San inselti manoteltikan

¿TLENON KIJTOSNEKI?

San moselti timoteltis noijki kijtosneki:

• maka isiujkan tiknekis tikpiyas tlen tikileuiya

• xnimantsin tikchiuas tlen mitsyoltilana

• titlamis motekiyo maski xtikuelita

• kachtopa timajmanas inpampa oksekimej

¿TLEKA MELAK NONEKI?

Kokonej akin uelij san inselti noteltiaj xkichiujtiuetsij tlen kinyoltilana noso tlen melak kuelitaj. San ika, kokonej akin xuelij san inselti noteltiaj kichiua:

• matlauelejkej

• melak manajmanakan

• mapokikan, makintekitiltikan drogas noso matlauanikan

• xkuajli manotlakualtikan

Seki ixtlamatkej yokitakej ika kokonej akin uelij san inselti noteltiaj xsan kauilmatij intomin, xnokalaktiaj ipan tlauejli iuan tekiuajkej noso xmás kualoj ijkuak uejueyiyaj. Yejuin okichiuj ika se tlamachtijketl akin tekiti ipan Universidad de Pensilvania, akin itoka Angela Duckworth, makijto: “Xkeman mitsijtlakos tla san moselti timoteltia”.

¿KENON UELIS TIKINMACHTIS SAN INSELTI MANOTELTIKAN?

Xmomati tikijtos ka niman xchiua ken yotikijto

TLEN BIBLIA TECHMACHTIA: “San xtlanankilikan ‘kemaj’ noso ‘ka’” (Mateo 5:37).

Kemantika, konetsitsintin peuaj notlaueltiaj teixpan niman ijkon kitaskej tla intajuan kipatlaj tlen yokimijlikej. Tla tajtli kichiua tlen kineki ikoneuj, on konetl kita ika ijkuak notlaueltia maski yokijlikej ika ka sakin kijliaj ika kema.

San ika, tla tajtli kijlia ikoneuj ika ka niman xnoyolkuepa, ikoneuj kasikamati ika xnochipa uelis kipiyas tlen kinekis. Tlapajtiketl David Walsh okijkuilo: “Maski xtikneltoskaskej, más pakij akin kasikamatij yejuin. Kuakon, tikimijtlakouaj tokoneuan tla tikimititiaj ika nochipa uelis kipiyaskej tlen yejuamej kinekij”.a

Tla aman tiueli tikijlia mokoneuj ika ka, ijkuak iueyi kipaleuis maka makinseli drogas, maka manoteka iuan akin xixnamik niman maka makiseli okseki tlen uelis kijtlakos.

Xmachti ika nochi tlen kitlapejpenis uelis kipaleuis noso kijtlakos

TLEN BIBLIA TECHMACHTIA: “Tlen kitokas sen tlakatl, sano yejua kipixkas” (Gálatas 6:7).

Mokoneuj noneki kasikamatis ika tlen kichiuas uelis kipaleuis noso kijtlakos, ika yejon, tla xueli san iselti noteltia, xkuajli onkisas. San matikonnemilikan, tla mokoneuj nimantsin peua tlauelmiki ijkuak itlaj xkuelita, xkinpiyas miyekej akin inuan nouikas. San ika, tla yejua ueli kiteltia itlauel noso tlakaki ijkuak itlaj kijliaj, oksekimej kinekiskej iuan nouikaskej. Xkititi mokoneuj ika tla san iselti noteltia kichiuas mayolpaki.

Xmachti tlenon noneki kachtopa kichiuas

TLEN BIBLIA TECHMACHTIA: Kuajli xkitakan “kenijki nenkitlapejpeniskej on tlen más kuajli” (Filipenses 1:10).

Timoteltis san moselti xsan kijtosneki xtikchiuas tlen xkuajli, noijki kijtosneki tikchiuas tlen tejua motekiyo, maski kemantika xtikuelitas. Melak noneki ika mokoneuj maueli makitlapejpeni tlenon noneki kachtopa kichiuas, niman xpaleui ijkon makichiua. Ken ijkuak tikijlia kachtopa makichijchiua itarea niman sakin maski manauiltiti.

Motech mauelikan tlen kuajli

TLEN BIBLIA TECHMACHTIA: “Nejua nemechchiuilia in para nemejuamej no xchiuakan ken nejua yonikchiu” (Juan 13:15).

Mokoneuj kita tlenon tikchiua ijkuak itlaj xtikuelita noso itlaj mitskualania. Ika tlen tikchiua, xkititi ika tla san moselti timoteltia más kuajli tonkisas. Xontlanemili: ijkuak mokoneuj xmitstlakamati, ¿nimantsin tikualani, noso tiueli kualtsin tiknotsa?