Soothene Nthowa na Otheya!

ASIMWALI eeli yeeca mu epooma yo Baguio, o Filipina. Vaava yeecaaya, yaahoona ekarinya ya soolaleeryiwa, nyenya awo hiyaacamenle vaavaa waarivo ekarinya. Helen, murokora yoowo eemenle waacamela ekarinya, aahooniherya otheya ntakhara yaawo. Asimwali awo yaahititelela weeca, nyenya yaahitannyeya murima ni otheya woonthamwene Helen oonihenryeiye.

Voocharela, asimwali awo yaawela ekaaro eyaaka owannyaya, nave eri mphironi yaahoona Empa ya Omwene orempwevo eneneeryo jw.org. Nave awo yaahuupuwela wi yaari eneneeryo emohamoha yeeyo yoonnaaya wuupaceryani va ekarinya. Oopiili aya yaakhuruwa mukaaroni, nave yoona elista ya mithukumano ya miloko soohiyanahiyana yaaphateeliwe va mukhora wa Empa ya Omwene.

Asimwali oopiili, yaahiphiya va muthukumano woocharela. Nyenya taani yaamoonnaaya vaavaa yaavolonwaaya mu Empa ya Omwene? Helen, mwali yoole yaamoonnaaya va ekarinya! Mwawaakuveya, awo yaahuupuwela wi aari mwali yoole aawoonihenrye otheya wa onthamwene. Helen ooloca: “Vaavaa awo yaarwaaya vachu kaaryaakavo, kaahikhala awoova. Kuupuwela wi yookhala echu vyakala yoonanara kaapankaaka.” Nyenya asimwali awo, yaahimuleela Helen wi yaamonne elukuluku aareiye va ekarinya.

Asimwali awo yaahipuha mithukumano ni onthamwene, nave yaahiisoona ntoko wi eri owaani. Vaavaa yaawoonnaaya akina yeelihaka mu Empa ya Omwene mithukumano imanle, awo yaahiveka wi ekhaviherye muteko. Mwali mmoha aahikookela mu elapo yoowannyawe, nave mukina onnaphiya mmithukumano moohihiyererya, nave aapacerya omuhuserya Piipiliya—soothene seiha nthowa na otheya!