MASU AWAACEERERYA

Nsina na Muluku—Ophariheliwa Waya Muteko ni Yootaphulela Aya

MU PIIPILIYA anyu, Salumu 83:18, otaphuleliwe hai? Piipiliya Nlakano Nahihano onataphulela eciciri ela mmukhalelo ola: “Wi esuwele wi nyenyuru, nsina nanyu mwa Yehova, mwa Awirimurimu velaponi yothene ya vathi.” Apiipiliya akina anataphulela mmukhalelo woophwanaphwana. Nyenya, mu Apiipiliya ancipale nsina nawi Yehova nookumihiwamo, nraceelihiwa ni masina a ncicimiho ntoko “Apwiya” naari “Awiikhalelaru.” Tiheeni enaphwanela ophariheliwa va eciciri ela? Mano nsina na ncicimiho, naari nsina Yehova?

Eciciri ela enaloca sa nsina. Mu Eheepri elocelo yoopacerya yaaphariheliwe muteko wi erempwe makupa mancipale a Piipiliya, nsina nla na vameekhaaya ninnaphwanyeya va eciciri ela. Ni soorepa sa Eheepri nsina nla nnarempwa hiiha: יהוה (YHWH). Mu elocelo ya Elomwe otaphuleliwa woovuwa wa nsina nlo ti “Yehova.” Mano nsina nlo nnaphwanyeya mu eciciri emoharu ya Piipiliya? Hooye. Mu Soorempwa soopacerya sa Eheepri nsina nla ninnaphwanyeya mummo ikwaha sawaakhwana 7.000!

Apwanne nsina na Muluku ti noochuneya? Thokororyani nivekelo na ntakiheryo nenlo Yesu aavanheiye. Nlo nnapacerya mmukhalelo ola: “Atithihu muri wirimu, nsina nanyu nèlihiwe.” (Mateu 6:9) Voovira wa elukuluku, Yesu aavekela wa Muluku: “Atithi, chichimihani nsina nanyu.” Va waakhula, Muluku aaloca orweela wirimu, ariki: “Kòvuwiha, nave kinanvuwihatho wiliwili.” (Yohani 12:28) Mwawooneyaxa, nsina na Muluku ti noochuneya vancipale. Vanonto, ntakhara heeni alipa ootaphulela akina aakumihamo nsina nla mu sootaphulela saya sa Piipiliya nave eraceeliha nlo ni masina a ncicimiho?

Onakhala ntoko orivovo mathowa meeli matokotoko. Nthowa noopacerya, achu ancipale analoca wi nsina nlo hinnaphwanela ophariheliwa muteko nthowa nawi olelo miichanelo aya akhalai hanasuweliwa. Elocelo ya Eheepri yakhalai yaarempwa ehirino ivokaali. Mwawiihiiha, haavovo naari muchu mmoha olelo onasuwela phaameene mukhalelo achu a ilukuluku sa Piipiliya yiichanaaya nsu nawi YHWH. Apwanne, ela enaphwanela onooceeliha opharihela muteko nsina na Muluku? Mu ilukuluku sa Piipiliya, nsina nawi Yesu akhweya niichaniwa Yeshua naari Yehoshua—haavovo onasuwela evelevelo vooloca sa eyo. Olelo, achu veelaponi yoothene anapharihela muteko makhalelo oohiyana hiyana a nsina na Yesu, yiichanaka mmukhalelo ori woovuwa mu elocelo aya. Awo hanoovelela opharihela muteko nsina nlo naamwi ehisuwelaka miichanelo aya mu iyaakha nsana noopacerya. Moophwanaphwana, wakhala wi muheeca mukwaha murowa o elapo ya elocelo ekina, nyuwo mwahaala woona wi nsina nanyu nniichaniwa moohiyana mu elocelo ekina. Mwawiihiiha, ohisuwela phaama miichanelo akhalai vooloca sa nsina na Muluku tahi nthowa wi nihipharihele muteko nsina nlo.

Nthowa na naawiili nnooniheryiwa ikwaha sincipale vooloca sa okumihiwa wa nsina na Muluku Mpiipiliyani, nnaphitaanyerya muhapo wa khalai wa Ayuuta. Ancipale a yaawo yaaroromela wi nsina na Yehova hinnaphwanela wiichaniwa. Mwawooneyaxa, yoororomela ela enathipeliwa mu ophariheliwa muteko moohiphwanelela nlamulo na Piipiliya nenlo nnaloca wii: ‘Ohiromole nsina na Yehova, Muluku aa, mu mukhalelo watheru, ntakhara Yehova hamuhiya omulaka yoole onaromola nsina nawe mu mukhalelo watheru.’—Mukwaha 20:7, NM.

