NIKOHO 4
Tiheeni Kinaphwanelaaka Weera Kapaka Yoonanara?
WAAHAALA WEERA EHEENI?
Waanyiherye yaweereya ela: Kapriyele onamvonya mphirya ni asinthamwene awe: Ni osiveliwa vancipale owo onnamvonya ni ikuru nave mphirya onnapwexa nikalasi na exanela ya mwaacamani awe.
Waakhanle wi weyaano wa Kapriyele, tiheeni waaphwanelaawe weera?
WUUPUWELE ELA!
OTHANLE YAWEERA:
Ochawa?
Omootherya muchu mukina?
Omuleela mwaacamani wi weyaano wenreno, ni wiivaha oliva?
Akhweya onahaala othanla yaweera yoopacerya: Ochawa! Nyenya ti yaphaama olokoha echu eri yoothene wenraawe.
MATHOWA MARARU A WEMERERYA YOOHESA
Teri echu yoophwanela weera.
Piipiliya oni: “Ninnakhwela wetxa ni wokololowa mwa sothene.”—Ahebri 13:18.
Ti wookhweya omulevelela muchu oneemererya yoohesa awe.
Piipiliya oni: “Onavitha sonanara sawe, onamutakhaliwa; onalokoha seiho ni atxharuwa, onamuleveleliwa.”—Masiposipo 28:13.
Nthowa ntokweene ti wi eyo ennamuhakalaliha Muluku.
Piipiliya oni: “Apwiya annùlumela etxheko ya mutakhali, nto anarèliha etxheko ya mutxhu awokololowa.”—Masiposipo 3:32.
Karina a iyaakha 20 sa oyariwa, aalivihiwa nthowa na opwaha mphimo wa weeciha ekaaro. Nyenya owo haalenle atiithi awe, nave haawenrye wiipithiha elukuluku yoothene. Owo onnathariha: “Ovinre muyakha mmoha apapa yaasuwela wi kaahilivihiwa nthowa na opwaha mphimo wa weeciha nave miyaano kaatepa weeteteya!”
Tiheeni nnahuseryaahu? Karina ooloca: “Ovitha yoohesa ahu waaceererya makacamiho. Naamwi muchu alekelakaru onawehererya oliva yoohesa awe!”
OHUSERYEVO ECHU MOORWEELA WA SOOHESA SAA
Piipiliya oni: “Ntakhara tinnakwachuliwahu othene hi va itchu sinchipale.” (Yakobo 3: 2, Nlakano Nahihano) Ntoko nonnaahu, ti yaphaama weemererya yoohesa ahu mwawaakuveya—eyo ennooniherya wiiyeviha ni ncicimiho.
Yoocharela ori ohuseryavo echu orweela soohesa saa. Mwali mmoha awiichaniwa Vera ooloca ariki: “Wakhala wi koheera echu yoonanara, kinneererya ohuseryavo echu. Eyo ennakikhaviherya okhala muchu oophwanelela ni weerano ichu mmukhalelo woohiyana ekwaha ekina.” Vano noone ti mwawiihai onahaalaawe weerano yeeyo.
Waanyiherye wi woopoleya ecika ya atiithi aa nave enanara, tiheeni waahaalaawe weera?
Ohiloca echu, wuupuwelaka wi awo heni yoone.
Olokoha echu yeeren’ye.
Omootherya muchu mukina.
Waanyiherye wi howenrye opaka phaama eporova oxikola nthowa na ohihuserya, tiheeni waahaalaawe weera?
Oloca wi yaatepa owalamela.
Weemererya wi hiwaahusenrye phaama.
Oloca wi muhusiha ohookhalela nrima.
Wuupuwelela yoohesa elukuluku yincipale ori ntoko mulipa aweeciha yoowo oneeciha awehaka va eweheryo elukuluku yoothene
Vano waanyiherye wi ori vamiithoni va atiithi ni muhusiha. Yaahaala woona hai wakhala wi woheemererya soohesa saa? Vano yaahaala woona hai wakhala wi wookhuwa soohesa saa?
Vano wuupuwele yoohesa wenraawe muyakha ovinre nave waakhule makoho ala:
Yoohesa taani wenraawe, nave waamalinhe hai?
Mi nkaalokonhe.
Kaamoothenrye muchu mukina.
Kaalokoha moohilekela.
Waakhanle wi waakhuwa yoohesa aa, woonne hai voocharela?
Kahoopowa mu ohooxeya!
Kaaniisoona okhalano nthowa.
Tiheeni waaphwanelaawe weera wi wookolole?
Tiheeni ohusenryaawe orweela yoohesa yeeyo?
ONOONA HAI?
Ntakhara heeni achu akina annoovelela weemererya soohesa saya?
Tiheeni achu anahaalaaya wuupuwela wakhala wi onnakhuwa soohesa saa, nave tiheeni achu anahaalaaya wuupuwela wakhala wi onneemererya soohesa?—Luka 16:10.