Meecelo Anamucicimiha Muluku
1. Ntakhara heeni Anamoona a Yehova annasuweliwa vaavaa anayaaya o akongreso a edistritu?
1 Vaavaa nnayaahu o akongreso a edistritu, ninnasuweliwa moomalela. Mu ipooma sincipale sa kongreso, michaka sa vanipuroni sinnalokoha ophiya wahu. Hoteli ni irestaurante ikwaha sincipale sinnasareiwa ni alipa kongreso, nave achu anakhala mmapuro yaawo annawoona alipa ooxekurya ancipale ewanre ikaraxa sa kongreso. Inacharela ti sawuupuxerya seiyo inahaala onikhaviherya wi nimucicimihe Muluku moorweela wa meecelo ahu aphaama vaava nnakhalaahu va epooma ya kongreso.—1 Pet. 2:12.
2. Nnii niwerye hai omucicimiha Muluku moorweela wa soowara soophwanelela vaavaa nnakhalaaya va epooma ya kongreso?
2 Soowara Soophwanelela: Owara wahu woophwanelela vaavaa nnakhalaahu va eprograma wiiliwiili onnaalekecha yaale ananoona. Nyenya, mukhalelo wa mawarelo ahu mu ilukuluku ikina—vaavaa nnaalikhelaahu Hoteli, vaavaa nnalyaahu mmapuro a irestaurante, vaavaa nnathumaahu, ni sikina—ennaweeriha achu onivarerya vancipale. Naamwi nihichunaka owara soowara soophwanelela mu ilukuluku seiya, yeeyo nnawaraahu enaphwanela okhala yoophwanelela, yaphaama, nave ohiya yoohiphwanelela. Alipa oovarerya anaphwanela owerya woona ohiyana variyari wa hiyaano ni oohiroromela. (Arom. 12:2) Mwawaacererya, hiyaano nnaphwanela owara ekaraxa ahu ya kongreso, hiihaa eyo enahaala omulaleya kongreso, ehoolelaka ikari sa ovaha onamoona, nave ennaweeriha alipa kongreso akina onisuwela.
3. Nnii nooniherye hai ovilela ni ncicimiho?
3 Ovilela ni Ncicimiho: Mu elukuluku vaavaa ancipale mu elapo aryaaya awiisivela mukhataaya ni ohithamalela, wiichuuwiha taani ovilela ni ncicimiho nahu nnahaalaaya okhala wa alipa oovarerya, ntoko anamalapa a hoteli ni a restaurante! (2 Tim. 3:1-5) Vaavaa nnakuhaahu mipaco nari vaavaa nnakhalaahu mu liinya wi nikuxe soovonyiwa va kongreso, nnaphwanela waavya, ohiya wiiphwanyerya wahu mukhatihu, nyenya wiiphwanyerya wa akina. (1 Akor. 10:23, 24) Amanle oya o kongreso awe oopacerya, mulopwana mmoha oochuna aaloca: “Nkinuupuwela miyaha saalociwe nihiku nenle, nyenya meecelo a Anamoona yaahikitannya vancipale.”
4. Ntakhara heeni nnaphwanelaahu othokororya wiiveleela va kongreso wakhala wi makhalelo ahu anneemererya?
4 Alipa Wiiveleela: Munepa wawiiveleela ti eneneeryo ya aKiristu eeparipari. (Sal. 110:3) Nyuwano munanwerya wiiveleela wi mukhaviherye va kongreso? Va nipuro na kongreso mmoha, anna ni arokora 600 yaahiveleela wi erehererye nipuro kongreso ahaakumve. Anamalapa ootikiniheya yaaloca wi: “Ela echu yootikinihaxa hiyaano nihintonkaahu woona! Ennavila waanyiherya wi achu oothene yaala ti alipa wiiveleela.” Hiyaano ninnawehererya ni ochuna akongreso a edistritu a 2013 ni ekari nnahaalaahu okhalano ohiya pahi ya owiriyana ni ohuserya sa Muluku nyenya tho ya omucicimiha yoowo.
[Eruku va epaaxina 3]
Sawuupuxerya sa Kongreso a 2013
◼ Ilukuluku sa Eprograma: Milako sa nipuro na inahaala ohuliwa 7:00. Musika onahaala opacerya 8:20 mahiku oomararu. Elukuluku yeeyo oothene hiyo nnaphwanela oya o mipaco sahu wi eprograma epacerye mmukhalelo woophwanelela. Ncipo ni nivekelo nookuchula nnahaala weeriwano 15:55 Naneethanu ni Nawoorowa nave 14:40 Namurunku.
◼ Nipuro na Atransporti: Mapuro oothene a kongreso weiwo nnalamulelaahu nipuro na atransporti, mapuro anahaala okhala a mahala wa alipa kongreso mmukhalelo wa opacerya ophiya. Nipuro na atransporti wiiliwiili ti nooyeva, mwawiihiiha wuuka ikaaro onaphwanela weeriwano wakhala wooweryeya.
