherya, aamweemererya Aatamu waavaha axinama masina. (Maphatxuwelo 2:19, 20) Nkaanyiheryani ohakalala Aatamu aareiyeno opaka muteko yoowo! Mweephoole aanahuserya mukhalelo wa mwaaxinama ori oothene, voocharela aanamvaha nsina. Yehova taapatunxe axinama oothene, mwawiihiiha anwerya waavaha masina. Nyenya, aahooniherya wa Aatamu wi aanamusivela moorweela wa omvaha muteko yoowo. Muluku tho aamvaha Aatamu muteko wa weeriha elapo yoothene okhala parataiso. (Maphatxuwelo 1:27, 28) Nyenya Aatamu aalakelela ohiya olapa ni Muluku, nave yookhumelela yaari ohooxeya otokweene ntakhara yene ni anamwane awe oothene.—Maphatxuwelo 3:17-19, 23.
4. Akina yaalampe ni Muluku mwawiihai wi ekhwaaniherye yookhwela awe?
4 Voocharela, Muluku aahaawopa akina olapa vamoha ni yoowo. Noowa aahimpaka mwaaceya yoowo aamukhapelenle yene ni emusi awe variyari va Maahi Mancipale. Moose aahoopola nloko o Yiikuputu. Yosuwa aahaahoolela Aisarayeli o Elapo ya Nlakano. Soolomoni aateka empa ya Muluku o Yerusalemu. Mariya aamuyara Yesu. Achu yaala ancipale oororomeleya ni akina yaahilapa ni Yehova wi ekhwaaniherye yookhwela awe.
5. Muteko taani nnapakaahu, nave apwanne yaari yookhweleya Yehova onivoliiherya mmuteko yoowo? (Moone eruku yoopacerya.)
5 Olelo Yehova onnaniwopa wi nipake yeeyo nnaweryaahu wi nikhaviherye Omwene awe. Aakhalavo makhalelo mancipale a omurumeela Muluku. Naamwi oothene nihirino mavyakelo mamohamoha, oothene nnanwerya olaleerya michaka ya Omwene. Yehova aampaka muteko yoola meekheiye. Anwerya oloca ni achu veelaponi orweela wirimu. Yesu aaloca wi Yehova aamweeriha maluku oloca ni achu sa Mwene ni Omwene Awe. (Luka 19:37-40) Nyenya Yehova onnaneemererya okhala “amulapeli ni Muluku.” (1 Korinto 3:9) Murummwa Paulo aarepa: “Hiyo amukhaviheryi a Muluku, ninnovekani wi muhakheleke siyo ene mahala a Muluku.” (2 Korinto 6:1) Ekari etokweene Muluku oniwopa olapa ni yene. Hankooni noone ntakhara heeni eyo ennanruuhela ohakalala.
OLAPA NI MULUKU ONNANRUUHELA OHAKALALA
6. Mwaana oopacerya a Muluku otharinhe hai mukhalelo ooneiye olapa vamoha ni Tiithi awe?
6 Olapa ni Muluku wiiliwiili onnaweeriha akapuro a Muluku okhala oohakalala. Ahaakumve orwa veelaponi yavathi, Mwaana oopacerya a Muluku aaloca: “Apwiya akipatunse ntoko mulepu wa sopatusiwa saya . . . Miyano kari ni yowo ntoko mulipa òteka empa nave kari nihakalaliho nawe nihiku ti nihiku, vamithoni vawe kàneliwa murima mahiku othene.” (Masiposipo 8:22, 30) Vaavaa Yesu aalapeiye ni Tiithi awe, aanakhala oohakalala woona wi aapatuxa ichu sincipale nave aanasuwela wi Yehova aanamusivela. Hanka vooloca sa hiyo?
7. Ntakhara heeni muteko wa olaleerya onnanruuhela ohakalala?
7 Yesu aaloca wi ninnakhala oohakalala moorweela wa ovaha ni waakhela. (Saweriwa T’arummwa 20:35) Noophwanya ohakalala vaavaa nihusenryaahu eparipari, nave tho ntakhara heeni ninnakhala oohakalala okawana ni akina eparipari? Nthowa nawi ninnawoona ekhalaka oohakalala vaavaa anapaceryaaya wiiwexexa yeeyo Piipiliya onahusiheiye ni okhalano onthamwene ni Muluku. Ninnahakalala owoona etorokaka mukhalelo wa muupuwelo ni wa okumi aya. Olaleerya muteko wookhweleyaxa ni woohakalaliha yoowo nnaphwanelaahu opaka. Owo tho onnaweeriha asinthamwene a Muluku okhalano okumi woohimala.—2 Korinto 5:20.
