Muupuwelele Osivela Otokweene wa Yehova

“Nave kinanyiherya muteko anyu wothene.”​—SALMO 77:12.

MACIPO: 18, 61

MWAAHAALA WAAKHULA HAI?

Vooloca sa osivela wa Yehova, tiheeni nnaphwanelaahu ororomela?

Ntakhara heeni nnanwerya oloca wi Yehova ookhalano osivela otokweene wa achu awe?

Nnaphwanela waakhulela hai osivela wa Muluku?

1, 2. (a) Ntakhara heeni moolekecheya wi Yehova onnaasivela achu awe? (b) Nchuno taani achu oothene aryaayano?

NTAKHARA heeni moolekecheya wi Yehova onnaasivela achu awe? Muhaakumve waakhula nikoho nenla, muthokororye sootakiherya iha: Mu iyaakha sincipale, anna ni arokora yaanamuceenyerya murokora Taylene okhala oophimelela ni ohiweherya sincipale wa yoowo meekheiye. Owo onnaloca: “Waakhanle wi Yehova hanakisivela, owo hi akivahe ikano sawe mwawuuluulela.” Prixite, yoowo aaphunwe meekheiye anamwane apiili onnaloca: “Waaphuwa anamwane mu elapo ya Satana echu yoovila, xaxaxa wa muchu ori meekheiye. Nyenya koolekecheya wi Yehova onnakisivela ntakhara onnakihoolela mu sawuukhula, nave haneemererya wi kikhaleno makacamiho kihinahaalaaka owerya ovilela.” (1 Akor. 10:13) Santra onnahooxeya ni ereca etokweene. Mmuthukumano wa muceche, aasiveliwa ni opwacha wa murokora mmoha mwaara a munna oosuweliwa. Santra iyawe onnaloca: “Naamwi nahaamusuwenle murokora ole, opwacha wawe waahakalaliha mirima sahu. Meerelo vakhaani a osivela oorweela wa anna ni arokora annooniherya wi Yehova onnanisivela vancipale.”

² Achu apatuxiwe ni nchuno na wooniherya osivela naari opuha osivela wa akina. Ti wookhweya okhala ookhulumuwa wakhala wi yoochuna ela hekhwaaniheryiwe nthowa na echu yoohiwehereryeya, ntoko ereca, orama wa ikhorowa naari oyeleela ohakalala mu orummwa. Wakhala wi noopacerya woona wi Yehova hananisivela, ti yaphaama wuupuwelela wi nookhalano esisapo vamiithoni vawe, nave wi onahaala opharela moono ahu ni onikhaviherya. Owo harwa anicuwala wakhala wi nri oororomeleya wa yoowo.​—Yes. 41:13; 49:15.

3. Tiheeni enahaala onikhaviherya olipiha olekecheya wahu wawi Yehova ookhalano osivela otokweene ntakhara hiyo?

³ Achu yaala aromoliwe yaanaroromela wi Muluku aari ni yaawo mu ilukuluku sa wuukhuwa. Hiyaano tho nnanwerya olekecheya wi Owo ori ni hiyo. (Sal. 118:6, 7) Mwaha ola onnathokororya ti mwawiihai osivela wa Muluku onooneyaaya orweela mu (1) soopatuxiwa, (2) Masu awe ooveereliwa, (3) nivekelo ni (4) moorweela wa woopola. Wuupuwelela ichu saphaama Muluku onapakeiye enahaala waaceererya othamalela wahu ntakhara osivela wawe otokweene.​—Mwaalakhanye Salmo 77:11, 12.

MUUPUWELELE SOOPATUXA SA YEHOVA

4. Soopatuxa sa Yehova sinooniherya eheeni?

⁴ Apwanne nnanwerya woona osivela wa Yehova orweela wa ichu opatunxeiye? Aai, ntakhara opatuxa yawooniherya emoha ya osivela wa Muluku. (Arom. 1:20) Owo oopatuxa elapo ya vathi mmukhalelo oneeriha wi okhale wooweryeya okhalano okumi. Nyenya wi ntitelele okhalano okumi onachuneya olya. Yehova oheeriha wi elapo ya vathi ekhaleno miri soohiyana hiyana seiyo inavaha yoolya yaphaama. Nthowa na yeeyo, oheeriha wi olya okhale woohakalaliha! (Ekle. 9:7) Murokora mmoha awiichaniwa Katarina onnahakalala moorweela wa waalikhela soopatuxa, xaxaxa mweelukuluku ya nakhutu o Kanata. Owo onnaloca: “Ti wootikhiniha mukhalelo ichu inaphacuwaaya​—ithutu seiyo inamela mweelukuluku aya ni ipalame sinapaka mukwaha okookela ilapo saya, ophitaanyerya ephera yeeyo enaphwanya yoolya aya opithela wa mucheko aka. Ohakalala Yehova onanivaheiye onnooniherya wi onnanisivela chiryene.” Tiithi ahu oosivela a wirimu onnahakalala ni soopatuxa sawe, nave owo onachuna tho wi nipuhe.​—Saw. 14:16, 17.

