Ovootha Vamoha Makuchuwelo a Elapo Ela
“Vawi n’ri sam’mwílini mukina ni mukhwawe.”—AEF. 4:25.
MWAHAALA WAAKHULA HAI?
Mathitimanelo taani amiravo anaphwanelaaya osepa, nave ntakhara heeni?
Ntakhara heeni ti woochuneya okhala ‘awúpana phama’ mu wiiwanana?
Munii mooniherye hai wi muri variyari va yaawo ‘mmoha ni mukhwawe analapelana’?
1, 2. Tiheeni Muluku onachuneiye wa alapeli awe, amiravo ni awunnuwela?
NYUWAANO mwa mmiravo? Wakhala wi aai, muroromele wi, ntoko makupa a muloko wa elapo yoothene wa Yehova, nyuwaano munnapwachiwa. Mu ilapo sincipale, ancipale a yaawo anapatisiwa amiravo. Echu yoolipiha owoona amiravo ancipale ephitaanaka ni yaale alakelenle omurumeela Yehova!
2 Ntoko mmiravo, munnapuha okhala vamoha ni amiravo akina? Aai chiryene. Ti yoohakalaliha ovira ilukuluku saphaama ni yaale a iyaakha sahu. Nyenya, moohipwacha naari mmiravo naari awunnuwela ni mikhalelo sahu, Muluku onachuna wi nikhale awiiwanana mu omulapela. Murummwa Paulo aarepa wi yoochuna ya Muluku ori wi “atchu othene evuluwe, wi ephiye voróra eparipari.” (1 Tim. 2:3, 4) Mu Yawupulula 7:9, annalociwa alapeli a Muluku “órwela mwa maloko othene, ni mahimo ni atchu ni ilochelo.”
3, 4. (a) Munepa taani ori wawunlaana variyari va amiravo ancipale amutano? (b) Moonelo taani oniiwanana ni Aefeso 4:25?
3 Wookhalavo ohiyana otokweene variyari va amiravo anamurumeela Yehova ni amiravo a elapo yeela! Ancipale a yaawo ahinamurumeela Yehova anahooleliwa ni okumi onateteiwa ni yaawo mukhataaya, yuukhuwaka pahiru ni yeeyo anachunaaya. Sootholathola ikina inawiichana ntoko “Achu a Iyaakha Saka.” Moorweela wa malocelo ni mawarelo aya, annooniherya waanyemula achu awunnuwela, yaawo anawoonaaya ntoko “oovireliwa.”
4 Munepa yoowo onnanrukurerya. Mwawiihiiha, amiravo ari alapeli a Yehova annoona wi onachuneya wiilipixerya osepa ni weemererya moonelo wa Muluku. Mu nsana noopacerya, Paulo aahoona tho okhala woochuneya waalopola asinthamwene awe a nroromelo osepa “munepa yowo onerano [onalamulela] hihano mwa anamwane óhiwelela” ni mummo ‘yenchayamo khalai.’ (Mwaalakhanye Aefeso 2:1-3.) Amiravo yaawo anasuwela ochuneya waya osepa munepa yoowo ni okhala awiiwanana ni anna aya annaphwanela othamaleliwa. Moonelo yoowo onniiwanana ni masu a Paulo wi “n’ri sam’mwílini mukina ni mukhwawe.” (Aef. 4:25) Vaavaa nnaacamelaahu omakuchuwelo wa elapo ela, ti woochuneyaxa okhala awiiwanana. Hankooni nthokororye sootakiherya sa Mpiipiliyani inahaala onikhaviherya osuwela ochuneya waya okhala awiiwanana.
VAYA YAARI AWIIWANANA
5, 6. Wiiwanana wa Looti ni anamwane awe enanihusiha eheeni?
5 Khalai, Yehova annasiveliwa owaakiha achu awe vaavaa mwa wiiwanana yaakhaviheryanaaya mu ilukuluku sookacamiha. Alapeli a Muluku amutano, moohipwacha amiravo naari awunnuwela ananwerya ohuserya echu orweela wa sootakiherya sa Mpiipiliyani. Yootakiherya emoha ti ya Looti.
