Mmarehereryo ahu hiyaano hinaanono atokweene analiviwa ikhorowa. Hiihaa ntoko yeereyaaya mmuloko Weekiristu woopacerya, Atokweene ooreheryeya annathanliwa “wi ekukhule muloko wa Muluku.” (Saweriwa Tarummwa 20:28) Atokweene yaala alopwana awunnuwa omunepani anahoolela muloko ni okukhula, “tahi mwawakuviha, nyenya ni onethi, wa Muluku; óhitchara yawiphwanyerya yotakhala, nyenya mwa mvai.” (1 Petro 5:1-3) Muteko taani awo aneeraaya wi nikhaleno mphurelo?

Awo annanikhaviherya ni onikhapelela. Atokweene annahoolela ni annakhapelela muloko mmakupa oomunepani. Esuwelaka wi Muluku taavanhe muteko ola wookhweleya, atokweene hananihooxa, nyenya awo annanikhaviherya okhala phaama ni ohakalala wahu. (2 Akorinto 1:24) Hiihaa ntoko mukukhula oniilipixeryeiye okhapelela ipucepuche sawe, atokweene anniilipixerya omusuwela muchu ti muchu a mmulokoni.​—Masiposipo 27:23.

Awo annanihusiha mukhalelo wa weerano yookhwela ya Muluku. Esumana eri yoothene, atokweene annahoolela mithukumano sa muloko wi elipihe nroromelo nahu. (Saweriwa Tarummwa 15:32) Alopwana yaala awiiveleela annahoolela tho muteko woolaleerya, annalaleerya ni hiyaano nave annanivyakiha mu mikhalelo soothene sa orummwa.

Awo annamulipiha muchu ti muchu a hiyo. Wi ekhaviherye soochuna soomunepani sa muchu ti muchu a hiyo, atokweene a vanipuroni annaxekurya mu ichoko sahu naari mu Empa ya Omwene wi enivahe nikhaviheryo ni olipiha onarweela Mpiipiliyani.​—Yakobo 5:14, 15.

Ohiya pahiru nikhaviheryo anavahaaya mmulokoni, atokweene ancipale aakhalano tho muteko weelapo ni murici veechokoni seiho inamaliha elukuluku aya. Anna yaala analapa mwakuru annaphwanela ncicimiho nahu.​—1 Atesalonika 5:12, 13.

• Tuuvi ori muteko wa atokweene mmulokoni?

• Atokweene anooniherya hai wi annanthokororya?

Piipiliya onnaloca makhuuru meeli a alopwana Eekiristu arino murici wa okhapelela muloko​—“alipa oweherya ni arummwa.” (Afilipi 1:1) Muloko ori woothene onnakhalano anna ancipale anarumeela. Muteko taani arummwa oorumeela aneeraaya wi enikhaviherye?

Awo anakhaviherya nikhuuru na atokweene. Arummwa oorumeela alopwana awunnuwa mmunepani, oororomeleya, akina amiravo, akina ahuuluvala. Awo anakhaviherya miteko sookhweleya sa mmulokoni. Eyo ennaweeriha atokweene okhala ooweiwa ni murici wa ohusiha ni okukhula.

Awo anneerano muteko wookhweleya. Arummwa oorumeela akina annathanliwa ntoko athoonyeryi wi ewaakheleke achu oothene anaphiya mmithukumanoni. Akina anakhaviherya makupa a sooruma, waakawa aliivuru, okhapelela ikhorowa sa muloko, ni orehererya mapuro a olaleerya wa anna a mmulokoni. Awo tho annakhaviherya orehererya Empa ya Omwene. Atokweene annaveka arummwa oorumeela wi yaakhaviherye awuuluvala. Muteko ori woothene arummwa oorumeela anaakhelaaya, anneerano, nave muloko onnaacicimiha yaawo nthowa na wiiveleela waya.​—1 Timoteo 3:13.

