Mmuthamalele Yehova Ntoko Mulipa-awuupa Ahu
“Nto nyuwano, Pwiya [Yehova], . . . Hiyano na oloko, muri mulipa awupa, nupiwe ti mata anyu.”—ISAIYA 64:7
MACIPO: 89, 26
NNAPHURA HAI VAAVAA NNIIWEXEXAAHU . . .
mukhalelo Yehova onaathanleiye yaale onahaaleiye owuupa?
ntakhara heeni Yehova onnawuupa achu awe?
mukhalelo Muluku onawuupeiye yaale anamwiiwelela?
1. Ntakhara heeni Yehova Mulipa-awuupa mutokotoko?
MU Novempuru a 2010, epiya ya o Xiina yaatumihiwa itoolare waacamela macikhwi 70, o Inklatera. Echu yootikhiniha wi mulipa-awuupa awerye wuupa echu yasisapo ni oloko pahiru. Yehova, Mulipa-awuupa ahu, onnampwaha mulipa-awuupa oomwiilini. Piipiliya onaloca wi Yehova ampatusa mulopwana oophaameya ni “etxaya” yeeyo enataphulela orweela wa oloko. (Maphatxuwelo 2:7) Mulopwana owo, Aatamu aari “mwana a Muluku” nave aapatusiwe ni owerya wa otakiherya mikhalelo sa Muluku.—Luka 3:38.
2, 3. Nnii ntakiherye hai moonelo wa Aisarayeli oocharuwa?
2 Elukuluku Aatamu aamuchekenleiye Mpatusa awe, aahiya okhala mwaana a Muluku. Moohiyana anamwane ancipale a Aatamu annamuthanla Yehova ntoko Mulamuleli aya. (Ahebri 12:1) Vaavaa anamwiiwelelaaya Mpatusa aya, annooniherya wi annachuna wi owo akhale Tiithi ni Mulipa-awuupa aya, omuhiya Satana. (Yohani 8:44) Ororomeleya waya wa Muluku ennanuupuxerya yeeyo Aisarayeli oocharuwa yaaloncaaya: “Nto nyuwano, Pwiya [Yehova] muri Tithihu. Hiyano na oloko, muri mulipa awupa, nupiwe ti mata anyu.”—Isaiya 64:7.
3 Moolikana, alapeli eeparipari a Yehova olelo, anniilipiserya okhala awiiyeviha ni awiiwelela. Anoona okhala ekari omwiichana Yehova Tiithi aya, nave annachuna wi akhale Mulipa-awuupa aya. Apwanne ninniilipixerya wi nikhale ntoko oloko wawoolowa wi Muluku awerye onuupa ntoko epiya yasisapo? Ninnawoona anna ni arokora etitelelaka oya vahoolo nlelo yuupiwaka ni Muluku? Wi enikhaviherye okhalano moonelo woophwanelela, nnahaala othokororya mukhalelo Yehova onaathanleiye yaawo onawuupeiye, mathowa anamweeriha owuupa, ni mukhalelo oneereiyeno yeeyo.
