Nyuwaano Munnathamalela Yeeyo Mwaakhenlaanyu?
“Hanákhenle hiyo munepa welapo ya vathi, nyenya munepa wa wa Muluku, wi nsuwele hiyo n’navahiwa ti Muluku siyo ene.”—1 AKOR. 2:12.
MWAHAALA WAAKHULA HAI?
Tiheeni amiravo ni oothene hiyo nnaphwanelaahu othamalela?
Sootakiherya taani saphaama sa yaale yaathamalenle muyareriwo aya woomunepani?
Munoona hai vooloca sa yeeyo mwaakhenlaanyu?
1. Moonelo taani wawunlaana onalociwa?
ACHU ancipale anniiwa masu ala: ‘Ti woovila othamalela echu muchu oreiyeno ophiyerya ayelenle.’ Montoko woona mmukhalelo yoola? Vaavaa muchu onakhaleiyeno ichu sa muyareriwo, ti wookhweya ohithamalela. Ntoko yootakiherya, muchu yoowo unnunwe mu echoko yooreela onanwerya woona okhala sookhweya ichu seiyo oreiyeno. Ela enneereya ni amiravo yaawo nthowa na ohikhalano masuwelelo hanawerya osuwela ichu soochuneya chiryene.
2, 3. (a) Amiravo Eekiristu anaphwanela okhalano ephoole taani? (b) Tiheeni enahaala onikhaviherya othamalela yeeyo nryaahuno?
2 Waakhanle wi nyuwaano mwa mmiravo, tiheeni eri yoochuneya wa nyuwaano? Wa ancipale, okumi onateteiwa ni ichu soomwiilini—ikhorowa sawaaca, empa yaphaama, naari ikhankoonya samutano. Nyenya wakhala wi hiyaano ninnuukhuwa pahiru ni seiya, ennahala echu ekina yoochuneyaxa—muhakhu woomunepani. Moohiciha, macikhwi macikhweene nlelo hapacenrye waavya muhakhu yoola. Amiravo nyu mphuiwe ni asitiithi Eekiristu munaphwanela okhalano ephoole wi muhiyeleele othamalela esisapo ya yeeyo mwaakhenlaanyu ntoko muyareriwo woomunepani. (Mat. 5:3) Oyeleela othamalela enahaala oruuha sookhumelela seiyo inahaala ovolowela okumi anyu woothene.
3 Nyenya, munanwerya osepa wi eyo eheereye. Tiheeni enahaala wookhaviheryaani othamalela muyareriwo anyu woomunepani? Hankooni nthokororye sootakiherya sa Mpiipiliyani seiyo inahaala onikhaviherya woona ntakhara heeni ti wa miruku ocicimiha muyareriwo ahu woomunepani. Sootakiherya nnahaalaahu othokororya inahaala waakhaviherya ohiya pahiru amiravo nyenya tho Akiristu oothene othamalela muhakhu aya woomunepani.
VAYA YAAYELEELA OTHAMALELA
4. 1 Samuwele 8:1-5 onooniherya eheeni vooloca sa anamwane a Samuwele?
4 Ninnaphwanya saweereya sa Mpiipiliyani sa achu yaawo yaakhenle muyareriwo woomunepani nave eyeleela othamalela. Eyo yaaheereya ni emusi ya mulipa a miririmu, Samuwele, yoowo aamurumeenle Yehova opacerya woonamwane nave aakhalano meecelo aphaama vamiithoni va Muluku. (1 Sam. 12:1-5) Samuwele aatikitherya yootakiherya wa anaawe, Yoweli ni Apiya, yeeyo yaaphwanelaaya otakiherya. Nyenya vaya hiyaathamalenle, nave yaakhala oonanara. Yaweereya ya Mpiipiliyani ennanleela wi moohiyana ni tiithi aya, awo “yannanariha mukhalelo wawokololowa.”—Mwaalakhanye 1 Samuwele 8:1-5, BNM.
5, 6. Tiheeni yeeren’ye ni anamwane a Yosiya ni musulwa awe?