Awo annavaha ntakiheryo naphaama ntoko alopwana Eekiristu. Arummwa oorumeela anathanliwa nthowa na mikhalelo saya saphaama soomunepani. Vaavaa awo analocaaya miyaha mmithukumanoni, awo annalipiha nroromelo nahu. Moorweela wa ovaha yootakiherya yaphaama mu olaleerya, awo annanceenyerya okhala a mvai. Nthowa na wiiveleela ni okhaviherya waya, awo annatetheeryela ohakalala ni wiiwanana. (Aefeso 4:16) Voovira wa elukuluku, awo tho ananwerya ophwanelela wi erumeele ntoko atokweene.

• Arummwa oorumeela alopwana a mukhalelo taani?

• Arummwa oorumeela anakhaviherya hai wi muloko weece phaama?

Soorempwa Seekiriki wiiliwiili sinnaloca sa Parnapa ni murummwa Paulo. Alopwana yaala yaarumeela ntoko alipa ooweherya aweeceeca, exekuryaka miloko mu nsana noopacerya. Ntakhara heeni? Ntakhara awo yaanakhala awuukhuwa ni okhala phaama wa anna aya Eekiristu. Paulo aaloca ariki “nikókele’tho náshekurye anna” wi nawoone yaakhanle phaama. Owo aahiiveleela weeca mastatiya mancipale wi aalipihe yaawo. (Saweriwa Tarummwa 15:36) Ela ti yookhwela ya alipa ooweherya aweeceeca olelo.

Awo anarwa wi enilipihe. Ooweherya a ekulucu onneecelela miloko sawaakhwana 20, amalihaka esumana ni muloko ti muloko, itila piili iyaakha soothene. Hiyaano ninnaphura vancipale moorweela wa osuwela wa anna yaala vamoha ni asaaraya wakhala wi aathela. Awo anniilipixerya wi yaasuwele amiravo ni atokweene, nave awo annasiveliwa olapa ni hiyaano mu orummwa ni mu soohuserya sahu sa Piipiliya. Alipa ooweherya yaala vamoha ni atokweene annapaka weeceecela wa okukhula, nave wi enilipihe awo annaloca miyaha soolipiha mmithukumanoni sa muloko ni sa ekulucu.​—Saweriwa Tarummwa 15:35.

Awo annooniherya nchuno wa oothene. Ooweherya a ekulucu onnooniherya nchuno wa mukhalelo woomunepani wa miloko. Owo onnaathukumanya atokweene ni arummwa oorumeela wi evarerye muteko opakiwe ni ovaha miruku wi ekhwaaniherye mirici saya. Owo onnaakhaviherya mapiyoneero okhwaaniherya muteko aya, nave anniilipixerya waasuwela achu avyaani ni osuwela sincipale vooloca sa oyawaya vahoolo omunepani. Anna yaala anniiveleela mukhataaya ‘onikhaviherya’ wi nikhale phaama. (2 Akorinto 8:23) Hiyaano nnaphwanela otakiherya nroromelo ni wiiveleela waya.​—Ahepri 13:7.

• Ooweherya a ekulucu onaxekurya miloko ni yoolakelela taani?

• Nnii niwerye hai ophwanya mphurelo moorweela wa oxekurya waya?

Vaava enakhumelelaaya epahu, Anamoona a Yehova mwawaakuveya annarehererya nikhaviheryo wi ewoopole anna aya anahooxeya. Wiilipiherya iwo onnooniherya osivela wahu weeparipari wa mukina ni mukhwaawe. (Yohane 13:34, 35; 1 Yohane 3:17, 18) Mukhalelo taani nnakhaviheryaahu?

Ninnarumiha sooveleela. Vaava etala etokweene yaakhumelenlaaya o Yuteya, Akiristu oopacerya o Antiokeya yaarumiha sookhaviherya wi yaakhaviherye anna aya oomunepani. (Saweriwa Tarummwa 11:27-30) Moolikana, vaava nnasuwelaahu wi annihu mmakupa makina a elapo aakhalano makacamiho, hiyaano ninnarumiha sookhaviherya moorweela wa muloko nnakhalaahu wi naavahe nikhaviheryo yaawo anahooxeya.​—2 Akorinto 8:13-15.

