“Phoole, Ahikhalevo Anii Oophareeni”!

1. Mwawiiwanana ni Kolosi 2:4, 8, Satana oneererya hai ovolowela muupuwelo ahu?

SATANA onachuna wi nihiye omusivela Yehova. Wi aakhwaniherye yoolakelela awe, owo onneererya ovolowela muupuwelo ahu, achunaka wi nuupuweleke hiiha ntoko yene onuupuweleiye. Owo onneererya oniwoka wi nimuchariheke yene moorweela wa opharihela ichu seiyo nnachunaahu.—Mwaalakhanye Kolosi 2:4, 8.

2-3. (1) Ntakhara heeni nnaphwanelaahu othokororya olopola yoowo onaphwanyeya mu Kolosi 2:8? (2) Tiheeni nnahaalaahu othokororya mmwaha yoola?

² Apwanne chiryene nri va yawoopiha ya ohuwelihiwa ni Satana? Aai, nri va yawoopiha! Muupuwele wi, olopola yoowo ori va Kolosi 2:8 tahi wi Paulo aarepela achu oohiroromela. Owo aarepela Akristu yaawo yaari oothanliwa ni munepa waweela. (Kol. 1:2, 5) Akristu awo yaari va yawoopiha ya ohuwelihiwa ni Satana mu elukuluku yeele, navetho hiyotho olelo nri va yawoopiha etokotoko. (1 Kor. 10:12) Ntakhara heeni? Satana ooriheliwa veelaponi yavathi, nave ni esara awe onneererya waawoka alapeli oororomeleya a Muluku. (Wup. 12:9, 12, 17) Mu waaceererya, nnakhala mu elukuluku yeeyo achu oonanara murima ni oowoka ‘anaamutepaya onanara waya.’—2 Tim. 3:1, 13.

³ Mmwaha yoola nnahaala othokororya mukhalelo Satana onaphariheleiye “soowoka satheru” wi eererye ovolowela muupuwelo ahu. Nnahaala osuwela meerelo mararu a “ovyaka” wawe. (Éfe. 6:11) Nyenya mmwaha onacharela, nnahaala othokororya mukhalelo nneeraahu nikhooce ovolowela vyakala woonanara yoowo akhweya nryaahuno mmuupuweloni mwahu. Voopacerya, hankooni nthokororye yeeyo nnahaalaahu ohuserya moorweela wa mukhalelo Satana aawonkeiye Aisarayeli emanle ovolowa mu Elapo ya Nlakano.

SATANA AAHIWEERERYA AISARAYELI OLAPELA YOOPHWANIHERYA

4-6. Mwawiiwanana ni Malamulo 11:10-15, matorokelo taani a olima Aisarayeli yaaphwanelaaya opaka vaavaa yaavolonwaaya mu Elapo ya Nlakano?

⁴ Moovyaka Satana aahiweererya Aisarayeli olapelaka yoophwaniherya. Owo aaweerenrye mwawiihai? Satana aahisuwela wi Aisarayeli yaanachuna yoolya, mwawiihiiha owo aahipharihela yeeyo wi aweerihe opaka yeeyo owo aachuneiye. Vaavaa Aisarayeli yaavolonwaaya mu Elapo ya Nlakano, awo yaaphwanela ohuserya mukhalelo muvyaani wa olima. Elukuluku yaaryaaya o Yikuputu, Aisarayeli yaanaaniha imaca saya ni maahi yaarweela mmuhice Nilu. Nyenya, mu Elapo ya Nlakano mukhalelo wa onaaniha imaca hiwaarweela mmuhice mutokweene, nyenya mu epula naari mu nikami. (Mwaalakhanye Malamulo 11:10-15; Isa. 18:4, 5) Aisarayeli yaaphwanela ohuserya mikhalelo mivyaani sa olima. Eyo hiyaari yookhweya nthowa nawi makholo yaawo yaarino mavyakelo a olima yaahikhwa mutakhwani.

⁵ Yehova aahaatharihela achu awe wi mikhalelo saya saahaala otorokeya. Voocharela owo aahaaceererya olopola ola, yoowo wooneya wi honiiwanana ni muteko woolima: “Nto mwiivareryeke, muhihuwele wi munaalapa amuluku akina ni waakokhorela yaawo.” (Malam. 11:16, 17) Ntakhara heeni Yehova aahaalopola achu awe ntakhara waalapela amuluku atheru okhalaka wi aaleela vooloca sa ohuserya meerelo mavyaani a olima?