YEHOVA ONAATHANLA YAALE ONAWUUPEIYE
4. Yehova onaathanla hai yaale onawiichaneiye? Mvahe yootakiherya.
4 Yehova hanawoona achu ntoko nnawoonaahu. Moohiyana, owo onaalikhela murima nave onnoona yeeyo oreiye muchu ti muchu a hiyo. (Mwaalakhanye 1 Samuwele 16:7b.) Yehova aaheerano yeela vaavaa aapankeiye muloko Weekiristu. Yehova ni Mwanawe yaahiithanlela achu ancipale yaawo akina yaawoonaaya okhala oohiphwanelela. (Yohani 6:44) Ntoko yootakiherya, mmoha a yaawo aari Nfarisi iichaniwa Saawulu, yoowo aari “òruwana, awikara ni òwali.” (1 Timóteo 1:13) Nyenya Yehova aathoriha naari aahaalikhela murima wa Saawulu nave ahoona wi aari oloko woophwanelela. (Masiposipo 17:3) Opwaha yeeyo, Yehova aahoona wi Saawulu aahaala wuupiwa ntoko epiya ‘yòthanliwa wi alaleye . . . wa amalapo, wa mamwene ni wa anamwane a Isarayele.’ (Saweriwa T’arummwa 9:15) Yehova tho aahaathanla akina yaahaala wuupiwa wi ekhale “etxhu yorèrasa,” ophitaanyerya alipa oohapaliwa, alipa ooraruwa, ni ampava. (Aroma 9:21; 1 Korinto 6:9-11)Vaavaa anahuseryaaya Soorempwa, awo annalipiha nroromelo naya wa Yehova nave annamweemererya wi awuupe.
5, 6. Omuroromela wahu Yehova ntoko Mulipa-awuupa ahu enahaala ovolowela hai moonelo ahu vooloca sa (a) achu a ekulucu ahu? (b) anna ni arokora ahu?
5 Ninnaroromela wi Yehova onnawerya waathanla ni owiichana achu oophwanelela. Ti nthowa nene nihinaphwanelaahu waathoriha achu mu ekulucu ni mmulokoni mwahu. Moone yootakiherya ya mulopwana oniichaniwa Mikeeli enreiye vaavaa Anamoona a Yehova yaamusekunryaaya. Owo ooloca: “Kaarukunuwa nave waakhala wi awo hiyaari vaava. Kaatepa onyeenyeya! Ohoolo waya, va nipuro nikina, kaasuwela emusi yeeyo yaakitikhiniha nthowa na meecelo aya. Nihiku nimoha yaaphiya achu owaani—awo yaari Anamoona a Yehova! Meerelo aya yaakeeriha waalikhela nthalu naka. Moohilekela kaasuwela wi moonelo aka waari nthowa na ohisuwela ichu seeparipari.” Mikeeli aanachuna ohuserya sincipale nave aaheemererya yoohuserya ya Piipiliya. Ohoolo waya aapatisiwa nave voocharela aakhala mulaleeryi a elukuluku yoothene.
6 Wakhala wi ninnamweemererya Yehova ntoko Mulipa-awuupa ahu, moonelo ahu vooloca sa anna ni arokora onahaala otorokeya. Nnahaala woona wiilipiherya wa muchu ti muchu. Ti hiiha Yehova onawooneleiye. Owo chiryene onnoona omuchu aya wa mpuwa nave oosuwela wi ohiphaameya waya ti wa elukuluku yavakhaani. Oosuwela muchu a mukhalelo taani mmoha ti mmoha onahaaleiye okhala. (Salumu 130:3) Nnammutakiherya Yehova wakhala wi nookhalano moonelo woophwanelela vooloca sa annihu. Nnaphwanela olapa vamoha ni Mulipa-awuupa ahu wi naakhaviherye anna ni arokora oya vahoolo. (1 Tesalónika 5:14, 15) Atokweene mmulokoni anaphwanela ovaha yootakiherya yaphaama mu weerano yeela.—Éfeso 4:8, 11-13.
NTAKHARA HEENI YEHOVA ONNANUUPA?
7. Ntakhara heeni munnacicimiha olaka wa Yehova?
7 Achu akina ananwerya oloca: ‘Nkintonko ocicimiherya olaka kaakhelaka ni asitiithi aka ophiyerya okhalano anamwane.’ Elukuluku nnunnuwaahu, ninnacicimiherya olaka woona wi noosuwela wi yawooniherya ya osivela. (Mwaalakhanye Ahebri 12:5, 6, 11.) Chiryene, Yehova onnanisivela ntoko anamwane awe, ti nthowa neni onanlakeiye moopisa murima, naari onanuupeiye. Onachuna wi nikhale amiruku, oohakalala ni omusivela owo ntoko Tiithi ahu. (Masiposipo 23:15) Hanachuna onoona nihooxeyaka, nave tho hanachuna wi nikhwe nthowa na ohicharuwa soocheka.—Éfeso 2:2, 3.
