Kuajli xtekitilti motiempo

Kachtopa: Kuajli xkita tlenon tikchiuas

Xkita tlenon kachtopa noneki tikchiuas. Biblia techijlia matikitakan tlenon más ueyi kijtosneki (Filipenses 1:10). Xkijkuilo nochi tlen noneki tikchiuas, niman xkinxexelo ika tlen más ueyi kijtosneki, tlen xnimantsin noneki tikchiuas niman tlen kachtopa noneki tikchiuas. San ika, xkilnamiki ika onka tlen más ueyi kijtosneki, ken tikonkouas tlen tijkuas, maski xnimantsin noneki tikchiuas. Niman onka tlen nimantsin noneki tikchiuas, ken tikitas kenon peua tlen más tikuelita ipan televisión, maski xueyi kijtosneki.a

Xkita tlenon más uelis tikchiuas. Eclesiastés 10:10 kijtoua: “Tla sen hacha xok tlateki niman xkitentiaj, noneki más chikauak kitlajkalij para tlatsonteki. Más kuajli tla itlaj tikchiuas kuajli niman ikan tlamatkilistli”. Ijkon ken noneki tiktentis hacha achto tijkuis, noijki noneki kuajli tikitaskej tlenon tikchiuaskej niman ijkon kuajli tiktekitiltiskej totiempo. Niman tla itlaj nimantsin otitlan, xkita tlenon más uelis tikchiuas tlen tikchiuaskia sakin. Tla ijkon tikchiua, mopan panos ken on tlakatl akin kitentia ihacha achto peuas tekitis, miyek tlen uelis tikchiuas.

Xchiua tlen yemelak noneki. Maka xseli miyek tekitl nion maka xchiua tlen xmás ueyi kijtosneki niman tlen san mitskixtilia motiempo. Tla tikpiya miyek tekitl, kichiuas xajmankamiki niman xtiyolpakis.

Ika ome: Maka xchiua tlen mitskuilia motiempo

Maka xkaua itlaj para okse tonajli nion maka xometlamati. Eclesiastés 11:4 kijtoua: “Yejuan kimojkaita on ajakatl, xkisa ontôka, niman yejuan kimojkaita on moxtli, xkisa onpixka”. Se akin kichia tokas ijkuak nochi kuajli onias, san kipoloua tiempo niman nion xtokas nion xtlaj kipixkas. Noijki ijkon, tla xtikmatij tlenon tikchiuaskej, xkeman tikchiuaskej tlen noneki. Noso kanaj kemantika tiknekij tikmatiskej nochi para itlaj tikchiuaskej. Yemelak ika onka seki tlemach tlen noneki kuajli matiknemilikan. Proverbios 14:15 kijtoua ika se tlakatl tlamachilise kuajli kinemilia achto itlaj kichiuas. San ika, kemantika xnochi uelis tikmatiskej (Eclesiastés 11:6).

Maka xnemili ika nochipa nochi kuajli kisas. Santiago 3:17 kijtoua ika tlamachilistli tlen ualeua itech toTajtsin teasikamati. Melak kuajli ijkuak se kineki nochi kuajli kichiuas, san ika, tla nochipa tiknekij nochi kuajli makisa, uelis toyolkokoskej. Ken akin nomachtijtika se tlajtojli, noneki kasikamatis ika maski nopopolos, yejon kipaleuis. San ika, akin nochi kineki kuajli kichiuas xkineki nopopolos niman xuelis yejon tlajtojli. Melak kuajli tla san tikchiuaj tlen tiuelij. Ijkon kijtoua Proverbios 11:2, ika akin kasikamatij ika xnochi uelij kichiuaj, yejuamej akin tlamachilisejkej. Yejuamej xnimantsin noyolkokouaj niman kemantika hasta kinuetskitia ijkuak nopopolouaj.

Ika yeyi: Xkita kech uelis tikchiuas niman tlen uelis tikchiuas

Xkita kech titekiti niman kech tiempo timoyolpaktia. “Más kuajli titekitis ken kitokaroua niman tikpiyas achitsin neseuijli, xken sanoyej tichikajkatekitis niman tikpiyas miyek, pero xtikpiyas neseuijli” (Eclesiastés 4:6). Akin melak kuelita tekitis, miyek tiempo tekiti niman xok noyolpaktia ika tlen kitlani, san ika, akin tlatsijki kuelita nochipa kipolos tiempo niman san noseuijtos. Biblia techijlia ika matitekitkej, san ika, noijki techijlia ika matiyolpakikan ika tlen tiktlanij (Eclesiastés 5:19).