◼ Okuha mipaco: Mipaco poti okuhiwa wa yaale murulaanyuno vamoha, munakhalaanyuno veechokoni, nari ale munaahusihaanyu Piipiliya.—1 Akor. 13:5.
◼ Yoolya ya Mitiya: Ninnoovekaani wi muruuhe yoolya yookhweya ohiya okhuma va nipuro na kongreso wi mwaavye yoolya variyari va ewora ya wiichuuwa. Yookuxerya ekhaani enaweryeya okuhiwa vathi va mpaco poti ophariheliwa muteko. Sookuxerya itokotoko sa marance ni sookuxerya sa vidro hasineemereryiwa va nipuro na kongreso.
◼ Sooveleela: Hiyaano poti wooniherya othamalela marehereryo a kongreso moorweela wa opaka sooveleela soochuna va kongreso wi nikhaviherye muteko wa veelaponi yoothene. Exeeki eri yoothene enaphwanela orempwa “Associação das Testemunhas de Jeová de Moçambique.”
◼ Murece: Wakhala wi nyuwano moolamuleliwa murece, ninnoovekaani wi mukuxe wawaakhwanela, ntakhara wi va kongreso hokhalavo.
◼ Isapatho: Ti waphaama othanla isapatho soophwanelela, sawaakhwanela sinahaala weeriha wi muneeca phaama.
◼ Iformulaario Queira Visitar (S-43): Eformulaario Queira Visitar enaphwanela ophariheliwa wi nrepe miseelo vooloca sa nchuno nri noothene inaphwanyiwa mu olaleerya wa vanlakani variyari va kongreso. Iformulaario soorempwa inaphwanela oveleeliwa o Nipuro na Aliivuru nari ovahiwa namarepa a muloko mwakookela owaani.
◼ Irestaurante: Mucicimihe nsina na Yehova moorweela wa meecelo aphaama mu irestaurante. Muware mmukhalelo onamphwanelela muKiristu. Mwaarowaka mvahe yamahala wakhala wi yookhoveleliwa.
◼ Marehereryo a Ikwartu: Edata ya kongreso ehakumve ophiya, Edepartamentu ya Ikwartu ennapacerya opaka marehereryo wi yaathokororye oothene yaale anaveka nipuro. Nrehereryo nenla ninnaacererya ohakalala nnalawihaahu moorweela wa okhala vamoha ntoko aKiristu. Nyenya, nuupuwelaka wi “sothe sene sereye mophwanelela ni mokwasulela,” nave wi onaphitaanyerya okhala phaama wa akina, sawuupuxerya vakhaani ti soochuneya. Yaale ari aleco vaate va munna anaphwanela okhala oohakalala ni yeeyo anavahiwaaya ni wiiwanana ni yeeyo enavekiwa. Awo anaphwanelela ochuna orehererya ekwartu khata nihiku ehaakumve oya o kongreso ni ehaakumve orowa. Okhala muleco vaate va munna honamaliha murici wa khata muchu othokororya yoolya awe ni atransporte Mwawiihiiha, khata muchu onaphwanela wiirehererya mmukhalelo yoola. Wiiwanana wahu ni wiiwexexa mmiyaha seiya enneeriha wi mulipa owaakhela aleco ooniherye ovaha wawe moochuna, ohiya vathi va okhinyereryiwa. Mmukhalelo mmohamoha, yaale anakhala va nipuro na kongreso anaphwanela wiiwanana ni athoonyeryi wi nipuro na kongreso ntitelele okhala naweela nihiku nnihiku.—1 Akor. 14:40.
◼ Muteko Wawiiveleela: Muchu onachuna wiiveleela onaphwanela olokoha o edepartamentu ya Muteko Wawiiveleela va kongreso. Anamwane arino iyaakha sa oyariwa vathi 16 poti tho okhaviherya phaama moorweela wa olapa ehooleliwaka ni tiithi, mukhapeleli, nari mutokweene mukina eemereryiwe ni tiithi nari mukhapeleli.
◼ Opatiso: Alipa opatiso anaphwanela okilaathi va nipuro ahiyeryiwaaya ohaakumve opacerya mwaha wa opatiso, Sabata wooxixelo. Oothene eemereryiwe opatiso anaphwanela oruuha etuwalya aaya ni yoowara yoophwanelela. Elukuluku evinre akina yaahiwara soowara soohiphwanelela nave yeeyo yaahinanariha mukhalelo. Mansiau awuuluulela makoho mu liivuru Organizados ni alipa opatiso anaphwanela osuwela wi awo anniiwexexa mwaha yoola ni malakiheryo a Piipiliya anavolowela.