MWAHA 67
Yosafete Onnamuroromela Yehova
MANO munnasuwela wii alopwanaala taani nave tiheeni yeeyo awo aneeraaya? Awo anaya okhoconi, nave ookhala vahoolo awo anamwiipa. Nyenya, vakina vaya munnakoha: ‘Mano ntakhara heni alipa awiipa awo ahiryaayano nlema ni nivaka noowanano? Hinkoni noone.
Yosafete aari mwene a omwene wa mahimo meeli a Isarayeli. Aakhanle mu elukuluku emohamoha yeeyo ya Mwene Akabe ni Yezebeli, a omwene wa mahimo 10. Nyenya Yosafete aari mwene aphaama, nave atiithinya, Asa, yaaritho aphaama. Hiihaanto, achu a omwene wa mahimo meeli, onakhumawo echeku yamirupi, mu iyaakha sincipale, yaari ni okumi waphaama.
Nyenyanto, yaaheereya echu yaawoopopinhe achu. Oorummwa yaahirwa omuleela Yosafete: ‘Muloko mutokotoko wakhoco wa Mowaape, Amooni ni o Mwaako wa Seyire onoorwa wooroxani nyuwo.’ AIsarayeli ancipale yaahithukumana o Yerusalemu, waavyavya okhaviherya wa Yehova. Yaahirowa ompa ya Muluku, nave weiwo Yosafete aahivekela: ‘Nyuwo Yehova, Muluku ahu, hinnasuwela yawii neere. Nri oocheecheya moovaanyihana ni muloko mutokotoko wakhocoola, Nnaveka okhaviherya wanyu.’
Yehova aahimuthokororya nave aahilamula wii mmoha a arummwaawe aaleele achwaawo: ‘Ekhoco tahi yawinyu, nyenya ya Muluku. Nyuwo himuwana. Mooneke oweha pahi nave moone mummo Yehova oniiriiye oovuluxeryeeni.’
Wooxixelwaaya, Yosafete aahi wa achwaawo: ‘Muroromeleeni Yehova!’ Ovinyerya vavaa aahaaruma alipa awiipa oya vahoolo va asurutatu, nave awo yaahiipa mathamalelo wa Yehova mu weeca iwo. Mano moosuwela yeeyo yeerenyee vavaa yaaphiyalaaya vakhiviru wii ewane? Yehova aaheriha wii asurutatu amwiicani awo ewaneke yaawo-yaworu. Nave vavaa aIsarayeli yaaphiyalaaya, haahanleruvo musurutatu mwiicani ari mukumi!
Mano hiwaari wamiruku wii Yosafete aroromele wa Yehova? Hiyotho nnahaala okhala amiruku naroromela mwa Yoowo.
1 Mamwene 22:41-53; 2 Matharihelo 20:1-30.