Yohuserya 10

Mummo Muniiryanyu Mphwanyerye Ekeresha Yeparipari

Mwaatchunaka okhala nthamwene a Muluku, munnaphwanela okhala mu ekeresha yeyo Muluku oneemeryeryiiye. Yesu aariye wii “alipa-othamala eparipari” yahaala omuthamala Muluku mopharihana ni “eparipari.” (Yohane 4:23, 24) Orivo ephiro emoharu pahi yaphama yomuthamalela Muluku. (aEfeso 4:4-6) Ekeresha yeparipari ennaholela wukumini wohimala nave ekeresha yowoka ennaholela wutoloshiwani.—Mateyu 7:13, 14.

Munanwerya osuwela ekeresha yeparipari mwa wavarerya yawo anakhalamo. Okhala wii Yehova taphama, alipa omuthamalelawe eparipari anaphwanelatho okhala atchu aphama. Ntoko mummo mwiri wa mararache waphama oniimaya mararache aphama, ekeresha yeparipari ennakhalano atchu aphama.—Mateyu 7:15-20.

Asiinthamwene a Yehova annamuchichimiha vanchipale Biblia. Annasuwela wii Biblia ta Muluku. Annemererya wii yeyo owo onlochiiye eholele okumi aya, wokolola sokachamiha saya ni wakhaviherya ohuserya etchu volocha sa Muluku. (2 Timoteo 3:16) Annavyavya werano yeyo analaleryaya.

Asiinthamwene a Yehova annathonyerya wii annasivelana mukina ni mukhwawe. Yesu ahithonyerya osivela wa atchu mwa wahusiha sa Muluku, mwa wapenusha awiicheliwa. Yawo anakhala mu ekeresha yeparipari annathonyeryatho wii annaasivela akhwaya. Hihaa ntoko Yesu, hanaanyemula alipa ohawa nari yawo ari a nloko nikina. Yesu aariye wii atchu yahaala wasuwela ohuseryawe mwa osivela weiwo awo yiiryaya ethonyeryeke wa mukina ni mukhwawe.—Yohane 13:35.

Asiinthamwene a Muluku annachichimiha nsina Nawe, Yehova. Wakhala wii mutchu mukina onnakhocha oromola nsina nanyu, mano yowo ahaala okhala mmoha a asiinthamwenanyu a vamurimani? Hoye! Nakhala ni nthamwene, ninnaromola nsina nawe nave ninnalocha phama sa yowo wa akina. Mwawihihaa, yawo anatchuna okhala asiinthamwene a Muluku annaphwanela oromola nsina nawe ni olocha sa nenlo wa akina. Yehova onatchuna wii nerekeno yeyo.—Mateyu 6:9; aRoma 10:13, 14.

Hihaa ntoko Yesu, asiinthamwene a Muluku annaahusiha atchu Omwene wa Muluku. Omwene wa Muluku ti epoma ya wirimu yeyo enii etatushe elapo okhala paradaiso. Asiinthamwene a Muluku annaalela akina mitchaka yaphama yeyo ya Omwene wa Muluku.—Mateyu 24:14.

Anamona a Yehova annavyavya okhala asiinthamwene a Muluku. Annamuchichimiha Biblia nave akhalano osivela variyari vaya. Navetho annaromola ni ochichimiha nsina na Muluku ni wahusiha akina Omwene wa Muluku. Anamona a Yehova olelo anakhala mu ekeresha yeparipari velaponi yavathi.