8. Tiheeni akina aloncaaya nthowa na olapa ni Yehova?
8 Vaavaa nnaakhaviheryaahu akina ohuserya vooloca sa Muluku, ninnasuwela wi Yehova onnanreeliha nave onnacicimiha wiilipixerya wahu omurumeela. Eyo tho ennanivaha ohakalala. (Mwaalakhanye 1 Korinto 15:58.) Marko, yoowo onakhala o Italiya, ooloca: “Kinnakhalano ohakalala woohithariheya osuwela wi kinneera yeeyo kinaweryaaka wa Yehova ohiya wa muchu yoowo aahaala ocuwala muteko aka.” Moolikana, Franko, yoowo onarumeela tho o Italiya, ooloca: “Moorweela wa Masu awe ni soovaha soomunepani, Yehova onnanuupuxerya mahiku oothene wi onnanisivela nave wi echu yoothene nnapakaahu ntakhara yene ti yookhweleya, naamwi okhalaka wi wiilipixerya wahu ti wa vakhaani. Ti nthowa nene olapa ni Muluku onakivahaaya ohakalala ni okhalano yootaphulela ya okumi.”
OLAPA NI MULUKU ONNANAACAMELIHA WA MULUKU NI AKINA
9. Onthamwene taani waarivovo variyari va Yehova ni Yesu, nave ntakhara heeni?
9 Vaavaa nnalapaahu vamoha ni yaale nnaasivelaahu, ninnawaacamela. Ninnasuwela phaama vooloca sa omuchu ni mikhalelo saya. Ninnasuwela soolakelela saya ni wiilipixerya aneeraaya wi ephwanye. Yesu oolapa ni Yehova iyaakha macikhwi oohaalakhanyeya. Osivelana waya waari woolipa ophiyerya wi hiyaavovo echu yaahaala opwexa onthamwene aya. Yesu aathariha mukhalelo wa onthamwene yoowo vaavaa aalonceiye: “Miyo ni Atithi nri mmoharu.” (Yohani 10:30) Chiryene awo yaari awaataana, nave yaaniiwanana vaavaa yaalapaaya vamoha.
10. Ntakhara heeni muteko wa olaleerya onnanaacameliha wa Muluku ni akina?
10 Yesu aamveka Yehova wi aakhapelele oohuserya awe. Mwawiihai? Owo aavekela: “Wi ekhale amoha ntoko hiyano.” (Yohani 17:11) Vaavaa nnakhalaahu mwawiiwanana ni malakiheryo a Muluku ni olaleerya, ninniiwexexa phaama mikhalelo sawe sootikhiniha. Ninnahuserya ntakhara heeni oryaaya waphaama omuroromela ni ochariha ohoolela wawe. Nave vaavaa nnamwaacamelaahu Muluku, owo tho onnanaacamela. (Mwaalakhanye Tiyako 4:8.) Ninnaataana tho ni anna vamoha ni arokora nthowa nawi ninnakumanano makacamiho mamohamoha ni ohakalala nave tho nthowa na okhalano soothanla imohamoha. Ninnalapa vamoha, ninnahakalala vamoha, nave ninnavilela vamoha. Octavia, yoowo onakhala o Kra-Pretanya, ooloca: “Olapa ni Yehova onnakaacameliha wa akina.” Octavia oothariha wi eyo nthowa nawi onthamwene awe vano onathipeleya mu “soothanla ni ohoolela waphaama.” Chiryene, ninnoona mmukhalelo mmohamoha. Vaavaa nnoonaahu wiilipixerya wa annihu wi emucicimihe Yehova,eyo ennanaacameliha wa yaawo.
