‘Mweece ni Nroromelo, Ohiya ni Sawooneya’
Ehaakumve otoloxiwa epooma ya o Yerusalemu, murummwa Paulo aahaarepela Akiristu yaale awiichanaka ntoko anakhoco a Kiristu, wi yaahaala ohoolela makacamiho nave wi hiyaaphwanela okuha vahoolo mukhalelo wa opuha ni ohakalala waya. (2 Tim. 2:3, 4) Vooloca sa epahu enahaala okhumelela mu elapo ela yoonanara, nnaphwanela okhalano nroromelo noolipa wi ntikitherye moonelo ahu wa ichu soomunepani. (2 Kor. 4:18; 5:7) Vaavaa munoonaanyu exilema ‘Ande pela Fé, Não pela Vista,’ moone mukhalelo muhakhu waamweerinhaaya Naum ni Repeka olekela ocimula. Voocharela, mwaakhule makoho ala.
(1) Echu yoothanyeya “va nipuro naweela” mu nsana noopacerya yaari eheeni, nave echu taani Akiristu yaawo yaakhala o Yerusalemu yaaphwanelaaya weera? (Mat. 24:15, 16) (2) Ntakhara heeni ochawa mu epooma ele waachuneya nroromelo? (3) Wi muchu achawe, tiheeni aaphwaneleiye ohiya oculi? (4) Ntakhara heeni Naum ni Repeka yaalekela ocimula? (Mat. 24:17, 18) (5) Yaweeha taani ekina ya nroromelo Rakele aahoolenleiye mu ovinya o Yerusalemu? (Mat. 10:34-37; Mar. 10:29, 30) (6) Etani ovanhe hai yootakiherya yaphaama ya omuroromela Yehova? (7) Makacamiho taani Akiristu yaakumannaayano o Pela? (8) Ntakhara heeni Naum ni Repeka yaaceecheya mu nroromelo? (9) Yehova aakhapelenle hai Akiristu yaakhala o Pela? (Mat. 6:33; 1 Tim. 6:6-8) (10) Nnii nimutakiherye hai Aaparahamu ni Saara vaavaa nnaacamelaahu omakuchuwelo wa mukhalelo yoola wa ichu? (Ahe. 11:8-10) (11) Tiheeni yaamulekenche Naum ni Repeka okookela o Yerusalemu, nave ntakhara heeni muupuwelo owo waari woonanara? (Luka 21:21) (12) Tuuvi waari mukhalelo weevelevelo wa o Yerusalemu vaavaa Naum ni Repeka yaakookenlaayawo? (13) Ntakhara heeni nnaphwanela olipiha nroromelo nahu hiihaano—ehaakumve ophiya makuchuwelo a mukhalelo yoola wa ichu?—Luka 17:31, 32; 21:34-36.
Weeca ni nroromelo onataphulela (1) ororomela ohoolela wa Yehova, (2) weemererya wi malakiheryo awe ehoolele inaani sahu, ni (3) wooniherya wi ninnavaha esisapo ichu soomunepani opwaha muhakhu. Oothene hiyo nikhale oolakelela weeca ni nroromelo, nsuwelaka wi “elapo enanvira, vamoha ni minkhela saya, nto yole onera okhwela wa Muluku onnakhala mahiku òhimala.”—1 Yoh. 2:17.