6 Looti emusi awe yaari mmukhalelo wawoopiha ntakhara Sotoma, epooma yeeyo yaakhalaayawo yaahaala otoloxiwa. Ankeelo a Muluku yaamulamulela Looti ochawa wi aphwanye naakiho omwaako, eriki: “Otxhawe! Ovuluse ekumi à!” (Map. 19:12-22, BNM) Looti aahiiwelela, nave anamwane awe apiili aasithiyana yaakhala ni yoowo ekhumaka mu epooma ele. Moothananiha, asuweli aya akina hiyenreno. Wa amiravo yaawo yachuna waathela anamwane a Looti, yaamoona mulopwana ole ntoko “òpa mwaha.” Eyo yaahaayeleeliha ikumi saya. (Map. 19:14, BNM) Pahiru Looti ni anamwane awe aasithiyana, yaawo yaari awiiwanana ni yoowo, yaavuluwa.
7. Yehova aakhavihenrye hai yaale yoonihenrye munepa wa wiiwanana vaavaa Aisarayeli yaakhummaaya o Yiikuputu?
7 Muthokororye yootakiherya ekina. Vaavaa Aisarayeli yaakhummaaya o Yiikuputu, hiyenreno yeeyo ntoko makhuuru ookawanyeya, nikhuuru ti nikhuuru ncharaka mphiro aya. Nave vaavaa Moose aatheten’yeiye “n’wono vasulu va ephareya” nave Yehova akawanya eniya, Moose haalapunwe meekheiye naari ni Aisarayeli vakhaani. Ohiya yeeyo, ni naakiho na Yehova, nloko noothene naalapuwa. (Muk. 14:21, 22, 29, 30, BNM) Awo yaahooniherya munepa wa wiiwanana, nave yaari ni “atxhu antxipale,” ophitaanyerya yaahiri Aisarayeli. (Muk. 12:38, BNM) Hori wooweryeya waanyiherya wi achu vakhaani, akhweya nikhuuru na amiravo, yaapheruwa, echaraka ephiro yoonaaya okhala yaphaama. Weerano yeeyo hiyaahaala okhala ya miruku nave yaahaala oyeleela waakiha wa Yehova.—1 Akor. 10:1.
8. Mmahiku a Yosafati, ti mwawiihai achu a Muluku yoonihenryaaya wiiwanana?
8 Mmahiku a Mwene Yosafati, achu a Muluku yaakumana ni mwiicani akuru, “akhotxo antxipalesa” a ilapo soorukurerya. (2 Math. 20:1, 2, BNM) Moothamaleleya, alapeli a Muluku hiyeerenrye omvootha mwiicani ni ikuru saya. Ohiya yeeyo, yaachimakela wa Yehova. (Mwaalakhanye 2 Matharihelo 20:3, 4.) Nave hiyenreno mookawanyeya, muchu ti muchu eerakano ntoko onuupuweleiye naari onachuneiye. Yaweereya ya Piipiliya ennanleela: “Atxhu othene o Yudeya yàri òvekela vamithoni v’Apwiya, vamoha ni asàraya ni anàya akhani.” (2 Math. 20:13, BNM) Amiravo ni awunnuwela yaari awiiwanana mu nroromelo wi echarihe ohoolela wa Yehova, nave Yehova aawaakiha ntakhara mwiicani aya. (2 Math. 20:20-27) Ela yootakiherya yaphaama ya mukhalelo wa ovootha makacamiho ntoko achu a Muluku.
9. Tiheeni nnahuseryaahu orweela wa wiiwanana mmasu ni mmuupuwelo wa Akiristu oopacerya?
9 Akiristu oopacerya yaasuweliwa ni wiiwanana waya. Ntoko yootakiherya, vaavaa Ayuuta ancipale ni aheleni yaakhanlaaya Akiristu, awo yaahiikhalelaru “múhusiha wa arummwa ni mwiyátáno, mu winna epau ni mavekelo.” (Saw. 2:42) Wiiwanana yoowo waari wawooneyaxa variyari va wiikariwa, vaavaa yaachunaaya nikhaviheryo na mukina ni mukhwaawe. (Saw. 4:23, 24) Nyuwaano hamuneemererya wi variyari va ilukuluku sookacamiha, ti woochuneya okhala awiiwanana?