5 Eyo yaaheereya tho ni anamwane a Mwene Yosiya. Yosiya aavaha yootakiherya yaphaama ya omulapela Yehova. Vaavaa liivuru a Malamulo a Muluku aaphwanyiweiye ni aalakhanyiwa wa Yosiya, owo aahiilipixerya opharihela malamulo a Yehova. Aahiilipixerya omaliha mathamalelo a soophwaniherya ni onamulosiwe mweelaponi, nave aahaaceenyerya achu omwiiwelela Yehova. (2 Mam. 22:8; 23:2, 3, 12-15, 24, 25) Anamwane awe yaahaakhela muhakhu wawaaca woomunepani! Anamwane awe araru ni musulwa awe mmoha moovira wa elukuluku yaakhala mamwene, nave haavo oonihenrye othamalela yeeyo yaakhenlaaya.
6 Yohakasi, mwaana a Yosiya, aamuraceela ntoko mwene, nyenya owo “hetxenle phama okhwela wa Apwiya.” Aalamulenle pahiru miyeeri miraru nave Farawo a Yiikuputu amphara, nave Yohakasi aakhwa mu kariposo. (2 Mam. 23:31-34, BNM) Mukhwaawe Yowakimi aalamulela iyaakha 11. Owo tho aayeleela othamalela yeeyo aakhenleiye wa tiithi awe. Nthowa na meecelo oonanara a Yowakimi, Yeremiya aaloherya sa yoowo: “Onaya ovithiwa ntoko enama.” (Yer. 22:17-19, BNM) Araceeli akina a Yosiya—mwanawe Setekiya ni musulwa awe Yoyakini—yaari oonanara; hiyaathanlile ochara meecelo awookololowa a Yosiya.—2 Mam. 24:8, 9, 18, 19.
7, 8. (a) Mmukhalelo taani Soolomoni ayeenheiye muyareriwo awe woomunepani? (b) Tiheeni nnaweryaahu ohuserya orweela wa sootakiherya sa Piipiliya sa achu yaawo yaayeehale muyareriwo aya woomunepani?
7 Soolomoni aari mwene yoowo aakhenle sincipale wa tiithi awe, Tavite. Moorweela wa Soolomoni waapakeya muyareriwo yoowo waapacenrye phaama, ohoolo waya aayeleela othamalela mphiro waphaama. “Asariye awo yamutxuwaliha Muluku èparipari nave, uluvanleiye, àwepesa amuluku àsariye yawo. Wàhiya athiyana Salomoni murima awe hiwaroromela Apwiya Muluku awe.”(1 Mam. 11:4, BNM) Wookuchulani, Soolomoni aayeleela weemereryiwa ni Yehova.
8 Ti woothananiha woona wi alopwana yaala yaakhele muyareriwo ni ekari ya weera yaphaama hiyaaciciminhe! Naamwi hiiha, tahi wi amiravo oothene mmahiku a Piipiliya yaarino meecelo oolikana, hiiha ntoko olelo. Hankooni nthokororye sootakiherya saphaama sa amiravo seiyo inaphwanela otakiheryiwa ni amiravo Eekiristu amutano.
VAYA YAATHAMALELA YEEYO YAAKHENLAAYA
9. Anamwane a Noowa avanhe hai yootakiherya yaphaama? (Moone eruku yoopacerya.)
9 Ninnaphwanya yootakiherya yaphaama mu anamwane a Noowa. Tiithi aya aahaakhela nlamulo na omuteka mwaaceya wi avolowe ni emusi awe. Anamwane a Noowa yaanathamalela okhweleya waya weerano yoochuna ya Yehova. Awo yaaniwanana ni tiithi aya. Vakina vaya, yaanamukhaviherya tiithi aya omuteka mwaaceya, nave ohoolo waya yaavolowa. (Map. 7:1, 7) Yaarino yoolakelela taani? Maphatxuwelo 7:3, (BNM), onnaloca wi awo yaahaakuxa axinama waavoliiha mmwaaceyani ‘wi ekhapelele muloko aya vathiva.’ Achu tho yaavuluxiwa. Nthowa na anamwane a Noowa othamalela yeeyo yaakhenlaaya orweela wa tiithi aya, awo yaakhalano ekari ya okhaviherya okhapelela nloko na achu ni otikitherya malapelo eeparipari mweelapo yaweelihiwa.—Map. 8:20; 9:18, 19.