⁶ Yehova aahisuwela wi Aisarayeli yaahaala weereryiwa ohuserya meerelo makina a olima a elapo ele orweela wa achu yaawo yahaamulapela Yehova. Mweeparipari, amwaacamani aya yaahikhalano mavyakelo awaaca a olima waapwaha Aisarayeli, nave achu a Muluku yaanwerya ohuserya meerelo makina amphurelo orweela wa yaawo, nyenya eyo yaari yawoopiha. Muupuwelo wa anamalima o Kanani waahivoloweliwa mu omuroromela waya Pala. Awo yaamoona Pala ntoko mwaneene a erimu ni namavaha a epula. Yehova haachuna wi achu awe ehuwelihiwe ni soororomela sa mukhalelo yoole. Nyenya, vakhaani vakhaani, Aisarayeli yaahithanla omulapela Pala. (Nam. 25:3, 5; Amut. 2:13; 1 Mam. 18:18) Vano mohoona mukhalelo Satana aawenryeiye waapaka Aisarayeli okhala akapuro awe.

MIRAAKHO MIRARU SATANA AAPHARIHENLEIYE WI AISARAYELI EKHALE AKAPURO AWE

7. Yaweeha taani ya nroromelo Aisarayeli yaaphwannyaaya vaavaa yaavolonwaaya mu Elapo ya Nlakano?

⁷ Muraakho woopacerya yoowo Satana aapharihenleiye saari ichu soochuneya mookumini, ntoko woona elapo enaanihiwaka ni epula. Mu Elapo ya Nlakano eyaakha ti eyaakha yaarupa epula vakhaani opacerya mweeri wa Apirili ophiyerya mweeri wa Setempuru. Wa Aisarayeli, wi mmiso aya wunnuwe awo yaaroromela epula yeeyo wiiliwiili yaapacerya mu Otupuru. Satana ahaahuweliha Aisarayeli weemererya wi yaariki ekhumelele phaama, awo yaaphwanela ochariha meerelo a amwaacamani aya yahaamulapela Yehova. Amwaacamani aya yeemererya wi mikucho sammoori saari soochuneya wi yaavahe amuluku aya wi yaaruuhele epula yaachunaaya. Yaale yaayeleenle nroromelo mwa Yehova yaaneemererya wi owo waari mukhalelo mmoharu wa osepa elimwi yoorekama, mwawiihiiha awo yaanapaka meerelo a malapelo oowoka emucicimihaka muluku atheru Pala.

8. Muraakho taani wanawiili Satana aapharihenleiye? Mutharihe.

⁸ Satana aahipharihela muraakho wanawiili wi aawoke Aisarayeli. Owo aahipharihela nchuno na ocapaheya. Maloko yaawo yahaamulapela Yehova yaalapela amuluku aya moorweela wa opaka meerelo a ocapaheya. Mukhalelo yoowo wa ocapaheya waaphitaanyerya okonihana wa athiyana ni alopwana mu empa ya muluku aya. Okonihana wa achu oolikana mwiikho ni meerelo makina a ocapaheya tahi wi pahiru yaamutumeryiwa, nyenya yaari aweemereryeya wa yaawo! (Malam. 23:17, 18; 1 Mam. 14:24) Achu ale yeemererya wi mikucho iho saanaalipiha amuluku aya weeriha elapo okhala yawuucelana. Aisarayeli ancipale yaahichariha meerelo oocapaheya a malapelo yaawo nave yaaheemererya wiivoliiherya mu waalapela amuluku atheru. Mweeparipari, Satana aahaakeriha wookapuroni.

9. Mwawiiwanana ni Oseya 2:16, 17, Satana aahuwelinhe hai moonelo wa Aisarayeli vooloca sa Yehova?

⁹ Satana aahipharihela Muraakho waneeraru. Owo aahihuweliha moonelo wa Aisarayeli vooloca sa Yehova. Mu mahiku a mulipa miririmu Yeremiya, Yehova aahilokoha wi alipa a miririmu oowoka yaahaala waahuweliha achu Awe ni waacuwaliha nsina Nawe “nthowa na muluku Paala.” (Yer. 23:27) Mwawooneya achu a Muluku yaahiya opharihela nsina na Yehova nave eraceeliha ni nsina na Pala, nenlo nnataphulela “Mwaneene” naari “Pwiya.” Eyo yaaheeriha okhala woovila wa Aisarayeli osuwela ohiyana orivovo variyari va Yehova ni Pala, yeerihaka okhala wookhweya wa yaawo opweseherya mikucho sa malapelo a Pala ni omulapela Yehova.—Mwaalakhanye Oseya 2:16, 17.