Nlamulo nla ninnawateeliha opharihela nsina na Muluku mmukhalelo woonanara. Mano nlamulo nla ninnawateeliha opharihela nsina na Muluku mwa ncicimiho? Hooye. Anamarepa a Piipiliya a Eheepri (“Nlakano Nakhalai”) oothene yaari alopwana oororomeleya yaawo yaakhala mwawiiwanana ni nlamulo nenlo Muluku aavanheiye Aisarayeli akhalai. Vanonto, wiiliwiili awo yaanapharihela nsina na Muluku. Ntoko yootakiherya, awo yaahela nsina nlo mu masalumu mancipale yaawo yiipiwa moovuwa ni miloko mincipale sa alipa oothamalela. Yehova Muluku aahaahusiha akapuro awe wi eniichana nsina nawe, nave achu oororomeleya yaaniiwelela. (Yoweli 2:32; Saweriwa T’arummwa 2:21) Mwawiihiiha, olelo Akiristu hanoovelela opharihela muteko nsina na Muluku mwa ncicimiho, ntoko Yesu eenreiye.—Yohani 17:26.

Nthowa na oraceeliha nsina na Muluku ni masina a ncicimiho, alipa ootaphulela a Piipiliya annacheka vancipale. Awo anneeriha wi Muluku akhale ntoko ori ocaicai nave oohikhala muchu. Nyenya Piipiliya onnaalipiha achu wi ‘yatàne’ ni Yehova. (Salumu 25:14) Nkuupuwelani vooloca sa nthamwene anyu a vamurimani. Nyuwo mwanwerya okhala nthamwene awe muhisuwenle nsina nawe? Moophwanaphwana, achu yaawo ahisuwenle nsina na Muluku, Yehova, anahaala owerya hai okhala asinthamwene awe? Mwa waacererya, achu yaahinapharihela nsina na Muluku, awo tho annayeleela osuwela yootaphulela yootikiniha na nsina nlo. Mano nsina na Muluku nnataphulela eheeni?

Muluku mukhateiye aathariha yootaphulela ya nsina nawe wa murummwa awe oororomeleya Moose. Vaavaa Moose aakonheiye vooloca sa nsina na Muluku, Yehova aahaakhula: ‘Miyo kinahaala wooniherya okhala yeeyo kinahaalaaka wooniherya okhala.’ (Mukwaha 3:14, NM) Piipiliya otaphuleliwe ni Rotherham, masu ala analoca wii: ‘Miyo kinahaala okhala soothene kinachunaaka.’ Mwawiihiiha, Yehova onnawerya okhala echu eri yoothene enachuneya wi akhwaaniherye sookhwela sawe.

Tiheeni mwaahaalaanyu weera waakhanle wi nyuwo munnawerya okhala yeeyo munachunaanyu? Tiheeni mwaahaalaanyu weera ntakhara asinthamwene anyu? Wakhala wi mmoha a yaawo ootepa wiiceliwa, nyuwo mwahaala ompenuxa yoowo. Wakhala wi mukina ooyeleela muhakhu, nyuwo muri ooreela mwahaala omaliha makacamiho awe. Nyenyanto, eparipari ti wi, nyuwo hamunawerya opaka ichu soothene munachunaanyu. Oothene hiyo hannawerya. Mwapwahiherya omuhuserya Piipiliya, munahaala ohakalala woona mukhalelo Yehova onakhaleiye echu eri yoothene enachuneya wi akhwaaniherye sookhwela sawe. Nave Yehova onnasiveliwa opharihela muteko ikuru sawe wi aakhaviherye achu yaale anamusivela yoowo. (2 Matharihelo 16:9) Makhalelo ala ooreera a Yehova hanasuweliwa ni achu yaale ahinasuwela nsina nawe.

Mweeparipari, nsina na Yehova nnaphwanela ophariheliwa muteko Mpiipiliyani. Osuwela yootaphulela aya ni opharihela muteko phaama nsina nlo mu malapelo ahu nikhaviheryo nakuru wi niwaacamele Atiithihu a wirimu, Yehova.a

[Nsu na vathi]

[Eruku va epaaxina 195]

Nsina na Muluku ni soorepa mu Eheepri