10. Amiravo axexe Aheepiri yoonihenrye hai othamalela iparipari seiyo yaahusenryaaya?
10 Iyaakha masaneene ohoolo waya, amiravo axexe Ahepri yaahooniherya wi yaasuwela yeeyo yaari yoochuneya chiryene. Hananiya, Misayeli, Asariya, ni Taniyeli yaakerihiwa o Paapulu mu 617 E.E.K. Awo yaari amiravo oophwaneliwa, oovyaka yaawo mookhweya yaahaala ovolowela mukhalelo wa okumi wa Paapulu. Nyenya awo hiyenreno. Ennooneya orweela wa saweera saya wi yaanuupuwelela muyareriwo aya, yeeyo yaahusihiwaaya. Oothene aya yaareelihiwa nthowa na okhapelela soohuserya soomunepani seiyo yaahusenryaaya eri anamwane.—Mwaalakhanye Taniyeli 1:8, 11-15, 20.
11. Akina yaaphunre hai muyareriwo woomunepani wa Yesu?
11 Othokororya wahu sootakiherya saphaama hiwaahaala waakhwanela ehirivo yootakiherya ya Yesu, Mwaana a Muluku. Owo aahaakhela sincipale orweela wa Tiithi awe, nave aanathamalela chiryene. Othamalela wawe yeeyo aahusihiweiye onnooneya mmasu awe: “Ntoko ákihusihenryeiye Atithi, kinuluma iha.” (Yoh. 8:28) Nave aanachuna wi akina ephure yeeyo aakhenleiye: “Onnakiphwanela Miyo kilaleyerye Mitchaka Yaphama ya Omwene wa Muluku witchokoni sikina’tho: ntakhara kárummwa wera hihá.” (Luka 4:18, 43) Aahaakhaviherya alipa oowiriyana awe woona ochuneya waya ‘ohikhalano makupa a elapo,’ yeeyo ehinacicimiha ichu soomunepani.—Yoh. 15:19.
MUTHAMALELE YEEYO MWAAKHENLAANYU
12. (a) 2 Timoteo 3:14-17 onaphariheleya hai wa amiravo ancipale amutano? (b) Makoho taani amiravo Eekiristu anaphwanelaaya othokororya?
12 Ntoko alopwana yaawo naathokoronryaahu, nyuwaano tho akhweya munnunwe ni asitiithi anamurumeela Yehova Muluku. Wakhala wi ti hiiha, yeeyo Soorempwa inalocaaya sa Timoteo enanwerya wiiwanana phaama ni mukhalelo anyu. (Mwaalakhanye 2 Timoteo 3:14-17.) Moorweela wa asitiithi anyu ‘mosuwela’ vooloca sa Muluku eeparipari ni mukhalelo wa omuhakalaliha. Asitiithi anyu akhweya yaapacenrye woohusihani opacerya woonamwane. Ela chiryene ennookhaviheryaani okhalano “miruku ophiyerya ovulushiwa, mwa nroromelo na mwa Kristu Yesu” ni okhala “óryeheryeya” ntakhara muteko wa Muluku. Nikoho noochuneya ti nla: Nyuwaano munahaala wooniherya othamalela yeeyo mwaakhenlaanyu? Ela enahaala wookhaviheryaani wiisaalikhela. Muthokororye makoho ntoko: ‘Kinoona hai opaka makupa a anamoona ancipale oororomeleya? Kinoona hai okhala variyari va achu vakhaani veelaponi yavathi yaawo asuweliwe ni Muluku? Apwanne kinnathamalela ekari etokweene ya osuwela eparipari?’
13, 14. Yaweeha taani Akiristu akina anakumanaayano, nave ntakhara heeni wuuwela hiyaahaala okhala ya miruku? Mvahe yootakiherya.