WIIWANANA VAAVAA NIHIKU NA YEHOVA NNAACAMELAAYA
10. Ti liini wiiwanana onahaalaaya okhala woochuneyaxa?
10 Elukuluku ya epiiphi etokweene ennaacamela. Mulipa a miririmu Yoweli onaromola ntoko “nihiku n’epiphi, noripa ni na meku.” (Yow. 2:1, 2, BNM; Sof. 1:14) Wa achu a Muluku, eyo enahaala okhala elukuluku onachuneya wiiwanana. Muupuwele masu a Yesu: “Omwene wokawaneya va mekhaya onakhala milepe.”—Mat. 12:25.
11. Olikana taani onaphwanyeya mu Salmo 122:3, 4 onawerya ophariheleya wa achu a Muluku amutano? (Moone eruku yoopacerya.)
11 Variyari va elukuluku enoorwa ya makacamiho a mukhalelo ola, nnahaala ochuna okhala awiiwanana chiryene. Wiiwanana woomunepani yoowo nnahaalaahu ochuna okhalano variyari, vahu onanwerya olikanyihiwa ni waacamana wa ipa mu Yerusalemu akhalai. Ipa ihe saatekiwe vakhiviru khiviru ophiyerya wi namarepa a salmo aamuromola Yerusalemu ntoko “muchetche wawúpana phama.” Ela yaanaweeriha anamakhala okhaviheryana ni waakihana mukina ni mukhwaawe. Nyenya, waacamana waya waanooniherya wiiwanana woomunepani wa nloko noothene vaavaa “mahimo a Yehova” yaathukumanaaya wi epake malapelo. (Mwaalakhanye Salmo 122:3, 4.) Moolikana, olelo ni mmahiku ookacamiha anarwa, ti woochuneya wiikhalelaru ‘awúpana phama.’
12. Tiheeni enahaala onikhaviherya ovuluwa ohipheliwa onoorwa wa achu a Muluku?
12 Ntakhara heeni ‘wúpana phama’ onahaala okhala woochuneya mu elukuluku yeeyo? Esekiyeli ekapitulu 38, (BNM) onnaloca yooloherya ya “Gogi . . . a mukuma wo Magogi” waahiphela achu a Muluku. Eyo heni ekhale elukuluku ya weemererya wi echu vyakala enimwalanye. Hinni nichune oveka nikhaviheryo na elapo. Ohiya yeeyo, nnahaala ochuna okhala awiiwanana ni annihu. Nyenya, hanivuluwa pahiru nthowa na opaka nikupa na nikhuuru. Yehova ni Mwaana awe anahaala waavuluxa yaale aniichana nsina na Yehova mweelukuluku yeeyo yookacamiha. (Yow. 2:32; Mat. 28:20) Apwanne ti woophwanelela wuupuwela wi yaale yaahiikhalenleru awiiwanana ntoko muhuwo wa Muluku—yaale yaapheruwenle iphiro saya—anahaala ovuluxiwa?—Mik. 2:12.
13. Echu taani amiravo oomoova Muluku anaweryaaya ohuserya orweela wa yeeyo nimanlaahu othokororya?
13 Ti yawooneya wi, tahi ya miruku ochariha meecelo a amiravo yaawo aniivala mmukhalelo wawaya ene. Ninnaacamela elukuluku yeeyo nnahaalaahu ochuna chiryene nikhaviheryo na mukina ni mukhwaawe. Nave eyo enataphulela oothene hiyo, amiravo ni awunnuwela! Aai, vano elukuluku ya ohuserya olapa vamoha, ni wiiwanana yoowo onahaala okhala woochuneya mmahiku a muhoolo.
