MWAHA WA EKAAPA | MULUKU ONNAWUUPUWELAANI NYUWO?

Muluku Onnawoonaani

Muluku “onnóna metxelo ahu othene.”​—YOBI 34:21, BNM.

NTAKHARA HEENI AKINA ANNAKHWA MINIKWA: Mwawiiwanana ni yoohuserya ya hiihaanoru, erimu ahu pahiru yookhalano ilapo sawaakhwana macikhwi macikhweene. Esuwelaka wunnuwa wa elapo, achu ancipale annakoha, ‘Ntakhara heeni Mpatuxa aikuru soothene aahaaleiye woona yeeyo achu aneeraaya mu elapo ekhaani?’

MASU A MULUKU ANAHUSIHA EHEENI: Muluku tahi wi orimoona onivaha Piipiliya pahiru avinyaka anihiya. Moohiyana, Yehova onnanroromeliha: “Miyo kinarwa-kothoriherya ni wohusiha weyo sa mphiro oniriá wecheke’mo; Kinolélano n’nitho naka nawoweha weyo.”​—Salmo 32:8.

Mmuthokororye Hakari, muthiyana a Yiikuputu a nsana 20 E.E.K. Hakari hamucicimiha pwiya awe, Sarai, mwawiihiiha Sarai aamvevula, nave Hakari aachawela mutakhwani. Woona wi Hakari aahesa, apwanne Muluku aahiya ompwacha? Piipiliya onnaloca: “Munkelo a Apwiya àmona Hagari.” Munkeelo yoowo aamuroromeliha Hakari alocaka: “Apwiya àwìwa mokhuwelani mwà.” Vano Hakari aahi wa Yehova: “Weyano wa Muluku onakònà.”​—Maphatxuwelo 16:4-13, BNM.

‘Muluku awoona’ onnawoonaani nyuwo tho. Wi nlikanyihe: Maai oosivela onnawoona anamwane awe akhaani, nikwiya ninnachuna vancipale opwacha wa asitiithi awe. Moolikana, Muluku onnanoona xaxaxa vaavaa nnakhalaahu awuukhuwa ni oohasuwa. Yehova onnaloca, “Miyano kimanke osulu weiwo ni kiri aphama, nto kiri ni atxhu ohosiwa ni òyevihiwa wi kavahe ikuru ni nroromelo.”​—Isaiya 57:15, BNM.

Akhweya, nyuwaano munanwerya okoha: ‘Muluku onakoona hai? Apwanne owo onakithoriha orweela wa omuchu aka wa vaate, naari wi onniiwexexa omuchu aka chiryene?’