Ninnavaha nikhaviheryo nawooneya. Atokweene ari mmapuro okhumelenlewo epahu annamwaavya muchu ti muchu a va mulokoni wi esuwele waakhanle wi oothene akumi. Nikhuuru nookhaviherya ninnahoolela okawa soolya, maahi oowurya, soowara, empa, ni murece. Anamoona ancipale arino masuwelelo a muteko anniiveleela nave annalivela mukwaha aya wi yakhaviherye oteka ipa sa anna vamoha ni Ipa sa Omwene inyaanyen’ye. Wiiwanana wahu ntoko marehereryo ni osuwela nnaphwanyaahu mwa olapa vamoha ennaneeriha orehererya sookhaviherya mwawaakuveya mu ilukuluku sa makacamiho. Naamwi hiyaano naakhaviheryaka yaale a “vemusi ya nroromelo,” wakhala wooweryeya hiyaano tho ninnaakhaviherya akina, nihipwache malapelo aya.​—Akalatiya 6:10.

Ninnavaha nikhaviheryo noomunepani ni mmuupuweloni. Achu yaawo ekhumeleliwe ni epahu annachuna ohakararyiwa. Mu ilukuluku seiyo, hiyaano ninnalipihiwa ni Yehova, “Muluku a ohakararya wothene.” (2 Akorinto 1:3, 4) Ninnaloca moohakalala soolaiherya sa Piipiliya ni yaale ahirino ewehereryo, naavahaka ewehereryo wi moohilekela Omwene wa Muluku onahaala omaliha ipahu soothene sinatannya wiicela ni ohooxeya.​—Yawupulula 21:4.

• Ti mwawiihai Anamoona a Yehova anaweryaaya okhaviherya mwawaakuveya yakhumelela epahu?

• Ohakararya taani woomunepani nnavahaahu wa yaale avulunwe mu epahu?

Mu nsana noopacerya, nikhuuru nikhaani, na “arummwa ni atokwene” o Yerusalemu, naarumeela ntoko nikhuuru noolamulela naapaka soothanla sookhweleya wa muloko woothene wa Akiristu awoocihiwa. (Saweriwa Tarummwa 15:2) Vaavaa yaapakaaya yoothanla mwawiiwanana, yaakhala yookhumelelavo ya ovaanela yeeyo Piipiliya onaloceiye ni ochariha ohoolela wa munepa wa Muluku. (Saweriwa Tarummwa 15:25) Yootakiherya yeela ennacharihiwa olelo.

Nlo nnaphariheliwa muteko ni Muluku wi neerano yookhwela awe. Anna awoocihiwa yaawo anarumeela mu Nikhuuru Noolamulela, aakhala ni osivela otokotoko wa Masu a Muluku nave aakhalano osuwela otokotoko wi ekhwaaniherye soochuna soomunepani. Nlo ninnathukumana esumana eri yoothene wi nthokororye sookhwela sa onna wa elapo yoothene. Hiihaa ntoko mu nsana noopacerya, awo annavaha mahusiheryo orweela Mpiipiliyani, moorweela wa ikaarata naari alipa ooweherya aweeceeca ni akina. Eyo enneeriha okhala awiiwanana mmuupuweloni ni mu saweera variyari va achu a Muluku. (Saweriwa Tarummwa 16:4, 5) Nikhuuru Noolamulela ninnahoolela opakiwa wa soolya soomunepani, ninnaaceenyerya oothene ohela vahoolo muteko wa olaleerya Omwene, nave ninnahoolela othanliwa wa anna wi ekhaleno mirici.

Nlo nnachariha ohoolela wa munepa wa Muluku. Nikhuuru Noolamulela ninnaavya ohoolela wa Mwene a Elapo, Yehova, ni Muru wa muloko, Yesu. (1 Akorinto 11:3; Aefeso 5:23) Ala haniisona mukhataaya okhala mamwene a achu a Muluku. Awo vamoha ni Akiristu awoocihiwa oothene “enamutchara Mwana épuchepuche wothe wene wiwo onayiye’wo.” (Yawupulula 14:4) Nikhuuru Noolamulela ninnathamalela mavekelo ahu ntakhara yaawo.

• Taani yaari mu nikhuuru noolamulela mu nsana noopacerya?