“SAM’MWÍLINI MUKINA NI MUKHWAWE”
14, 15. (a) Teevi eri yoolakelela ya Yehova vaavaa onaavyakiheiye amiravo ni awunnuwela olelo? (b) Ekano taani Yehova onavaheiye wi anikhaviherye okhala awiiwanana?
14 Yehova onnanikhaviherya ‘omutxitximiha ni murima mmoha.’ (Sof. 3:8, 9, BNM) Owo onnanivyakiha wi niiwanane ni yoolakelela awe yoohimala. Eyo enaphitaanyerya eheeni? Yehova oolakelela wi “athukumanye vamoha sothe sene mwa Kristu.” (Mwaalakhanye Aefeso 1:9, 10.) Aai, owo onachuna othukumanya soopatuxiwa soothene seekhaikhai, nave onahaala okhumelela phaama mu weerano yeeyo. Apwanne ela ennookhaviheryaani ntoko mmiravo woona ochuneya waya olapa mwawiiwanana ni marehereryo a Yehova?
15 Yehova onnanihusiha okhala awiiwanana hiihaano, achunaka wi nikhale awiiwanana okhala wookhala. Wiiliwiili, Soorempwa sinnanleela ‘othokororyana mukina ni mukhwawe,’ ‘osivelana ni osivela weparipari,’ ‘omalihana,’ ni ‘otchukelana mukina ni mukhwawe.’ (1 Akor. 12:25; Arom. 12:10; 1 Ates. 4:17; 5:11) Yehova oosuwela wi Akiristu toohiphaameya, nave ela enanwerya okacamiha okhala awiiwanana, mwawiihiiha ninnachuna wiilipiherya okhala “ólevana.”—Aef. 4:32.
16, 17. (a) Teevi eri yoolakelela emoha ya mithukumano Seekiristu? (b) Tiheeni amiravo anaweryaaya ohuserya orweela wa yootakiherya ya Yesu ntoko mmiravo?
16 Yehova tho onnanivaha mithukumano Seekiristu wi anikhaviherye ohuserya okhala awiiwanana. Ikwaha sincipale nohaalakhanya yooceenyerya enaphwanyeya mu Ahebri 10:24, 25. Yoolakelela emoha ya mithukumano seiya ori wi “nákuvihaneke o masivelelo ni o mitekoni yaphama.” Ti wootikhiniha wi, mithukumano sinnareheryiwa wi “nchenyeryane, nave mopwahasha [nnoonaahu] nihiku nrikimwachamela.”
17 Ntoko mmiravo, Yesu ootikitherya yootakiherya yaphaama ya othamalela marehereryo yaala. Vaavaa aareiyeno iyaakha 12 sa oyariwa, aakhala ni asitiithi awe va muthukumano mutokweene woomunepani. Ekwaha emoha, owo aarimeela ohiya nthowa nawi aari ni amiravo akina. Ohiya yeeyo, Yoosefe ni Mariya yaamphwanya ari va muthukumano woomunepani ni ahusiha mu empa ya Muluku.—Luka 2:45-47.
18. Mavekelo ahu anakhaviherya hai wiiwanana?
18 Ophitaanyerya wunnuwiha osivela wa mukina ni mukhwaawe, opharihela mithukumano Seekiristu ni waaceererya wiiwanana, nnanwerya ovekelelana mukina ni mukhwaawe. Ninnuupuxeryiwa wuukhuwa ntakhara akina, moorweela wa okhala ooluluwanya mu omveka wahu Yehova wi aakhaviherye annihu. Hisaavo ichu inaphwanela weeriwano pahiru ni Akiristu awunnuwela. Nyuwaano mwaari mmiravo, munnapharihela marehereryo yaala wi mwaaceererye waataana wanyu ni emusi anyu yoomunepani? Weerano yeeyo enahaala wookhaviheryaani ohikhala oovelavela vaavaa elapo ela yakhalai eneeraaya eraceeliwe.
WOONIHERYA WI “MMOHA NI MUKHWAWE NINNALAPELANA”
19-21. (a) Mmukhalelo taani nnooniheryaahu wi “mmoha ni mukhwawe ninnalapelana”? Mvahe sootakiherya. (b) Tiheeni munahuseryaanyu orweela wa mukhalelo anna akina yaakhulenlaaya ipahu?