8, 9. Tiheeni Yehova onanihusiheiye, nave mahusiheryo yaala anahaala otitelela hai omwaahiyu?
8 Nihaakumve omusuwela Yehova naakhalano mikhalelo soonanara. Nyenya Yehova oonuupa nave oonikhaviherya opaka matorokelo. Ntoko yookhumelela, vano nookhalano mikhalelo saphaama. (Isaiya 11:6-8; Kolosi 3:9, 10) Nnakhala mu parataiso oomunepani. Ola mukhalelo wavameekhaaya Yehova onapakeiye mmahiku ahu yoowo onamukhaviherya onuupa. Muumu, ninnakhala ookhapeleleya naamwi nikhalaka mu elapo yeela yoonanara. Yaawo annunwe ehirino osivela wa emusi aya, vano annoona osivela weeparipari wa anna ni arokora aya mu parataiso oomunepani. (Yohani 13:35) Nave noohuserya waasivela akina. Echu yookhweleyaxa, noomusuwela Yehova nave vano ninnapuha osivela wawe weeparipari.—Tiyako 4:8.
9 Mu elapo ya hiihaano, nnahaala ompuha parataiso oomunepani. Nnahaala opuha tho okumi mparataiso awooneya yoowo onahaala olamuleliwaka ni Omwene wa Muluku. Elukuluku yeeyo, Yehova onahaala otitelela onuupa ni onihusiha mmukhalelo nihinaanyiheryaahu. (Isaiya 11:9) Yehova tho onahaala weeriha wi mwiili ni muupuwelo ahu sikhale soophaameya. Mmukhalelo yoowo onahaala okhala wookhweya wa hiyo wiiwexexa ni wiiwelela mahusiheryo awe. Hankooni ntitelele omweemererya Yehova wi anuupe nave nooniherye wi ninnavaha esisapo onisivela wawe.—Masiposipo 3:11, 12.
YEHOVA ONANUUPA HAI?
10. Yesu oonihenrye hai ovilela ni mavyakelo a Mulipa-awuupa Mutokotoko?
10 Moolikana ni mulipa-awuupa orino mavyakelo osuwenle oloko wa mukhalelo taani onuupeiye, Mulipa-awuupa ahu, Yehova, oonisuwela phaama. Owo oosuwela sooceecheya sahu, okotakota ni owetha nnapakaahu, nave onnamuupa mmoha ti mmoha uupuwelaka mikhalelo seiyo. (Mwaalakhanya Salumu 103:10-14.) Ninnahuserya mukhalelo Yehova onanooneiye moorweela wa mukhalelo Yesu ooneiye ohiphaameya wa oohuserya awe. Mu ilukuluku ikina, oohuserya yaanaakhulana vooloca sa taani aari mutokweene. Waakhanle wi mwaari weiwo, mwaahaala woona hai meecelo a oohuserya? Mwaahaala woona wi hiyaari ntoko oloko wa woolowa. Yesu, aasuwela wi awo yaahaala wuupeya waakhala wi aawiriyana ekano awe yaphaama ni otakiherya wiiyeviha wawe. (Marko 9:33-37; 10:37, 41-45; Luka 22:24-27) Yesu amanle oviihiwa mookhwani, oohuserya yaahaakhela munepa waweela nave hiyaateteiwa vooloca sa taani aari mutokweene. Opwaha yeeyo, yaahiivoliiherya muteko Yesu aavanheiye.—Saweriwa T’arummwa 5:42.