• Nikhuuru Noolamulela nnaavya hai ohoolela wa Muluku olelo?

Peteli, nsina na Eheepri, nnataphulela “Empa ya Muluku.” (Maphatxuwelo 28:​17, 19, BNM) Nla nsina noophwanelela na ipa sooluceleliwa seiyo Anamoona a Yehova apankaaya veelaponi yoothene mwemmo onahooleliwamo ni okhaviheryiwa muteko wa olaleerya. Nikhuuru Noolamulela nnarumeela o nipuro ntokotoko o Nova York, EUA, nave orweela weiwo nla ninnahoolela muteko wa ifiliyale mu ilapo sincipale. Ntoko nikhuuru, yaale anarumeela mmapuro yaawo aniichaniwa emusi ya Opeteli. Ntoko emusi awo anakhala vamoha, analapa vamoha, analya vamoha, ni anamuhuserya Piipiliya vamoha.​—Salmo 133:1.

Nla nipuro navameekhaaya weiwo achu aniiveleelaayawo. Epeteli eri yoothene, aakhalamo alopwana ni athiyana yiiveleenle wi yeereno yookhwela ya Muluku ni okhaviherya sookhweleya sa Omwene elukuluku yoothene. (Mateyu 6:33) Haavo onaakhela yoolivela, nyenya oothene annavahiwa nipuro na okona, soolya, ni ikhorowa vakhaani wi ethumeno sookhwela saya. Muchu ti muchu Opeteli ookhalano muteko awe, ntoko olapa mu ekupweete, opaka yoolya, naari orehererya meesa a soolya. Akina analapa ni maakina a aliivuru, oreherya nipuro na okona, ocapa ikuwo, oreherya maakina, ni miteko mikina.

Nla nipuro na muteko nnakhaviherya olaleerya Omwene. Yoolakelela ya Ipeteli soothene ori weeriha eeparipari ya Piipiliya waaphiyerya achu ancipale. Eproxura ela yawooniherya ya yeeyo. Ela erempwe ni ohoolela wa Nikhuuru Noolamulela, erumihiwa mmaakinani wa makhuuru ootaphulela masana masaneene veelaponi yoothene, ekumihiwa ni makina awaakuva mu Ipeteli sinakumiha, nave ekerihiwa mmiloko soopwaha 110.000. Mmakupa oothene yaala, imusi sa Ipeteli sinnakhaviherya vancipale muteko wa waakuveyaxa opwaha miteko soothene​—olaleeryiwa michaka yaphaama.​—Marko 13:10.

• Taani anarumeela Opeteli, nave anakhaviheryiwa hai?

• Muteko taani wawaakuveya onakhaviheryiwa moorweela wa muteko wa Ipeteli soothene?

Achu a emusi ya Opeteli anarumeela mu makhuuru oohiyana hiyana, ekhaviheryaka muteko wa olaleerya mu elapo emoha naari ilapo sincipale. Awo annarumeela mmakhuuru ootaphulela, waapaka aliivuru, onakuhiwamo aliivuru, opaka ixilema naari okhapelela ichu ikina sa vanipuroni.

Nikhuuru na Efiliyale nnahoolela miteko. Nikhuuru Noolamulela ninnathanla anna araru a Ofiliyale ari atokweene oophwanelela, wi ehoolele. Nikhuuru nenla ninnaaleela anna a Nikhuuru Noolamulela wunnuwa wa muteko wa elapo yoothene enahoolelaaya ni makacamiho oothene anakhumelela. Soolokoha seiho sinnakhaviherya Nikhuuru Noolamulela wi nthanle miyaha taani inaphwanela othokororyiwa mu aliivuru amuhoolo, mmithukumano sa muloko ni sa muceche. Anna aneemelela Nikhuuru Noolamulela aniichaniwa ooweherya efiliyale annarumihiwa wi exekurye ifiliyale ni ovaha malakiheryo wa makhuuru a Ifiliyale okhwaaniherya mirici saya. (Masiposipo 11:14) Muthukumano wa vameekhaaya onaphitaanyerya mwaha onalociwa ni ooweherya a efiliyale onareheryiwa wi yaalipihe yaale anakhala mmapuro awaacamela efiliyale.