5. Osivela wa Yehova onooneya hai mmukhalelo aapatunxeiye achu?

⁵ Yehova onipatunxe ni mavyakelo a weerano miteko saphaama seiyo inahakalaliha okumi ahu. (Ekle. 2:24) Muluku aachuna wi achu esareye veelaponi ya vathi, ekhapeleleke elapo, ihopa, ipalame ni soopatuxa ikina irino okumi. (Map. 1:26-28) Nave Yehova ohooniherya osivela moorweela wa onivaha mikhalelo inanikhaviherya omutakiherya!​—Aef. 5:1.

MUCICIMIHE MASU OOVEERELIWA A MULUKU

6. Ntakhara heeni nnaphwanelaahu ocicimiha Masu a Muluku?

⁶ Muluku ohooniherya osivela otokweene orweela wa onivaha Masu awe ooveereliwa. Piipiliya onnanikhaviherya omusuwela ni ohuserya waakhaliha wawe achu. Ntoko yootakiherya, Soorepa sinnanooniherya waakhaliha wawe Aisarayeli, yaawo yaamuchekela wiiliwiili. Salmo 78:38 onii: “Nyenya Yowo oríye aikharari, Áleva yonanara, ahátolosha; Alapelela esara awe wili wili; Nave hávíhale oshimwa wawe.” Wuupuwelela yoorepa yeela enahaala wookhaviheryaani osuwela wi Yehova onnoosivela ni wookhapelelaani. Suwelani wi mookhalano esisapo wa Yehova.​—Mwaalakhanye 1 Petro 5:6, 7.

7. Ntakhara heeni nnaphwanelaahu omvaha Piipiliya esisapo etokweene?

⁷ Nnaphwanela omvaha Piipiliya esisapo etokweene ntakhara Muluku onaloca ni hiyo moorweela wa Piipiliya. Olocihana waphaama variyari va asitiithi ni anamwane ti woochuneya wi okhalevo ororomelana ni osivelana mukina ni mukhwaawe. Hanka vooloca sa Yehova? Naamwi nihitonko omoona naari wiiwa nsu nawe, owo “onnaloca” ni hiyo moorweela wa Masu awe ooveereliwa, nave nnaphwanela owiriyana. (Yes. 30:20, 21) Yehova onnachuna onihoolela ntoko achu awe ni onaakiha mu sawoopiha. Owo tho onachuna wi nimusuwele nave nimuroromele.​—Mwaalakhanye Salmo 19:7-11; Masiposipo 1:33.

8, 9. Tiheeni Yehova onachuneiye wi nsuwele? Mooniherye ni yootakiherya ya Mpiipiliya.

⁸ Yehova onachuna wi nimusuwele ntoko muchu onanisivela ni ohinateteiwa ni soohesa sahu. Owo onaavya yeeyo eri yaphaama mwa hiyo. (2 Math. 16:9) Wi nooniherye, muthokororye yaweereya ya Mwene Yosafati a Yuteya. Mweelukuluku ekina, Yosafati aaheemererya omuhoola Mwene Akape mu ekhoco wi amoopole Ramoti-kileyati mmatani mwa Asiiriya. Alipa a miririmu oowoka 400 yaamuroromeliha Akape wi aahaala okhumelela phaama, nyenya mulipa a miririmu eeparipari a Yehova Mikeya aaloherya wi aahaala ovoothiwa. Akapi aakhwa mu ekhoco, nave Yosafati aakophola. Vaavaa aachikenleiye o Yerusalemu, owo aahuuliheya muru nthowa na omukhaviherya Akape. Naamwi hiiha, Yehu, mwaana a Hanani, aamuleela Yosafati: “Apwiya ahèma itxhu ikina saphama werawe.”​—2 Math. 18:4, 5, 18-22, 33, 34; 19:1-3, BNM.