11. Mmikhalelo taani Tavite aareiye ntoko oloko wa woolowa, nave nnii nimutakiherye hai?
11 Olelo, Yehova onnampharihela Piipiliya, munepa waweela ni muloko wi anuupe. Mano, Piipiliya onanuupa hai? Nnaphwanela omwaalakhanya, wuupuwelela yeeyo naalakhannyaahu, ni omveka Yehova wi anikhaviherye opharihela yeeyo nihusenryaahu. Mwene Tavite aarepa: “Vanlini vaka kinnawupuwelani, kinnawupuwelani mwa irilo sa ohiyu.” (Salumu 63:7) Owo tho aarepa: “kinnàthamala Apwiya akivan’he miruku; ohiyu murimaka onnakihusiha.” (Salumu 16:7) Chiryene, Tavite aanuupuwelela ekano ya Yehova nave eyo yaahuupa mwawiiseela muupuwelo ni moonelo awe, naamwi ekano yaari yoovila weemererya. (2 Samuwele 12:1-13) Tavite oonivaha yootakiherya yaphaama ya wiiyeviha ni wiiwelela. Mwawiihiiha mwiikohe: ‘Vaavaa kinamwaalakhanyaka Piipiliya, kinnuupuwelela mwa yeeyo kinaalakhanyaaka ni weemererya ekano ya Muluku wi etannye muupuwelo ni moonelo aka mwawiiseela? Kinii keereno hai eyo vancipale?’—Salumu 1:2, 3.
12, 13. Yehova onanuupa hai moorweela wa munepa waweela ni muloko Weekiristu?
12 Munepa waweela onanwerya onuupa mmikhalelo soohiyanahiyana. Ntoko yootakiherya, munepa onanwerya onikhaviherya ohuserya otakiherya omuchu wa Yesu, ni wooniherya mikhalelo soohiyanahiyana sa sawiima sa munepa. (Galasya 5:22, 23) Mukhalelo mmoha wa yawiima ya munepa ti okhwela naari osivela. Ninnamusivela Muluku nave ninnachuna omwiiwelela ni wuupiwa ni yoowo woona wi noosuwela wi malamulo awe tamphurelo wa hiyo. Mwawaacererya, munepa waweela onamunivaha ikuru wi nsepe otekiwa ni elapo yeela yoonanara. (Éfeso 2:2) Murummwa Paulo vaavaa aareiye mmiravo, owo aavoloweliwa ni wiirumiha wa ahooleli a malapelo a Ayuuta. Nyenya munepa waweela waamukhaviherya opaka matorokelo. Ohoolo waya aarepa: “Kinnawerya itxhu sothene mwa yowo onakilipiha.” (Filipi 4:13) Hiyaano tho nnaphwanela oveka munepa waweela, nsuwelaka wi Yehova onahaala waakhula mavekelo ahu.—Salumu 10:17.
13 Yehova onnapharihela muloko ni atokweene wi amuupe mmoha ti mmoha a hiyo. Ntoko yootakiherya, wakhala wi atokweene ahoona wi nookhalano sooceecheya, anneererya onicharusa. Nyenya hanavaha ekano enathipeleya mmoonelo aya. (Galasya 6:1) Opwaha yeeyo, mwawiiyeviha annamveka Yehova wiiwexexa ni miruku. Voocharela annapaka otholathola empharihelaka Piipiliya ni soolaleeryiwa Seekiristu wi ephwanye malakiheryo anahaala onikhaviherya. Wakhala wi atokweene aarwa wa nyuwo nave yoovahaani ekano mweepewe ni moosivela, akhweya vooloca sa mawarelo anyu, muupuwele wi ekano eyo yawooniherya ya osivela wa Muluku ntakhara nyuwo. Vaavaa munapharihelaanyu ekano, munahaala okhala ntoko oloko wa woolowa yoowo Yehova onaweryeiye wuupa, nave munahaala ophura.
