Yesu Onnaathoriha Afarisi

Moorweela wa okhooca wi Yesu onakumiha masololo ni owerya wa Muluku, alipa oorepa ni Afarisi ari va yawoopiha mu onyemula munepa waweela. Vanonto awo ari makupa taani—a Muluku naari a Satana? Yesu onnaloca: “Muni mwiri ti waphama, ni sawima saya saphama; muni mwiri ti wonanara ni sawima saya sonanara, wona wi ti sawima inasuweliha miri.”—Mateu 12:33.

Echu yoolosowa oloca wi yawiima yaphaama ya okumiha masololo yookhumelela enarweela nthowa na Yesu omurumeela Satana. Ntoko Yesu aalonceiye va Mwaha wa Vamwaakoni, wakhala wi yawiima ti yaphaama, mwireene ti waphaama, ohiya woonanara. Vanonto, yawiima ya Afarisi, omuthoriha waya Yesu, enooniherya eheeni? Enooniherya wi awo toonanara. Yesu onnaaleela: “Nloko na ivili, munawerya hai olotxa itxhu saphama, muri atxhu ònanara murima? Wona wi eyano enalotxa itxhu seiye isaren’ye mmurimani.”—Mateu 7:16, 17; 12:34.

Chiryene, masu ahu annooniherya ichu iri mmurimani mwahu nave annavahererya mathipelo a othoriha. Mwawiihiiha, Yesu onnaloca: “Miyo kinnolèlani wi: nihiku nothoriha atxhu anamuthorihiwa wa nthowa na masu othene apure. Wona wi we onanvulusiwa nari onamurimela wa nthowa na masu-à.”—Mateu 12:36, 37.

Moohipwacha miteko soowerya Yesu onapakeiye, alipa oorepa ni Afarisi nlelo annamwaakaaha: “Muhusiha, erà etxhu yotikiniha: none!” Waakhanle wi ahintoko omoona apakaka sootikhiniha naari hooye, ahaacavo achu aneerela onamoona yeeyo onapakeiye. Mwawiihiiha Yesu onnaaleela ahooleli Ayuta: “Nloko nla nonanara murima ni noraruwa nnaveka yotikiniha, nto hinnavahiwa ntikhinelo nimoharu, nihiri nenle na mulipa a miririmu Yona.”—Mateu 12:38, 39.

Yesu hanaweherya wi emukohe vooloca sa yeeyo aachuneiye oloca: “Vawi ntoko Yona akhanleiye mmirimani mwa ehopa etokotoko mahiku mararu ni ohiyu ene, hiha Mwana a mutxhu onamukhala vathi va etxhaya mahiku mararu ni ohiyu ene.” Yona aamiryiwe ni ehopa etokotoko nyenya akhumamo ntoko wi aarimukhwa. Mwawiihiiha Yesu onaloherya wi yoowo ene onahaala okhwa nave mu nihiku naneeraru aviihiwe mookhwani. Vaavaa ohoolo waya eyo eneereyaaya, ahooleli a Ayuta annakhooca “ntikhinelo . . . na mulipa a miririmu Yona,” ekhocaka ocharuwa ni otorokeya. (Mateu 27:63-66; 28:12-15) Moohiyana, “atxhu o Nínive” yaahicharuwa Yona amanle waalaleerya. Mwawiihiiha awo anamuthoriha nloko nenla. Yesu olonce wi moorweela wa yootakiherya awe, mwene amwaamuthiyana o Saba onahaalatho waathoriha. Owo aahichuna wiiwa miruku sa Solomoni nave aahitikhiniheya ni seiyo. Vano Yesu onnaloca, “vava òkhalavo mutokwene ompwaha Salomau.”—Mateu 12:40-42.

Yesu onalikanyiha mukhalelo wa nloko nla noonanara ni mulopwana yoowo onakhumamo munepa woonanara. (Mateu 12:45) Woona wi mulopwana hanasarihavo muupuwelo awe ni ichu saphaama, munepa woonanara onnakooka ni minepa mithanu napiili soonanaraxa opwaha yoole aareiyeno nave iho sinnamuhoosa. Moolikana, nloko na Aisarayeli naaheelihiwa nave nrehereryiwa—nnalikana ni mulopwana yoowo okhummemo munepa woonanara. Nyenya nloko naahaakhooca alipa miririmu a Muluku, ephitaanyeryaka omwiica yoowo mookwakwaleya aarino munepa wa Muluku, Yesu. Ela enooniherya wi mukhalelo wa nloko waari woonanaraxa opwaha omapacereryo waya.

Vaavaa Yesu onaloceiye, amamaawe ni asinnawe annaphiya nave anneemela vaate. Akina amwaacamenle annamuleela: “Amai-à ni asinna-à ari vate, annakhwela owona.” Yesu onnooniherya ophiyerya mweeryo taani aatanneiye ni oohuserya awe, yaawo yaakhala ntoko asinna arokora ni amamaawe. Awookolelaka oohuserya awe moono, owo onnaloca: “Amai ni asinnaka t’ale aniwa nsu na Muluku ni enerano.” (Luka 8:20, 21) Owo onnooniherya wi moohipwacha waataana orivovo ni amusi awe, onthamwene awe ni oohuserya awe ti wasisapo. Chiryene ti yoolipiha wa hiyo okhalano onthamwene si yoola ni annihu oomunepani, xaxaxa wakhala wi akina annanikhwa minikwa naari ovaanya miteko sahu saphaama!