13 Amiravo ancipale yaawo aphuiwe ni asitiithi Eekiristu hanawerya woona ohiyana otokweene orivovo variyari va parataiso ahu ahiihaano oomunepani ni epiiphi ya elapo ya Satana. Akina anneererya woona mukhalelo wa okumi wa mweelapo. Apwanne mwaahaala ochimakela ohoolo wa ekaaro yeecaka wi moone waakhanle wi ennaphoreiha—naari enniipha? Moohikhwa minikwa hooye! Moolikana, hori woochuneya hiyaano olawiha meecelo a “marimélelo” mweelapo yeela pahiru wi noone opahula waya.—1 Pet. 4:4.
14 Xena, yoowo onakhala o Asiya, aaphuiwale mu emusi Yeekiristu. Aapatisiwa arino iyaakha 12 sa oyariwa. Ari namwali, aahootothiwa ni mukhalelo wa elapo yeela. Owo onnaloca: “Kaachuna olawiha ‘otaphuwa’ yoowo elapo enavahaaya.” Xena aapacerya okhalano okumi woovaha minikwa. Arino iyaakha 15 sa oyariwa, aavala mukhalelo wa asinthamwene awe oonanara. Aanawurya ni oruwana ntoko asinthamwene awe. Xena aaphiya vaate ohiyu, amanle othata ni axooku a komputatore a nlala ni asinthamwene awe. Nyenya, moovira wa elukuluku, aapacerya woona wi oreera wa elapo ela honavaha ohakalala weeparipari. Nave wi etheru theru. Owo onnaloca sa okookela wawe mmulokoni: “Aakhalavo makacamiho mancipale nlelo onakuukhula, nyenya mareeliho a Yehova annavirelela makacamiho yaawo.”
15. Tiheeni amiravo ahiphuiwale ni asitiithi Eekiristu anaphwanelaaya wuupuwelela?
15 Nave tho aakhalavo amiravo akina ahiphuiwale ni asitiithi Eekiristu anathukumana ni muloko. Wakhala wi nyuwaano mwa mmoha a yaawo, muupuwele ekari etokweene yeeyo munapuhaanyu nthowa na omusuwela ni omurumeela Mpatuxa! Aakhalavo macikhwi a achu veelaponi yavathi. Mwawiihiiha, ekari ntokweene okhala variyari va yaale Yehova aataanneiyeno ni yaawo onawuupululeleiye eparipari ya Piipiliya. (Yoh. 6:44, 45) Variyari va nikhuuru na achu 1.000, pahiru muchu mmoha tarino masuwelelo eeparipari, nave nyuwaano mwa mmoha a yaawo asuwenle eparipari. Apwanne ela hiyaaphwanela onivaha ohakalala, moohipwacha mukhalelo nihusenryaahu eparipari? (Mwaalakhanye 1 Akorinto 2:12.) Xena onnaloca: “Kinnatepa ohakalala vaavaa kinuupuwelaaka vooloca sa yeeyo, taani miyaano wi kisuweliwe ni Yehova, Mwaneene a elapo?” (Sal. 8:4) Murokora mmoha Eekiristu a elapo emohamoha aaloca: “Anamahuserya annatepa ohakalala nthowa na osuweliwa ni muhusiha aya. Ekari taani etokweene osuweliwa ni Yehova, Muhusiha Mutokotoko!”
TIHEENI MUNAHAALAANYU WEERA?
16. Teevi eri yoothanla yaphaama wa amiravo Eekiristu olelo?
16 Muupuwelele ekari yootikhiniha muryaanyuno, eyo enaphwanela oweerihaani okhala oolakelela okhala variyari va avakhaani yaawo anapharihela phaama okumi aya. Mwawiihiiha, munamukhala vamoha ni alapeli oororomeleya a Muluku. Eyo ti ya miruku opwaha waachariha amiravo ancipale yaawo, ntoko mu ikhove, aneeca vamoha ni elapo ela enaya wootoloxiwani.—2 Akor. 4:3, 4.