⁹ Omapacereryo wa olamulelo awe, Yosafati aalamulela wi mamwene, Aleevi ni anamukucho yeece orukurerya epooma ya Yuteya yaahusihaka achu malamulo a Yehova. Muteko owo waakumiherya mphurelo ophiyerya wi achu a maloko makina yaapacerya omoova Yehova. (2 Math. 17:3-10) Aai, Yosafati aaheera echu moolosowa, nyenya Yehova aanoona ichu saphaama owo aapankeiye. Yaweereya yeela ya Piipiliya ennanihusiha wi moohipwacha ohiphaameya wahu, Yehova onahaala otitela okhalano osivela otokweene wa hiyo wakhala wi ninniilipixerya omuhakalaliha ni murima woothene.

MUCICIMIHE EKARI YA NIVEKELO

10, 11. (a) Ntakhara heeni nivekelo yoovaha yasisapo ya Yehova? (b) Muluku onaakhula hai mavekelo ahu? (Moone eruku yoopacerya.)

¹⁰ Tiithi oosivela onniivaha elukuluku wi aawiriyane anamwane awe vaavaa anachunaaya oloca ni yoowo. Owo onnaavya osuwela yeeyo enawuukhula ntakhara onnathokororya yeeyo eri mmuupuweloni mwaya. Tiithi ahu a wirimu, Yehova onnaniwiriyana vaavaa nnamwaacamelaahu moorweela wa nivekelo.

¹¹ Nnanwerya omwaacamela Yehova mu elukuluku vyakala. Owo hatikithenrye mphimo wa hiyo. Yehova nthamwene ahu yoowo ori ooreheryeya oniwiriyana. Taylene, oromoliwe woopaceryani oriye: “Nyuwaano munanwerya oloca echu vyakala naari ichu soothene.” Vaavaa nnamuleelaahu Muluku muupuwelo ahu wawiiseela mu nivekelo, onahaala waakhula mavekelo ahu moorweela wa makupa a Mpiipiliyani, miyaha sa erevista ahu naari moorweela wa masu oolipiha a anna. Yehova onnawiriyana oveka wahu nave onniiwexexa naamwi ahirivo muchu mukina onniiwexexa. Waakhula wawe mavekelo ahu yawooniherya yaphaamaxa ya osivela wawe otokweene ntakhara hiyo.

12. Ntakhara heeni ti woochuneya othokororya mavekelo arempwe mu Piipiliya? Mvahe yootakiherya.

¹² Ninnahuserya ichu sincipale orweela wa mavekelo arempwe mu Masu a Muluku. Vakina vaya onahaala okhala wa mphurelo waalikhela mavekelo yaawo va Malapelo a Echoko. Wuupuwelela mukhalelo alapeli akhalai a Yehova yaamuleenlaaya Muluku muupuwelo aya wawiiseela enahaala onikhaviherya oreeriha mavekelo ahu. Ntoko yootakiherya, muthokororye nivekelo Yona aapankeiye ari mmirimani mwa ehopa. (Yona 1:17–2:10) Muupuwele nivekelo na Soolomoni mu nihiku na ohuliwa empa ya Muluku. (1 Mam. 8:22-53) Mwaanyiherye nivekelo na ntakiheryo nenlo Yesu aahusinheiye. (Mat. 6:9-13) Opwaha soothene, haya moohihiyererya “hiho munavekanyu sisuweliwe ti Muluku.” Ntoko yookhumelela, “murechele wa Muluku wopwaha osuwelasha wothene, onarwa-okhapelela mirimányu ni sawupuwelela sanyu.” Othamalela wahu osivela otokweene wa Yehova onahaala waaceereryeya.​—Afil. 4:6, 7.

OTHAMALELA WOOPOLA

13. Yamahala ya woopola evanhe ekari taani?

¹³ Yamahala yoohiniphwanela ya mukucho wa Yesu waavahiwe “wi nikhale akumi.” (1 Yoh. 4:9) Alocaka sa yamahala yeela ya Muluku enooniherya osivela wawe, murummwa Paulo aarepa: “Kristu áhakhwela óhithamala. Ntakhara ni wukhuwa mutchu anamukhwela mukina ékhaikhai; ntakhara akhweya mukina anúmiha murima omukhwela mutchu aphama. Nyenya Muluku annanchichimiheryela hiyo osivela wawe wa mwanene mekhiye mummo, wi vokhala hiyo okhala wokhala ótcheka Kristu ánikhwela hiyo.” (Arom. 5:6-8) Yamahala ela yoohula ephiro wi achu yeemereryiwe ni Yehova.