Efiliyale ennakhaviherya miloko. Anna oophwanelela mu efiliyale anneemererya ohuliwa wa miloko mivyaani ni othanliwa wa atokweene ni arummwa oorumeela. Anna annahoolela tho muteko wa mapiyoneero, mamisiyonaario, ni alipa ooweherya ikulucu yaawo anarumeela mmapuro a efiliyale anarumeelaayawo. Annarehererya tho mithukumano mitokotoko, otekiwa wa Ipa sa Omwene ivyaani, ni waaveleela aliivuru mmilokoni wi ekhwaaniherye soochuna saya. Echu eri yoothene eneeriwa ofiliyale ennakhaviherya okhwaaniherya muteko woolaleerya mwawiiwanana.​—1 Akorinto 14:33, 40.

• Nikhuuru na Efiliyale enakhaviherya hai Nikhuuru Noolamulela?

• Mirici taani inathokororyiwa o Filiyale?

Wi nlaleerye “mitchaka yaphama wa maloko othene n’nihimo ni ilochelo ni atchu,” hiyaano ninnaapaka aliivuru mu ilocelo soopwaha 750. (Yawupulula 14:6) Nnawerya hai okhwaaniherya muteko yoola wookacamiha? Ninnawerya ela nnikhaviheryo na anamarepa mu ilapo soothene nnikhuuru na alipa ootaphulela awiiveleela​—oothene Anamoona a Yehova.

Woopaceryani Soolaleeryiwa Sinakhala mu Enklesi. Nikhuuru Noolamulela ninnahoolela Nikhuuru Noorepa nri Opeteli etokotoko. Nla nnathanla anamarepa anarumeela Opeteli etokotoko ni mu ifiliyale sikina. Okhalano anamarepa oohiyanahiyana ennanikhaviherya orepa miyaha sinaavolowela achu a makhalelo oohiyanahiyana, mwawiihiiha aliivuru ahu annaasivela achu a maloko mancipale.

Soolaleeryiwa sinnakerihiwa wa alipa ootaphulela. Yamala oorempwa ni weemereryiwa, ennaveleeliwa mmaakinani wa makhuuru a alipa ootaphulela orukurerya elapo, yaawo anataphulela, waalikhela, ni waalakhanya. Awo anniilipixerya othanla ‘masu eparipari’ yaawo anahaala wooniherya yootaphulela yawaakhwanela ya Enklesi mu ilocelo saya.​—Eklesiyaste 12:10, BNM.

Ikhankoonya sinnaakuviha muteko. Ikhankoonya hasinawerya waaraceela achu ari anamarepa ni alipa ootaphulela. Nyenya muteko aya onnaakuveya moorweela wa ompharihela Tisionario, iprokrama, ni ichu ikina sa ikhankoonya. Anamoona a Yehova aamurehererya MEPS (Sistema Eletrônico de Fotocomposição Multilíngüe) moorweela wa yeela yoolaleeryiwa ennakawanyiwa mu ilocelo masana masaneene, ennareheryiwa mwawiichaalela, nave enuupaanyiwa wi ekumihiwe.

Ntakhara heeni ninniilipixerya otaphulela ophitaanyerya ilocelo inalociwa ni achu a vakhaani pahiru? Ntakhara eyo yookhwela ya Yehova wi “atchu othene evuluwe, wi ephiye voróra eparipari.”​—1 Timoteo 2:3, 4.

• Aliivuru ahu anarempwa hai?

• Ntakhara heeni hiyaano ninnaataphulela aliivuru ahu mu ilocelo sincipale?

Iyaakha soothene, marehereryo ahu annaapaka ni annaakawa masana masaneene a Apiipiliya ni aliivuru akina mahaleene. Ninnateka ni okhapelela Ipa sa Omwene ni ifiliyale. Ninnaakhaviherya tho macikhwi macikhweene a anna anakhala opeteli ni mamisiyonaario, navetho ninnavaha nikhaviheryo mu ilukuluku sa ipahu. Nyuwaano akhweya munniikoha: ‘Soothene iha sinliveliwa hai?’

