Samuwele Aatitelela Weera Yeeyo Yaari Yaphaama

Samuwele ovinyerya ari mwaana, owo aakhala nave aalapa mu mukocha, nipuro nenlo achu yaayaayawo omulapela Yehova. Woosuwela ti heeni yeerinhe wi Samuwele akhaleke mmukocha? Haya nipacerye ohuserya vooloca sa Ana, amannya Samuwele.

Mu elukuluku yincipale, Ana haawerya okhalano mwaana naamwi aachuna okhalano. Nto owo aavekela wa Yehova ni wiikhupanyerya wi amukhaviherye. Ana aaroromeliha wi akhalano mwaana amwaamulopwana, aahaala omveleela owo wi akhaleke nave arumeeleke mmukocha. Yehova aahaakhula nivekelo nawe, nave owo aakhalano mwaana amwaamulopwana. Ana aamuchuwa nsina nawe Samuwele. Nave hiihaa ntoko aaroromelinheiye, vaavaa Samuwele aareiyeno iyaakha chaaru nari xexe sa oyariwa, amannya yaamukeriha o mukochani wi amurumeeleke Muluku mwemmo.

Heli aari mutokweene aanamukucho mmukochani. Anamwane awe apiili yaarumeela tho mwemmo. Wuupuwele, mukocha yaari empa ya malapelo a Muluku, nave achu yaaphwanela weeraka ichu saphaama mwemmo. Nnya anamwane a Heli yeera ichu soonanara vancipale. Samuwele aanoona ichu seiyo awo yeeraaya. Mano Samuwele aaheera ichu soonanara ntoko anamwane a Heli yeeraaya?— Hooye, Samuwele aatitelela weera yeeyo yaari yaphaama, hiihaa ntoko asitiithi awe yaamuhusinhaaya.

Onuupuwela wi Heli aphwanela weera eheeni ni anamwane awe apiili?— Heli aaphwanela waalaka awo. Owo haaphwanela waahiya awo orumeela mmukocha. Nnya Heli heenreno hiiha, nto Yehova aananariwa ni Heli vamoha ni anamwane awe apiili. Yehova aalakelela waalaka yaawo.

Ohiyu omoha Samuwele akonaka, aamwiiwa muchu amwiichanaka: ‘Samuwele!’ Samuwele aachimakela wa Heli, nnya Heli aaloca: ‘Nkiwiichanne’. Ela yaaheereya itila piili. Etila yaneeraru, Heli aahimuleela Samuwele wi wakhala wi ohiiwa nsu nlo etila ekina, owo aaphwanela waakhula: ‘Locani Yehova, mi kinniiwa.’ Ti yeeyo Samuwele eenreiye. Nto Yehova aahi wa Samuwele: ‘Omuleele Heli wi Mi kinahaala olaka emusi awe nthowa na ichu soonanara aneeraaya.’ Onuupuwela wi waari wookhweya Samuwele omuleela Heli muchaka yoola?— Hooye, hiwaari wookhweya. Nnya naamwi Samuwele aanoova, owo aaheerano yeeyo Yehova aamulenleiye weera. Yeeyo Yehova aalonceiye yaaheereya. Anamwane apiili a Heli yaahiiphiwa, navetho Heli aakhwa.

Samuwele yootakiherya yaphaama wa hiyo. Samuwele aaheera yeeyo yaari yaphaama naamwi awoonaka achu akina yeeraka ichu soonanara. Hanka we? Onahaala okhala ntoko Samuwele nave otitelela weera yeeyo eri yaphaama? Weerano hiiha, onahaala omuhakalaliha Yehova vamoha ni asitiithi aa.