14, 15. Woopola onahaala okumiherya eheeni wa (a) Akiristu awoocihiwa? (b) ale arino ewehereryo ya veelaponi ya vathi?

¹⁴ Achu awaalakhanyeya annoona osivela otokweene wa Yehova mmukhalelo wavameekhaaya. (Yoh. 1:12, 13; 3:5-7) Nthowa na okhala awoocihiwa ni munepa waweela, awo “ari anamwane a Muluku.” (Aro. 8:15, 16) Paulo aaloca wi Akiristu awoocihiwa ‘ánivíha vamoha, ni okilathiha vamoha mu sawirimu mwa Kristu Yesu.’ (Aef. 2:6) Awo aakhalano mukhalelo yoola woomunepani ntakhara ‘áheyeryiwa eneneryo ni Munepa Wawéla a nlakano’ eyo ti wi ‘oweheryerya wiwo alokololeliwaya wirimu.’​—Aef. 1:13, 14; Akol. 1:5.

¹⁵ Achu ancipale yaawo anaroromela woopola, aakhalano ekari ya okhala asinthamwene a Yehova ni ewehereryo ya okhala anamwane a Muluku ekhalaka mu Parataiso veelaponi ya vathi okhala wookhala. Mwawiihiiha, moorweela wa woopola, Yehova ohooniherya osivela wawe wa achu oothene. (Yoh. 3:16) Wakhala wi nnaweherya okhala veelaponi ya vathi ni omurumeela Yehova moororomeleya, nroromele wi owo onahaala weeriha wi okumi okhale woohakalaliha mu elapo ya hiihaano. Chiryene ti woophwanelela woona woopola ntoko yawooniherya ya osivela otokweene wa Muluku ntakhara hiyo!

WAAKHULELA OSIVELA WA YEHOVA

16. Wuupuwelela mikhalelo soohiyana hiyana Yehova onooniheryeiye osivela enakumiherya eheeni wa hiyo?

¹⁶ Nnanwerya waalakhanyerya sawooniherya sa osivela wa Yehova ntakhara hiyo. Namarepa a salmo Tavite aahiipa: “Kinera wi sawanyiherya sanyu ti sowalamela tchiri! Walakhanyerya waya hasikhweiye wacha! Kalakhanya sinnacha opwaha eháva.” (Sal. 139:17, 18) Nnaphwanela weemererya wi masu yaala yunnuwihe mpuwa mwahu nchuno na omusivela Yehova ni murima woothene naakhulelaka osivela wawe. Mu ichu soothene, haya nimvahe Muluku owetha wahu.

17, 18. Taavi ari makhalelo a wooniherya osivela wahu wa Muluku?

¹⁷ Aakhalavo makhalelo mancipale a wooniherya osivela wahu wa Yehova. Ntoko yootakiherya, ninnooniherya osivela wa Muluku ni wa mwaacamani moorweela wa okhaviherya muteko wa olaleerya Omwene mwa mvai. (Mat. 24:14; 28:19, 20) Ninnooniherya wi mweeparipari ninnamusivela Yehova moorweela wa ovilela saweeha. (Mwaalakhanye Salmo 84:11; Yakopo 1:2-5.) Wakhala wi makacamiho ahu annaaceereryeya, nroromele wi Muluku onnoona ohooxeya wahu nave onahaala onikhaviherya, woona wi nri asisapo vamiithoni vawe.​—Sal. 56:8.

¹⁸ Omusivela wahu Yehova onnaneeriha wuupuwelela mu soopatuxa sawe ni miteko mikina sootikhiniha. Ninnooniherya wi ninnamusivela vancipale Muluku ni Masu awe moorweela wa omuhuserya Piipiliya. Omusivela wahu Yehova onnanaacameliha wa yoowo mu nivekelo. Nave omusivela wahu Muluku onnannuwa vaavaa nnuupuwelelaahu mukucho wa woopola yoowo ovahiwe ntakhara soocheka sahu. (1 Yoh. 2:1, 2) Ala mathowa mamoha nryaahuno wi nimusivele Yehova naakhulelaka osivela wawe otokweene.