19 Achu a Yehova annakhala mwawiiwanana ni nlakiheryo nnaphwanyeya mu Aroma 12:5, (BNM): “Mmoha ni mukhwawe ninnalapelana.” Ninnawerya woona yeela vaavaa inakhumelelaaya ipahu. Mu Tesempro a 2011, epula etokweene yaatannya osareya wa maahi o Filipina evilivili ya Mintanau. Opwaha ipa 40.000 saamiryiwa ni maahi, ophitaanyerya ipa sa annihu. Nave efiliyale yoolokoha wi “naamwi nikhuuru nookhaviherya nihaakumve ophiya, anna Eekiristu a makupa makina yaanavaha nikhaviheryo.”
20 Moolikana, vaavaa mwaacikinye ni tsunami aaphacunweiye o Xapau oomoko, anna ni arokora ancipale yaayeleela ichu sincipale. Akina hiyaahanleno echu. Yoshiko, yoowo aayeleenle empa awe, aakhala ikilomeeturu 40 orakamela Empa ya Omwene. Ola onnaloca: “Ohoolo waya, naatikhina osuwela wi nivinre nihiku nimoha amanle mwaacikinye, ooweherya aweeceeca ni munna mukina yaarwa enaavyaka.” Ni otheya otokweene, onnaaceererya: “Hiyaano chiryene ninnathamalela okhapeleliwa soothowa sahu soomunepani moorweela wa muloko. Mwawaacererya naahaakhela soowara, isapatho, ni mirupa.” Munna mmoha a nikhuuru nookhaviherya onnaloca: “Anna a makupa oohiyana a Xapau yaalapa ntoko muchu mmoha, yiilipixeryaka okhaviheryana. Anna yaarwa tho mmapuro oohiyana a Estados Unidos wi ekhaviherye. Vaavaa yaakohiwaaya ntakhara heeni yaapaka mukwaha woorakama, yaahaakhula, ‘Hiyo nri awiiwanana ni annihu a Xapau, nave awo annachuna nikhaviheryo.’” Nyuwaano hamunahakalala opaka makupa a marehereryo yaawo anaathokororya achu aya? Musuwele wi Yehova onnahakalala woona munepa yoola wawiiwanana.
21 Okhalano munepa yoowo hiihaano enahaala onikhaviherya ovootha sookacamiha sa omwaahiyu mwawiiwanana naamwi nrakamelanne ni annihu a makupa makina a elapo. Mweeparipari, munepa yoowo onnanivyakiha wa makacamiho nnahaalaahu okumanano vaavaa mukhalelo ola wakhalai oneeraaya ophiye omakuchuwelo. Fumiko, yoowo aahooxen’ye ni echeku etokweene o Xapau, onnaloca: “Makuchuwelo ari vakhiviru. Onachuneya otitelela waakhaviherya asinthamwene ahu a nroromelo vaavaa nnaweheryaahu elukuluku yeeyo eneeraaya ehikhalevo ipahu.”
22. Mphurelo taani woohimala onahaala orweela wa wiiwanana Weekiristu?
22 Amiravo ni awunnuwela yaawo hiihaano anahuserya wiiwanana anniireherya wi evuluwe omakuchuwelo wa elapo ela yoonanara, ni yoohiiwanana. Ntoko khalai, Muluku ahu onahaala waavuluxa achu awe. (Yes. 52:9, 10) Mukhaleno mmuupuweloni wi nyuwaano munanwerya okhala variyari va achu oovuluxiwa wakhala wi muhiilipixerya okhala makupa a achu awiiwanana a Muluku. Echu ekina enahaala onikhaviherya ori wunnuwiha othamalela yeeyo naakhenlaahu. Ela enahaala othokororyiwa mmwaha onacharela.
[Eruku va epaaxina 21]
Oothene hiyo nnanwerya ovekela ntakhara annihu (Moone eparakrafo 18)