MIRAAKHO SATANA ONAPHARIHELEIYE MUTEKO WI AAHUWELIHE ACHU OLELO

10. Miraakho taani Satana onaphariheleiye olelo?

¹⁰ Satana onnapharihela miraakho soolikana olelo. Owo onnaaphara achu moorweela wa opharihela ichu soochuneya mookumini, ovuwiha nchuno na ocapaheya, ni ohuweliha moonelo wa achu vooloca sa Yehova. Voopacerya, nnahaala othokororya mukhalelo Satana onaweeriheiye achu ocuwala moonelo wa Yehova.

11. Satana onahuweliha hai moonelo wa achu vooloca sa Yehova?

¹¹ Satana onnahuweliha moonelo wa achu vooloca sa Yehova. Arummwa a Yesu emanle okhwa, akina yaawo yaaloca wi yaari Akristu yaahipacerya omwaryamwasa mahusiheryo awootha. (Saw. 20:29, 30; 2 Tes. 2:3) Alipa oomwaryeya yaawo yaahipacerya ovitha osuwanyeya wa Muluku mmoharu eeparipari. Ntoko yootakiherya, awo yaahihiya opharihela nsina na Muluku, mu Apiipiliya aya nave yaahiraceeliha nlo ni nsu nawi “Apwiya” ni masu makina. Moorweela wa oviihamo Nsina na Muluku ni oraceeliha ni nsu nawi “Apwiya,” yaaheeriha okhala woovila wa alipa awaalakhanya osuwela ohiyana orivovo ni “asipwiya” akina yaawo anaromoliwa mu Soorempwa. (1 Kor. 8:5) Awo yaapharihela nsu nimoharu nenlo nawi “Apwiya” emwaahaka Yesu navetho Yehova, yeerihaka okhala woovila wiiwexexa ohiyana orivovo variyari va Yehova ni Mwanawe. (Yoh. 17:3) Waakanyerya wuuwu wookhaviherya waaceereryeya wa nihusiheryo nawi Amuluku araru mwa mmoha nenlo nihiniiwanana ni Masu a Muluku. Ntoko yookhumelela, ancipale anamoona Muluku ntoko a malavi nave aneemererya wi hinni niwerye omusuwela. Ola wootha chiryene!—Saw. 17:27.

12. Tiheeni malapelo atheru anavuwihaaya, nave ni yookhumelela taani, hiiha ntoko etharihiwaaya mu Aroma 1:28-31?

¹² Satana onnapharihela nchuno na ocapaheya. Mmahiku a Aisarayeli, Satana aahipharihela malapelo atheru wi avuwihe ocapaheya. Olelotho, owo onneerano emohamoha. Malapelo atheru annatumerya ni ovuwiha meecelo oocapaheya. Ntoko yookhumelela, ancipale yaawo analoca wi annamurumeela Muluku aahiya ochariha malakiheryo awe ookwakwaleya vooloca sa meecelo. Mu ekaarata awe wa Aroma murummwa Paulo ooloca yeeyo enakhala yookhumelela. (Mwaalakhanye Aroma 1:28-31.) Variyari va ichu “soohiphwanelela” aakhalavo makhalelo oothene a ocapaheya, ophitaanyerya okonihana wa achu oolikana mwiikho. (Aro. 1:24-27, 32; Wup. 2:20) Ti yoochuneya vancipale hiyaano ocharihaka malakiheryo ookwakwaleya a Piipiliya!

13. Muraakho taani mukina Satana onaphariheleiye?

¹³ Satana onnapharihela ichu soochuneya mookumini. Nookhalano nchuno nooyariwano na ohuserya mavyakelo yaawo anahaala onikhaviherya wiivakulela hiyo ni imusi sahu. (1 Tim. 5:8) Wiiliwiili, ninnawerya okhalano mavyakelo yaawo moorweela wa ohuserya osikola ni wiilipiserya. Nyenya nnaphwanela okhalano ekaasoope. Mikhalelo sa mahusiheryo mu ilapo sincipale tahi wi sinahusiha mavyakelo pahiru nyenya sinnahusiha miruku saachu. Anasikola annaceenyeryiwa ovaanya okhala wa Muluku ni ohimuroromela Piipiliya. Annaleeliwa wi nihusiheryo na othatuwa ti nenlo pahiru nnathariha mookwakwaleya vooloca sa maphacuwelo a ekumi. (Aro. 1:21-23) Mahusiheryo ntoko yaala annavaanyihana ni “miruku sa Muluku.”—1 Kor. 1:19-21; 3:18-20.