Hinnaveka ikhorowa naari omuliviha tiisimu. Naamwi ichuneyaka ikhorowa sincipale wi ikhaviherye muteko ahu woolaleerya, hiyaano hinnaveka ikhorowa. Iyaakha nsana ivinre, Mulipeleli aaloca wi hiyaano ninnaroromela wi Yehova tonanikhaviherya nave “hinirwa naaveka achu nikhaviheryo”​—nave hinintonko weerano!​—Mateyu 10:8.

Miteko sahu sinakhaviheryiwa ni sooveleela soochuna. Achu ancipale annathamalela muteko ahu wa mahusiheryo a Piipiliya nave annakhaviherya mwa yeeyo. Anamoona Yehova moohakalala annavaha elukuluku aya, ikuru, ikhorowa, ni ichu saya sikina wi yeereno yookhwela ya Muluku veelaponi yoothene ya vathi. (1 Matharihelo 29:9) Mu Empa ya Omwene ni mmithukumano mitokweene, sinnakhalavo ikaaxa sa sooveleela wa yaale anachuna ovaha sooveleela saya. Naari sooveleela sinanwerya opakiwa moorwela wa site ahu jw.org. Wiiliwiili, ikhorowa sinaakheliwa sinavahiwa ni achu oothoiwa, ntoko naamukhwele oohaawa aalociwe ni Yesu yoowo aveleenle ikhorowa piili mu ekofiri ya muhakhu ya empa ya Muluku. (Luka 21:​1-4) Hiihaa muchu ori oothene onaphwanela okhalano yookhovelela ya ‘okhapelela mekheiye’ echu wi aveleele “ntoko murima awe onupuwelaya.”​—1 Akorinto 16:2; 2 Korinto 9:7, BNM.

Hinnakhwa minikwa wi Yehova onahaala otitelela otannya mirima sa yaale anakhwela ‘omutxitximiha yowo ni muhakhu aya’ wi ekhaviherye muteko wa Omwene wi yookhwela awe yeereye.​—Masiposipo 3:9, BNM.

• Tiheeni enahiyaniha marehereryo ahu ni ikerexa sikina?

• Sooveleela soochuna sinaphariheliwa muteko mwawiihai?

Ntoko enooniheryiwaaya nsina Empa ya Omwene, mahusiheryo a Piipiliya anahuseryiwa weiwo analoca sa Omwene wa Muluku yoowo waari muru wa orummwa wa Yesu.​—Luka 8:1.

Awo mapuro a malapelo eeparipari. Ovinyerya mwemmo, michaka yaphaama ya Omwene sinnalaleeryiwa. (Mateyu 24:14) Ipa sa Omwene ti soohiyana wunnuwa ni makhalelo, nyenya soothene ti soophwanelela, sincipale sinaphariheliwa muteko opwaha muloko mmoha. Iyaakha ivinre hiihaanoru, nooteka Ipa sa Omwene masana masaneene (waalakhanyerya thanu vanihikuni) wi saakhwaniherye winnuwa wa miloko sahu. Eyo enaweryeya hai?​—Mateyu 19:26.

Iho inatekiwa moorweela wa sooveleela ineeriwano ntakhara yeeyo. Sooveleela iho sinnarumihiwa ofiliyale wi ikhalevo ikhorowa sa okhaviherya miloko inachuna oteka naari oreherya Empa ya Omwene.

Iho inatekiwa ni achu awiiveleela oohiliveliwa oorweela mmukhalelo woothene wa okumi. Mu ilapo sincipale, Makhuuru Ooteka Ipa sa Omwene aareheryiwa. Makhuuru ooteka a arummwa ni awiiveleela annaya muloko ni muloko mpuwa mwa elapo, okhaviherya otekiwa Empa ya Omwene ya vanipuroni. Mu ilapo sikina annathanliwa anna oophwanelela wi ehoolele otekiwa ni oreheryiwa wa Ipa sa Omwene mpuwa mwa ilapo akaweliwaaya. Naamwi alipa a wiiveleela ooteka anarweela mu ilapo ikina toosuwelaxa, muteko wa anna a vamucecheni onnakhaviherya vancipale. Munepa wa Yehova ni wiilipiherya ni murima woothene wa achu awe onneeriha soothene iho weereya.​—Salmo 127:1; Akolose 3:23.