11. Ntakhara heeni nnahaala omwaacamela Yehova ni annihu mu elapo yahiihaano?
11 Omusivela wahu Muluku ni annihu onnakhala woolipa hiihaano, nyenya onahaala okhala woolipaxa mu elapo yahiihaano. Nkuupuwelani muteko woohakalaliha nnahaalaahu ophara omwaahiyu! Nnahaala owaakhela yaale anahaala oviihiwa mookhwani ni waahusiha vooloca sa Yehova. Nnahaala tho olapa wi neerihe elapo okhala parataiso. Enahaala okhala yoohakalalihaxa olapa vamoha nave vakhaani vakhaani niphwanye ophaameya vathi va olamulelo wa Kiristu. Achu oothene anahaala waataana mukina ni mukhweiye nave Yehova onahaala ‘okumiha ntata nawe wi avonihe sothene irino okumi’—Salumu 145:16.
OLAPA NI MULUKU ONNANIKHAPELELA
12. Muteko woolaleerya onanikhapelela hai?
12 Hiyaano nnachuna okhapelela onthamwene ahu ni Yehova. Nnakhala mu elapo ya Satana nave na achu oohiphaameya, mwawiihiiha ti wookhweya opacerya wuupuwela ni weera ichu hiiha ntoko elapo eneeraaya. Ori ntoko weekha mmuhiceni mummo maahi anamukakhelaaya muchu nipuro ohinachuneiyewo. Mmukhalelo yoowo nnaphwanela opharihela ikuru sahu soothene wi neekhe nayaaka nipuro nnachunaahu. Moolikana, nnaphwanela olapa mwakuru wi nsepe ovolowela woothene wa elapo yeela ya Satana. Muteko woolaleerya onanikhapelela hai? Vaavaa nnalocaahu sa Yehova ni Piipiliya, ninnakuha muupuwelo ahu mu ichu sookhweleya ni saphaama, ohiya mu ichu inahaala oceecheiha nroromelo nahu. (Filipi 4:8) Olaleerya onnalipiha nroromelo nahu nthowa nawi onnanuupuxerya soolaiherya ni malakiheryo oosivela a Muluku. Onnanikhaviherya tho okhapelela mikhalelo seiyo nnachunaahu wi inikhapelele ohivoloweliwa ni Satana ni elapo.—Mwaalakhanye Éfeso 6:14-17.
13. Munna mmoha o Australiya onne hai vooloca sa muteko woolaleerya, hanka nyuwo munoona hai sa yeeyo?
13 Vaavaa nnakhalaahu ooweiwa mmuteko woolaleerya, ohuserya, ni opaka ichu ntakhara annihu a mmulokoni, ninnakhapeleleya woona wi hannakhalano elukuluku ya oweiwa vancipale ni makacamiho ahu. Yoel, onakhala o Australiya, ooloca: “Muteko woolaleerya onnakikhaviherya ohiyeleela ichu siri seeparipari. Onnakuupuxerya makacamiho achu anakumanaayano ni mareeliho kinaakhelaaka moorweela wa opharihela malakiheryo a Piipiliya mu okumi aka. Muteko woolaleerya onnakikhaviherya okhala awiiyeviha; muteko owo onnakivaha ekari ya omuroromela Yehova ni anna.”
14. Ovilela wahu mmuteko woolaleerya enooniherya hai wi munepa wa Muluku ori ni hiyo?
14 Muteko woolaleerya tho onnanivaha nroromelo wi munepa waweela wa Muluku ori ni hiyo. Wi nlikanyihe: Nkuupuwelani wi muteko anyu ori waavaha achu iphaawu mu ekulucu anyu. Nyuwo hamunaveka nlivelo ntakhara muteko yoowo, nave munalivela mukhatiinyu muteko yoowo. Nave tho achu ancipale hanachuna iphaawu, ophiyerya wi akina annawicaani nthowa na waaruuhela iphaawu. Munoona wi mwaahaala omaliha elukuluku yincipale mmuteko yoowo? Moohilekela mwaahaala oceecheya, nave mwaahaala omaala. Nyenya, ancipale a hiyo ninnatitela muteko wa olaleerya eyaakha ti eyaakha, naamwi ochuneyaka wa hiyo elukuluku ni ikhorowa, moohipwacha mukhalelo nnakhalihiwaahu. Eyo yawooniherya yawi munepa wa Muluku onnanikhaviherya.
