Mmurumeele Muluku Moororomeleya Moohipwacha “Sohosha Sinchipale”

“Ni sohosha sinchipale ninnaphwanela ovolowa mu’mwene wa Muluku.”​—SAW. 14:22.

MWAHAALA WAAKHULA HAI?

Taani onatannya soohooxa sahu?

Nnii niireherye hai ohooleela wiikariwa ni ovootha okhulumuwa?

Tuuvi onii akhale phatamari wa yaale anavilela soohooxa?

1. Ntakhara heeni yoohooxa tahi yootutuxa wa alapeli a Muluku?

APWANNE ennawuukhulaani osuwela wi munaphwanela okumana ni “sohosha sinchipale” muhaakumve omwaakhela phatamari a okumi woohimala? Akhweya hooye. Moohipwacha waakhanle wi mvolonwe hiihaanoru mweeparipari naari mwa mulapeli a Yehova ovinyerya khalai, nyuwaano moosuwela wi makacamiho makupa a okumi mweelapo ya Satana.​—Yaw. 12:12.

2. (a) Mwawaacererya soohooxa seiyo inaavolowela achu oothene oohiphaameya, mukhalelo taani wa ohooxa Akiristu anakumanaayano? (Moone eruku yoopacerya.) (b) Taani ori oculi wa soohooxa sahu, nave nnasuwela hai?

² Ophitaanyerya makacamiho ‘omutchu’​—soohooxa seiyo sinaavolowela achu oothene oohiphaameya—​Akiristu annakumana ni mukhalelo mukina wa yoohooxa. (1 Akor. 10:13) Yoohooxa taani? Wiikariwa otokweene nthowa na wiiwelela waya malamulo a Muluku. Yesu aaloca wa oohuserya awe: “Kapuro hari mtokotoko opwaha Pwiya’we. Khwino yákihosha Miyo, enarwa-yohoshani nyuwo’tho.” (Yoh. 15:20) Taani ori oculi wa wiikara wuuwu? Chiryene, ti Satana, yoowo Piipiliya onamuloceiye ntoko “mwacho awunla” yoowo “onechécha” wi aamirye achu a Muluku. (1 Pet. 5:8) Satana onahaala opharihela mukhalelo woothene onaweryeiye wi eererye onanariha nroromelo na oomuchara Yesu. Muthokororye yeeyo yeeren’ye ni murummwa Paulo.

YOOHOOXA O LUSTRA

3-5. (a) Yoohooxa taani Paulo aakumanneiyeno o Lustra? (b) Mmukhalelo taani muchaka awe vooloca sa soohooxa soomwaahiyu waaryaaya woolipiha?

³ Opwaha ekwaha emoha, Paulo ahiikariwa nthowa na nroromelo nawe. (2 Akor. 11:23-27) Yaweereya emoha yaari o Lustra. Amanle ompenuxa mulopwana yoowo aari oorakala opacerya wooyariwani, Paulo ni nthamwene awe Parnapa yaacicimihiwa ntoko miluku. Oopiili yaaveka muloko yoole wootikhiniheya wi ohaathamalele! Voohilekela, amwiicani Ayuuta yaaphiya, nave awo yaapharihela mavyakelo wi yuutuwele muupuwelo wa achu. Mwawaakuveya yaatorokeya! Achu vano yaamvonya Paulo maluku nave yaamuhiya ntoko ookhwa ene.—Saw. 14:8-19.

⁴ Amanle omuxekurya Terpe, Paulo ni Parnapa “yákókela o Lustra ni Ikoniyo ni Antiokeya, elipiha mirima ya óhuserya, yáchenyerya wi ekhaleru mu nroromelo, wi’tho ni sohosha sinchipale ninaphwanela ovolowa mu’mwene wa Muluku.” (Saw. 14:21, 22) Woopaceryani, masu yaala anakhala ntoko ooceecheiha. Ewehereryo ya okumana ni “sohosha sinchipale” yahaala wooniwa ntoko ookhulumula, ohiya oolipiha. Nave, ti mwawiihai, Paulo ni Parnapa ‘yalipinhaya mirima ya óhuserya’ ni muchaka yoowo waaloca vancipale sa ohooxa?