17-19. Tiheeni enahaala wookhaviheryaani okhalano moonelo woophimelela vooloca sa okhala oohiyana ni elapo?
17 Henataphulela wi okhala oohiyana onahaala okhala wookhweya. Wakhala wi munnupuwela vooloca sa yeeyo, okhala oohiyana enahaala wooniherya miruku. Wi nlikanyihe: Muupuwele sa mulipa oochimaka. Owo hanakhwa minikwa wi onaphwanela okhala oohiyana wi aphiye omakuchuwelo. Owo onaphwanela wiihiiha ichu seiyo saahaala omaliha elukuluku ni owetha wawe, alakelelaka elukuluku ya wiivyakiha. Mmakupa makina, olakelela wawe okhala oohiyana ni asinthamwene awe yaahaala omweeriha wiivyakiha vancipale ni ophwanya yoochuna awe.
18 Moonelo wa elapo vooloca sa okumi ti wookotakota. Wakhala wi mookhalano moonelo wa omwaahiyu, mukhalaka oohiyana ni elapo nave musepaka miteko soonanariha mmeecelo ni omunepani, nyuwaano munahaala okhalano “okumi-kumi owo.” (1 Tim. 6:19) Murokora oromoliwe onnaloca: “Wakhala wi nyuwaano munniikhalelaru mu yeeyo munaroromelaanyu, munahaala okhala oohakalala omakuchuwelo wa nihiku. Eyo enahaala wooniherya wi mookhalano ikuru wi mvoothe okuchuwa wa elapo ya Satana. Opwaha ichu soothene, eyo eri ntoko omoona Yehova Muluku ahakalalaka ni atheyaka ntakhara nyuwaano! Ela eneereya vaavaa munoonaanyu okhala yaphaama okhala oohiyana!”
19 Okumi ti watheru wakhala wi muchu onateteiwa pahiru ni yeeyo onaweryeiye okhalano hiihaano. (Ekle. 9:2, 10) Wakhala wi nyuwaano mwa mmiravo nave munnuupuwela mwawiiseela yoolakelela ni olekela wa okumi anyu, apwanne tahi ya miruku osepa weeca “ntokotho amalapo aníséchelaya” ni okhalano okumi orino yootaphulela aya?—Aef. 4:17; Malak. 3:18.
20, 21. Wakhala wi ninnapaka soothanla saphaama, tiheeni nnahaalaahu ophura orweela wa okhala awookololowa, nyenya tiheeni enaweheryiwa wa hiyo?
20 Wakhala wi ninnapaka soothanla saphaama, nnahaala okhalano okumi woohakalaliha hiihaano ni awookololowa wi ‘nákhele elapo ya vathi’—okhalano okumi woohimala. Aakhalavo mareeliho mancipale ootikhiniha iyaathiwe yaawo nihinaweryaahu waanyiherya. (Mat. 5:5; 19:29; 25:34) Nyenya, Muluku hanoona onivaha ichu. Owo onnaveka echu wa hiyo. (Mwaalakhanye 1 Yohane 5:3, 4.) Omurumeela hiihaano moororomeleya ti wa mphurelo woohimala!
21 Chiri ekari etokweene waakhela sincipale orweela wa Muluku! Nookhalano masuwelelo eeparipari a Masu awe ni wiiwexexa phaama eparipari vooloca sa yoowo ni soolakelela sawe. Ninnapuha ekari ya ovaha onamoona wa nsina nawe ni okhala Anamoona awe. Muluku onnanroromeliha wi owo ori ni hiyo. (Sal. 118:7) Hankooni oothene hiyo, moohipwacha amiravo naari awunnuwela, nooniherye othamalela moorweela wa okhala mmukhalelo onooniherya nchuno na omvaha Yehova “nchichimiho mahiku othene.”—Arom. 11:33-36; Sal. 33:12.
[Eruku va epaaxina 26]
Munoona hai opaka makupa a anamoona ancipale oororomeleya? (Moone iparakrafo 9, 10, 12)