Kuajli xkochi. Se akin okijkuilo Biblia okijto: “Nejua noyolika ninoteka niman kuajli nikochtiu” (Salmo 4:8). Miyekej akin iuejueyimej noneki kochiskej ocho horas niman ijkon kuajli noseuiskej niman oksejpa kuajli kojtitoskej. Melak kuajli tiktekitiltijtos motiempo tla kuajli timoseuiya pampa ijkon kuajli titlanemilis, miyek tikilnamikis niman miyek tiuelis. San ika, tla xkuajli tikochi uelis timokokos, timopopolos niman san nochipa tikualantos.

Xchiua tlen kema tiuelis. “Xpiya pakilistli ika on tlen tikpiya, niman maka yej xkoneleuijtia on tlen xtikpiya” (Eclesiastés 6:9). ¿Tlenon techmachtia yejuin? Akin tlamachilise xsan kineki itlaj tlen xuelis kichiuas noso tlen xkeman panos. Ika yejon, xnimantsin kikojtiuetsi tlen kita nion xkinotlaneuiya tomintsin. San tlanemilia itech tlen uelis kipiyas noso tlen uelis kichiuas.

Ika naui: Xmoyekana ika tlen kuajli

Xkita ika tlenon timoyekanas. Tlen ika toyekanaj techpaleuiya matikitakan tlenon más ueyi kijtosneki. Tla tonemilis yeskia ken se flecha, ken toyekanaj yeskia ken yejon arco tlen kipaleuiya. Tlen ika toyekanaj techpaleuiya matikitakan tlenon tikchiuaskej ipan tonemilis niman kuajli matiktekitiltikan totiempo. ¿Niman kanon uelis tiknextiskej tlen ika toyekanaskej? Miyekej kitejtemouaj ipan Biblia, pampa kasikamatij ika san ompa kinextiskej tlen melak kinpaleuis (Proverbios 2:6, 7).

Nochipa xteititi ika titetlasojtla. Colosenses 3:14 kijtoua: “On tetlajsojtlalistli yejua más kuajli kichiua para melauak notlajsojtlalo”. Tla xtitetlasojtlaj, xtiyolpaktoskej niman xkuajli tomachiliskej, más ipan tofamilia. Akin xijkon tlanemiliaj niman san tlanemilijtokej itech tomintsin noso itlaj okse, xuelis nemiskej ika inyojlo. Ika yejon, Biblia miyekpa kiteneua tetlasojtlalistli niman kijtoua ika melak ueyi kijtosneki (1 Corintios 13:1-3; 1 Juan 4:8).

Xxelo tiempo para más tikixmatis toTajtsin. Se tlakatl akin itoka Geoff kipiaya isiuatsin, ikonetsitsinuan, akin kuajli imiuan nouikaya niman melak kuelitaya tekitis ken paramédico. San ika, ipan itekiyo kitaya kenon miyekej tlajyouiayaj niman mikiyaj, kuakon notlajtoltiaya: “¿Nochipa ijkin tinemiskej?”. Se tonajli okipouj inamatlajkuilol iteixpantijkauan Jehová niman okinexti itlaj tlen melak okiyolpakti.

Geoff okimijli isiuatsin niman ikoneuan tlen yokipoujka niman yejuamej noijki kinekiyaj okseki kimatiskej. Nochimej okinejkej nomachtiskej Biblia niman tlen ouelkej okinpaleui más mayolpakikan niman kuajli makitekitiltikan intiempo. Yejuamej noijki ouelkej ika ajsis tonajli ijkuak xok yakaj tlajyouis (Apocalipsis 21:3, 4).

Tlen ipan onochiuj Goeff techilnamiktia tlen okijto Jesucristo: “Yolpakij akin kimatstokej ika kipiya ika kitejtemoskej tlen ualeua itech toTajtsin, pampa yejuamej intlatki Tekiuajyotl tlen onka iluikak” (Mateo 5:3, Traducción del Nuevo Mundo). ¿Tikuelitaskia tikxelos tiempo niman ijkon más tikixmatis toTajtsin? Kuajli xmatsto ika san yejuin mitspaleuis kuajli xnemi.