⁵ Nnanwerya ophwanya naakhulo wakhala wi noovarerya moomaaleleya masu a Paulo. Owo haariye pahiru: “Nnaphwanela ovilela sohosha sinchipale.” Ohiya yeeyo, owo aariye: “Ni sohosha sinchipale ninaphwanela ovolowa mu’mwene wa Muluku.” Mwawiihiiha Paulo aahaalipiha oohuserya orweela wa ocicimiherya yookhumelela yaphaama ya okhala oororomeleya. Phatamari yoowo haari echu ya waanyiherya. Chiryene, Yesu aaloca: “Yowo óvilela ophiyerya makutchuwelo, yola anarwa-avulushiwa.”—Mat. 10:22.

6. Phatamari taani iyaathiwe wa yaale anahaala ovilela?

⁶ Wakhala wi noovilela, nnahaala okhalano phatamari. Wa Akiristu awoocihiwa, phatamari aya ori okumi woohikhwa wirimu ntoko alamuleli ni Yesu. Wa “ipuchepuche sikina,” phatamari aya ori okumi woohimala veelaponi yavathi “mummo munitchála’mo ekhaikhai.” (Yoh. 10:16; 2 Pet. 3:13) Ntoko Paulo olonceiye, hiyaano nnahaala okumana ni soohooxa sincipale mweelukuluku yeela. Nthokororye makhalelo meeli a soohooxa nnahaalaahu okumanano.

OHIPHELA WAWOONEYA

7. Mukhalelo taani wa ohooxa onawerya olociwa ntoko ohiphela wawooneya?

⁷ Yesu aaloherya: “Enarwa-yovelélani nyuwo wa atokwene a milachu; nave enarwa-yowashulani mothukumanela; nave okhoveni wa achamasuwa ni mwamwene.” (Mar. 13:9) Ntoko masu yaala anooniheryaaya, Akiristu akina anahaala okumana ni soohooxa ntoko wiikariwa woomwiilini, akhweya orweela wa ahooleli a malapelo ni a elapo. (Saw. 5:27, 28) Muthokororye yootakiherya ya Paulo wanawiili. Apwanne owo aaceecheya ni muupuwelo wa okumana ni wiikariwa? Hooye chiryene.​—Mwaalakhanye Saweriwa Tarummwa 20:22, 23.

8, 9. Paulo oonihenrye hai wi aari oolakelela ovilela, nave akina mmahiku ahu yoonihenrye hai olakelela woolikana?

⁸ Paulo moolipa murima aavilela ohiphela wawooneya wa Satana nave aloca: “Nyenya nto nkinera wi okumi aka titchu, wi tiwasisapo aya wa miyo mekhaka; wi kakutchule ephiro aka, ni orummwa kákhenlaka wa Apwiya Yesu, werela namona Mitchaka yaphama ya ikharari sa Muluku.” (Saw. 20:24) Mwawooneya, Paulo haari ookhulumuwa ni ewehereryo ya wiikariwa. Moohiyana, owo aari oolakelela ovilela, moohipwacha yeeyo yahaala weereya. Yawuukhula awe yoopacerya waari “werela namona” moohipwacha ohooxa vyakala.

⁹ Olelo, anna ni arokora ahu ancipale yaahooniherya olakelela woolikana. Ntoko yootakiherya, mweelapo emoha Anamoona akina yaavilela iyaakha 20 ewaleliwe nthowa na okhapelela ororomeleya waya. Mwaha aya hiwitonko othokororyiwa, woona wi elapo yeele hiyaarino marehereryo wa yaale anakhooca nthowa na yawuupuxerya-ya-murima. Vaavaa yaaraaya mukariposo, awo yaawatiihiwa oxekuryiwa ni amusi, nave akapuro akina yaanamaniwa nave yaanahooxiwa mmakhalelo oohiyanahiyana.