14. Naamwi arino owerya wa onuupa, Yehova onooniherya hai ncicimiho na othanla wahu woochuna?
14 Wakhala wi ninniiwexexa mukhalelo Yehova onanuupeiye, eyo enahaala onikhaviherya okhalano onthamwene waphaama ni anna ni arokora ahu. Nave tho, enahaala onikhaviherya okhalano moonelo waphaama vooloca sa achu a ekulucu ahu, ophitaanyerya oohuserya ahu a Piipiliya. Khalai, mulipa-awuupa ahaakumve wuupa oloko, aaphwanela orehererya ni oviihavo maluku ni ikokhola. Mulipa-awuupa, Yehova, onnaakhaviherya achu anachuna wuupiwa. Owo hanaakhinyererya, nyenya onnawooniherya malakiheryo awe aphaama. Voocharela awo anaphwanela olakelela yeeyo anahaalaaya weera wi epake matorokelo.
15, 16. Oohuserya a Piipiliya anooniherya hai wi annachuna wi Yehova awuupe? Mooniherye.
15 Muthokororye yeeyo yeeren’ye ni murokora Tessie o Australiya. Waari wookhweya wa yoowo ohuserya yeeyo Piipiliya onaloceiye. Nyenya haaya vahoolo, nave haaphiya mmithukumano. Murokora aamuhusiha aavekela vancipale wa Yehova nave aalakelela ohiya yoohuserya. Voocharela yaaheereya echu yootikhiniha. Ehuseryaka, Tessie aamuleela murokora ntakhara heeni haaya vahoolo. Tessie aaloca wi iisoona ntoko nawoothe nthowa nawi aanasuwela wi ichu eereiye saari soonanara. Nyenya olelo owo oolakelela ohiya ichu eereiye.
16 Moohilekela, Tessie aapacerya ophiya mmithukumano ni wooniherya mikhalelo Seekiristu naamwi asinthamwene awe akhalai emunyemulaka. Voocharela aapatisiwa nave aakhala piyoneero a elukuluku yoothene, naamwi aarino mwaana. Ti yawooneya wi oohuserya a Piipiliya yapacerya opaka matorokelo wi emuhakalalihe Muluku, owo onnawaacamela nave onnawuupa ntoko ipiya sa esisapo.
17. (a) Munoona hai okhalano Yehova ntoko Mulipa-awuupa anyu? (b) Mukhalelo taani wa wuupa nnahaalaahu othokororya?
17 Olelo, alipa-awuupa akina annuupa oloko ni mata mweephoole okhala ipiya saphaama. Moolikana, Yehova onnanuupa moopisa murima apharihelaka ekano awe, nave onnanivarerya wi oone mukhalelo nnaakhulelaahu. (Mwaalakhanye Salumu 32:8.) Apwanne munnoona wi Yehova onnoothokororyaani? Munnoona mukhalelo Yehova onawuupeiyeeni moopisa murima? Wakhala wi ti hiiha, mikhalelo taani inahaala wookhaviheryaani okhala oloko wawoolowa yoowo Yehova onaweryeiye wuupa? Meerelo taani munaphwanelaanyu osepa wi muhikhale ntoko oloko woolipa ohinaweryeya wuupiwa? Nave ti mwawiihai asitiithi eneeraaya elape vamoha ni Yehova wi ewuupe anamwane aya. Mwaha onacharela onahaala waakhula makoho yaala.
[Yooleeliherya va epaaxina 4]
Ti nthowa neni nihinaphwanelaahu waathoriha achu mu ekulucu naari mmulokoni mwahu
[Yooleeliherya va epaaxina 5]
Chiryene, Yehova onnanisivela ntoko anamwane awe, ti nthowa neni onanlakeiye naari onuupa moopisa murima
[Ekaaxa va epaaxina 8]
MASU ATHARIHIWE
Yehova onnanuupa ampharihelaka Piipiliya, munepa waweela, ni muloko awe. Onnanikhaviherya opaka matorokelo wi niwerye okhala achu aphaama