OLAPA NI MULUKU ONNOONIHERYA OMUSIVELA WAHU NI WAASIVELA AKINA
15. Muteko wa olaleerya michaka yaphaama oniiwanana hai ni yookhwela ya Muluku ntakhara achu?
15 Muteko woolaleerya oniiwanana hai ni yookhwela ya Yehova ntakhara achu? Yookhwela ya Muluku yaari yawi achu ekhaleke veelaponi okhala wookhala, nave yookhwela eyo hetoroken’ye vaavaa Aatamu aachenkeiye. (Isaiya 55:11) Muluku oopaka marehereryo wi anoopole mu yoocheka ni okhwa. Mwawiihai? Yesu aarwa veelaponi yavathi wi avahe ekumi awe ntoko mukucho wa woopola. Nyenya wi achu ephure mukucho yoowo wa woopola onachuneya omwiiwelela Muluku. Mwawiihiiha Yesu ohaahusiha achu mukhalelo waphaama Muluku onakhweleiye nave aahaalamulela oohuserya awe weera emohamoha. Vaavaa nnalaleeryaahu ni waakhaviherya akina okhala asinthamwene a Muluku hiihaano, hiyaano nnalapa ni Muluku mmarehereryo awe oosivela a waavuluxa achu mu yoocheka ni okhwa.
16. Muteko ahu woolaleerya oniiwanana hai ni nlamulo ntokweene na Muluku?
16 Vaavaa nnaahusihaahu achu ophwanya okumi woohimala, nnooniherya wi ninnaasivela awo vamoha ni Yehova. Yoowo “onakhwela wavulusa atxhu othene, nave wi ephiye mosuwelani wa eparipari.” (1 Timóteo 2:4) Vaavaa Mfarisi aamukonheiye Yesu ti nivi naari nlamulo ntokweene, Yesu aahaakhula: “‘Onarwa-osivelana ni Apwiya Mulukuá ni murimá wothene, nave ni okumiá wothene, nave ni mirikuá yothene. Nla n’ri nlamulo ntokotoko n’nopacherya. Nave nanawili nolikanano tinla, Onarwa-osivela mukhwá ntoko onirá wisivela mwanene mekhá.’” (Mateu 22:37-39, Nlakalano Nahihano) Vaavaa nnalaleeryaahu michaka yaphaama, ninniiwelela nlamulo nenla.—Mwaalakhanye Saweriwa T’arummwa 10:42.
17. Munoona hai ekari ya olaleerya michaka yaphaama?
17 Ninnahakalala vancipale! Yehova oonivaha muteko onanruuhela ohakalala, onanaacameliha wa yoowo ni annihu, nave onakhapelela onthamwene ahu ni yoowo. Muteko owo tho onnanivaha ekari ya wooniherya osivela wahu wa Muluku ni wa akina. Yehova ookhalano akapuro awe macikhwi orukurerya elapo, nave oothene yaawo aakhalano mikhalelo soohiyana. Nyenya moohipwacha naakhanle amiravo, awuuluvala, ooreela, oohaawa, oolipa, ni ooceecheya, oothene yeehu nnanwerya waaleela akina nroromelo nahu. Ninnoona mmukhalelo mmohamoha wa Chantel o Fransa, yoowo olonce: “Muchu a owerya woothene a veelaponi, Mpatuxa a soothene, Muluku a ohakalala, ooloca wa miyo: ‘Hawe! Loca! Oloce sa miyo, oloce orweela mmurimani. Miyaano kohoovaha ikuru saka, Masu aka Piipiliya, nikhaviheryo na wirimu, asinthamwene a veelaponi yavathi, ovyakiha, ni mahusiheryo a esisapo mu elukuluku yoophwanelela.’ Ekari taani etokweene nryaahuno, opaka yeeyo Yehova onanivekeiye ni olapa vamoha ni Muluku ahu!”
[Ekaaxa va epaaxina 32]
MASU ATHARIHIWE
Hiyaano ninnalapa vamoha ni Muluku vaavaa nnalaleeryaahu wa akina ni waakhaviherya okhala asinthamwene a Muluku wi yaakhele okumi woohimala. Naamwi Muluku aahaala owerya opaka muteko yoola meekheiye, ohooniherya osivela ntakhara hiyo moorweela wa oniwopa wi nlape ni yoowo. Muteko yoola onnanruuhela ohakalala, onnanikhapelela, nave onnanaacameliha wa Yehova ni akina
[Eruku va epaaxina 30]
Muteko taani woohakalaliha naahaalaahu opaka opwaha omukhaviherya muchu ohuserya eparipari? (Moone eparakrafo 7)