MWAHA WA EKAAPA | MULUKU ONNAWUUPUWELAANI NYUWO?

Muluku Onnawiiwexexaani

“Mwákálikhela, Yehova, nave mwákisuwela.”​—SALMO 139:1.

NTAKHARA HEENI AKINA ANNAKHWA MINIKWA: Achu ancipale anoona wi Muluku onawoona achu pahiru ntoko alipa oocheka​—ooriipiheya ni oohiphwanela opwachiwa ti yoowo. Kentra, yoowo aahooxeya ni wuukhuwa mmuupuweloni, aahiivaha nthowa ntakhara haawerya wiiwelela moophaameya malamulo a Muluku. Ntoko yookhumelela, owo aaloca, “kaahiya ovekela.”

MASU A MULUKU ANAHUSIHA EHEENI: Yehova onoona opwaha ohiphaameya wanyu nave onniiwexexa mukhalelo anyu chiryene. Piipiliya onnaloca: “Ntakhara tanasuweliye maphachuwelo ahu; Annupuwela wi hiyo na ntchupi.” Mwawaacererya, Muluku hananeerela “ntoko mwa marapwa ahu,” nyenya owo mwa ikharari onnanikhurumuwela vaavaa nnacharuwaahu.​—Salmo 103:10, 14.

Mmuthokororye Tavite, mwene a Isarayeli oromoliwe mmwaha woopacerya. Mu nivekelo wa Muluku, Tavite aaloca: “Kihákuvale wupiwa miyo mitho anyu yákóna, Sam’mwílini saka sothene sárempwa m’livro mwanyu . . . Mukalikhele, Muluku, nave musuwele murima aka.” (Salmo 139:16, 23) Aai, Tavite aalekecheya wi naamwi aacheka​—ikwaha ikina soocheka itokotoko—​Yehova aanawerya woona murima awe woocharuwa.

Yehova onnawiiwexexaani phaama opwaha muchu mukina. “Mutxhu onòna iri sawòneya,” onnaloca Piipiliya, nyenya “Apwiya anòna murima.” (1 Samuwele 16:7, BNM.) Muluku oosuwela yeeyo enaweerihaani weera ichu​—muyareriwo anyu, ophuiwa wanyu, mukhalelo anyu, ni omuchu anyu, soothene iha sinnoovolowelaani ntoko muchu. Muluku onnoona nave onnacicimiha omuchu muniilipixeryaanyu okhala, naamwi muhesaka.

Muluku onapharihela hai wiiwexexa wawe mwawiiseela vooloca sa omuchu anyu wi oohakararyeeni?