MASU AWAACEERERYA

Ntakhara Heeni Akiristu Eeparipari Hanapharihela Mwikimanyo Mmalapelo?

MWIKIMANYO onnalapeliwa nave onnacicimihiwa ni macikhwi aachu. Encyclopetia Britannica eniichana mwikimanyo “eneneeryo etokotoko ya ekerexa Yeekiristu.” Nyenya, Akiristu eeparipari hanapharihela mwikimanyo mmalapelo. Mano ntakhara heeni?

Nthowa ntokotoko ti nawi Yesu Kiristu hakhwile va mwikimanyo. Nsu na Ekriki ntaphuleliwe “mwikimanyo” ti stau·rós. Nsu nlo nnataphulela “mwiri wawookowa naari mutanta.” The Companion Bible onii: Nsu nla “[Stau·rós] hannataphulela miri miili sawiikimanyiwa . . . Naari mu [Nlakano Nahihano] na Ekriki hiwaamo echu erempwe enooniherya miri miili sawiikimanyiwa.”

Mu soorepa sincipale, alipa oorepa a Piipiliya annapharihela nsu nikina yaalocaka sa mwiri ipheliwevo Yesu. Ti nsu na Ekriki xyʹ·lon. (Saweriwa T’arummwa 5:30; 10:39; 13:29; Galasya 3:13) Nnataphulela “mutanta” ,“niphacha, ekopo, naari “mwiri.”

Liivuru Das Kreuz und die Kreuzigung (Mwikimanyo ni Okhomeliwa va Mwikimanyo), orempwe ni Hermann Fulda, alocaka ntakhara heeni mwiri mmoha pahiru waanaphariheliwa muteko ikwaha sincipale va wiiphiwa achu, onii: “Tahi wi saanakhalawo miri mapuro oothene yaathanliwa wi yiiphiwevo achu vanlakani vene. Vanonto, mwiri mmoha ti waathipeliwa vathi. Anamaahita yaanamakiwa naari okhomeliwa vamwirini ni matata aya osulu, nave ikwaha sincipale manaani aya tho yaanamakiwa naari okhomeliwa.”

Mathipelo oolipa opwaha oothene ti ale anakhuma mu Masu a Muluku. Murummwa Paulo onaloca wii: “Kristu ánópola o wulumeliwani wa malamulo, akhanle wulumeliwa mu nipuroni mwanyu; vawi worempwa, awulumeliwa ti yowo onathomeyiwa va mwirini.” (Akalatiya 3:13, NN) Mu eciciri ela Paulo onaromola masu ari mu liivuru a Malamulo 21:22, 23, yaawo mwawiiweyaxa analoca mwiri, ohiya mwikimanyo. Nthowa nawi mwiri ola waanamweeriha muchu okhala “awulumeliwa,” tahi echu yoophwanelela wa Akiristu ohela mpa mwaya soophwaniherya sa Kiristu athomeiwe va mwikimanyo.

Hiyaavo echu enooniherya wi mu iyaakha 300 soopacerya amanle okhwa Kiristu, yaale yaaloca wi Akiristu yaanapharihela mwikimanyo mu malapelo. Vanonto, mu nsana naneexexe, mmalapo Constantino yoowo aari Mulamuleli, aahaakhulela ovolowa mu Akiristu oomwaryeya, vanonto aavuwiha mwikimanyo ntoko eneneeryo ya Ekiristu. Moohipwacha muupuwelelo wa Constantino, mwikimanyo honiiwanana ni Yesu Kiristu. Mwevelevelo, mwikimanyo opacenrye ni amalapo. Liivuru New Catholic Encyclopedia onaakhulela wii: “Mwikimanyo onnaphwanyeya mu mihapo sa makupa oothene, wa ale yaari Akiristu ni ale yahaari Akiristu.” Alipa waalakhanya ancipale, ahoona wi mwikimanyo oniiwanana ni olapela ichu sa maphacuwelo ni mihapo sa okonihana wa amalapo.

Vano, ntakhara heeni eneneeryo ela ya amalapo yoovuwa vancipale? Mwawooneyaxa, nthowa na ochuna waakhweiherya amalapo wi yaakhele “Ekiristu.” Nyenya, Piipiliya onnawateeliha olapela eneneeryo eri yoothene ya amalapo. (2 Korinto 6:14-18) Soorempwa tho sinnawateeliha makhalelo oothene a olapela soophwaniherya. (Mukwaha 20:4, 5; 1 Korinto 10:14) Mwawiihiiha, Akiristu eeparipari aakhalano nthowa naphaama wi ehipharihele mwikimanyo mu malapelo.a

[Nsu na vathi]