Mphure Moorweela wa Yoohuserya ya Liivuru Piipiliya Onahusiha Eheeni Chiryene?

¹ Liivuru Piipiliya Onahusiha Eheeni Chiryene? ninnampharihela vancipale mmuteko ahu wa olaleerya, xaxaxa weecihano yoohuserya ya Piipiliya. Mwawiihiiha nnaphwanela wiikhoveleliha ni ekaruma ahu yeela. Eyo enahaala oweryeya woona wi nnahaala omuhuserya mu Yoohuserya ya Piipiliya ya Muloko, opacerya mu esumana ya 19 a Otupuru a 2015.

² Mulipa aweeciha makupa yaala, onahaala woopaceryani opaka makoho anaphwanyeya omapacereryo wa mwaha ti mwaha. Voocharela yoohuserya enahaala weecihiwa moorweela wa makoho anaphwanyeya vathi va epaaxina. Soorepa ilociwe “Mwaalakhanye,” inaphwanela waalakhanyiwa, othokororiwa, nave enahaala okhala ya mphurelo othokororya ekaaxa “Piipiliya Onahusiha Eheeni” wookuchulani wa mwaha ti mwaha wi ekhaviherye wuuluulela miyaha, woona wi annaphwanyeyamo maakhulo a Piipiliya wa makoho anaphwanyeya omapacereryo wa mwaha ti mwaha. Munahaala woona wi onahaala okhala wookhweya ovaha maakhulo woona wi liivuru ola onathokororya miyaha mookhweya, mookwakwaleya ni mwawiiweya.

³ Masu Awaaceererya annavaha sootaphulela sa miyaha mookwakwaleya. Nnanwerya opharihela miyaha seiha vaavaa oohuserya a Piipiliya anachunaaya sooleeliherya sa mwaha. Ikwaha ikina, makupa a Masu Awaaceererya anahaala othokororiwa mu Yoohuserya ya Piipiliya ya Muloko. Elukuluku yeemererya, mwaha woothene onaphwanyeya mu Masu Awaaceererya anahaala waalakhanyiwa ni alipa awaalakhanya a yoohuserya, nave miyaha soorekama inaphwanela okawanyiwa mmakupa aya. Masu awaaceererya haanono makoho, nyenya mulipa aweeciha makupa yaala, onahaala opaka makoho aniiwanana ni mwaha.

⁴ Mu Yoohuserya ya Piipiliya ya Muloko, othokororiwa wa liivuru Piipiliya Onahusiha Eheeni onahaala opakiwaka mwawaakuveya, ohiyana ni vaavale nnahuseryaahu ni akina, xaxaxa wakhala wi haanono masuwelelo a Piipiliya. (Saw. 26:28, 29) Variyari va yoohuserya ya Piipiliya vaate va namakhala, nnaphwanela othokororya soorepa mmukhalelo wookwakwaleya, ni othariha sootakiherya ni ichu ikina. Mwawiihiiha, mukhaleno yoolakelela ya okhala mmuthukumano, ohicompela, ni opaka makupa mu yoohuserya ya liivuru Piipiliya Onahusiha Eheeni Chiryene?.