14. Tiheeni miruku saachu sinavuwihaaya?

¹⁴ Miruku saachu sinnavaanya naari okhoromanya malamulo awookololowa a Yehova. Iho hasinakumiherya sawiima sa munepa wa Muluku, nyenya “miteko sa mwiili.” (Gal. 5:19-23) Miruku iho inaaceenyerya achu okhala awiirumiha, nave yookhumelela ene sinnaweeriha achu okhala “awiichuna mukhataaya.” (2 Tim. 3:2-4) Mikhalelo seiyo ti soohiyana ni wiichacala, munepa wa wiiyeviha yoowo akapuro a Muluku anaceenyeriwaaya okhalano. (2 Sam. 22:28) Akristu akina yaawo yaakele o esikola yavasulu muupuwelo aya waahuupiwa ni elapo ohiya ni Muluku. Hankooni nthokororye yootakiherya emoharu mmukhalelo eyo eneereyaaya.

15-16. Tiheeni muhusenryaanyu orweela wa yaweereya ya murokora?

¹⁵ Murokora mmoha yoowo ori mmuteko wa elukuluku yoothene mu iyaakha khumi nathanu ooloca: “Ntoko Namoona a Yehova, kaahaalakhanya nave kaahiiwa vooloca sa sawoopiha sinakhalavo muchu aya o esikola yavasulu, nave nkaapwanche olopola owo. Kuupuwela wi ekano eyo hiyaphariheleya wa miyaano.” Makacamiho taani murokora ola aahoolenleiye? Owo oriye: “Kaanamaliherya elukuluku yincipale mu mahusiheryo aka ophiyerya wi nkaakhalano elukuluku yawaaca ntakhara ovekela wa Yehova, kaanoona okhala woovila oloca sa Piilipiya ni akina, navetho kaanatepa okoma ophiyerya wi nkaarehererya mithukumano phaama. Kinnatepa othamalela woona wi, kaahisuwela wi wiivooliherya mu mahusiheryo a vasulu waanapahula onthamwene aka ni Yehova. Miyaano kaahisuwela wi kaaphwanela ohiya ohuserya. Nave kaahihiya.”

¹⁶ Mahusiheryo awo yaavolowenle hai muupuwelo wa murokora owo? Owo onnaakhula: “Kinnuuliwa muru weemererya wi mahusiheryo yaawo kaathanlilaaka yaakihusiha okhala ootikitheryeya mu soohesa sa akina, xaxaxa anna ni arokora aka, kiwehereryaka wi epake sincipale opwaha yaaweryelaayavo, nave kiivalaanyaka wa yaawo. Yaahiviravo elukuluku yincipale wi kihiye wuupuwela mmukhalelo yoowo. Yaweereya yeela yookooniherya yawoopiha enakhalavo vaavaa muchu ohinachariheiye olopola yoowo Tiithi ahu awirimu onanivaheiye orweela wa marehereryo awe. Yehova ookisuwela phaama opwaha kiisuwenlaaka mukhataaka. Pahiru waakhanle wi koowiriyana!”

17. (1) Teevi enaphwanela okhala yoolakelelaahu? (2) Tiheeni nnahaalaahu othokororya mmwa onacharela?

¹⁷ Mukhale oolakelela okhooca ophariwa “ni osuwela . . . wa miruku soowoka satheru” sa elapo ya Satana. Moohihiyererya mwiikhapelele orweela wa miraakho sa Satana. (1 Kor. 3:18; 2 Kor. 2:11) Muhirwe mmweemererye Satana ohuweliha moonelo anyu vooloca sa Yehova. Mukhaleke mwawiiwanana ni malakiheryo avasulu a Yehova. Nave muhirwe mweemererye wi Satana aweeriheeni ohiya ochariha ikano sa Yehova. Nyenya hanka wakhala wi moosuwela wi moovoloweliwa ni muupuwelo weelapo yeela? Mwaha onacharela onahaala wooniherya mukhalelo Masu a Muluku eneeraaya enikhaviherye ovootha naamwi muupuwelo ni sookhovelela irino “ikuru saya.”—2 Kor. 10:4, 5.