10. Ntakhara heeni hannaphwanela woova soohooxa sootutuxa?

¹⁰ Anna ahu mmapuro makina annavilela tho soohooxa seiyo inakhumelela mootutuxa. Wakhala wi eyo yoheereya ni nyuwaano, muhimorele mu woova. Muupuwele sa Yoosefe. Owo aatumihiwa wookapuroni, nyenya Yehova “amwakiha yowo mu sohosha sawe sothe sene.” (Saw. 7:9, 10) Yehova onanwerya weera emohamoha wa nyuwaano. Muhirwe muciwale wi “Apwiya annasuwela wavulusha alipa-othamalela enehiwaya.” (2 Pet. 2:9) Mano nyuwaano munahaala otitelela omuroromela Yehova, musuwelaka wi owo onanwerya owopolaani mmukhalelo yoola wa ichu ni wohiyaani wi mpuhe okumi woohimala vathi wa olamulelo wa Omwene awe? Nyuwaano mookhalano mathowa oothene a ororomela ni ovilela wiikariwa moolipa murima.—1 Pet. 5:8, 9.

OHIPHELA WOOVITHEYA

11. Ohiphela woovitheya wa Satana onahiyana hai ni ohiphela wawooneya?

¹¹ Mukhalelo mukina wa wiikariwa yoowo nnahaalaahu okumanano onaphitaanyerya ohiphela woovitheya. Ola onahiyana hai ni ohiphela wawooneya wa wiikariwa woomwiilini? Wiikariwa wawooneya ori ntoko epahu enavolowa mu epooma ni okumula empa anyu mwawaakuveya. Ohiphela woovitheya ori ntoko oweexe yoowo vakhaani-vakhaani onalya miri sa empa anyu ophiyerya okumula. Ni oweexe, muchu akhweya hanawerya woona yawoopiha ophiyerya oxilevo.

12. (a) Tuuvi ori mukhalelo mmoha woovitheya wa Satana, nave ntakhara heeni annamukumiherya mphurelo? (b) Paulo aavoloweliwe hai ni okhulumuwa?

¹² Satana ahaala osiveliwa onanariha onthamwene anyu ni Yehova, ni ohiphela wawooneya wa wiikariwa naari moorweela wa okhulumula nroromelo nanyu vakhaani-vakhaani moorweela wa ohiphela woovitheya. Mavyakelo mamoha oovitheya yaawo Satana onaphariheleiye ni mphurelo ori okhulumuwa. Murummwa Paulo aaheemererya wi aakhala ookhulumuwa ilukuluku ikina. (Mwaalakhanye Aroma 7:21-24.) Vano, ntakhara heeni Paulo​—“mutokweene” mmunepani yoowo aari a nikhuuru noolamulela na nsana noopacerya—​aahiiseera ntoko “mutchu óháwa”? Paulo aaloca wi iisoona mmukhalelo yoola nthowa na soohiphaameya sawe. Owo chiryene aanachuna weerano yeeyo yaari yaphaama, nyenya aanoona ikuru ikina iwanawanaka moovanyihana ni yoowo. Wakhala wi ilukuluku ikina nyuwaano munnawana ni moonelo yoola, apwanne hamunoona okhala yoolipiha osuwela wi murummwa Paulo aakumana ni nikacamiho nimohamoha?

13, 14. (a) Tiheeni enaweeriha achu akina a Muluku okhala ookhulumuwa? (b) Taani onachuna woona nroromelo nahu nipwante, nave ntakhara heeni?

¹³ Ilukuluku ikina, anna ni arokora ancipale annoona okhala ookhulumuwa, awuukhuwa, nave akhweya oohiphwanelela. Ntoko yootakiherya, piyoneero amvai awiichaniwa Teepora aaloca: “Kaanuupuwela wiiliwiili yoocheka kenraaka, kiisoona okhala oohiphwanelela elukuluku yoothene. Vaavaa kinuupuwelaaka yoocheka aka, eyo ennakeeriha woona wi haavo ahaala owerya okisivela, ophitaanyerya Yehova.”

