Elapo Yavathi Yaparadaiso

Yehova onahaala omaliha soonanara soothene seiyo Satana oneereiye. Yehova omuthanla Yesu okhala Mwene a elapo yoothene yavathi. Mu omwenaawe, elapo yavathi enarwa ekhala paradaiso.—Danieli 7:13, 14; Luka 23:43.

Yehova oolaihenrye ichu iha:

SOOLYA SINCIPALE: “Elapo ya vathi ennaveleela sawiima saya. Muluku, Muluku ahu tonanreeliha.” “Mwiilaponi mmo mukhalemo yoolya yincipale ophiyerya vasulu va miyaako.”—Masaalimu 67:6; 72:16.

HORWA OKHALAVO THO EKHOCO: “Rwaani, moone miteko ya Apwiya, yoowo oneerano sootikiniha mwiilaponi ya vathi. Owo onnamaliha ikhoco elapo yoothene ya vathi.”—Masaalimu 46:8, 9.

HORWA OKHALAVO THO ACHU OONANARA: “Ntakhara aweera soonanara enarwa etoloxiwa . . . Vahanle vakhaani oonanara hamuwoona tho, nari owaavyaka horwa owoona.”—Masaalimu 37:9, 10.

HORWA OKHALAVO THO IRECHA, OTHANANA NARI OKHWA: “Mu elukuluku yeele, enarwa ehuleya miitho eevasi nave maaru oochiyana enarwa ehuleya. Mu elukuluku yeele, oorakala onarwa achupa ntoko naahe, nave nlumi na muchu oohuluma nnarwa nikhuwela moohakalala.”—Yesaya 35:5, 6.

“Nave Muluku tani akhalekeno, akhale Muluku aya; Nave anarwa-avuta mithori yothene ovíha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho sóvira.”—Yawupulula 21:3, 4.

Moohiyana ni Satana nave tho ni masololo, Yehova hatonko wootha. Ichu soothene olakanneiye, moohikhala minikwa inarwa seereya. (Luka 1:36, 37) Yehova onnoosivelaani nyuwo, nave onachuna wi mukhale m’paradaiso yoowo onahaaleiye ompaka. Vanonto, locani ni Anamoona a Yehova wi muhuserye vancipale vooloca sa iiparipari sootikiniha sinaphwanyeya mPiipiliyani, Masu a Muluku. Mwapharihela muteko eeparipari mu okumaanyu, munamukhala ootaphuwa mu okapuro mwa sawootha, malavi, ni ohisuwela echu. Mu ovira wa elukulu, munahaala okhala ootaphuwa mu okapuro wa yoocheka ni okhwa. Hiihaa ntoko Yesu olonceiye: “Nave munarwa-musuwelasha eparipari, nave eparipari enarwa-yotaphulani.”—Yohane 8:32.