• Ntakhara heeni mapuro ahu a malapelo aniichaniwaaya Ipa sa Omwene?

• Onaweryeya hai oteka Ipa sa Omwene veelaponi yoothene?

Empa ya Omwene eri yoothene ya Anamoona a Yehova ennakuxa nsina naweela na Muluku. Mwawiihiiha, nnoona okhala ekari okhaviherya ni oreherya Empa ya Omwene okhala yaphaama nave ti echu yookhweleya mmalapelo ahu aweela. Oothene annaphwanela okhaviherya.

Mukhaviherye ovela samala mithukumano. Wamala muthukumano, anna ni arokora moohakalala annareherya Empa ya Omwene. Etila emoha va esumana, ennareheryiwa mwawaakhwanela. Mutokweene naari murummwa oorumeela tonahoolela muteko, acharihaka muteko onaphwanela weeriwa. Mwawiiwanana ni sookhweleya, achu anniiveleela wi evele, orapiha mpuwa, oviihamo nchupi, orehererya mipaco, etumpusi, orapiha ixanela ni makalasi, oriha ikokhola, ni oreherya vaate. Etila emoha vayaakhani ninnathanliwa nihiku na oreherya otokotoko. Moorweela wa okhaviherya muteko yoola, anamwane ahu, annahuserya ocicimiha nipuro na malapelo ahu.​—Eklesiyaste 5:1.

Mwiiveleele wi mukhaviherye muteko onakhweleya. Eyaakha eri yoothene, onnavareryiwa mukhalelo wa Empa ya Omwene vaate ni mpuwa. Moorweela wa ovarerya yoola, muteko wa oreherya onneeriwa wi empa ekhale phaama, ekhaviheryaka osepa sookhweleya soowalamela. (2 Matharihelo 24:13; 34:10) Empa ya Omwene yaweela ni yooreheryeya ti nipuro noophwanelela na omulapela Muluku ahu. Moorweela wa okhaviherya muteko yoola, ninnamusivela Yehova nave ninnacicimiha nipuro nahu na malapelo. (Salmo 122:1) Eyo tho ennavaha onamoona waphaama va mucecheni.​—2 Akorinto 6:3.

• Ntakhara heeni tahi waphaama ohireherya nipuro nahuna malapelo?

• Marehereryo taani anapakiwa wi neelihe Empa ya Omwene?

Munnachuna otholathola wi mwaaceererye nsuweliho nanyu na Piipiliya? Muri ootikhiniheya vooloca sa yoorepa naari muchu, nipuro, naari echu eromoliwe Mpiipiliyani? Montoko wiikoha wakhala wi Masu a Muluku ananwerya wookhaviheryaani omaliha makacamiho anyu? Mwa yeeyo haweni o nipuro na aliivuru na Empa ya Omwene.

Sookhalawo ikaruma saphaama sa otholathola. Akhweya, himwaanono aliivuru oothene arino mathipelo a Piipiliya a Anamoona a Yehova mu elocelo anyu. Nyenya nipuro na aliivuru na Empa ya Omwene aakhalawo aliivuru ancipale apakiwe mu elocelo anyu. Nyenya nipuro na aliivuru na Empa ya Omwene aakhalawo aliivuru ahiihaanoru. Nookhalano Apiipiliya oohiyanahiyana, Tisionario aphaama, ni aliivuru akina ookhaviherya. Nyuwaano muri ootaphuwa wi mwaapharihele muteko aliivuru yaawo ihaakumve opacerya naari imanle mithukumano. Wakhala wi komputatore ookhalawo, owo ookhalano Watchtower Library. Eyo eprokrama ya maakina erino aliivuru ahu ancipale nave okhweya opharihela muteko wi moone mwaha, masu, naari yoorepa.