¹⁴ Tiheeni enaweeriha arummwa akina amvai a Yehova, ntoko Teepora, okhala ookhulumuwa? Aakhalavo mathowa mancipale. Akina pahiru arino yookhovelela ya wuupuwela moonanara vooloca sa yaawo ni mukhalelo wa okumi aya. (Masi. 15:15) Wa akina, muupuwelo woonanara onnavolowela okumi ni moonelo aya. Moohipwacha nthowa nene, hiyaano nnaphwanela omuupuwela yoowo onachuna opharihela moonelo yoowo. Taani chiryene onachuna wi nikhulumuwe ophiyerya oviliwa? Taani onachuna wi nyuwaano moone ohokola wa othorihiwa onamuhokola yoowo? (Yaw. 20:10) Aai, ti Satana. Eparipari ti wi, moorweela wa ohiphela wawooneya naari ohiphela woovitheya, Satana orino yoolakelela emohamoha​—onoopopiha, oceecheiha mvai ahu, ni oneeriha oviliwa. Mweeparipari, achu a Muluku anawana ekhoco yoomunepani!

15. Nnii nooniherye hai wi nri oolakelela ohivoothiwa ni okhulumuwa?

¹⁵ Khalani oolakelela wi mutitelele owaniha. Munaweherya omwaakhela phatamari. Paulo aahaarepela Akiristu o Korinto: “Ntakhara awe hannachétcheya; nyenya nari omutchu ahu wavate onnúcha, wa mpuwa mwahu onnareheryiwa mwa hihano nihiku n’nihiku. Vawi yonihósha ahu yoveya velukuluku tonto ennanerela hiyo olimela wopwaha otokotoko ni wohimala wa nchichimiho.”​—2 Akor. 4:16, 17.

MWIIREHERYE HIIHAANO WA YOOHOOXA

16. Ntakhara heeni ti woochuneya wiireherya hiihaano wa yoohooxa?

¹⁶ Ntoko noonnaahu, Satana ookhalano “maphyakelo” mancipale. (Aef. 6:11) Mmoha ti mmoha a hiyo onaphwanela ochara olopola onaphwanyeya mu 1 Petro 5:9: “M’mukhoche ókilatheya mu nroromelo.” Wi neereno yeeyo, hiyaano nnaphwanela oreherya muupuwelo ni murima ahu, wiivyakiha hiihaano wi neereno yeeyo eri yaphaama. Wi nlikanyihe: Nikhuuru na anakhoco nnaphwanela wiivyakiha wiiliwiili ekhoco ehaakumve. Eyo ti yoolikana ni anakhoco oomunepani a Yehova. Hiyaano hannasuwela yeeyo ekhoco ahu enahaalaaya ophitaanyerya omwaahiyu. Vano, apwanne tahi ya miruku wiivyakiha mweelukuluku yeela ya murecele vakhaani? Paulo aahaarepela Akorinto: “Mwisónéni mekhinyu, mwari mu nroromelo, mwititelelihe mekhinyu.”​—2 Akor. 13:5.

17-19. (a) Mmakupa taani nnaphwanelaahu wiisaalikhela mukhatiihu? (b) Amiravo anahaala wiireherya hai wi yaakihe nroromelo naya oxikola?

¹⁷ Mukhalelo mmoha wa ochara ekano yooveereliwa ya Paulo ori wiisaalikhela phaama. Mwiipakele meekhinyu makoho ntoko ala: ‘Kinnavilela mu mavekelo? Vaavaa kinakumanaaka ni okhinyererya wa asinthamwene, kinnamwiiwelela Muluku ntoko mulamuleli ohiya achu? Kinnaphwanyeya mmithukumano Seekiristu moohihiyererya? Kinnaloca soororomela saka moolipa murima? Kinniilipixerya ohithokororya soohiphaameya sa Akiristu akhwaaka—hiiha ntoko awo ahinathokororyaaya saaka? Kinnawiiwelela yaale anahoolela muloko aka ni yaale anahoolela muloko wa elapo yoothene?’

