Ohakalala Ni Mulipa Oocheka Orukununse Murima

Moovira wa ilukuluku variyari va muteko awe woolaleerya, Yesu aahicicimiherya okhweleya waya wiiyeviha. (Luka 14:8-11) Owo aahikhalano nchuno na waaphwanya alopwana ni athiyana yaawo yaachuna omurumeela Muluku mwawiiyeviha. Ophiyerya vano, akina a yaawo anakhala wi anamacheka oosuweliwa.

Afarisi ni alipa oorepa annoona wi achu yaawo anawoonaaya okhala oohiphwanelela annamweemererya Yesu vamoha ni michaka sawe. Awo annaloca: “Yola onnawakhela alipa òtxheka ni onnalya ni yawo.” (Luka 15:2) Afarisi ni alipa oorepa aniisoona okhala oophwanelela nave anaakhaliha akina ntoko nchupi nri vathi va inaani saya. Yooniheryaka munyemu vooloca sa achu yaawo, ahooleli annapharihela nsu na Ehepri ‛am ha·’aʹrets, “achu a veelaponi” yaaromolaka yaawo.

Moohiyana, Yesu onnaakhaliha oothene mwancicimiho, epewe, ni oreera murima. Ancipale a wiiyeviha, ophitaanyerya yaawo asuweliwe ntoko anamacheka, annachuna owiriyana sa Yesu. Vano moonelo taani Yesu oreiyeno vooloca sa waakaaha oneereliweiye nthowa na waakhaviherya achu yaawo awiiyeviha?

Naakhulo ti nookwakwaleya vaavaa onaperekheiye niphwanaphwaniho, noolikana ni nenle olonceiye o Kafarnau. (Mateu 18:12-14) Yesu onaloca ichu ntoko wi Afarisi tawookololowa ni ookhapeleleya mmatani mwa Muluku. Moohiyana, achu awiiyeviha analociwa ntoko yaawo aahuwenle nave ahanle vakhaani orimeela. Yesu onnaloca:

“Tani wa nyuwo oni arino iputxeputxhe nsana ni, emurimela emoha, ahihiya iha makhumi mathanu na masese ni iputxeputxhe thanu na sese otakhwani, wi asye yele erimenle ophiyerya wona? Ni aphwanyà, annakuha vetxhuri ahakalanle, ni arowano, onnawitxhana akhwawe ni awatxamana ariki: ‘Muhakalale ni miyo. ntakhara kìhona eputxeputxhe aka yarimenle.’”—Luka 15:4-6.

Ophariheleya taani Yesu onapakeiye? Owo onnathariha: “kinnolèlani, wirimu onamukhalawo ohakalala wa mulipa òtxheka mmoha orukununse murima awe, wahiya atxhu makhumi mathanu na masese ni atxhu athanu nasese ari aphama.”—Luka 15:7.

Yesu oloca wawe orukunusa murima akhweya yohaavolowela Afarisi. Awo aniiserya okhala awookololowa nave anoona wi hanachuna orukunusa murima. Vaavaa akina yaamwaakanhaaya Yesu iyaakha muculi nthowa na olya ni alipa a musokho ni alipa oocheka, owo aahiloca: “Miyo nkarwele owitxhana atxhu aphama, nto alipa òtxheka.” (Marko 2:15-17) Afarisi yaawo aniiseera okhala awookololowa annahesa ohoona okhweleya wa orukunuwa, mwawiihiiha awo hanaruuha ohakalala wirimu. Eyo enakhala yoohiyana vaavaa mulipa oocheka onarukunuseiye murima mweeparipari.

Aceenyeryaka mwaha yoola wi orukunuwa wa mulipa oocheka ennaruuha ohakalala otokweene wirimu, Yesu onnaperekha niphwanaphwaniho nikina, vooloca sa empa ya emusi: “Muthiyana tani ori akhalano ikhorowa makhumi meli, ni erimelà ekhorowa emoha, ahipariha muthiko ni avelamo mpa wi one ekhorowa awe? Atxotxà, onnawitxhana athiyana akhwawe ni ale atxamanneiyeno ariki: ‘Muhakalale ni miyo, ntakhara kìhona ekhorowa aka yarimenle.’”—Luka 15:8, 9.

Ophariheleya Yesu onapakeiye onalikana ni yoole opankeiye amanle oloca niphwanaphwaniho na epucepuche yoorimeela. Vano owo oni: “Hihatho kinnolèlani: onamukhalawo ohakalala ni ankelo a Muluku wa nthowa na mulipa otxheka ònarukunusa murima awe.”—Luka 15:10.

Nkuupuwelani, ankeelo a Muluku annatepa ohakalala ni orukunuwa wa namacheka aarimenle! Ela xaxaxa ti yoophwanelela woona wi namacheka yoowo onarukunusa murima nave akhalano nipuro mu Omwene wa wirimu wa Muluku onahaala okhalano nipuro noocicimiheya opwaha nenlo ankeelo aryaayano! (1 Korinto 6:2, 3) Nyenya ankeelo haanono nrima. Vano, nnaphwanela woona hai vaavaa namacheka onamukookeleiye Muluku arukununse murima mwawaakhwanela?