Awo annaakhaviherya anaxikola a Okumi ni Muteko. Nyuwo munanwerya waapharihela aliivuru a Empa ya Omwene vaavaa munarehereryaanyu miyaha sanyu. Mulipa oohoolela Okumi ni Muteko Woolaleerya tonathokororya aliivuru. Owo torino murici wa osuwela wakhala wi aliivuru avyaani aakhalavo nave aareheryiwa phaama. Owo naari muhusiha anyu a Piipiliya onanwerya wookhaviheryaani ophwanya miselo munachunaanyu. Nyenya, haavo liivuru onaphwanela ovihiwamo mu nipuro na aliivuru mu Empa ya Omwene. Nave tho, hiyaano nnaphwanela waathokororya phaama aliivuru nave hinnaphwanela waarepa.

Piipiliya onaloca wi naariki ‘nimusuwele Muluku,’ nnaphwanela wiilipixerya waavyaavya ntoko “muhakhu” woovitheya. (Masiposipo 2:1-5, BNM) Aliivuru a Empa ya Omwene anahaala wookhaviheryaani opacerya otholathola.

• Ikaruma taani sa otholathola iri mu nipuro na aliivuru na Empa ya Omwene?

• Taani onahaala wookhaviheryaani waapharihela phaama aliivuru?

Yesu Kiristu aahaaleela omuchara awe wi “mwáryihe omwaléla wanyu va mithoni va atchu, wi vawona miteko anyu yaphama, yachichimihe Atithinyu a Wirimu.” (Mateyu 5:16) Ni yookhwela yeeyo, hiyaano ninnapharihela phaama ikhankoonya sa mutano, ophitaanyerya interneti. Site ahu, jw.org/ngl, eri ehime ya interneti vooloca sa miselo sa soororomela ni miteko sa Anamoona a Yehova. Tiheeni enaphwanyeyamo?

Maakhulo a Piipiliya a makoho anapakiwa wiiliwiili. Munahaala ophwanya maakhulo a makoho ookhweleyaxa yaawo achu anapakaaya. Ntoko yootakiherya, itrataatu Makacamiho anahaala omala? ni Alipa ookhwa anamukookela okhala akumi chiryene? sinnaphwanyeya mu interneti mu ilocelo soopwaha 600. Nyuwaano tho munahaala omphwanya Tradução do Novo Mundo mu ilocelo soopwaha 130 ni aliivuru anakhaviherya omuhuserya Piipiliya, ophitaanyerya liivuru Piipiliya Onahusiha eheeni chiryene? ni irevista ivyaani Mulipeleli ni Despertai! Aliivuru ancipale ananwerya waalakhanyiwa naari owiriyaniwa mu interneti naari oheliwa mu itisku, MP3, PDF, naari EPUB. Nyuwaano munanwerya okumiha ipaaxina vakhaani wi mukawane ni muchu onachuna mu elocelo awe! Ixilema sa aliivuru sookhalavo mu ilocelo soohiyanahiyana sa ineneeryo. Nyuwo munanwerya owiriyana waalakhanyiwa wa Piipiliya ntoko etrama, itrama sa Piipiliya, opuha muusika wooreera mu elukuluku yootaphuwa.

Miselo seeparipari vooloca sa Anamoona a Yehova. Sookhalamo tho miyaha mivyaani ni ixilema vooloca sa muteko ahu veelaponi yoothene, saweereya sinaaphacuwela Anamoona a Yehova, ni wiilipiherya wahu okhaviherya wa ikharari. Nyuwaano munahaala ophwanya soolokoha sa mithukumano mitokotoko sa muhoolo ni miselo vooloca sa ifiliyale sahu.

Moorweela wa ikaruma iha, hiyaano ninneeriha wi omwaleela wa eparipari waarye ophiyerya makupa oorakamela a elapo ya vathi. Achu oorweela ilapo soothene, ophitaanyerya Antartika, anniiphwanyerya. Hiyaano ninnavekela wi “masu a Apwiya yakuveyeke” mu elapo yoothene ya vathi, wi Muluku acicimihiwe.​—2 Atesalonika 3:1.

• Mukhalelo taani jw.org/ngl onaakhaviheryeiye achu ancipale ohuserya eparipari ya Piipiliya?

• Tiheeni munachunaanyu waavyaavya mu Site ahu?