¹⁸ Moone wi makoho meeli analoca sa waakiha soororomela sahu moolipa murima ni ovilela okhinyererya wa asinthamwene. Amiravo ahu ancipale anaphwanela weerano hiihaa oxikola. Awo annahuserya ohikhala awoova naari wuukhuwa vooloca sa soororomela saya. Moohiyana, awo annaloca moolipa murima. Miruku sookhaviherya mmwaha yoola sinnalaleeryiwa mu irevista sahu. Ntoko yootakiherya, Despertai! a Yulyo 2009 aaloca wi wakhala wi nthamwene ooxikola ookoha: “Ntakhara heeni honeemererya othatuwa?” nyuwaano mwaahaala waakhula: “Ntakhara heeni kaaphwanelaaka weemererya othatuwa? Alipa oohuserya haniiwanana mwa yeeyo, nave awo anooniwa ntoko anamasuwela!” Asitiithi, munaavyakiha anamwane anyu wi ekhale ooreheryeya ovootha okhinyererya wa asinthamwene aya ooxikola.

¹⁹ Mweeparipari, tahi yookhweya ilukuluku soothene oloca naari weera ichu ikina Yehova onanivekeiye. Nimalinhe nihiku noothene omutekoni, akhweya onachuneya wiiphara oya mmithukumano. Onanwerya okhala woovila ovinya woosiselo wi niphwanyeye mu orummwa. Nyenya muupuwele: Wakhala wi mohunnuwiha sookhovelela soomunepani woosiilo, vaavaa anakhumelelaaya makacamiho matokweene omwaahiyu, nyuwaano munahaala owerya ovootha.

20, 21. (a) Ti mwawiihai wuupuwelela woopola onanwerya onikhaviherya ovootha moonelo woonanara? (b) Tiivi enaphwanela okhala yoolakelela ahu vooloca sa soohooxa?

²⁰ Hanka vooloca sa ohiphela woovitheya? Nnii niwerye hai owanano moonelo wa okhulumuwa? Mukhalelo mmoha wakuruxa wa weerano yeeyo ori wuupuwelela woopola. Ti yeeyo murummwa Paulo enreiye. Owo aasuwela mukhalelo isooneiye ilukuluku ikina​—oohaawa. Nyenya aasuwela tho wi Kiristu aakhwa, ohiya ntakhara achu oophaameya, nyenya wa alipa oocheka. Nave Paulo aari mmoha a alipa oocheka yaawo. Mweeparipari owo aarepa: “Okumi yowo kiryakano hihano m’mwílini kirino mu nroromelo na Mwana a Muluku, yowo ákisivenle, íleva mekhiye ntakhara a miyo.” (Akal. 2:20) Aai, Paulo aaheemererya woopola. Owo aaroora wi woopola waanamvolowela yene mukhateiye.

²¹ Moonelo mmohamoha yoowo​—wa woona woopola ntoko yoovaha ya Yehova wa nyuwo mukhatinyu—​onanwerya wookhaviheryaani vancipale. Ela henataphulela wi okhulumuwa onahaala ocakanela mwawaakuveya. Vakina vaya, akina a hiyo anahaala owanano ohiphela woovitheya wu ophiyerya mweelapo yahiihaano. Nyenya muupuwele: Phatamari onahaala okhala a yaale ahinahiya. Hiyaano ninnaacamela nihiku nootikiniha nenlo Omwene wa Muluku onahaalaaya otikitherya murecele ni weeriha wi achu oothene oororomeleya ekhale oophaameya. Khalani oolakelela ovolowa mu Omwene owo​—naamwi mukumanaka ni soohooxa sincipale.

[Eruku va epaaxina 15]

Amiravo ni atokweene Eekiristu anniivyakiha wi yaakihe nroromelo naya (Moone eparakrafo 16)